„ქედის მუნიციპალიტეტის გამგეობის ადმინისტრაციული სამსახურის დებულების დამტკიცების შესახებ“ ქედის მუნიციპალიტეტის საკრებულოს 2010 წლის 3 სექტემბრის №24 დადგენილებაში ცვლილებისა და დამატების შეტანის შესახებ

ქედის მუნიციპალიტეტის საკრებულოს

 დადგენილება №47

2011 წლის 21 დეკემბერი

დ. ქედა

„ქედის მუნიციპალიტეტის გამგეობის ადმინისტრაციული სამსახურის დებულების დამტკიცების შესახებ“ ქედის მუნიციპალიტეტის საკრებულოს 2010 წლის  3 სექტემბრის  №24 დადგენილებაში ცვლილებისა და დამატების  შეტანის შესახებ

„ნორმატიული აქტების შესახებ“ საქართველოს კანონის მე-20 მუხლის შესაბამისად, ქედის მუნიციპალიტეტის საკრებულო ადგენს:

    მუხლი 1

 „ქედის მუნიციპალიტეტის გამგეობის ადმინისტრაციული სამსახურის დებულების დამტკიცების შესახებ“  ქედის მუნიციპალიტეტის საკრებულოს 2010 წლის  03 სექტემბრის №24 დადგენილებაში (სსმ V, №28, 22.09.2010, მუხ.803.) შეტანილ იქნეს  შემდეგი სახის ცვლილება და დამატება:

ა) დადგენილებით დამტკიცებული დებულების პირველი მუხლი ჩამოყალიბდეს შემდეგი რედაქციით:

     „მუხლი 1. გამგეობის ადმინისტრაციული სამსახური

1. ქედის მუნიციპალიტეტის გამგეობის ადმინისტრაციული სამსახური (შემდგომში – სამსახური) წარმოადგენს გამგეობის სტრუქტურულ ერთეულს, რომელიც ახორციელებს გამგეობის საქმიანობის ორგანიზაციულ, იურიდიულ, დოკუმენტურ, ანალიტიკურ, საინფორმაციო და მატერიალურ-ტექნიკურ უზრუნველყოფას, აგრეთვე გამგეობის დებულებითა და ამ დებულებით განსაზღვრულ ფარგლებში  –  საკრებულოს საქმიანობის უზრუნველყოფასა და ახალგაზრდულ საქმეთა სფეროს განვითარების ხელშეწყობას.

2. ადმინისტრაციული სამსახურის ფუნქციაა უზრუნველყოს გამგეობის საქმიანობისათვის შესაბამისი პირობების შექმნა, გაუწიოს დახმარება გამგეობას უფლებამოსილების განხორციელებაში, მიაწოდოს ინფორმაცია მოსახლეობას გამგეობის საქმიანობის შესახებ, ორგანიზაციულად უზრუნველყოს მოქალაქეთა ურთიერთობა გამგეობასთან.

3. ადმინისტრაციული სამსახური შექმნილია „ადგილობრივი თვითმმართველობის შესახებ“ საქართველოს ორგანული კანონისა და ქედის მუნიციპალიტეტის გამგეობის დებულების შესაბამისად.

4. სამსახურის იურიდიული მისამართია: დაბა ქედა, კოსტავას №3.

5.  სამსახურს აქვს ბეჭედი, შემოსული წერილებისა და დოკუმენტაციის სარეგისტრაციო შტამპი და იყენებს მუნიციპალიტეტის გამგეობის ბლანკს საკუთარი დასახელების აღნიშვნით.“;

ბ) დადგენილებით დამტკიცებული დებულების მე-2 მუხლის პირველი პუნქტი ჩამოყალიბდეს შემდეგი რედაქციით:

„1. ადმინისტრაციული სამსახურის საქმიანობის სამართლებლივი საფუძვლებია, „საქართველოს კონსტიტუცია“, „ადგილობრივი თვითმმართველობის შესახებ“ საქართველოს ორგანული კანონი, საქართველოს სხვა საკანონმდებლო აქტები, გამგეობის დებულება და ეს დებულება.“;

გ) დადგენილებით დამტკიცებული დებულების მე-3 მუხლის პირველი პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) ორგანიზაციულ-ტექნიკურად უზრუნველყოს გამგეობის სამუშაო თათბირების, აგრეთვე გამგეობის სტრუქტურული ერთეულების, ტერიტორიული  ორგანოებისა და გამგეობის თანამდებობის პირების მიერ სხვა ღონისძიების ჩატარება. უზრუნველყოს გამგეობის საქმიანობის შესახებ ოპერატიული ინფორმაციის მომზადება და გამოქვეყნება;“;

დ) დადგენილებით დამტკიცებული დებულების მე-4 მუხლის მე-2 პუნქტი ჩამოყალიბდეს  შემდეგი რედაქციით:

„2. სამსახურის სტრუქტურული ქვედანაყოფია:

ა) იურიდიული და საკადრო საკითხთა განყოფილება;

ბ) ახალგაზრდულ საქმეთა განყოფილება.“;

ე) დადგენილებით დამტკიცებულ დებულებას დაემატოს მე-6¹ მუხლი შემდეგი რედაქციით:

,,მუხლი 6¹. ახალგაზრდულ საქმეთა განყოფილების ფუნქციები

ახალგაზრდულ საქმეთა განყოფილება:

ა) ახორციელებს ახალგაზრდულ საქმეთა სფეროს განვითარების მიზნით კონცეფციების და  შესაბამისი მიზნობრივი პროგრამების პროექტების მომზადებას, პროგრამათა განხორციელების კოორდინაციას;

ბ) უზრუნველყოფს სამოქალაქო საზოგადოების მშენებლობის საქმეში ახალგაზრდების  მონაწილეობის ხელშეწყობას;

გ) ახალგაზრდებში პატრიოტული სულისკვეთების ამაღლების, ეროვნული და ზოგადსაკაცობრიო ღირებულებათა დამკვიდრების, ფიზიკურად ძლიერი და სულიერად ჯანსაღი თაობის აღზრდისათვის შესაბამისი ღონისძიებების გატარება;

დ) ნიჭიერი მოზარდებისა და ახალგაზრდების შესაძლებლობების რეალიზებისათვის ხელსაყრელი პირობების შექმნა;

ე) მუნიციპალიტეტის ტერიტორიაზე მცხოვრები სოციალურად დაუცველი, ინვალიდი და მზრუნველობას მოკლებული ბავშვებისა და მოზარდების საზოგადოებრივ ცხოვრებაში ჩაბმის ხელშემწყობი პროექტების განხორციელებას;

ვ) ახორციელებს საქართველოს მოქმედი კანონმდებლობით, გამგეობის დებულებით და ამ დებულებით გათვალისწინებულ სხვა უფლებამოსილებებს.“;

ვ) დადგენილებით დამტკიცებული დებულების „თავი IV“  ამოღებულ იქნეს.

    მუხლი 2

დადგენილება ამოქმედდეს 2012 წლის პირველი იანვრიდან.

საკრებულოს თავმჯდომარე                                              ბ. დიასამიძე