საქართველოს მთავრობასა და აზერბაიჯანის რესპუბლიკის მთავრობას შორის აზერბაიჯანის რესპუბლიკის მიმართ საქართველოს ვალის რესტრუქტურიზაციის შესახებ

შეთანხმება

საქართველოს მთავრობასა და აზერბაიჯანის რესპუბლიკის მთავრობას შორის აზერბაიჯანის რესპუბლიკის მიმართ საქართველოს ვალის რესტრუქტურიზაციის შესახებ

პრეამბულა

საქართველოს მთავრობა და აზერბაიჯანის რესპუბლიკის მთავრობა, შემდგომში წოდებულნი მხარეებად,

ითვალისწინებენ რა საქართველოს მთავრობის წარმომადგენლისა და პარიზის კლუბის მონაწილე კრედიტორი-სახელმწიფოების მთავრობების წარმომადგენელთა მიერ 2004 წლის 21 ივლისს, პარიზში საქართველოს ვალის კონსოლიდაციის თაობაზე ხელმოწერილი შეთანხმებული ოქმის (შემდგომში – შეთანხმებული ოქმი) პირობებს,

და ორ ქვეყანას შორის მეგობრული ურთიერთობების შემდგომი განვითარებისა და გაღრმავების მიზნით,

შეთანხმდნენ შემდეგზე:

მუხლი 1. წინამდებარე შეთანხმების მოქმედების სფერო

წინამდებარე შეთანხმების დებულებები გამოყენებული იქნება „საქართველოს მთავრობასა და აზერბაიჯანის რესპუბლიკის მთავრობას შორის აზერბაიჯანის რესპუბლიკის მიმართ“ საქართველოს მთავრობასა და აზერბაიჯანის რესპუბლიკის მთავრობას შორის აზერბაიჯანის რესპუბლიკის მიმართ საქართველოს ვალის რესტრუქტურიზაციის შესახებ“ 1997 წლის 18 თებერვლის შეთანხმების მიხედვით საქართველოს ვალის რესტრუქტურიზაციის შესახებ“ 2003 წლის 7 ოქტომბრის (შემდგომში – 2003 წლის 7 ოქტომბრის შეთანხმება) შეთანხმებით განსაზღვრული საქართველოს დავალიანების არაკონსოლიდირებული თანხის მიმართ.

წინამდებარე  შეთანხმების დებულებები არ იქნება გამოყენებული აზერბაიჯანის რესპუბლიკის მიმართ საქართველოს დავალიანების 2003 წლის 7 ოქტომბრის შეთანხმებით განსაზღვრული კონსოლიდირებული თანხის მიმართ (შემდგომში – კონსოლიდირებული თანხა.)

    მუხლი 2. კონსოლიდაცია

1. წინამდებარე შეთანხმების შესაბამისად, კონსოლიდირებული იქნება აზერბაიჯანის რესპუბლიკის მიმართ საქართველოს დავალიანების 2003 წლის 7 ოქტომბრის შეთანხმებით განსაზღვრული არაკონსოლიდირებული თანხის (შემდგომში – არაკონსოლიდირებული თანხა) შემდეგი კატეგორიები:

ა) 2004 წლის 31 მაისის ჩათვლით დასაფარი და შეთანხმებული ოქმის ხელმოწერის დღისთვის დაუფარავი არაკონსოლიდირებული ძირითადი და საპროცენტო თანხების (მათ შორის, საჯარიმო პროცენტის) დავალიანების ასი პროცენტი;

ბ) 2004 წლის 1 ივნისიდან 2006 წლის 31 დეკემბრის ჩათვლით დასაფარი და შეთანხმებული ოქმის ხელმოწერის დღისთვის დაუფარავი არაკონსოლიდირებული ძირითადი თანხისა და საპროცენტო თანხის დავალიანების ასი პროცენტი.

2. არაკონსოლიდირებული თანხის დავალიანება, კონსოლიდირებული ამ მუხლის 1-ლი პუნქტის შესაბამისად (შემდგომში – სარესტრუქტურიზაციო თანხები), მითითებულია დანართში 1, რომელიც წინამდებარე შეთანხმების განუყოფელი ნაწილია.

    მუხლი 3. სარესტრუქტურიზაციო თანხების დაფარვა

1. წინამდებარე შეთანხმების მე-2 მუხლის 1-ლი პუნქტის ა) ქვეპუნქტით განსაზღვრული სარესტრუქტურიზაციო თანხების ორმოცდაათი პროცენტი დაიფარება აშშ დოლარებში, დანართში 2 მოცემული გრაფიკის შესაბამისად, რომელიც წინამდებარე შეთანხმების განუყოფელი ნაწილია.

2. წინამდებარე შეთანხმების მე-2 მუხლის 1-ლი პუნქტის ა) ქვეპუნქტით განსაზღვრული სარესტრუქტურიზაციო თანხების დარჩენილი ორმოცდაათი პროცენტი, აგრეთვე, წინამდებარე შეთანხმების მე-2 მუხლის 1-ლი პუნქტის ბ) ქვეპუნქტით განსაზღვრული სარესტრუქტურიზაციო თანხმები დაიფარება აშშ დოლარებში დანართში 3 მოცემული გრაფიკის შესაბამისად, რომელიც წინამდებარე შეთანხმების განუყოფელი ნაწილია.

    მუხლი 4. პროცენტის დარიცხვა და გადახდა

1. წინამდებარე შეთანხმების მე-2 მუხლის პუნქტი 1-ის ა) ქვეპუნქტში მითითებულ სარესტრუქტურიზაციო თანხებს დაერიცხება პროცენტი წლიური 3%-ის განაკვეთით 2004 წლის 1 ივნისიდან.

2. წინამდებარე შეთანხმების მე-2 მუხლის პუნქტი 1-ის ბ) ქვეპუნქტში მითითებულ სარესტრუქტურიზაციო თანხებს დაერიცხება პროცენტი წლიური 3%-ის განაკვეთით, 2003 წლის 7 ოქტომბრის შეთანხმებით განსაზღვრული დაფარვის შესაბამისი თარიღებიდან.

3. პროცენტის დარიცხვა მოხდება ყოველ ექვს თვეში, 365-დღიან წელიწადში გასული დღეების ფაქტობრივი რაოდენობის საფუძველზე და დაიფარება აშშ დოლარებში შემდეგ ვადებში:

ა) წინამდებარე შეთანხმების მე-3 მუხლის 1-ლი პუნქტის შესაბამისად, დასაფარ სარესტრუქტურიზაციო თანხებზე დარიცხული პროცენტი დაიფარება სარესტრუქტურიზაციო თანხების შესაბამისი ნაწილის გადასახდელებთან ერთად;

ბ) წინამდებარე შეთანხმების მე-3 მუხლის მე-2 პუნქტის შესაბამისად, დასაფარ სარესტრუქტურიზაციო თანხებზე დარიცხული პროცენტი დაიფარება ყოველი წლის 1 სექტემბერს და 1 მარტს. ამასთან, პროცენტის პირველი დაფარვა განხორციელდება 2004 წლის 1 სექტემბერს, ბოლო დაფარვა კი სარესტრუქტურიზაციო თანხების ბოლო დაფარვასთან ერთად.

    მუხლი 5. ვადაგადაცილებულ დავალიანებაზე დარიცხული პროცენტი

სარესტრუქტურიზაციო თანხებისა და მასზე დარიცხული პროცენტის ნებისმიერი გადასახდელი, რომელიც არ დაიფარება დროულად წინამდებარე შეთანხმების მე-3 და მე-4 მუხლების შესაბამისად, გამოცხადდება ვადაგადაცილებულად და მას დაერიცხება წლიური 3,5 პროცენტი დავალიანების ამ ნაწილის სრულად დაფარვამდე ვადაგადაცილების დღეების ფაქტობრივი რაოდენობისა და 365-დღიანი წელიწადის საფუძველზე.

    მუხლი 6. ვალის დაფარვის სახეები

მხარეთა შეთანხმებით სარესტრუქტურიზაციო თანხებისა და მასზე დარიცხული პროცენტის გადასახდელების დაფარვა შეიძლება განხორციელდეს საქონლისა და მომსახურების მიწოდებით, აგრეთვე, პრინციპით „ქონება ვალის სანაცვლოდ“.

    მუხლი 7. აგენტები და პროცედურები

მხარეთა უფლებამოსილი ბანკები ვალდებულნი არიან შეათანხმონ წინამდებარე შეთანხმების პირობებიდან გამომდინარე აღრიცხვისა და ანგარიშსწორების ტექნიკური წესი წინამდებარე შეთანხმების ხელმოწერიდან ერთი თვის ვადაში.

გადასახდელის დაფარვის დღედ ჩაითვლება თანხის ჩარიცხვის დღე აზერბაიჯანის რესპუბლიკის უფლებამოსილი ბანკის ანგარიშზე.

    მუხლი 8. ძალაში შესვლა

წინამდებარე შეთანხმება ძალაში შედის მხარეთა მიერ შეთანხმების ძალაში შესვლისათვის აუცილებელი შიდასახელმწიფოებრივი პროცედურების შესრულების შესახებ საბოლოო წერილობითი შეტყობინების მიღების დღიდან და მოქმედებს მხარეთა მიერ ამ შეთანხმებით განსაზღვრული ვალდებულებათა სრულად შესრულებამდე.

შესრულებულია ქ. ბათუმში, 2006 წლის 17 აგვისტოს, თანაბარი ძალის მქონე ორ ნამდვილ პირად, თითოეული ქართულ, აზერბაიჯანულ და რუსულ ენებზე.

წინამდებარე შეთანხმების დებულებათა განმარტებისას უთანხმოების წარმოშობის შემთხვევაში მხარეები მიმართავენ ტექსტს რუსულ ენაზე.

საქართველოს                                                         აზერბაიჯანის რესპუბლიკის

მთავრობის სახელით                                             მთავრობის სახელით

(ხელმოწერილია)                                                     (ხელმოწერილია)

დანართი 1

კონსოლიდაციის განრიგი

მუხლი 2, პუნქტი 1-ა); მუხლი 3, პუნქტი 1

დანართი 2

დანართი 3