საქართველოს დაზვერვის სახელმწიფო დეპარტამენტის ემბლემის დებულების, ემბლემისა და დროშის დამტკიცების შესახებ

საქართველოს პრეზიდენტის

ბრძანებულება №60

2003 წლის 26 თებერვალი

ქ. თბილისი

საქართველოს დაზვერვის სახელმწიფო დეპარტამენტის ემბლემის დებულების, ემბლემისა  და  დროშის დამტკიცების შესახებ

„საქართველოს დაზვერვის სახელმწიფო დეპარტამენტის დებულების დამტკიცების შესახებ“ საქართველოს პრეზიდენტის 1999 წლის 23 აგვისტოს №500 ბრძანებულების მე-5 მუხლის თანახმად დამტკიცდეს საქართველოს დაზვერვის სახელმწიფო დეპარტამენტის ემბლემის აღწერილობა (დანართი №1), დებულება „საქართველოს დაზვერვის სახელმწიფო დეპარტამენტის ემბლემის შესახებ“ (დანართი№2) და საქართველოს დაზვერვის სახელმწიფო დეპარტამენტის დროშის აღწერილობა (დანართი№3).

ე. შევარდნაძე

          დანართი N1

საქართველოს დაზვერვის სახელმწიფო დეპარტამენტის ემბლემის აღწერილობა

საქართველოს დაზვერვის სახელმწიფო დეპარტამენტის ემბლემა არის გრაგნილის ფორმის 4 ოქროსფერი ორნამენტი, რომელიც ბოლნური ჯვრის ფორმას ქმნის. გრაგნილებს შორის ჩაზნექილობას ავსებს მახვილი ფორმის ოთხი წახნაგი, რომლებიც შიგნით დაშტრიხულია მახვილის მიმართულებებით. ჯვრის გულზე მოთავსებულია მრგვალი ქართული ფარი ლურჯი ველით, რომელიც ოქროსფერი წარწერით გამოყოფილია შიდა და გარე წრეებად. გარეთა წრეში ქართული ასოებით ოქროსფრად წერია „საქართველოს დაზვერვის სახელმწიფო დეპარტამენტი“. შიდა წრეში ლურჯ ფონზე ოქროსფრად გამოსახულია ორი ჯიქის ფიგურა, რომლებსაც თათებით უკავიათ მრგვალი ქართული ფარი ოთხი პატარა წრეწირით ოთხსავე მხარეს, ხოლო ფარის შუაგულში ასევე გამოსახულია წრეწირი. ჯიქების ფერხთ დაგებულია ოქროსფერი ლენტი, რომელზეც ქართული ასოებით შავად წერია “სდსდ“.

დანართი N2

დებულება

საქართველოს დაზვერვის სახელმწიფო დეპარტამენტის ემბლემის შესახებ

1. საქართველოს დაზვერვის სახელმწიფო დეპარტმენტის ემბლემა (შემდეგში – ემბლემა) არის ოფიციალური სიმბოლო, რომელიც აღნიშნავს დაზვერვის სახელმწიფო დეპარტამენტის სამხედრო მოსამსახურეებს, შეიარაღებას, სატრანსპორტო და სპეციალურ საშუალებებსა და სხვა ქონებას, როგორც დაზვერვის სახელმწიფო დეპარტამენტის კუთვნილებას.

2. ემბლემა შეიძლება განთავსდეს კუთხის შტამპებზე ან დაზვერვის სახელმწიფო დეპარტამენტისა და მისი ქვედანაყოფების ბლანკებზე კუთხოვანი შტამპით.

3. დაზვერვის სახელმწიფო დეპარტამენტის ემბლემა განთავსდება (ინახება) დაზვერვის სახელმწიფო დეპარტამენტის თავმჯდომარის კაბინეტში და საქართველოს დაზვერვის სახელმწიფო დეპარტამენტის კოლეგიის სხდომათა დარბაზში.

4. ემბლემა გამოისახება:

– დროშაზე;

– დაზვერვის სახელმწიფო დეპარტამენტის წარჩინებისა და განმასხვავებელ სამხედრო ნიშნებზე;

– ჯილდოდ გადაცემულ იარაღზე;

– ბეჭდვით გამოცემებზე;

– დაზვერვის სახელმწიფო დეპარტამენტის მიერ მომზადებულ კინო, ვიდეო და ფოტომასალებზე;

– დაზვერვის სახელმწიფო დეპარტამენტის შეკვეთით მომზადებულ სარეკლამო-საინფორმაციო და სუვენირულ პროდუქციაზე.

5. დაზვერვის სახელმწიფო დეპარტამენტის თავმჯდომარეს უფლება აქვს დამატებით დაადგინოს დაზვერვის სახელმწიფო დეპარტამენტის ემბლემის გამოსახულების გამოყენების სხვა შემთხვევები.

6. დაზვერვის სახელმწიფო დეპარტამენტის ემბლემა დაცულია დადგენილი წესის შესაბამისად.

          დანართი N3

საქართველოს დაზვერვის სახელმწიფო დეპარტამენტის დროშის აღწერილობა

საქართველოს დაზვერვის სახელმწიფო დეპარტამენტის დროშა არის მართკუთხა ფორმის თეთრ ფონზე გამოსახული წითელი სწორკუთხა ჯვარი, რომლის ცენტრში გამოსახულია საქართველოს დაზვერვის სახელმწიფო დეპარტამენტის ემბლემა.

დროშაზე გამოსახული წითელი ჯვრის სიგანე სიმეტრიულია დეპარტამენტის ემბლემაზე  გამოსახული გრაგნილების გვერდების სიგანისა.  დროშის ზომებია  140X95 სმ.