მოსამართლის განსაკუთრებული ჩაცმულობის ფორმის - მანტიის დამტკიცების შესახებ

საქართველოს იუსტიციის უმაღლესი საბჭოს

გ ა დ ა წ ყ ვ ე ტ ი ლ ე ბ ა №1/69              

2011 წლის 8 აპრილი           

 ქ. თბილისი

მოსამართლის განსაკუთრებული ჩაცმულობის ფორმის –  მანტიის დამტკიცების შესახებ

1. „საერთო სასამართლოების შესახებ“ საქართველოს ორგანული კანონის 74-ე მუხლის მე-2 პუნქტის საფუძველზე, დამტკიცდეს მოსამართლის განსაკუთრებული ჩაცმულობის ფორმა – მანტია დანართის შესაბამისად.

2. ამ გადაწყვეტილებით დამტკიცებული მოსამართლის განსაკუთრებული ჩაცმულობის ფორმით – მანტიით მოსამართლის საქმის სასამართლო განხილვაში მონაწილეობა განხორციელდეს 2011 წლის 1 სექტემბრიდან.

3. ამ გადაწყვეტილების ამოქმედების მიზნით საქართველოს იუსტიციის უმაღლესი საბჭოს საერთო სასამართლოების დეპარტამენტმა უზრუნველყოს კანონმდებლობით გათვალისწინებული ღონისძიებების გატარება.

4. ძალადაკარგულად გამოცხადდეს „მოსამართლის განსაკუთრებული ჩაცმულობის ფორმის – მანტიის დამტკიცების შესახებ“ საქართველოს იუსტიციის უმაღლესი საბჭოს 2007 წლის 25 სექტემბრის №1/211-2007 გადაწყვეტილება 2011 წლის 1 სექტემბრიდან.

5. ეს გადაწყვეტილება ამოქმედდეს 2011 წლის 11 აპრილიდან.

საქართველოს იუსტიციის

უმაღლესი საბჭოს მდივანი ვ. ცერცვაძე       

დამტკიცებულია

საქართველოს იუსტიციის უმაღლესი საბჭოს

 2011 წლის 8 აპრილის №1/69 გადაწყვეტილებით

მოსამართლის განსაკუთრებული ჩაცმულობის ფორმა – მანტია

საქმის სასამართლო განხილვაში მოსამართლე მონაწილეობს განსაკუთრებული ჩაცმულობით –  მანტიით.

მანტია არის სწორი სილუეტის, იატაკიდან 20 სმ-ით დაცილებული. კალთა და ზურგი დამუშავებულია კოკეტკებით, კოკეტკის ქვემოთ კალთაზე თითოეულ მხარეს სამ-სამი ნაკეცით, ზურგზე შუაში ერთი შემხვედრი ნაკეცით, ხოლო გვერდებზე ორი შემხვედრი და თითო განიერი ნაკეცით.

კალთისა და ზურგის კოკეტკა სახელოს ჩაკერების ადგილას გაფორმებულია 4 სმ-იანი დაგოფრილი დეტალით. სახელო ჩაკერებულია ნაკეცებით, ერთი შემხვედრი ნაკეცი შუაში და თითო-თითო აქეთ-იქეთ. სახელოს ბოლო დამუშავებულია 7 სმ-ის სიგანის მანჟეტით.

მანტია იკვრება ფარული ღილით და ღილკილოთი, საყელო დგარი. მანტიას ახლავს ორი ცალი თეთრი საყელო, რომელიც გაფორმებულია წითელი კანტით. მანტიის საყელო მაგრდება ღილით და ღილკილოთი.

მანტია იკერება ნახევრად აბრეშუმის ქსოვილისაგან. ქსოვილის შემადგენლობაა: 63% პოლიესტერი, 32% ვისკოზა, 5% ელასტინი. ქსოვილის შემადგენლობის შეცვლა დასაშვებია ნატურალური ქსოვილის პროპორციულობის 5%-ით გაზრდის ხარჯზე.  

მანტიის ფერია მუქი შავი.