შეთანხმება საქართველოს აღმასრულებელ ხელისუფლებასა და საფრანგეთის რესპუბლიკის მთავრობას შორის საარქივო სფეროში თანამშრომლობის შესახებ

შეთანხმება

საქართველოს აღმასრულებელ ხელისუფლებასა და საფრანგეთის რესპუბლიკის მთავრობას შორის საარქივო სფეროში თანამშრომლობის შესახებ

ერთი მხრივ, საქართველოს აღმასრულებელი ხელისუფლება და , მეორეს მხრივ, საფრანგეთის რესპუბლიკის მთავრობა

შემდგომში „მხარეებად“ წოდებულნი

ეყრდნობიან რა 1994 წლის 21 იანვარს პარიზში საქართველოსა და საფრანგეთს შორის დადებულ ხელშეკრულებას „ურთიერთგაგების, მეგობრობისა და თანამშრომლობის შესახებ“;

ითვალისწინებენ რა 1997 წლის 3 თებერვალს პარიზში ხელმოწერილ შეთანხმებას საქართველოს მთავრობასა და საფრანგეთის რესპუბლიკის მთავრობას შორის „კულტურული, სამეცნიერო და ტექნიკური თანამშრომლობის შესახებ“;

ხაზს უსვამენ რა ამ ორ ქვეყანას შორის არსებული მჭიდრო კავშირების განმტკიცებისათვის მათი წარსული და თანამედროვე ისტორიისა და კულტურის ურთიერთგაცნობის მნიშვნელობას;

მიაჩნიათ რა, რომ ორივე ქვეყნის არქივების გაცნობის საშუალება მნიშვნელოვანი ფაქტორია ურთიერთგაცნობისათვის,

შეთანხმდნენ შემდეგზე:

    მუხლი 1

მხარეები განავითარებენ არქივების სფეროში თანამშრომლობას, მათი ეროვნული კანონმდებლობის დაცვით და მათი საბიუჯეტო შესაძლებლობების ფარგლებში.

    მუხლი 2

ისინი ხელს შეუწყობენ ყველა სახის თანამშრომლობას ორი ქვეყნის კომპეტენტურ საარქივო ორგანიზაციებს შორის:

-საქართველოს მხრიდან – საქართველოს საარქივო სახელმწიფო დეპარტამენტი და საქართველოს მეცნიერებათა აკადემიის ხელნაწერთა ინსტიტუტი;

-საფრანგეთის რესპუბლიკის მხრიდან – საფრანგეთის საგარეო საქმეთა სამინისტროს არქივებისა და დოკუმენტაციების განყოფილება და საფრანგეთის კულტურისა და კომუნიკაციების სამინისტროს საფრანგეთის არქივების განყოფილება.

    მუხლი 3

თანამშრომლობა მიიღებს შემდეგ სახეს:

-დოკუმენტაციის გაცვლა;

-ერთობლივი პუბლიკაციები;

-გამოფენები;

-არქივების შენახვისა და რესტავრაციის სპეციალისტების გაცვლა, ისევე როგორც მათი გამოყენება და წარმოჩენა;

-მკვლევართა გაცვლა;

-საარქივო განათლება.

    მუხლი 4

ამ შეთანხმებით გათვალისწინებული გაცვლების პრაქტიკული მხარეები დადგინდება დიპლომატიური გზით. საჭიროების შემთხვევაში, ეს გაცვლები განხორციელდება ქართულ და ფრანგულ კომპეტენტურ ორგანიზაციებს შორის ცალკეული შეთანხმებების საფუძველზე.

    მუხლი 5

წინამდებარე შეთანხმება დადებულია 5 წლის ვადით და ძალაში შედის ხელმოწერის დღიდან. მისი მოქმედების ვადა ავტომატურად გრძელდება მომდევნო 5 წლით. შეთანხმება დენონსირებულად ჩაითვლება თითოეული მხარის მიერ ამ გადაწყვეტილების შესახებ მოქმედების ვადის გასვლამდე 6 თვით ადრე წერილობითი შეტყობინების მიღების შემდეგ.

ხელმოწერილია პარიზში, 1999 წლის 20 მაისს, ორ ეგზემპლარად, თითოეული ქართულ და ფრანგულ ენებზე.

ორივე ტექსტი თანაბარი ძალისაა.