„ქვეყანაში თავდაცვითი დანიშნულების სამეცნიერო-სამრეწველო საქმიანობის სრულყოფის ზოგიერთ ღონისძიებათა შესახებ“ საქართველოს პრეზიდენტის 1997 წლის 15 ოქტომბრის №582 ბრძანებულებაში დამატებების შეტანის თაობაზე

საქართველოს პრეზიდენტის

ბრძანებულება №533

2002 წლის 16 დეკემბერი

ქ. თბილისი

„ქვეყანაში თავდაცვითი დანიშნულების სამეცნიერო-სამრეწველო საქმიანობის სრულყოფის ზოგიერთ ღონისძიებათა შესახებ“ საქართველოს პრეზიდენტის 1997 წლის 15 ოქტომბრის №582 ბრძანებულებაში დამატებების შეტანის თაობაზე

მასობრივი განადგურების იარაღის, სხვა სახის იარაღის, მათი შექმნის ტექნოლოგიების გაუვრცელებლობის შესახებ საქართველოს კანონმდებლობის, აგრეთვე საქართველოს საერთაშორისო ხელ­შეკრულებებისა და შეთანხმებების შესაბამისად, ანტიტერორისტული კოალიციის წევრი სახელმწიფოების ვალდებულებებიდან გამომდინარე, ქვეყანაში სამხედრო დანიშნულების ტექნიკის, მოწყობილობებისა და ტექნოლოგიების ექსპორტზე სახელმწიფო კონტროლის გაძლიერების მიზნით „ქვეყანაში თავდაცვითი დანიშნულების სამეცნიერო-სამრეწველო საქმიანობის სრულყოფის ზოგიერთ ღონისძიებათა შესახებ“ საქართველოს პრეზიდენტის 1997 წლის 15 ოქტომბრის №582 ბრძა­ნებულებით დამტკიცებულ №2 და №3 დანართებში შეტანილ იქნეს შემდეგი დამატებები:

1. ეროვნული უშიშროების საბჭოს სამხედრო-ტექნიკურ საკითხთა მუდმივ საუწყებათაშორისო კომისიის შემადგენლობაში (№2 დანართი) შეყვანილ იქნეს ირაკლი მენაღარიშვილი – საქართველოს საგარეო საქმეთა მინისტრი.

2. „საქართველოს უცხოეთის ქვეყნებთან სამხედრო-ტექნიკური თანამშრომლობის წესის შესახებ“ დებულების (№3 დანართი) მე-2 თავის მე-14 პუნქტს ბოლოში დაემატოს აბზაცი შემდეგი რედაქციით:

„ – სამხედრო დანიშნულების ტექნიკის, მოწყობილობებისა და ტექნოლოგიების ექსპორტის განხორციელების დროს უზრუნველყოფს დაინტერესებული საერთაშორისო ორგანიზაციების ინფორმირებას და მათი მოსაზრებების, აგრეთვე არსებული საერთაშორისო და ორმხრივი შეზღუდვების გათვალისწინებით, აღნიშნულ საკითხზე ეროვნული უშიშროების საბჭოს სამხედრო-ტექნიკურ საკითხთა მუდმივ საუწ­ყებათაშორისო კომისიას წარუდგენს დასკვნას“.

ე. შევარდნაძე