„ქ. თბილისის მერიის ეკოლოგიისა და გამწვანების საქალაქო სამსახურის დებულების დამტკიცების შესახებ" ქ. თბილისის მერის 2009 წლის 27 ივლისის №38 ბრძანებაში ცვლილებისა და დამატების შეტანის თაობაზე

ქალაქ თბილისის მერის

ბრძანება №27

2010 წლის 22 დეკემბერი

ქ. თბილისი

„ ქ. თბილისის მერიის ეკოლოგიისა და გამწვანების საქალაქო სამსახურის დებულების დამტკიცების შესახებ’’ ქ. თბილისის მერის 2009 წლის 27 ივლისის № 38 ბრძანებაში ცვლილებისა და დამატების შეტანის თაობაზე

„ნორმატიული აქტების შესახებ” საქართველოს კანონის მე-20 მუხლის, „საქართველოს დედაქალაქის – თბილისის შესახებ” საქართველოს კანონის 22-ე მუხლის მე-3 პუნქტის „ნ” ქვეპუნქტის, „ქ. თბილისის მერიის დებულების დამტკიცების შესახებ” ქ. თბილისის საკრებულოს 2006 წლის 12 ოქტომბრის №1–1 გადაწყვეტილებით დამტკიცებული ქ. თბილისის მერიის დებულების მე-9 მუხლის პირველი პუნქტის „ნ” ქვეპუნქტის საფუძველზე, ვბრძანებ:

1. დებულების მე-7, მე-8 და მე-9 მუხლები ჩამოყალიბდეს შემდეგი რედაქციით:

     „მუხლი 7.

სამსახურის ფუნქციებია:

ა) ქ. თბილისში არსებული მწვანე ნარგავების დაზიანებული ტერიტორიების სპეციალური გამოკვლევა, აღდგენა და გაშენება-გამწვანება;

ბ) მწვანე ნარგავების მოვლა-პატრონობა და აღრიცხვის წარმოება;

გ) ქ. თბილისის ტერიტორიაზე კერძო საკუთრებაში არსებული მწვანე ნარგავების (გარდა ხილ-კენკროვანი მცენარეებისა) ჭრაზე ნებართვის გაცემა;

დ) კანონმდებლობით დადგენილი წესით, სპეციალური ჭრების დაგეგმვა და განხორციელება;

ე) ქ. თბილისის მოსახლეობის სათბობი შეშით უზრუნველყოფის მიზნით, შესაბამისი ღონისძიებების დაგეგმვა და განხორციელება;

ვ) დედაქალაქის გამწვანების პრიორიტეტების, პროგრამებისა და გეგმების შემუშავება; ქ. თბილისის მერის მიერ საკრებულოში წარსადგენად მათი მომზადება;

ზ) ცენტრალურ გამზირებზე, ქუჩებზე, ბაღ-სკვერებში, პარკებში, მოედნებსა და გამწვანების სხვა ობიექტებში არსებული ზეხმელი და ავარიული ხეების გეგმური ფორმირება და ამოძირკვა;

თ) დედაქალაქში გარემოს დაცვისა და ბუნებრივი რესურსების საკითხებთან დაკავშირებული სხვადასხვა სასწავლო-სამეცნიერო და გაცვლით პროგრამებში მონაწილეობა;

ი) სახელმწიფო ორგანოებთან ერთობლივი კომპეტენციის ფარგლებში ბუნებათსარგებლობის, გარემოს დაცვისა და ეკოლოგიური უსაფრთხობის უზრუნველყოფა;

კ) ქ. თბილისის ტერიტორიაზე არსებული შემოსასვლელების, სანაპიროებისა და პარკების პროექტირება და მოწყობა;

ლ)     არსებული სარწყავი ქსელების შესწავლა, მოწესრიგება და რეაბილიტაცია;

მ) ქ. თბილისის ტერიტორიაზე არსებული შემოსასვლელების, სანაპიროების, მწვანე საფარის, ბაღების, პარკების, სკვერების, მოედნების, გაზონების, ფერდობებისა და ყვავილნარებისთვის სარწყავ-სამელიორაციო სისტემების დაგეგმარება და მშენებლობა;

ნ) ქ. თბილისის ტერიტორიაზე არსებული შემოსასვლელების, სანაპიროებისა და პარკების მოვლა-პატრონობა;

ო) ქ. თბილისის ტერიტორიაზე არსებულ შემოსასვლელებში, სანაპიროებზე და პარკებში დეკორატიული კუთხეების პროექტირება და მოწყობა;

პ) ქ. თბილისის ტერიტორიაზე არსებული შემოსასვლელების, სანაპიროების და პარკების პროექტირება და მოწყობა;

ჟ) ქ. თბილისის ტერიტორიაზე არსებული შემოსასვლელების, სანაპიროებისა და პარკების გამწვანება-განაშენიანება, დაზიანებული და განადგურებული ტერიტორიების აღდგენა;

რ) ნიადაგის ნაყოფიერების აღდგენის ღონისძიებებში მონაწილეობა;

ს) ქ. თბილისის ტერიტორიაზე არსებული გაზონების, ფერდობებისა და ყვავილნარების მოვლა-პატრონობა;

ტ) გაზონებზე, ფერდობებსა და ყვავილნარებში დეკორატიული კუთხეების პროექტირება და მოწყობა;

უ) ქ. თბილისის ტერიტორიაზე არსებული გაზონების, ფერდობებისა და ყვავილნარების გამწვანება-განაშენიანება, დაზიანებული და განადგურებული ტერიტორიების აღდგენა.

    მუხლი 8.

სამსახური შედგება სამი განყოფილებისაგან:

ა) ქ. თბილისის შემოსასვლელების, სანაპიროების, პარკების, სარწყავი სისტემების ექსპლუატაციის, აღდგენისა და მოწყობის განყოფილება;

ბ) ბაღ-სკვერების, მოედნების, ფერდობების, გაზონების, ყვავილნარების, ლანდშაფტების ექსპლუატაციის, აღდგენისა და მოწყობის განყოფილება;

გ) ეკოლოგიის, მწვანე ნარგავების მოვლისა და გარემოს დაცვითი ღონისძიებების განყოფილება.

    მუხლი 9.

1. ქ. თბილისის შემოსასვლელების, სანაპიროების, პარკების, სარწყავი სისტემების ექსპლუატაციის, აღდგენისა და მოწყობის განყოფილება უზრუნველყოფს ამ დებულების მე-7 მუხლის „კ’’–„რ’’ ქვეპუნქტებით განსაზღვრული ფუნქციების განხორციელებას, აგრეთვე კანონმდებლობით გათვალისწინებული სხვა ამოცანების, ფუნქციების, ქ. თბილისის მერის, ვიცე-მერის, მერის ერთ-ერთი მოადგილისა და სამსახურის უფროსის ცალკეულ დავალებათა შესრულებას.

2.  ბაღ-სკვერების, მოედნების, ფერდობების, გაზონების, ყვავილნარების, ლანდშაფტების ექსპლუატაციის, აღდგენისა და მოწყობის განყოფილება უზრუნველყოფს ამ დებულების მე-7 მუხლის „რ’’-„უ’’ ქვეპუნქტებით განსაზღვრული ფუნქციების განხორციელებას.

3. ეკოლოგიის, მწვანე ნარგავების მოვლისა და გარემოს დაცვითი ღონისძიებების განყოფილება უზრუნველყოფს ამ დებულების მე-7 მუხლის „ა”–„ი” ქვეპუნქტებით განსაზღვრული ფუნქციების განხორციელებას, აგრეთვე კანონმდებლობით გათვალისწინებული სხვა ამოცანების, ფუნქციების, ქ. თბილისის მერის, ვიცე-მერის, მერის ერთ-ერთი მოადგილისა და სამსახურის უფროსის ცალკეულ დავალებათა შესრულებას.’’.

2. ეს ბრძანება ძალაშია გამოქვეყნებისთანავე.

ქ. თბილისის მერი   გ. უგულავა