საქართველოს იუსტიციის სამინისტროს არასაპატიმრო სასჯელთა აღსრულებისა და პრობაციის დეპარტამენტის დებულების დამტკიცების შესახებ

სახელმწიფო სარეგისტრაციო კოდი 010.240.030.11.106.005.975

საქართველოს იუსტიციის მინისტრის

ბრძანება №764

2003 წლის 25 ივლისი

ქ. თბილისი

საქართველოს იუსტიციის სამინისტროს არასაპატიმრო სასჯელთა აღსრულებისა და პრობაციის დეპარტამენტის დებულების დამტკიცების შესახებ

“არასაპატიმრო სასჯელთა აღსრულების წესისა და პრობაციის შესახებ” საქართველოს კანონის 2¹ მუხლის პირველი პუნქტის თანახმად, ვბრძანებ:

1. დამტკიცდეს არასაპატიმრო სასჯელთა აღსრულებისა და პრობაციის დეპარტამენტის დებულება (დანართი №1)

2. ეს ბრძანება ამოქმედდეს გამოქვეყნებისთანავე.

რ. გილიგაშვილი

არასაპატიმრო სასჯელთა აღსრულებისა და პრობაციის დეპარტამენტის

დებულება

თავი I

ზოგადი დებულებანი

    მუხლი 1.

წინამდებარე დებულება განსაზღვრავს საქართველოს იუსტიციის სამინისტროს არასაპატიმრო სასჯელთა აღსრულებისა და პრობაციის დეპარტამენტის მიზნებს, ამოცანებს, უფლებამოსილებებს, მართვის ორგანიზაციასა და სტრუქტურას.

    მუხლი 2.

საქართველოს იუსტიციის სამინისტროს არასაპატიმრო სასჯელთა აღსრულებისა და პრობაციის დეპარტამენტი (შემდგომში – პრობაციის დეპარტამენტი) წარმოადგენს საქართველოს იუსტიციის სამინისტროს სტრუქტურულ ქვედანაყოფს, რომელიც შექმნილია „არასაპატიმრო სასჯელთა აღსრულების წესისა და პრობაციის შესახებ“ საქართელოს კანონის საფუძველზე და მის შესაბამისად.

    მუხლი 3.

დეპარტამენტი თავის საქმიანობაში ხელმძღვანელობს: საქართველოს კონსტიტუციით, საქართველოს საერთაშორისო ხელშეკრულებებითა და შეთანხმებებით, საქართველოს კანონით „არასაპატიმრო სასჯელთა აღსრულების წესისა და პრობაციის შესახებ“, საქართველოს სხვა საკანონმდებლო აქტებით, საქართველოს პრეზიდენტის ნორმატიული აქტებით, საქართველოს იუსტიციის მინისტრის ბრძანებებით, სხვა ნორმატიული აქტებით და წინამდებარე დებულებით.

    მუხლი 4.

დეპარტამენტის ადგილსამყოფელია ქ. თბილისი, ვაჩნაძის № 9.

თავი II

დეპარტამენტის მიზანი და უფლებამოსილებანი

    მუხლი 5.

დეპარტამენტის მიზანია არასაპატიმრო სასჯელთა აღსრულების წესისა და პრობაციის ოფიცერთა (შემდგომში – პრობაციის ოფიცერი) საქმიანობის კოორდინაცია და კონტროლი, ორგანიზაციული და მეთოდური ხელმძღვანელობა, არასაპატიმრო სასჯელთა აღსრულებისა და პრობაციის კადრების შერჩევა, მათი სწავლების ორგანიზება, სათანადო ღონისძიებების განხორციელება პროფესიული კვალიფიკაციის ამაღლების მიზნით.

    მუხლი 6.

დეპარტამენტი უფლებამოსილია:

ა) ორგანიზება გაუკეთოს არასაპატიმრო სასჯელთა აღსრულებისა და პრობაციის ბიუროების (შემდგომში - პრობაციის ბიურო) მიერ “არასაპატიმრო სასჯელთა აღსრულების წესისა და პრობაციის შესახებ” საქართველოს კანონის, საქართველოს იუსტიციის მინისტრის ბრძანებების და სხვა შესაბამისი ნორმატიული აქტების მოთხოვნათა შესრულებას;

ბ) შეიმუშავოს მის კომპეტენციას მიკუთვნებულ საკითხებზე ნორმატიული აქტების პროექტები;

გ) ორგანიზება გაუკეთოს პრობაციის ოფიცერთა საკვალიფიკაციო გამოცდებს;

დ) განახორციელოს პრობაციის ოფიცერთა საქმიანობის რევიზია და კონტროლი;

ე) გამოითხოვოს პრობაციის ბიუროებიდან საჭირო ინფორმაცია და დოკუმენტები;

ვ) განიხილოს პრობაციის ოფიცერთა მიმართ შემოსული საჩივრები და განცხადებები;

ზ)   აწარმოოს სტატისტიკა და ანალიზი;

თ)  განახორციელოს კანონით გათვალისწინებული სხვა საქმიანობა.

თავი III

დეპარტამენტის მართვა

    მუხლი 7.

დეპარტამენტს ხელმძღვანელობს დეპარტამენტის თავმჯდომარე, რომელსაც თანამდებობაზე ნიშნავს და თანამდებობიდან ათავისუფლებს საქართველოს იუსტიციის მინისტრი.

დეპარტამენტის თავმჯდომარე:

ა) იხილავს დეპარტამენტში შესულ განცხადებებსა და საჩივრებს;

ბ) ხელმძღვანელობს დეპარტამენტის საქმიანობას, ანაწილებს მოვალეობებს დეპარტამენტის თანამშრომელთა შორის,  აძლევს მათ მითითებებსა და დავალებებს;

გ) საქართველოს იუსტიციის მინისტრს წარუდგენს წინადადებებს პრობაციის ბიუროების უფროსების, ოფიცრების და დეპარტამენტის მოხელეთა წახალისებისა და დისციპლინური     პასუხისმგებლობის შესახებ;

დ) ახორციელებს კანონმდებლობით გათვალისწინებულ სხვა უფლებებს.

    მუხლი 8.

დეპარტმენტის თავმჯდომარეს ჰყავს ერთი მოადგილე.

თავი IV

დეპარტამენტის სტრუქტურა და უფლებამოსილება

    მუხლი 9.

დეპარტამენტის სტრუქტურული ერთეულებია:

ა) სააღსრულებო წარმოებისა და კონტროლის სამმართველო;

ბ) ინფორმაციის, სტატისტიკისა და ანალიზის სამმართველო;

გ) სამართლებრივი თანამშრომლობის სამმართველო.

    მუხლი 10.

1. სამსახურებრივ უფლებამოსილებათა განხორციელებისას პრობაციის დეპარტამენტის თანამშრომელი ხელისუფლების წარმომადგენელია და მისი კანონიერი მოთხოვნის შესრულება სავალდებულოა.

2. პრობაციის დეპარტამენტის თანამშრომლის კანონიერი მოთხოვნის შეუსრულებლობა გამოიწვევს პასუხისმგებლობას კანონით დადგენილი წესით.

თავი V

დასკვნითი დებულებანი

    მუხლი 11.

დეპარტამენტის რეორგანიზაცია და/ან ლიკვიდაცია ხორციელდება კანონმდებლობით დადგენილი წესით.

    მუხლი 12.

წინამდებარე დებულების გაუქმება, მასში ცვლილებებისა და დამატებების შეტანა ხდება საქართველოს იუსტიციის მინისტრის ბრძანებით.