„საქართველოს მოქალაქეობის შესახებ“ საქართველოს ორგანულ კანონში დამატებების შეტანის თაობაზე

საქართველოს ორგანული კანონი

„საქართველოს მოქალაქეობის შესახებ“ საქართველოს ორგანულ კანონში დამატებების შეტანის თაობაზე

საქართველოს პარლამენტი ადგენს:

I. „საქართველოს მოქალაქეობის შესახებ“ საქართველოს ორგანულ კანონში (საქართველოს პარლამენტის უწყებები, №3, 1993) შეტანილ იქნეს შემდეგი დამატებები:

1. V თავის სახელწოდებაში სიტყვას „დასკვნითი“ წინ დაემატოს სიტყვები „გარდამავალი და“;

2. კანონს დაემატოს შემდეგი შინაარსის 45¹ და 45² მუხლები:

   „მუხლი 45¹. საქართველოს მოქალაქეობის დადგენის დროებითი წესი

1. სხვა სახელმწიფოებში მოქმედ საქართველოს დიპლომატიურ წარმომადგენლობებსა და საკონსულო დაწესებულებებს დროებით – 2002 წლის 1 აპრილამდე ენიჭებათ ამ სახელმწიფოებში მყოფ პირთა საქართველოს მოქალაქეობის დადგენის საკითხების განხილვისა და შესაბამისი გადაწყვეტილების მიღების უფლებამოსილება ამ კანონით გათვალისწინებულ საფუძველზე, თუ საქართველოსა და ამ სახელმწიფოებს შორის მოქმედებს მიმოსვლის სავიზო რეჟიმი.

2. ამ მუხლის პირველი პუნქტის მოქმედება არ ზღუდავს საქართველოს იუსტიციის სამინისტროს ამ კანონის 36¹ მუხლით განსაზღვრულ უფლებამოსილებას.

    მუხლი 45² საქართველოს მოქალაქეობის დადგენის წესის გამარტივება

საქართველოს პარლამენტის იურიდიულ საკითხთა, კანონიერებისა და ადმინისტრაციული რეფორმების და საგარეო ურთიერთობათა კომიტეტებმა აღმასრულებელი ხელისუფლების შესაბამისი დაწესებულებების მიერ წარდგენილი წინადადებების გათვალისწინებით 2001 წლის 1 მაისამდე მოამზადონ კანონპროექტი საქართველოს მოქალაქეობის დადგენის წესის გამარტივების შესახებ“ .

II. ეს კანონი ამოქმედდეს გამოქვეყნებისთანავე.

საქართველოს პრეზიდენტი              ედუარდ შევარდნაძე .

თბილისი,

2001 წლის 2 მარტი .

№777 –IIს