„ამბროლაურის მუნიციპალიტეტის ტერიტორიაზე რეგისტრირებული მუდმივად მცხოვრები მოსახლეობის სამედიცინო მომსახურეობის სოციალური პროგრამის დამტკიცების შესახებ“ ამბროლაურის მუნიციპალიტეტის საკრებულოს 2011 წლის 30 ნოემბრის N46 დადგენილებაში ცვლილების შეტანის თაობაზე

ამბროლაურის მუნიციპალიტეტის საკრებულოს

დადგენილება №14

2012 წლის 2 მარტი

ქ. ამბროლაური

„ამბროლაურის მუნიციპალიტეტის ტერიტორიაზე რეგისტრირებული მუდმივად მცხოვრები მოსახლეობის სამედიცინო მომსახურების სოციალური პროგრამის დამტკიცების შესახებ“ ამბროლაურის მუნიციპალიტეტის საკრებულოს 2011 წლის 30 ნოემბრის №46 დადგენილებაში ცვლილების შეტანის თაობაზე

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად ამბროლაურის მუნიციპალიტეტის საკრებულო ადგენს:

    მუხლი 1.

შეტანილ იქნეს „ამბროლაურის მუნიციპალიტეტის ტერიტორიაზე რეგისტრირებული მუდმივად მცხოვრები მოსახლეობის სამედიცინო მომსახურეობის სოციალური პროგრამის დამტკიცების შესახებ“ ამბროლაურის მუნიციპალიტეტის საკრებულოს 2011 წლის 30 ნოემბრის №46 დადგენილებით (სსმ, ვებ - გვერდი, 111209010, 13/12/2011) დამტკიცებული პროგრამის №1 დანართში შემდეგი ცვლილება:

ა) დადგენილებით დამტკიცებული პროგრამის №1 დანართის მე-4 მუხლი ჩამოყალიბდეს შემდეგი რედაქციით:

    „მუხლი 4. ბენეფიციართა კატეგორიები

1. ბენეფიციარს, რომლის სამედიცინო მომსახურება ფინანსდება ამბროლაურის მუნიციპალიტეტის ბიუჯეტიდან, განეკუთვნება ამბროლაურის მუნიციპალიტეტის ტერიტორიაზე რეგისტრირებული მუდმივად მცხოვრები:

ა) 3-დან 60 წლის ჩათვლით მოქალაქე (მე-2 მუხლის „ა“ ქვეპუნქტის შემთხვევაში), რომლის სამედიცინო მომსახურების ხარჯები არ იფარება სახელმწიფო პროგრამის ან სადაზღვევო პოლისის მეშვეობით ;

ბ) მოქალაქე, რომლის ოჯახის სარეიტინგო ქულა სოციალურად დაუცველი ოჯახების მონაცემთა ერთიან ბაზაში არ აღემატება 70 000-ს და რომლის სადაზღვევო პერიოდი ჯერ არ დაწყებულა.

2. მე-2 მუხლის „ა“ ქვეპუნქტის შემთხვევაში ამბროლაურის მუნიციპალიტეტის ბიუჯეტიდან არა უმეტეს 1000 (ათასი) ლარით, დაფინანსდება ამბროლაურის მუნიციპალიტეტის ტერიტორიაზე რეგისტრირებული მუდმივად მცხოვრები 3-დან 60 წლის ჩათვლით იმ ბენეფიციარის მგზავრობის ღირებულება, რომელსაც ესაჭიროება საქართველოს ფარგლებს გარეთ სამედიცინო მომსახურება, თუ მისთვის სამედიცინო მომსახურების გაწევა საქართველოს ტერიტორიაზე შეუძლებელია .“ ;

ბ) დადგენილებით დამტკიცებული პროგრამის №1 დანართის მე-5 მუხლი ჩამოყალიბდეს შემდეგი რედაქციით:

    „მუხლი 5. ამბროლაურის მუნიციპალიტეტის გამგეობაში წარსადგენი დოკუმენტაცია

მოქალაქემ/წარმომადგენელმა სამედიცინო მომსახურების ან/და მგზავრობის ღირებულების (საქართველოს ფარგლებს გარეთ სამედიცინო მომსახურების შემთხვევაში) დაფინანსების მიზნით ამბროლაურის მუნიციპალიტეტის გამგეობაში უნდა წარადგინოს:

ა) განცხადება მუნიციპალიტეტის გამგებლის სახელზე;

ბ) პირადობის მოწმობის დამადასტურებელი დოკუმენტის ასლი;

გ) ცნობა ჯანმრთელობის შესახებ (ფორმა №100);

დ) სამედიცინო მომსახურების ხარჯების მოცულობის განმსაზღვრელი დოკუმენტი (ანგარიშ-ფაქტურა ან ინვოისი) სამედიცინო დაწესებულებიდან;

ე) მე-4 მუხლის „გ“ ქვეპუნქტის შემთხვევაში მგზავრობის ღირებულების დამადასტურებელი დოკუმენტი;

ვ) ცნობა ან ამონაწერი სოციალური მომსახურების სააგენტოდან.“.

    მუხლი 2. ეს დადგენილება ამოქმედდეს გამოქვეყნებისთანავე და მისი ამოქმედება განისაზღვროს 2012 წლის 1 მარტიდან.

საკრებულოს თავმჯდომარე კ . ფარჯანაძე