საჯარო სამართლის იურიდიული პირის – ჯანმრთელობის ეროვნული ინსტიტუტის და საჯარო სამართლის იურიდიული პირის – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრის შექმნის შესახებ

საქართველოს პრეზიდენტის

ბრძანებულება №55

2003 წლის 21 თებერვალი

ქ. თბილისი

საჯარო სამართლის იურიდიული პირის – ჯანმრთელობის ეროვნული ინსტიტუტის და საჯარო სამართლის იურიდიული პირის – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრის შექმნის შესახებ

სამედიცინო მეცნიერების თანამედროვე მიღწევების კოორდინაციის, ქვეყნის მოსახლეობის ხარისხიანი სამედიცინო მომსახურებისათვის ხელშეწყობის, ადამიანის განვითარების პრობლემების მეცნიერული მეთოდოლოგიის დამუშავების, ჯანმრთელობის დაცვის სფეროში ადამიანური რესურსების პროფესიული მომზადებისა და მათი უწყვეტი განათლების უზრუნველსაყოფად, დაავადებათა აღრიცხვის, ანალიზისა და კონტროლის, საზოგადოებრივი ჯანმრთელობის დაცვის პროგრამების განვითარების მიზნით:

1. შეიქმნას:

ა) საჯარო სამართლის იურიდიული პირი – ჯანმრთელობის ეროვნული ინსტიტუტი;

ბ) საჯარო სამართლის იურიდიული პირი – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრი.

2. დამტკიცდეს:

ა) საჯარო სამართლის იურიდიული პირის – ჯანმრთელობის ეროვ­ნული ინსტიტუტის თანდართული დებულება;

ბ) საჯარო სამართლის იურიდიული პირის – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრის თანდართული დებულება.

3. საჯარო სამართლის იურიდიული პირის – ჯანმრთელობის ეროვნული ინსტიტუტის და საჯარო სამართლის იურიდიული პირის – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრის სახელმწიფო კონტროლი განახორციელოს საქართველოს შრომის, ჯანმრთელობისა და სოციალური დაცვის სამინისტრომ.

 4. საჯარო სამართლის იურიდიულმა პირმა – ჯანმრთელობის ეროვნულმა ცენტრმა უზრუნველყოს ჯანმრთელობის დაცვის სფეროში რეალიზებად სახელმწიფო და საერთაშორისო პროგრამებში შპს „საქართველოს ჯანმრთელობის დაცვის მართვის ნაციონალური ცენტრის“ უფლება-მოვალეობათა განხორციელება.

5. საჯარო სამართლის იურიდიულმა პირმა – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნულმა ცენტრმა უზრუნველყოს ჯანმრთელობის დაცვის სფეროში რეალიზებად სახელმწიფო და საერთაშორისო პროგრამებში ლ. საყვარელიძის სახელობის დაავადებათა კონტროლის ეროვნული ცენტრისა და შპს „სამედიცინო სტატისტიკისა და ინფორმაციის ცენტრის“ უფლება-მოვალეობათა განხორციელება.

     6. საქართველოს სახელმწიფო ქონების მართვის სამინისტრომ (ს. პავლიაშვილი) უმოკლეს დროში უზრუნველყოს შპს „საქართველოს ჯანმრთელობის დაცვის მართვის ნაციონალური ცენტრის“; შპს „ლ. საყვარელიძის სახელობის დაავადებათა კონტროლის ეროვნული ცენტრისა“ და შპს „სამედიცინო სტატისტიკისა და ინფორმაციის ცენტრის“ ლიკვიდაცია და ამის შედეგად გამოთავისუფლებული ქონების გადაცემა საჯარო სამართლის იურიდიული პირების – ჯანმრთელობის ეროვნული ინსტიტუტისა და ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრისათვის კანონმდებლობით დადგენილი წესით.

7. ამ ბრძანებულების ამოქმედებიდან ძალადაკარგულად ჩაითვალოს: „საქართველოს ჯანმრთელობისა და სოციალური დაცვის სისტემაში საჯარო სამართლის იურიდიული პირების ჩამოყალიბების შესახებ“ საქართველოს პრეზიდენტის 2000 წლის 8 აპრილის №136 ბრძანებულების პირველი და მეორე პუნქტების „თ“ ქვეპუნქტები.

8. საქართველოს შრომის, ჯანმრთელობისა და სოციალური დაცვის სამინისტრომ (ა. გამყრელიძე) კანონმდებლობით დადგენილი წესით უზრუნველყოს საჯარო სამართლის იურიდიული პირის – ადამიანის განვითარების პრობლემების სამეცნიერო-კვლევითი ცენტრის ლიკვიდაციისათვის საჭირო ღონისძიებების განხორციელება.

ე. შევარდნაძე

საჯარო სამართლის იურიდიული პირის – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრის დებულება

    მუხლი 1. ზოგადი დებულებები

1. საჯარო სამართლის იურიდიული პირი – ლ. საყვარელიძის სახელობის დაავადებათა კონტროლისა და სამედიცინო სტატისტიკის ეროვნული ცენტრი (შემდგომში – ცენტრი) შექმნილია „საჯარო სამართლის იურიდიული პირის შესახებ“ საქართველოს კანონის საფუძველზე.

2. ცენტრი თავის საქმიანობის განსახორციელებლად ხელმძღვანელობს საქართველოს კონსტიტუციით, საქართველოს კანონებით, საქართველოს პრეზიდენტის ბრძანებულებებითა და განკარგულებებით, საქართველოს შრომის, ჯანმრთელობისა და სოციალური დაცვის მინისტრის ბრძანებებით, ამ დებულებით და სხვა ნორმატიული აქტებით.

3. ცენტრი, როგორც საჯარო სამართლის იურიდიული პირი, ამ დებულებით დადგენილი მიზნებისა და დაკისრებული ფუნქციების განსახორციელებლად საკუთარი სახელით იძენს უფლებებსა და მოვალეობებს, დებს გარიგებებს და უფლებამოსილია სასამართლოში გამოვიდეს მოსარჩელედ და მოპასუხედ. გარიგებები, რომლებიც სცილდება კანონით დადგენილი უფლებამოსილების ფარგლებს, ბათილია.

4. ცენტრს აქვს დამოუკიდებელი ბალანსი, ბეჭედი, ანგარიშები ბანკში.

5. ცენტრის იურიდიული მისამართია: საქართველო, ქ. თბილისი, მ. ასათიანის ქ. №9.

    მუხლი 2. მიზნები, ფუნქციები და საქმიანობის საგანი

1. ცენტრის ფუნქციონირების მიზანია მეცნიერულ საფუძველზე დაყრდნობით ეპიდზედამხედველობის, დაავადებათა კონტროლისა და პროფილაქტიკის ღონისძიებების ორგანიზებისა და განხორ­­ციელებისათვის ხელშეწყობა, თავისი კომპეტენციის ფარგლებში სამედიცინო სტატისტიკის ერთიანი ინფორმაციული სისტემის შექმნა და მისი სრულყოფა. საქმიანობის სფეროში გრძელვადიანი და მოკ­ლევადიანი პროგრამების შემუშავება.

2. ჯანმრთელობის დაცვისა და მედიცინის დარგში სოციალური სტატისტიკის წარმოება, ერთიანი ინფორმაციული სისტემის შექმნა და მისი სრულყოფა სწორი სტრატეგიის, ტაქტიკისა და ოპერატიული გადაწყვეტილებების უზრუნველსაყოფად.

3. ცენტრის ძირითადი ამოცანები და ფუნქციებია:

ა) ეპიდაფეთქებებისა და ეპიდემიების მიზეზების დადგენა; ეპიდსაწინააღმდეგო მონაწილეობის მიღება ცენტრის კომპეტენციის ფარგლებში;

ბ) შავი ჭირის ბუნებრივ და ეპიდემიურ კერებში საკარანტინო და ეპიდსაწინააღმდეგო ღონისძიებების დაგეგმვა და განხორციელება;

გ) დაავადებათა პროფილაქტიკა;

დ) სადეზინფექციო, სადეზინსექციო და სადერატიზაციო საქმიანობა;

ე) სამკურნალო და კონსულტაციური დახმარება განსაკუთრებით საშიში ინფექციებით დაავადებულთათვის;

ვ) ქვეყანაში და საზღვარგარეთ ინფექციურ დაავადებათა შესახებ ინფორმაციის მიღება, ამ მონაცემების ანალიზის შედეგად სახელმწიფო ორგანოებისა და საერთაშორისო ორგანიზაციებისათვის ეპიდ­საწინააღმდეგო რეკომენდაციებისა და ინფორმაციის მიწოდება;

ზ) სამეცნიერო საქმიანობა, მედიცინის მიღწევათა და ინფორმაციული სისტემების თეორიული საკითხების შემუშავებისათვის ხელშეწყობა;

თ) მიკროორგანიზმებისა და გადამტანების საწინააღმდეგო საშუალებების, საკვები ნიადაგების, იმუნობიოლოგიური პრეპარატების დამზადება, მათი ვარგისიანობის, დეზინფექციის ეფექტიანობისა და სტერილობის განსაზღვრა;

ი) ბაქტერიებისა და ვირუსების ეროვნული კოლექციის ორგანიზაცია;

კ) ეპიდზედამხედველობის, დაავადებათა კონტროლისა და პროფილაქტიკის ბიოლოგიური უსაფრთხოების შესახებ ნორმატიული და მეთოდური დოკუმენტების შემუშავებაში მონაწილეობის მიღება;

ლ) კომპეტენციის ფარგლებში სამედიცინო ტექნოლოგიების, სამეცნიერო კვლევების მეთოდოლოგიის სრულყოფის საქმიანობაში მონაწილეობის მიღება;

მ) თავისი კომპეტენციის ფარგლებში სხვადახსვა ორგანიზაციებთან, იურიდიულ და ფიზიკურ პირებთან, აგრეთვე, უცხო ქვეყნის შესაბამის ორგანოებთან, საერთაშორისო ორგანიზაციებთან საქმიანი ურთიერთობის დამყარება;

ნ) სამედიცინო ინფორმაციის ერთიანი სახელმწიფო სისტემის ორგანიზაცია, სოციალური ანალიზი, პროგნოზირება, ჯანდაცვითი და სამედიცინო სტატისტიკის პროგრესული ფორმებისა და მეთოდების შემუშავებაში მონაწილეობა;

ო) ჯანდაცვის ინტეგრირებულ და დანაწილებულ მონაცემთა ბაზების შექმნა თანამედროვე ტექნოლოგიების გამოყენებით;

პ) ეროვნულ მონაცემთა ბაზების დასაკავშირებლად ინფორმაციული ქსელის შექმნა;

ჟ) სტატისტიკური ინფორმაციის შეგროვებისა და ანალიზის მეთოდოლოგიის შემუშვება;

რ) სტატისტიკური ანალიზი დაავადებათა დიაგნოსტიკის, პროფილაქტიკისა და მკურნალობის სფეროში;

ს) თავისი კომპეტენციის ფარგლებში მიზნობრივი პროგრამების, პროექტებისა და ტექნოლოგიების შემუშავებაში მონაწილეობა და ექსპერტიზა შესაბამის სტრუქტურულ ორგანოებთან თანამშრომლობის საფუძველზე;

ტ) სახელმწიფო პროგრამების შესრულებაში სახელშეკრულებო საწყისებზე მონაწილეობის მიღება.

4. სამეცნიერო ფორუმების (კონფერენცია, სემინარი, კონგრესი, ყრილობა) ორგანიზაცია-გამართვა და მონაწილეობის მიღება როგორც ქვეყნის შიგნით, ისე მის ფარგლებს გარეთ.

5. საგამომცემლო საქმიანობის განხორციელება.

6. თავისი კომპეტენციის ფარგლებში ცენტრის სტრუქტურული ქვედანაყოფების მუშაობის ორგანიზაცია, კოორდინაცია, მართვა და კონტროლი.

    მუხლი 3. ცენტრის მართვა

1. ცენტრს მართავს დირექტორი, რომელსაც თანამდებობაზე ნიშნავს და თანამდებობიდან ათავისუფლებს საქართველოს შრომის, ჯანმრთელობისა და სოციალური დაცვის მინისტრი.

2. ცენტრის დირექტორი პერსონალურად ხელმძღვანელობს ცენტრის საქმიანობას და აწესრიგებს ცენტრის საქმიანობის სფეროს მიკუთვნებულ საკითხებს.

3. ცენტრის დირექტორი:

ა) მოქმედებს ცენტრის სახელით და წარმოადგენს მის ინტერესებს წერილობითი უფლებამოსილების გარეშე ყველა სახელმწიფო თუ არასახელმწიფო დაწესებულებასთან ურთიერთობაში, აგრეთვე, სასამართლოში ცენტრის საქმიანობასთან დაკავშირებული საკითხების განხილვისას. მასვე ეკისრება ცენტრის წარმომადგენლობა და პერსონალურად აგებს პასუხს მისი საქმიანობის სწორად წარმართვისათვის. ცენტრის დირექტორს ეკისრება პასუხისმგებლობა ცენტრის ქონებისა და ფულადი სახსრების მიზნობრივად და სწორად ხარჯვისათვის;

ბ) თანამდებობაზე ნიშნავს და თანამდებობიდან ათავისუფლებს ცენტრის სტრუქტურული ქვედანაყოფების ხელმძღვანელებსა და ცენტრის თანამშრომლებს;

გ) გამოსცემს ინდივიდუალური ხასიათის ბრძანებებს, რომლებიც სავალდებულოა შესასრულებლად ყველა თანამშრომლისათვის;

დ) საქართველოს შრომის, ჯანმრთელობისა და სოციალური დაცვის სამინისტროსთან შეთანხმებით ამტკიცებს ცენტრის საშტატო ნუსხას და შრომის ანაზღაურების ფონდს;

ე) ამტკიცებს ცენტრის შინაგანაწესს, რომლის შესრულება სავალდებულოა ცენტრის თითოეული თანამშრომლისათვის.

4. ცენტრის დირექტორს ჰყავს სამი მოადგილე, რომლებსაც თანამდებობაზე ნიშნავს და თანამდებობიდან ათავისუფლებს საქართველოს შრომის, ჯანმრთელობისა და სოციალური დაცვის მინისტრი.

5. პერსპექტიული და მიმდინარე პრობლემების განხილვის, დაგეგმვის, ერთიანი სამეცნიერო პოლიტიკის განხორციელების, სამამულო და უცხო ქვეყნების მეცნიერებისა და ტექნიკის უახლესი მიღწევების გამოყენებისათვის რეკომენდაციების შემუშავების მიზნით ცენტრში იქმნება სამეცნიერო საბჭო, რომლის დებულებას ამტკიცებს საქართველოს შრომის, ჯანმრთელობისა და სოციალური დაცვის მინისტრი.

    მუხლი 4. ცენტრის საქმიანობის სახელმწიფო კონტროლი

1. ცენტრის საქმიანობის სახელმწიფო კონტროლს ახორციელებს საქართველოს შრომის, ჯანმრთელობისა და სოციალური დაცვის სამინისტრო, რომელსაც უფლება აქვს მოითხოვოს კონტროლის განსახორციელებლად საჭირო მასალები და ინფორმაცია.

2. საქართველოს შრომის, ჯანმრთელობისა და სოციალური დაცვის სამინისტრო ზედამხედველობას უწევს ცენტრის საქმიანობის კანონიერებას, მიზანშეწონილობას, ეფექტიანობას და ახორციელებს საფინანსო-ეკონომიკური საქმიანობის ზედამხედველობას.

3. საქართველოს შრომის, ჯანმრთელობისა და სოციალური დაცვის მინისტრი უფლებამოსილია შეაჩეროს ცენტრის დირექტორის არამართლზომიერი გადაწყვეტილება.

4. ცენტრმა შრომის, ჯანმრთელობისა და სოციალური დაცვის სამინისტროს თანხმობით და კანონით გათვალისწინებული წესით შეიძლება განახორციელოს შემდეგი საქმიანობა:

ა) უძრავი ქონების შეძენა, გასხვისება და დატვირთვა;

ბ) სესხების აღება;

გ) თავდებობა;

დ) საშტატო ნუსხისა და ხელფასის ფონდის განსაზღვრა;

ე) სხვა გადაწყვეტილების მიღება ცენტრის ქონებასთან დაკავშირებით, თუ ისინი სცილდება ჩვეულებრივი საქმიანობის ფარგლებს.

5. ამ მუხლის მე-4 პუნქტის „ბ“ და „გ“ ქვეპუნქტების განსახორციელებლად აუცილებელია აგრეთვე, საქართველოს ფინანსთა სამინისტროს თანხმობა.

6. ამ მუხლის მე-4 პუნქტის „ა“ ქვეპუნქტით გათვალისწინებულ მოქმედებათა განსახორციელებლად აუცილებელია აგრეთვე, საქართველოს სახელმწიფო ქონების მართვის სამინისტროს თანხმობა.

    მუხლი 5. საფინანსო-ეკონომიკური საქმიანობა

1. ცენტრის შემოსავლის წყარო შეიძლება იყოს:

ა) ცენტრალური ბიუჯეტიდან გამოყოფილი მიზნობრივი სახსრები;

ბ) სახელმწიფო შეკვეთის შესრულების შედეგად მიღებული შემოსავალი;

გ) ხელშეკრულებისა და გრანტების საფუძველზე შესრულებული სამუშაოდან მიღებული შემოსავალი;

დ) საქართველოს კანონმდებლობით ნებადართული სხვა შემოსავალი.

2. მიღებული შემოსავლები მთლიანად ხმარდება ცენტრის დებულებით განსაზღვრული მიზნებისა და ფუნქციების შესრულებას, სხვა მიზნით მათი გამოყენება აკრძალულია.

3. ცენტრი ვალდებულია საქართველოს კანონმდებლობით დადგენილი წესით აწარმოოს საფინანსო-ეკონომიკური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს შრომის, ჯანმრთელობისა და სოციალური დაცვის სამინისტროს.

4. ცენტრის წლიურ ბალანსს ამოწმებს საქართველოს შრომის, ჯანმრთელობისა და სოციალური დაცვის სამინისტროს მიერ დანიშნული დამოუკიდებელი აუდიტი.

    მუხლი 6. საქმიანობის შეწყვეტა, ლიკვიდაცია

ცენტრის საქმიანობა საჯარო სამართლის იუიდიული პირის სტატუსით შეიძლება შეწყდეს შემდეგ შემთხვევებში:

ა) ცენტრი არსებითად გადავიდა სამეწარმეო საქმიანობაზე;

ბ) დასახული მიზნის მიღწევა შეუძლებელია.

2. საქმიანობის შეწყვეტა ხორციელდება კანონით დადგენილი წესით.

3. ცენტრის ლიკვიდაცია ხორციელდება კანონმდებლობით დადგენილი წესით. ლიკვიდაციის შედეგად დარჩენილი ქონება გადადის სახელმწიფოს საკუთრებაში.

    მუხლი 7. ცენტრის დებულებაში ცვლილებების შეტანის წესი

ცენტრის დებულებაში ცვლილებების შეტანა ხორციელდება საქართველოს პრეზიდენტის ბრძანებულებით.

 

 

საჯარო სამართლის იურიდიული პირის – ჯანმრთელობის ეროვნული ინსტიტუტის დებულება

    მუხლი 1. ჯანმრთელობის ეროვნული ინსტიტუტის სამართლებრივი სტატუსი

1. ჯანმრთელობის ეროვნული ინსტიტუტი (შემდგომში – ინსტიტუტი) არის საჯარო სამართლის იურიდიული პირი, რომელიც შექმნილია „საჯარო სამართლის იურიდიული პირის შესახებ” საქართველოს კანონის შესაბამისად და წარმოადგენს სახელწიფო მმართველობის ორგანოებისაგან განცალკევებულ ორგანიზაციას.

2. დადგენილი მიზნებისა და ფუნქციების განსახორციელებლად ინსტიტუს გააჩნია სპეციალური უფლებაუნარიანობა. იგი საკუთარი სახელით იძენს უფლებებსა და მოვალეობებს, დებს გარიგებებს და უფლებამოსილია სასამართლოში გამოვიდეს მოსარჩელედ და მოპასუხედ.

3. ინსტიტუტი თავის საქმიანობაში ხელმძღვანელობს საქართველოს კონსტიტუციით, საქართველოს კანონებით, საქართველოს პრეზიდენტის ბრძანებულებებით, ამ დებულებით და სხვა ნორმატიული აქტებით.

4. ინსტიტუტს აქვს დამოუკიდებელი ბალანსი, ბეჭედი, ანგარიშები ბანკში.

5. ინსტიტუტის იურიდიული მისამართია: საქართველოს, ქ. თბილისი, ივ. ჯავახიშვილის ქ. №51.

    მუხლი 2. ინსტიტუტის მიზნები, ფუნქციები და საქმიანობის საგანი

1. ინსტიტუტის მიზანია მედიცინის დარგის ინტელექტუალური პოტენციალის მობილიზება, ჯანმრთელობისა და სოციალური დაცვის სისტემის რეფორმირების პროცესის მეცნიერული უზრუნველყოფა, ჯანმრთელობისა და სოციალური დაცვის სფეროში სამეცნიერო და პრაქტიკული კვლევების შედეგების თავმოყრა, ცხოვრებაში განხორციელების ორგანიზება და მონიტორინგი, ადამიანის განვითარების პროებლემების მეცნიერული მეთოდოლოგიის შემუშავება, ამ სფეროში სახელმწიფო პოლიტიკის მეცნიერული უზრუნველყოფა.

2. დასახული მიზნების შესასრულებლად ინსტიტუტი:

ა) მონაწილეობს ჯანმრთელობისა და სოციალური სფეროს საკანონმდებლო ბაზის სრულყოფისათვის კანონპროექტებისა და კანონქვემდებარე აქტების მომზადებაში;

ბ) თავისი კომპეტენციის ფარგლებში შეიმუშავებს ჯანმრთელობისა და სოციალური დაცვის პოლიტიკის სრულყოფისათვის რეკომენდაციებსა და წინადადებებს და წარუდგენს საქართველოს შრომის, ჯანმრთელობისა და სოციალური დაცვის სამინისტროს;

გ) მონაწილეობს მოსახლეობის ჯანმრთელობის მდგომარეობის შესახებ ეროვნული მოხსენებისა და ჯანმრთელობის დაცვის ეროვნული ანგარიშის მომზადებასა და გამოცემაში;

დ) შეიმუშავებს ჯანმრთელობის, სხვა სოციალური სახელმწიფო პროგრამებს და სახელმწიფო სამედიცინო სტანდარტების პროექტებს, აგრეთვე ორგანიზაციას უწევს ამ პროგრამების ექსპერტიზას და წარუდგენს საქართველოს შრომის, ჯანმრთელობისა და სოციალური დაცვის სამინისტროს;

ე) ახორციელებს ჯანმრთელობის დაცვის მენეჯმენტის, ჯანმრთელობის დაცვის ადმინისტრირების, ჯანმრთელობის დაცვის ეკონომიკის, საექთნო საქმიანობისა და საოჯახო მედიცინის დიპლომისშემდგომ და უწყვეტ განათლებას;

ვ) უზრუნველყოფს სამედიცინო ქსელის საორგანიზაციო-მეთოდურ მომსახურებას, აქვს საკუთარი ბეჭდვითი ორგანო (გაზეთი, ჟურნალი და სხვ.);

ზ) სამედიცინო დარგის მაღალკვალიფიციური კადრების მომზადების მიზნით აქტიურად თანამშრომლობს საერთაშორისო ორგანიზაციებთან, საქართველოს შრომის, ჯანმრთელობისა და სოციალური დაცვის სამინისტროსთან შეთანხმებით მიავლენს სპეციალისტებს, ამ საკითხზე დებს ხელშეკრულებებს უცხოეთის ორგანიზაციებთან;

თ) ინსტიტუტი აწყობს სამეცნიერო და პრაქტიკულ კონფერენციებს, სიმპოზიუმებს, სემინარებს და იყენებს ინფორმაციის მიწოდების სხვა საშუალებებს;

ი) სამედიცინო მეცნიერების განვითარებისათვის ხელშეწყობის კოორდინაციის მიზნით თანამშრომლობს სამეცნიერო დაწესებულებებთან, სამთავრობო, არასამთავრობო და სხვა დაინტერესებულ ორგანიზაციებთან, დებს ხელშეკრულებებს საქართველოსა და უცხოეთის ფიზიკურ და იურიდიულ პირებთან;

კ) შეიმუშავებს საქართველოში ახალი სამედიცინო ტექნოლოგიებსა და სამეცნიერო ბიზნესის განვითარებისათვის ხელშეწყობის პროგრამებსა და მეთოდოლოგიურ საფუძვლებს;

ლ) დაინტერესებულ ორგანიზაციებთან თანამშრომლობით შეიმუშავებს ადამიანის განვითარების პრობლემების მეცნიერულ მეთოდოლოგიას, აანალიზებს მის მნიშვნელობას ადამიანის სოციალური განვითარებისათვის და ამ მიმართულებებით უზრუნველყოფს სახელმწიფოებრივი პოლიტიკის მხარდაჭერას.

    მუხლი 3. ინსტიტუტის ქონება

დასახული მიზნებისა და ფუნქციების განსახორციელებლად ინსტიტუტს ფლობისა და სარგებლობის უფლებით გადაეცემა ქონება, რომელიც დადგენილი წესით აისახება მის საბუღალტრო ბალანსში.

    მუხლი 4. ინსტიტუტის მართვა და სტრუქტურა

1. ინსტიტუტს მართავს დირექტორი, რომელიც დამოუკიდებლად მოქმედებს თავისი კომპეტენციის ფარგლებში და არის წარმომადგენლობის უფლებამოსილი პირი.

2. ინსტიტუტის დირექტორს თანამდებობაზე ნიშნავს და თანამდებობიდან ათავისუფლებს საქართველოს შრომის, ჯანმრთელობისა და სოციალური დაცვის მინისტრი.

3. ინსტიტუიტს დირექტორი:

ა) პერსონალურად ხელმძღვანელობს ინსტიტუტის საქმიანობას და აწესრიგებს ინსტიტუტის გამგებლობის სფეროს მიკუთვნებულ საკითხებს;

ბ) მოქმედებს ინსტიტუტის სახელით და წარმოადგენს მის ინტერესებს წერილობით მინიჭებული უფლებამოსილების გარეშე ყველა სახელმწიფო და არასახელმწიფო დაწესებულებასთან ურთიერთობისას, აგრეთვე, სასამართლოში ინსტიტუტის საქმიანობასთან დაკავშირებული საკითხების განხილვისას;

გ) ინსტიტუტის დირექტორი თანამდებობაზე ნიშნავს და თანამდებობიდან ათავისფლებს ინსტიტუტის თანამშრომლებს;

 დ) გამოსცემს ინდივიდუალური ხასიათის ბრძანებებს, რომლელიც სავალდებულოა შესასრულებლად ყველა თანამშრომლისათვის;

ე) საქართველოს შრომის, ჯანმრთელობისა და სოციალური დაცვის მინისტრთან შეთანხმერბით ამტკიცებს დაწესებულების საშტატო ნუსხას და შრომის ანაზღაურების ფონდს;

ვ) ამტკიცებს ინსტიტუტის შინაგანაწესს;

ზ) კანონით დადგენილი წესით განკარგავს ინსტიტუტის სახსრებს და პასუხისმგებელია ინსტიტუტის საკუთრებაში, ან სარგებლობასა და მფლობელობაში არსებული ქონებისა და ფულადი სახსრების მიზნობრივი და სწორი ხარჯვისათვის;

თ) პერსპექტიული და მიმდინარე პრობლემების განხილვის, დაგეგმვის, ინსტიტუტის წინაშე დასახული მიზნების სრულყოფილად განხორციელების, მის საქმიანობასთან დაკავშირებული რეკომენდაციების შემუშავების მიზნით ინსტიტუტში იქმნება სამეცნიერო საბჭო, რომლის მუშაობის რეგლამენტი განსაზღვრულია საბჭოს დებულებით, საბჭოს დებულებას ამტკიცებს საქართველოს შრომის, ჯანმრთელობისა და სოციალური დაცვის მინისტრი;

ი) ინსტიტუტის დირექტორს ჰყავს სამი მოადგილე, რომელთაც თანამდებობაზე ნიშნავს და თანამდებობიდან ათავისუფლებს საქართველოს შრომის, ჯანმრთელობისა და სოციალური დაცვის მინისტრი.

    მუხლი 5. ინსტიტუტის საქმიანობის სახელმწიფო კონტროლი

1. ინსტიტუტის საქმიანობის სახელმწიფო კონტროლს ახორციელებს საქართველოს შრომის, ჯანმრთელობისა და სოციალური დაცვის სამინისტრო, რომელიც ზედამხედველობას უწევს ინსტიტუტის საქმიანობის მიზანშეწონილობას, კანონიერებას, რესურსების გამოყენებას, მიზნების მისაღწევად აუცილებელ საქმიანობას და მის ეფექტიანობას, ამოწმებს ინსტიტუტის საფინანსო-ეკონომიკურ საქმიანობის კანონიერებასა და ეფექტიანობას.

2. საქართველოს შრომის, ჯანმრთელობისა და სოციალური დაცვის სამინისტრო უფლებამოსილია ინსტიტუტისაგან მოითხოვოს კონტროლის განსახორციელებლად საჭირო მასალები და ინფორმაცია.

3. საქართველოს შრომის, ჯანმრთელობისა და სოციალური დაცვის მინისტრი უფლებამოსილია შეარჩიოს ან გააუქმოს ინსტიტუტის არამართლზომიერი გადაწყვეტილება.

4. ინსტიტუტმა საქართველოს შრომის, ჯანმრთელობისა და სოციალური დაცვის სამინისტროს თანხმობით შეიძლება განახორციელოს:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო განრიგისა და შრომის ანაზღაურების ფონდის განსაზღვრა;

ე) ინსტიტუტის საქმიანობასთან დაკავშირებული სხვა გადაწყვეტილება, თუ ისინი სცილდება ჩვეულებრივი საქმიანობის ფარგლებს.

5. ამ მუხლის მე-4 პუნქტის „ბ” და „გ” ქვეპუნქტებით გათვალისწინებულ მოქმედებათა განსახორციელებლად აუცილებელია, აგრეთვე, საქართველოს ფინანსთა სამინისტროს თანხმობა.

6. ამ მუხლის მე-4 პუნქტის „ა” ქვეპუნქტით გათვალისწინებულ მოქმედებათა განსახორციელებლად აუცილებელია, აგრეთვე, საქართველოს სახელმწიფო ქონების მართვის სამინისტროს თანხმობა.

7. ამ მუხლის მე-4 პუნქტით განსაზღვრული მოქმედებების განხორციელებისათვის სახელმწიფო კონტროლის განმახორციელებელი ორგანოს უარი უნდა იყოს დასაბუთებული. უარი შეიძლება გასაჩივრდეს სასამართლოში.

    მუხლი 6. საფინანსო საქმიანობა

1. ინსტიტუტის დაფინანსების წყარო შეიძლება იყოს:

ა) საქართველოს ცენტრალური ბიუჯეტიდან გამოყოფილი სახსრები;

ბ) სახელმწიფო შეკვეთის შესრულების შედეგად მიღებული შემოსავალი;

გ) ხელშეკრულებისა და გრანტების საფუძველზე სამუშაოს შესრულების შედეგად მიღებული შემოსავალი;

დ) საქართველოს კანონმდებლობით ნებადართული სხვა შემოსავალი.

2. მიღებული შემოსავლები ხმარდება უშუალოდ ინსტიტუტის დებულებით განსაზღვრული მიზნებისა და ფუნქციების შესრულებას.

3. ინსტიტუტი ვალდებულია, საქართველოს კანონმდებლობით დადგენილი წესით აწარმოოს საფინანსო-ეკონომიკური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს საქართველოს შრომის, ჯანმრთელობისა და სოციალური დაცვის სამინისტროს.

4. ინსტიტუტის წლიურ ბალანსს ამოწმებს საქართველოს შრომის, ჯანმრთელობისა და სოციალური დაცვის სამინისტროს მიერ დანიშნული დამოუკიდებელი აუდიტი.

    მუხლი 7. ინსტიტუტის დებულებაში ცვლილებების შეტანის წესი

ინსტიტუტის დებულებაში ცვლილებების შეტანა ხდება საქართველოს კანონმდებლობით დადგენილი წესით.

    მუხლი 8. ინსტიტუტის რეორგანიზაცია და ლიკვიდაცია

1. ინსტიტუტის რეორგანიზაცია ან ლიკვიდაცია „საჯარო სამართლის იურიდიული პირის შესახებ” საქართველოს კანონის შესაბამისად ხორციელდება საქართველოს კანონმდებლობით დადგენილი წესით.

2. ინსტიტუტის ლიკვიდაციის შედეგად დარჩენილი ქონება გადადის სახელმწიფო საკუთრებაში.