განსაკუთრებულ პირობებში (სტიქიური უბედურება, მოსახლეობის მასობრივი დაზიანება, ეპიდემია, იშვიათი დაავადება), ან გადაუდებელი სახელმწიფო ინტერესების არსებობის შემთხვევაში არარეგისტრირებული სამკურნალო საშუალებების საქართველოს ტერიტორიაზე შემოტანის თაობაზე გადაწყვეტილების მისაღებად სამთავრობო კომისიის შექმნის შესახებ

საქართველოს პრეზიდენტის

ბრძანებულება №490

2003 წლის 30 სექტემბერი

ქ. თბილისი

განსაკუთრებულ პირობებში (სტიქიური უბედურება, მოსახლეობის მასობრივი დაზიანება, ეპიდემია, იშვიათი დაავადება), ან გადაუდებელი სახელმწიფო ინტერესების არსებობის შემთხვევაში არარეგისტრირებული სამკურნალო საშუალებების საქართველოს ტერიტორიაზე შემოტანის თაობაზე გადაწყვეტილების მისაღებად სამთავრობო კომისიის შექმნის შესახებ

ქვეყანაში განსაკუთრებულ ვითარებაში (სტიქიური უბედურება, მოსახლეობის მასობრივი დაზიანება, ეპიდემია, იშვიათი დაავადება), მოსახლეობისა და სამკურნალო-პროფილაქტიკური დაწესებულებების წამლით შეუფერხებლად და ოპერატიულად უზრუნველყოფის, „წამლისა და ფარმაცევტული საქმიანობის შესახებ“ საქართველოს კანონის 18⁷ მუხლის მე-2 პუნქტის შესრულების მიზნით, „სამთავრობო კომისიების შექმნის, უფლებამოსილებისა და საქმიანობის წესის შესახებ“ დებულების დამტკიცების თაობაზე“ საქართველოს პრეზიდენტის 2002 წლის პირველი მაისის №204 ბრძანებულების მოთხოვნებიდან გამომდინარე:

1. შეიქმნას სამთავრობო კომისია შემდეგი შემადგენლობით:

აკაკი ზოიძე – საქართველოს სახელმწიფო მინისტრის მოადგილე, კომისიის თავმჯდომარე

იაგორ კალანდაძე – საქართველოს შრომის, ჯანმრთელობისა და სოციალური დაცვის მინისტრის მოადგილე, კომისიის თავმჯდომარის მოადგილე

თინათინ ტურძილაძე – საქართველოს შრომის, ჯანმრთელობისა და სოციალური დაცვის სამინისტროს წამლისა და ფარმაცევტული საქმიანობის დეპარტა­მენტის უფროსის მოადგილე, კომისიის პასუხისმგებელი მდივანი

შოთა ასათიანი – საქართველოს შინაგან საქმეთა მინისტრის პირველი მოადგილე

ოთარ ბარათაშვილი – საქართველოს შრომის, ჯანმრთელობისა და სოციალური დაცვის მინისტრის მოადგილე

ვასილ გიგოლაშვილი – საქართველოს ფინანსთა მინისტრის მოადგილე

ზურაბ თავართქილაძე – საქართველოს გარემოსა და ბუნებრივი რესურსების დაცვის მინისტრის პირველი მოადგილე

ნათელა თურნავა – საქართველოს ეკონომიკის, მრეწველობისა და ვაჭრობის მინისტრის პირველი მოადგილე

ირინა იმერლიშვილი – საქართველოს იუსტიციის მინისტრის მოადგილე

მაია მაჭავარიანი – საქართველოს სახელმწიფო კანცელარიის სოციალურ საკითხთა სამსახურის რეფერენტი

მამუკა მუჯირი – საქართველოს სახელმწიფო უშიშროების მინისტრის მოადგილე.

2. კომისია თავის საქმიანობას ახორციელებს კომისიის სხდომების მეშვეობით, წინასწარ დამტკიცებული დღის წესრიგით. სხდომას უძღვება კომისიის თავმჯდომარე, ხოლო მისი არყოფნის შემთხვევაში – თავმჯდომარის მოადგილე.

3. კომისიის სამუშაო სხდომები იმართება საჭიროების შემთხვევაში, ქვეყანაში „წამლისა და ფარმაცევტული საქმიანობის შესახებ“ საქართველოს კანონის 18⁷ მუხლის მე-2 პუნქტით გათვალისწინებული განსაკუთრებული პირობების შექმნის (სტიქიური უბედურება, მოსახლეობის მასობრივი დაზიანება, ეპიდემია, იშვიათი დაავადება), ან გადაუდებელი სახელმწიფო ინტერესების არსებობისას.

4. კომისიის უფლებამოსილება განისაზღვროს უვადოდ.

5. კომისიის სხდომა უფლებამოსილია, თუ მას ესწრება კომისიის წევრთა სრული შემადგენლობის ნახევარზე მეტი.

6. კომისიის სხდომის გადაწყვეტილება მიღებულად ჩაითვლება, თუ მას მხარს დაუჭერს კომისიის დამსწრე წევრთა ნახევარზე მეტი.

7. ქვეყანაში შექმნილი მდგომარეობის სირთულის, ან სახელმწიფო ინტერესების მნიშვნელობის გათვალისწინებით კომისია ამზადებს წინადადებებს, რომლებსაც წინასწარ ეცნობა კომისიის ყველა წევრი.

8. გადაწყვეტილების მოსამზადებლად, საჭიროების შემთხვევაში, კომისია უფლებამოსილია მოითხოვოს ყველა სახის საჭირო ინფორმაცია ნებისმიერი უწყებიდან. გადაწყვეტილების მიღება ხდება ღია კენჭისყრით.

9. კომისია თავის გადაწყვეტილებას ქვეყანაში არარეგისტრირებული სამკურნალო საშუალებების შემოტანის თაობაზე აფორმებს ოქმით, რომელსაც ხელს აწერს სხდომის თავმჯდომარე და კომისიის პასუხისმგებელი მდივანი.

10. საჭიროების შემთხვევაში კომისიის სხდომის მუშაობაში მონაწილეობის მისაღებად დასაშვებია მოწვეულ იქნენ შესაბამისი სპეციალისტები სათათბირო ხმის უფლებით.

11. კომისიის საბოლოო გადაწყვეტილებას ხელს აწერს კომისიის ყველა წევრი.

ე. შევარდნაძე