„საჯარო სამართლის იურიდიული პირის – სამოქალაქო რეესტრის სააგენტოს დებულების დამტკიცების შესახებ“ საქართველოს იუსტიციის მინისტრის 2006 წლის 30 იანვრის №209 ბრძანებაში ცვლილების შეტანის თაობაზე

საქართველოს იუსტიციის მინისტრის

ბრძანება №123

2011 წლის 6 სექტემბერი

ქ. თბილისი

„საჯარო სამართლის იურიდიული პირის – სამოქალაქო რეესტრის სააგენტოს დებულების დამტკიცების შესახებ“ საქართველოს იუსტიციის მინისტრის 2006 წლის  30 იანვრის №209 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად, ვბრძანებ:

მუხლი 1. „საჯარო სამართლის იურიდიული პირის – სამოქალაქო რეესტრის სააგენტოს დებულების დამტკიცების შესახებ“ საქართველოს იუსტიციის მინისტრის 2006 წლის 30 იანვრის №209 ბრძანებით (სსმ III, 30. 01. 2006 წ., №12, მუხ. 138) დამტკიცებულ დებულებაში შეტანილ იქნეს შემდეგი ცვლილება:

1. მე-6 მუხლის მე-2 პუნქტის „პ“ ქვეპუნქტი ჩამოყალიბდეს შემდეგი რედაქციით:

„პ) საერთაშორისო ურთიერთობებისა და დონორ ორგანიზაციებთან კოორდინაციის სამსახური;“;

2. მე-6 მუხლს დაემატოს შემდეგი შინაარსის „ჟ“ ქვეპუნქტი:

„ჟ) პროექტების მართვისა და ბიზნეს ანალიზის სამსახური;“.

3. მე-7 მუხლის 14³ პუნქტი ჩამოყალიბდეს შემდეგი რედაქციით:

„14³. საერთაშორისო ურთიერთობებისა და დონორ ორგანიზაციებთან კოორდინაციის სამსახური:

ა) შეიმუშავებს წინადადებებს საერთაშორისო ორგანიზაციებისა და საზღვარგარეთის ქვეყნების შესაბამის ორგანოებთან თანამშრომლობის პრიორიტეტული მიმართულებების შესახებ;

ბ) სააგენტოს საჭიროებიდან გამომდინარე ამყარებს ურთიერთობებს საერთაშორისო, ადგილობრივ და სხვა სახელმწიფოების დონორ ორგანიზაციებთან;

გ) ახორციელებს საზღვარგარეთის ქვეყნების და საერთაშორისო ორგანიზაციების მიერ დაფინანსებული მიმდინარე პროექტების ზოგად კოორდინაციას;

დ) შეიმუშავებს წინადადებებს სააგენტოს განვითარების სტრატეგიული მიზნების შესახებ და უზრუნველყოფს მათ ასახვას შესაბამის დოკუმენტებში;

ე) ახორციელებს ამ დებულებითა და კანონმდებლობით გათვალისწინებულ სხვა უფლებამოსილებებს.“.

4. მე-7 მუხლს დაემატოს შემდეგი შინაარსის 14⁴ პუნქტი:

„14⁴. პროექტების მართვის და ბიზნეს ანალიზის სამსახური:

ა) შეიმუშავებს პროექტების მართვის და პროცესების ანალიზის სტანდარტულ მეთოდოლოგიებს და უზრუნველყოფს მათ დანერგვას სააგენტოს განვითარების ხელშეწყობის მიზნით;

ბ) უზრუნველყოფს ახალი პროცესების დანერგვას და არსებული პროცესების გაუმჯობესების  ანალიზს;

გ) უზრუნველყოფს სააგენტოს ელექტრონული მართვის სისტემებს შორის თანაკვეთების დადგენას და შეიმუშავებს მათი გაუმჯობესების საერთო სტრატეგიას;

დ) სააგენტოს რესურსების ოპტიმიზაციის მიზნით, უზრუნველყოფს დასახული ამოცანების პროექტებში გაერთიანებას, პროექტების პორტფოლიოს ფორმირებას და კონტროლს;

ე) განიხილავს პროდუქტების/სერვისების ტექნიკურ ამოცანებს, ახორციელებს მათ შეფასებას და მომსახურების პროცესების მაქსიმალური ავტომატიზაციის მიზნით სააგენტოს ხელმძღვანელ პირებს წარუდგენს შესაბამის რეკომენდაციებს;

ვ) განსაზღვრავს სააგენტოში მიმდინარე ბიზნეს პროცესების ძლიერ და სუსტ მხარეებს და ბიზნეს პროცესების გაუმჯობესების მიზნით სააგენტოს უწევს შესაბამის რეკომენდაციებს;

ზ) მონაწილეობს პროდუქტების/სერვისების მიწოდების/განხორციელების დროს წარმოქმნილი პრობლემების ანალიზსა და მათ გადაწყვეტაში;

თ ) ახორციელებს ამ დებულებითა და კანონმდებლობით გათვალისწინებულ სხვა უფლებამოსილებებს.“.

5. მე-8 მუხლის პირველი პუნქტის „ე¹“ ქვეპუნქტი ამოღებულ იქნეს;

6. მე-8 მუხლს დაემატოს შემდეგი შინაარსის მე-6 პუნქტი:

„6. სამმართველოს/სამსახურის უფროსი, ასევე სამმართველოს/სამსახურის უფროსის მოადგილე სააგენტოს თავმჯდომარის მიერ დელეგირებული უფლებამოსილების ფარგლებში, გამოსცემს ინდივიდუალურ ადმინისტრაციულ-სამართლებრივ აქტს.“.

მუხლი 2. ეს ბრძანება, გარდა ბრძანების პირველი მუხლის პირველი – მე-4 პუნქტებისა, ამოქმედდეს გამოქვეყნებისთანავე.

მუხლი 3. ამ ბრძანების პირველი მუხლის პირველი – მე-4 პუნქტები ამოქმედდეს 2011 წლის 12 სექტემბრიდან.

ზ. ადეიშვილი