ერთობლივი კომუნიკე საქართველოსა და ბრუნეი დარუსალამს შორის დიპლომატიურ ურთიერთობათა დამყარების შესახებ

ერთობლივი კომუნიკე

საქართველოსა და ბრუნეი დარუსალამს შორის დიპლომატიურ ურთიერთობათა დამყარების შესახებ

საქართველოს მთავრობა და ბრუნეი დარუსალამის სახელმწიფოს მეთაურის, მისი უდიდებულესობა სულთნის მთავრობა, ხელმძღვანელობენ რა სურვილით განავითარონ ორ სახელმწიფოს შორის მეგობრობისა და თანამშრომლობის ურთიერთობები პოლიტიკურ, ეკონომიკურ, კულტურულ და სხვა სფეროებში, საერთო შეთანხმების საფუძველზე,

დარწმუნებულნი არიან რა, რომ მათ შორის დიპლომატიურ ურთიერთობათა დამყარება შედის ორივე სახელმწიფოს ინტერესში და ხელს უწყობს საერთაშორისო თანამშრომლობისა და საყოველთაო მშვიდობის განმტკიცებას,

ხელმძღვანელობენ რა გაერთიანებული ერების ორგანიზაციის წესდებით გათვალისწინებული პრინციპებითა და საერთაშორისო სამართლის სხვა ფუძემდებლური ნორმებითა და პრინციპებით, კერძოდ, როგორიცაა, სახელმწიფოთა თანასწორობა, ეროვნული სუვერენიტეტისა და ტერიტორიული მთლიანობის პატივისცემა და სხვა სახელმწიფოს შიდა საქმეებში ჩაურევლობა,

შეთანხმდნენ ელჩების დონეზე დიპლომატიურ ურთიერთობათა დამყარებაზე წინამდებარე ერთობლივი კომუნიკეს ხელმოწერის დღიდან, დიპლომატიურ ურთიერთობათა შესახებ ვენის 1961 წლის კონვენციის დებულებათა შესაბამისად.

შესრულებულია ქ. ნიუ-იორკში, 2010 წლის 1 მარტს, ქართულ და ინგლისურ ენებზე, ორივე ტექსტი თანაბრად ავთენტიკურია. ერთობლივი კომუნიკეს განმარტებისას რაიმე განსხვავების შემთხვევაში უპირატესობა მიენიჭება ტექსტს ინგლისურ ენაზე.