საქართველოს ეროვნული ბანკისადმი 2001 წლის 1 იანვრამდე არსებული საქართველოს აღმასრულებელი ხელისუფლების წმინდა (სასესხო) დავალიანების შესამცირებლად სახელმწიფო ქონების პრივატიზებიდან მიღებული შემოსავლების ყოველთვიურად მიმართვისა და საქართველოს ფინანსთა სამინისტროსათვის იმავე ოდენობით ახალი გრძელვადიანი სესხის მიცემის წესის დამტკიცების შესახებ

სახელმწიფო სარეგისტრაციო კოდი 190.020.110.11.117.004.709

საქართველოს ფინანსთა მინისტრის

ბრძანება №61

2001 წლის 27 მარტი

ქ. თბილისი

საქართველოს ეროვნული ბანკისადმი 2001 წლის 1 იანვრამდე არსებული საქართველოს აღმასრულებელი ხელისუფლების წმინდა (სასესხო) დავალიანების შესამცირებლად სახელმწიფო ქონების პრივატიზებიდან მიღებული შემოსავლების ყოველთვიურად მიმართვისა და საქართველოს ფინანსთა სამინისტროსათვის იმავე ოდენობით ახალი გრძელვადიანი სესხის მიცემის წესის დამტკიცების შესახებ

„საქართველოს 2001 წლის სახელმწიფო ბიუჯეტის შესახებ” საქართველოს კანონის მე-11 მუხლის შესაბამისად, ვბრძანებთ:

1. დამტკიცდეს თანდართული „საქართველოს ეროვნული ბანკისადმი 2001 წლის 1 იანვრამდე არსებული საქართველოს აღმასრულებელი ხელისუფლების წმინდა (სასესხო) დავალიანების შესამცირებლად სახელმწიფო ქონების პრივატიზებიდან მიღებული შემოსავლების ყოველთვიურად მიმართვისა და საქართველოს ფინანსთა სამინისტროზე იმავე ოდენობით ახალი გრძელვადიანი სესხის მიცემის წესი”.

2. ეს ბრძანება ამოქმედდეს გამოქვეყნებისთანავე.

ზ. ნოღაიდელი          

დანართი

საქართველოს ეროვნული ბანკისადმი 2001 წლის 1 იანვრამდე არსებული საქართველოს აღმასრულებელი ხელისუფლების წმინდა (სასესხო) დავალიანების შესამცირებლად სახელმწიფო ქონების პრივატიზებიდან მიღებული შემოსავლების ყოველთვიურად მიმართვისა და საქართველოს ფინანსთა სამინისტროსათვის იმავე ოდენობით ახალი გრძელვადიანი სესხის მიცემის წესი

1. სახელმწიფო ქონების პრივატიზებიდან მიღებული თანხების (რომლებიც აისახება შემოსავლების ანგარიშზე) გადატანა ცენტრალური ბიუჯეტის შემოსავლების ანგარიშზე განხორციელდება ერთჯერადად, არაუგვიანეს ყოველი თვის ბოლო სამუშაო დღისა, ამ პერიოდამდე დაგროვილი თანხის ფარგლებში. იმავდროულად, ცენტრალური ბიუჯეტის ხარჯებიდან დაიფარება საქართველოს ფინანსთა სამინისტროს სასესხო დავალიანება (1996 წელს გაცემული გრძელვადიანი სესხი).

2. იმის გათვალისწინებით, რომ “საქართველოს 2001 წლის სახელმწიფო ბიუჯეტის შესახებ” საქართველოს კანონით 2001 წელს არ არის გათვალისწინებული აღმასრულებული ხელისუფლების სასესხო დავალიანების მოცულობის ცვლილება, გრძელვადიანი სესხების გაცემა (სახელმწიფო ქონების პრივატიზებიდან მიღებული შემოსავლებით დაფარული თანხის ფარგლებში) განხორციელდება ბიუჯეტის შემოსავლებში ასახვის გარეშე – ხარჯების შემცირებითა და სასესხო დავალიანების გაზრდით.

3. 2001 წელს სახელმწიფო ქონების პრივატიზებიდან ამ წესის მიღებამდე შემოსული თანხების ეკვივალენტური თანხა მიმართულ იქნეს 2001 წლის 1 იანვრისათვის არსებული საქართველოს ფინანსთა სამინისტროს სასესხო დავალიანების დასაფარად, შემდგომში ამ თანხის ფარგლებში ახალი გრძელვადიანი სესხის გაცემის პირობით.