უნებართვოდ მცხოვრებ პირთა რეადმისიის შესახებ საქართველოს მიერ გაფორმებული შეთანხმებების შესრულების თაობაზე

საქართველოს პრეზიდენტის

ბრძანებულება №225

2011 წლის 26 აპრილი

ქ. თბილისი

უნებართვოდ მცხოვრებ პირთა რეადმისიის შესახებ საქართველოს მიერ გაფორმებული შეთანხმებების შესრულების თაობაზე

1. ,,საქართველოსა და ევროკავშირს შორის უნებართვოდ მცხოვრებ პირთა რეადმისიის შესახებ“ 2010 წლის 22 ნოემბერს ქ. ბრიუსელში ხელმოწერილი შეთანხმებისა და საქართველოს მიერ სხვა ქვეყნებთან გაფორმებული უნებართვოდ მცხოვრებ პირთა რეადმისიის შესახებ შეთანხმების (შემდეგში – რეადმისიის შეთანხმება) შესრულების მიზნით უფლებამოსილ ორგანოდ განისაზღვროს საქართველოს შინაგან საქმეთა სამინისტრო.

2. საქართველოს შინაგან საქმეთა სამინისტრომ განახორციელოს ევროკავშირის წევრ და სხვა სახელმწიფოების ტერიტორიაზე რეადმისიას დაქვემდებარებულ პირთა საქართველოში დაბრუნების ორგანიზაციული და პროცედურული საკითხები.

3. საქართველოს საგარეო საქმეთა სამინისტრომ, საქართველოს იუსტიციის სამინისტრომ და საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ ითანამშრომლონ საქართველოს შინაგან საქმეთა სამინისტროსთან რეადმისიის შეთანხმებით ნაკისრი ვალდებულებების შესასრულებლად და აღნიშნულის უზრუნველსაყოფად ამ ბრძანებულების ამოქმედებიდან ერთ თვეში უზრუნველყონ შესაბამისი ერთობლივი ბრძანების შემუშავება და გამოცემა.

4. ეს ბრძანებულება ამოქმედდეს გამოქვეყნებისთანავე.

მ . სააკაშვილი