სსიპ „საზღვაო ტრანსპორტის სააგენტოს დირექტორის 2011 წლის 9 აგვისტოს N001 ბრძანებაში „ტექნიკური რეგლამენტის „საკლასიფიკაციო საზოგადოების აღიარების წესის“ დამტკიცების შესახებ“ ცვლილებების შეტანის თაობაზე

საქართველოს ეკონომიკისა და მდგრადი განვითარების სამინისტროს საჯარო სამართლის იურიდიული პირის – საზღვაო ტრანსპორტის სააგენტოს დირექტორის

ბრძანება №003

2012 წლის 31 იანვარი

ქ. ბათუმი

სსიპ „საზღვაო ტრანსპორტის სააგენტოს დირექტორის 2011 წლის 9 აგვისტოს №001 ბრძანებაში „ტექნიკური რეგლამენტის „საკლასიფიკაციო საზოგადოების აღიარების წესის“ დამტკიცების შესახებ“ ცვლილებების შეტანის თაობაზე

 „საჯარო სამართლის იურიდიული პირის – საზღვაო ტრანსპორტის სააგენტოს დებულების დამტკიცების თაობაზე“ საქართველოს ეკონომიკისა და მდგრადი განვითარების მინისტრის 2011 წლის 14 აპრილის №1-1/585 ბრძანებით დამტკიცებული დებულების მე-4 მუხლის „დ“ ქვეპუნქტის, „ტრანსპორტის სფეროში ტექნიკური რეგლამენტების ნუსხის დამტკიცების შესახებ“ საქართველოს ეკონომიკისა და მდგრადი განვითარების მინისტრის 2011 წლის 9 ივნისის №1-1/883 ბრძანებით დამტკიცებულ ტრანსპორტის სფეროში ტექნიკური რეგლამენტების ნუსხის მე-3 მუხლის „გ“ ქვეპუნქტის და საქართველოს ზოგადი ადმინისტრაციული კოდექსის 63-ე მუხლის შესაბამისად, ვბრძანებ:

1. შევიდეს ცვლილება სსიპ „საზღვაო ტრანსპორტის სააგენტოს" დირექტორის 2011 წლის 9 აგვისტოს №001 ბრძანებაში „ტექნიკური რეგლამენტის „საკლასიფიკაციო საზოგადოების აღიარების წესის“ დამტკიცების შესახებ“. მე-10 მუხლს დაემატოს შემდეგი შინაარსის მე-5 პუნქტი და ჩამოყალიბდეს შემდეგი რედაქციით:

„5. შესაბამის საკლასიფიკაციო საზოგადოებებს, რომლებიც არ არიან საკლასიფიკაციო საზოგადოებების საერთაშორისო ასოციაციის (IACS) წევრი, უფლება მიეცეთ 2012 წლის 1 სექტემბრამდე განახორციელონ ტექნიკური ზედამხედველობა და გასცენ საქართველოს კანონმდებლობით დადგენილი შესაბამისი სერტიფიკატები იმ გემებზე, რომლებიც ახორციელებენ საბუნკერო მომსახურებას საქართველოს ნავსადგურებში, ნავსადგურის აკვატორიასა და ტერიტორიულ ზღვაში.“.

2. ბრძანება ამოქმედდეს გამოქვეყნებისთანავე.

თ. იობიძე