საერთაშორისო ანტიტერორისტული საქმიანობის ხელშეწყობის ზოგიერთ ღონისძიებათა შესახებ

საქართველოს პრეზიდენტის

ბრძანებულება №484

2001 წლის 28 ნოემბერი

ქ. თბილისი

საერთაშორისო ანტიტერორისტული საქმიანობის ხელშეწყობის ზოგიერთ ღონისძიებათა შესახებ

2001 წლის 11 სექტემბერს ამერიკის შეერთებულ შტატებზე გან­ხორ­ციელებული ტერორისტული აქტების შემდეგ ტერორიზმთან ბრძო­ლის საქმეში ცივილიზებული ქვეყნების თანამეგობრობის ძალისხმევის კონსოლიდაციის, გაეროს უშიშროების საბჭოს 2001 წლის 28 სექტემ­ბრის №1373 რეზოლუციის ეფექტიანი შესრულებისა და „განუსაზღვრელი თავისუფლების“ მრავალეროვნული ანტიტერორის­ტული ოპერა­ციის განხორციელებაში საქართველოს წვლილის შეტანის მიზნით:

1. საქართველოს ტრანსპორტისა და კომუნიკაციების სამინისტრომ (სამოქალაქო ავიაციის ადმინისტრაცია) და ფინანსთა სამინისტრომ ამ ბრძანებულებით გათვალისწინებული წესითა და მე-6 პუნქტით დამტკიცებული დანართის მიხედვით უზრუნველყონ საერთაშორისო სამხედრო ოპერაცია „განუსაზღვრელი თავისუფლებისათვის“ ხელ­შეწყობის მიზნით საქართველოს შესაბამის აეროპორტში გაწეული მომსახურების სახელმწიფო დაფინანსების ორგანიზება.

2. საქართველოს ტრანსპორტისა და კომუნიკაციების სამინისტრომ (სამოქალაქო ავიაციის ადმინისტრაცია):

ა) ამ ბრძანებულების მოთხოვნებიდან გამომდინარე უზრუნველ­ყოს სათანადო ხელშეკრულებების გაფორმება იმ საწარმოებთან და ორგანიზაციებთან, რომლებიც უშუალოდ ახორციელებენ ამ ბრძანებულების პირველი პუნქტით გათვალისწინებულ მომსახურებას;

ბ) საერთაშორისო სამხედრო ოპერაცია „განუსაზღვრელი თავისუფლებისათვის“ ხელშეწყობის მიზნით განახორციელოს საქართველოს შესაბამის აეროპორტში მომსახურების სახელმწიფო ფინანსური უზრუნველყოფის კოორდინაცია;

გ) ყოველი თვის ბოლოს წარუდგინოს საქართველოს ფინანსთა სამინისტროს თვის განმავლობაში ამ პუნქტის „ბ“ ქვეპუნქტით გათვალისწინებული მომსახურების დაფინანსების ხარჯთანუსხა;

დ) უზრუნველყოს საქართველოს ფინანსთა სამინისტროს მეშვეობით მიღებული სახელმწიფო დაფინანსების განაწილება შესაბამის საწარმოებსა და ორგანიზაციებს შორის მათ მიერ ფაქტობრივად გაწეული მომსახურების მიხედვით.

3. საქართველოს ფინანსთა სამინისტრომ საქართველოს ტრანსპორტისა და კომუნიკაციების სამინისტროს მიერ წარდგენილი ხარჯთანუსხის მიხედვით უზრუნველყოს ამ ბრძანებულებით გათვალისწინებული მომსახურების სახელმწიფო დაფინანსების დროულად და შეუფერხებლად გამოყოფა.

4. საქართველოს ფინანსთა სამინისტრომ, სახელმწიფო ქონების მართვის სამინისტრომ, ტრანსპორტისა და კომუნიკაციების სამინისტრომ, საჭიროების შემთხვევაში, ურთიერთშეთანხმებით უზრუნველყონ ამ ბრძანებულებით განსაზღვრული მიზნებისათვის სახელმწიფო დაფინანსების განსახორციელებლად დამატებითი წყაროს გამოყენება.

5. საქართველოს ფინანსთა სამინისტრომ და ტრანსპორტისა და კომუნიკაციების სამინისტრომ ყოველთვიურად საქართველოს ეროვნული უშიშროების საბჭოს წარუდგინონ ინფორმაცია ამ ბრძანებულების გათვალისწინებით გაწეული სახელმწიფო დაფინანსების სტრუქტურის, მოცულობისა და არსებული მდგომარეობის შესახებ.

6. დამტკიცდეს „საერთაშორისო სამხედრო ოპერაცია „განუსაზღვრელ თავისუფლებაში“ მონაწილე ამერიკის შეერთებული შტატების საჰაერო ხომალდების მომსახურების ანაზღაურების საფინანსო გაანგარიშების შესახებ“ თანდართული დანართი.

7. ამ ბრძანებულების შესრულების კონტროლი განახორციელოს საქართველოს ეროვნული უშიშროების საბჭოს აპარატმა.

ე. შევარდნაძე

საერთაშორისო სამხედრო ოპერაცია „განუსაზღვრელ თავისუფლებაში“ მონაწილე ამერიკის შეერთებული შტატების საჰაერო ხომალდების მომსახურების ანაზღაურების საფინანსო გაანგარიშება*

                                                                                                       აშშ დოლარებში