ოქმი საქართველოს რესპუბლიკის მთავრობასა და თურქეთის რესპუბლიკის მთავრობას შორის ვაჭრობისა და ეკონომიკური ზონების დაარსებასა და ფუნქციონირებასთან დაკავშირებული ტექნიკურ–ეკონომიკური დასაბუთების შემუშავებისა და სათანადო კანონმდებლობის შექმნის საკითხებში თანამშრომლობის შესახებ

ოქმი

საქართველოს რესპუბლიკის მთავრობასა და თურქეთის რესპუბლიკის მთავრობას შორის საქართველოს რესპუბლიკაში თავისუფალი ვაჭრობისა და ეკონომიკური ზონების დაარსებასა და ფუნქციონირებასთან დაკავშირებული ტექნიკურ-ეკონომიკური დასაბუთების შემუშავებისა და სათანადო კანონმდებლობის შექმნის საკითხებში თანამშრომლობის შესახებ

საქართველოს რესპუბლიკის მთავრობა და თურქეთის რესპუბლიკის მთავრობა, შემდგომში „მხარეებად“ წოდებულნი, მათ შორის ურთიერთობების განმტკიცებისა და გაძლიერების, არსებული თანამშრომლობის გაფართოების მიზნით,

შეთანხმდნენ შემდეგზე:

    მუხლი 1

მხარეები ეცდებიან უზრუნველყონ ორი ქვეყნის თავისუფალი ვაჭრობისა და ეკონომიკური ზონების ხელმძღვანელ ორგანოებს შორის მრავალმხრივი მჭიდრო თანამშრომლობა.

    მუხლი 2

თურქეთის მხარე უზრუნველყოფს საქართველოში თავისუფალი ვაჭრობისა და ეკონომიკური ზონების დაარსებისათვის საჭირო ტექნიკურ-ეკონომიკური დასაბუთების შემუშავებასა და ამ ზონებში მოქმედი კანონმდებლობის შექმნის საკითხებთან დაკავშირებულ საკონსულტაციო და ტექნიკურ დახმარებას.

    მუხლი 3

თურქეთის მხარე უზრუნველყოფს თავისუფალი ვაჭრობისა და ეკონომიკური ზონების ამოქმედებისა და ფუნქციონირებისათვის საჭირო ყველა სახის ტექნიკურ დახმარებასთან დაკავშირებულ ინფორმაციის მიწოდებას და წაახალისებს თურქეთის კერძო სექტორს თავისუფალი ვაჭრობისა და ეკონომიკურ ზონებში ინვესტიციების განხორციელებისათვის.

    მუხლი 4

თავისუფალი ვაჭრობისა და ეკონომიკური ზონების ამოქმედების მიზნით, მხარეების მიერ დაარსებულ ერთობლივ საწარმოებში შეიძლება გაერთიანდნენ საქართველოსა და თურქეთის ის ფიზიკური და იურიდიული პირები, რომლებსაც მხარეები მიზანშეწონილად მიიჩნევენ. ამ ოქმში აღნიშნული თანამშრომლობის განხორციელების მიზნით, მხარეების თანხმობის შემთხვევაში, ზემოთ ხსენებულ საწარმოებში ერთობლივ პარტნიორებად შეიძლება მიღებულ იქნენ მესამე ქვეყნის სახელმწიფო ან კერძო სექტორის ორგანიზაციები და მეწარმეები.

ოქმი შესრულებულია ქ. თბილისში, 1995 წლის 31 აგვისტოს ორ ეგეზმპლარად, თითოეული ქართულ, თურქულ და ინგლისურ ენებზე. ამასთან, ყველა ტექსტი თანაბარი ძალისაა. ქართულ და თურქულ ტექსტებს შორის შეუსაბამობის არსებობის შემთხვევაში, უპირატესობა ენიჭება ინგლისურ ტექსტს.