„საჯარო სამართლის იურიდიული პირის – სამოქალაქო რეესტრის სააგენტოს ტერიტორიული სამსახურის ტიპური დებულების დამტკიცებისა და სამოქმედო ტერიტორიის განსაზღვრის შესახებ“ საქართველოს იუსტიციის მინისტრის 2006 წლის 30 იანვრის №213 ბრძანებაში ცვლილების შეტანის თაობაზე

საქართველოს იუსტიციის მინისტრის

ბრძანება №139

2011 წლის 25 ოქტომბერი

ქ. თბილისი

 „ საჯარო სამართლის იურიდიული პირის – სამოქალაქო რეესტრის სააგენტოს ტერიტორიული სამსახურის ტიპური დებულების დამტკიცებისა და სამოქმედო ტერიტორიის განსაზღვრის შესახებ“ საქართველოს იუსტიციის მინისტრის 2006 წლის 30 იანვრის №213 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად, ვბრძანებ:

მუხლი 1. „საჯარო სამართლის იურიდიული პირის – სამოქალაქო რეესტრის სააგენტოს ტერიტორიული სამსახურის ტიპური დებულების დამტკიცებისა და სამოქმედო ტერიტორიის განსაზღვრის შესახებ“ საქართველოს იუსტიციის მინისტრის 2006 წლის 30 იანვრის №213 ბრძანებით (სსმ III, 31.01.2006 წ., №13, მუხ. 156) დამტკიცებულ დებულებაში შეტანილ იქნეს შემდეგი ცვლილება:

1. მე-2 მუხლის:

ა) 2¹ პუნქტი ამოღებულ იქნეს;

ბ) 2² პუნქტი ჩამოყალიბდეს შემდეგი რედაქციით:

„ 2². სააგენტოს ტერიტორიული სამსახურები კანონმდებლობით გათვალისწინებული წესით იღებენ „იძულებით გადაადგილებულ პირთა – დევნილთა შესახებ“ საქართველოს კანონით განსაზღვრულ დევნილთა განცხადებებს საქართველოს მოქალაქის პირადობის მოწმობის გაცემის შესახებ, რის შემდეგაც აფხაზეთის, ცხინვალისა ან ახალგორის ტერიტორიული სამსახურები იღებენ გადაწყვეტილებას პირადობის მოწმობის გაცემის თაობაზე. სააგენტოს ტერიტორიული სამსახურები ასევე ახორციელებენ აღნიშნული წესით დამზადებული პირადობის მოწმობების გაცემას დევნილებზე.“;

გ) 4³ პუნქტი ჩამოყალიბდეს შემდეგი რედაქციით:

„ 4³ . სააგენტოს ძველი თბილისის, ქუთაისის და ბათუმის სამსახურები კანონმდებლობით გათვალისწინებული წესით ახორციელებენ ამ მუხლის პირველი პუნქტით (გარდა პირველი პუნქტის „ვ¹.ბ“, „ზ.ბ“, „ზ¹.ბ“ და „ზ³ “ ქვეპუნქტებით) გათვალისწინებულ უფლებამოსილებებს.“.

2. 2¹ მუხლის:

ა) მე -2 პუნქტი  ჩამოყალიბდეს შემდეგი რედაქციით:

„ 2. ამ მუხლის პირველი პუნქტის „ა“, „დ“, „ე“, „ვ“ და „ზ“ ქვეპუნქტებით გათვალისწინებულ უფლებამოსილებებს ახორციელებენ სააგენტოს ძველი თბილისის, ქუთაისის და ბათუმის სამსახურები.“;

ბ) მე -3 პუნქტი ჩამოყალიბდეს შემდეგი რედაქციით:

„ 3. ამ მუხლის პირველი პუნქტის „ბ“ ქვეპუნქტით გათვალისწინებულ უფლებამოსილებას ახორციელებენ ბიომეტრიული დოკუმენტების პერსონალიზაციის თბილისის, ქუთაისის და ბათუმის ცენტრები.“.

3. მე -5 მუხლის:

ა)  მე -3 პუნქტი ჩამოყალიბდეს შემდეგი რედაქციით:

„ 3. ამ დებულების მე-2 მუხლის 4³, 4⁴ და 4⁵ პუნქტებით გათვალისწინებული სააგენტოს ტერიტორიული სამსახურები ამ დებულების მე-2 მუხლის პირველი პუნქტის „ა“, „ბ“ (გარდა სამოქალაქო აქტების ჩანაწერების აღდგენისა და გაუქმებისა), „ბ¹“, „ბ²“,   „გ“, „გ¹“,  „ზ“ (გარდა „ზ.ბ“ ქვეპუნქტისა) და „ზ¹“ (გარდა „ზ¹.ბ“ ქვეპუნქტისა) ქვეპუნქტებით გათვალისწინებული უფლებამოსილების განხორციელებისას არ არიან შეზღუდული სამოქმედო ტერიტორიით.“;

ბ) 3² პუნქტი ჩამოყალიბდეს შემდეგი რედაქციით:

„ 3². ამ დებულების მე-2 მუხლის მე-4, 4², 4³, 4⁴ და 4⁵ პუნქტებით გათვალისწინებული  სამსახურები ამ დებულების მე-2 მუხლის პირველი პუნქტის „ი⁷“ ქვეპუნქტით გათვალისწინებული უფლებამოსილების განხორციელებისას არ არიან შეზღუდულნი სამოქმედო ტერიტორიით. ამავე ქვეპუნქტით გათვალისწინებული განცხადებების მიღებას ახორციელებს ნებისმიერი სამსახური, რომელსაც მიმართავს განმცხადებელი.“;

გ) 3⁴ პუნქტი ჩამოყალიბდეს შემდეგი რედაქციით:

„ 3⁴. ამ დებულების მე-2 მუხლის პირველი პუნქტის „ი⁸“ ქვეპუნქტით გათვალისწინებული უფლებამოსილების განხორციელებისას, სააგენტოს ძველი თბილისის სამსახურის სამოქმედო ტერიტორიაა ქ. თბილისის (თვითმმართველი ქალაქის) და ქ. რუსთავის მუნიციპალიტეტის ტერიტორია. სააგენტოს ქუთაისის სამსახურის სამოქმედო ტერიტორიაა ქ. ქუთაისის (თვითმმართველი ქალაქის) ტერიტორია, ხოლო ბათუმის სამსახურის სამოქმედო ტერიტორიაა ქ. ბათუმის (თვითმმართველი ქალაქის) ტერიტორია. აღნიშნული სამსახურები ასევე უფლებამოსილნი არიან ადგილზე მომსახურების მიზნით განსაზღვრულ სამოქმედო ტერიტორიაზე მიიღონ განაცხადი იმ მომსახურების განხორციელებაზე, რომელიც არ განეკუთვნება მათ სამოქმედო ტერიტორიაზე განსახორციელებელ მომსახურებას.“;

დ) 3⁵ პუნქტი ჩამოყალიბდეს შემდეგი რედაქციით:

„ 3⁵. ამ დებულების მე-2 მუხლის მე-4, 4², 4³,  4⁴ და 4⁵ პუნქტებით გათვალისწინებული სამსახურები პირადობის (ბინადრობის) მოწმობის გაცემის/შეცვლის უფლებამოსილების განხორციელებისას არ არიან შეზღუდულნი სამოქმედო ტერიტორიით.“.

მუხლი 2.   ეს ბრძანება ამოქმედდეს გამოქვეყნებისთანავე.

ზ. ადეიშვილი