ქ. თბილისის ტერიტორიაზე ჩამორთმეული ან/და მოპოვებული მწვანე ნარგავებისა და სამართალდარღვევის იარაღის (იარაღების) განკარგვის წესის დამტკიცების შესახებ

ქალაქ თბილისის მთავრობის

დადგენილება №07.01.228

2011 წლის 28 მარტი

ქ. თბილისი

ქ. თბილისის ტერიტორიაზე ჩამორთმეული ან/და მოპოვებული მწვანე ნარგავებისა და სამართალდარღვევის იარაღის (იარაღების) განკარგვის წესის დამტკიცების შესახებ

„ საქართველოს დედაქალაქის – თბილისის შესახებ’’ საქართველოს კანონის 23¹ მუხლის „ ფ’’ ქვეპუნქტისა და 34¹ მუხლის შესაბამისად, ქ. თბილისის მთავრობა ადგენს,

1. დამტკიცდეს ,,ქ. თბილისის ტერიტორიაზე ჩამორთმეული ან/და მოპოვებული მწვანე ნარგავებისა და სამართალდარღვევის იარაღის (იარაღების) განკარგვის წესი’’ (დანართი 1).

2. დადგენილება ძალაშია გამოქვეყნებისთანავე.

ქ. თბილისის მერი        გ. უგულავა

დანართი 1

ქ. თბილისის ტერიტორიაზე ჩამორთმეული ან/და მოპოვებული მწვანე ნარგავებისა და სამართალდარღვევის იარაღის (იარაღების) განკარგვის წესი

    მუხლი 1

ქ. თბილისის ტერიტორიაზე ჩამორთმეული ან/და ინსპექტირებისას გამოვლენილი უკანონოდ მოპოვებული ან/და დამზადებული მწვანე ნარგავები (შემდგომში – მწვანე ნარგავები) და სამართალდარღვევის იარაღი (იარაღები) წარმოადგენს ქ. თბილისის თვიმმართველი ერთეულის საკუთრებას.

    მუხლი 2

1. მწვანე ნარგავები, ქ. თბილისის მერიის ზედამხედველობის საქალაქო სამსახურის (შემდგომში – სამსახური) მიერ, შეიძლება დასაწყობდეს საამისოდ სპეციალურად გამოყოფილ ადგილას.

2. სამსახურს უფლება აქვს მწვანე ნარგავები საშეშე მერქნად, მიღება-ჩაბარების აქტის საფუძველზე, უსასყიდლოდ გადასცეს იურიდიულ ან ფიზიკურ პირებს, მათი სოციალური მდგომარეობის გათვალისწინებით, საკუთარი ინიციატივით ან/და ქ. თბილისის რაიონული გამგეობის შესაბამისი წერილობითი მომართვის საფუძველზე.

    მუხლი 3

1. ჩამორთმეული ან/და ინსპექტირებისას გამოვლენილი უკანონოდ მოპოვებული ან/და დამზადებული მწვანე ნარგავების გადაცემისას, მიღება-ჩაბარების აქტზე ხელს აწერს სამსახურის უფლებამოსილი პირი.

2. სამსახური უზრუნველყოფს გადასაცემი მწვანე ნარგავების ტრანსპორტირებას საამისოდ სპეციალურად გამოყოფილ ტერიტორიამდე.

    მუხლი 4

1. სამსახურის მიერ ჩამორთმეული სამართალდარღვევის იარაღი (იარაღები) შესაძლებელია დასაწყობდეს საამისოდ სპეციალურად გამოყოფილ ადგილას.

2. სამსახურის მიერ ჩამორთმეული სამართალდარღვევის იარაღი (იარაღები) შესაბამისი მიღება-ჩაბარების აქტის საფუძველზე გადაეცემა ქ. თბილისის მერიის ადმინიტრაციას.

3. მიღება-ჩაბარების აქტზე ხელს აწერენ სამსახურის და ქ. თბილისის მერიის ადმინისტრაციის უფლებამოსილი პირები.

    მუხლი 5

სამსახური უზრუნველყოფს ჩამორთმე ული სამართალდარღვევის იარაღის (იარაღების) ტრანსპორტირებას ქ. თბილისის მერიის ადმინისტრაციის მიერ სპეციალურად საამისოდ გამოყოფილ ტერიტორიამდე.

    მუხლი 6

ჩამორთმეული სამართალდარღვევის იარაღის (იარაღების) განკარგვა და რეალიზაცია, კანონმდებლობით დადგენილი წესით, ხორციელდება ქ. თბილისის მერიის სსიპ „ ქონების მართვის სააგენტოს” მიერ, ქ. თბილისის მერიის ადმინისტრაციის მიმართვის საფუძველზე.