განჩინება შპს „3 მ ჯორჯია ავტოსერვისის“ კრედიტორთა კრების მოწვევის შესახებ

გ ა ნ ჩ ი ნ ე ბ ა

საქართველოს სახელით

2012 წლის 6 თებერვალი                                      

 ქ. თბილისი

თბილისის საქალაქო სასამართლოს სამოქალაქო საქმეთა კოლეგია

მოსამართლე თამარ ჭუნიაშვილი

განმცხადებელი: მოვალე – შპს „3 მ ჯორჯია ავტოსერვისი“

წარმომადგენელი: როლანდ სულავა (დირექტორი);

მოთხოვნა: გაკოტრების საქმის წარმოების გახსნა;

ზეპირი მოსმენის გარეშე განიხილა განმცხადებლის შპს „3 მ ჯორჯია ავტოსერვისის“ კრედიტორთა კრების მოწვევის საკითხი და

გ ა მ ო ა რ კ ვ ი ა:

თბილისის საქალაქო სასამართლოს სამოქალაქო საქმეთა კოლგიას 2010 წლის 24 სექტემბერს განცხადებით მიმართა შპს „3 მ ჯორჯია ავტოსერვისის“ დირექტორმა როლანდ სულავამ და ითხოვა აღნიშნული შეზღუდული პასუხისმგებლობის საზოგადოების მიმართ გაკოტრების საქმის წარმოების გახსნა.

თბილისის საქალაქო სასამართლოს სამოქალაქო საქმეთა კოლეგიის 2010 წლის 18 ოქტომბრის განჩინებით განცხადება მიღებულ იქნა სასამართლოს წარმოებაში, შპს „3 მ ჯორჯია ავტოსერვისის“ გაკოტრების მმართველად დაინიშნა ვახტანგ კეკელიძე.

2012 წლის 3 თებერვალს თბილისის საქალაქო სასამართლოში შემოსავლების სამსახურმა წარმოადგინა 2012 წლის 31 იანვრის შპს „3 მ ჯორჯია ავტოსერვისის“ გაკოტრების მმართველის სამეურვეო ქონების ნატურით გადაცემის თაობაზე ხელმოწერილი ხელშეკრულება მიღება-ჩაბარების აქტთან ერთად.

სასამართლო გაეცნო წარმოდგენილ მასალებს, მიაჩნია, რომ დანიშნული უნდა იქნას კრედიტორთა კრება და კრედიტორთა კრებაზე განხილულ იქნეს საკითხი: შპს „3 მ ჯორჯია ავტოსერვისის“ სამეწარმეო რეესტრიდან ამოშლის და საქმის წარმოების დასრულების შესახებ.

„გადახდისუუნარობის საქმის წარმოების შესახებ“ საქართველოს კანონის 42-ე მუხლის პირველი ნაწილის თანახმად, გაკოტრების საქმის წარმოება დასრულდება გაკოტრების მმართველის მიერ სამეურვეო ქონების რეალიზაციისა და რეალიზაციით მიღებული თანხის ამ კანონის შესაბამისად განაწილებისთანავე.

სასამართლომ იხელმძღვანელა „გადახდისუუნარობის საქმის წარმოების შესახებ“ საქართველოს კანონის მე-7, მე-8, 27-ე, 42-ე მუხლებით, საქართველოს სამოქალაქო საპროცესო კოდექსის 284-285-ე მუხლებით,

დ ა ა დ გ ი ნ ა:

1. კრედიტორთა კრება მოწვეული იქნეს 2012 წლის 22 თებერვალს, 12:00 საათზე, თბილისის საქალაქო სასამართლოს შენობაში (ქ. თბილისი, დავით აღმაშენებლის ხეივანი, მე-12 კმ., №6, დარბაზი №29).

2. განჩინება გამოქვეყნდეს საქართველოს საკანონმდებლო მაცნეში და სასამართლოს დაფაზე.

3. განჩინებაზე შეიძლება კერძო საჩივრის შეტანა ამავე სასამართლოში მხარეებისათვის განჩინების გადაცემიდან 5 (ხუთი) დღის ვადაში.

მოსამართლე               თ. ჭუნიაშვილი