საქართველოს ტურისტულ-საკურორტო დარგისათვის კადრებისა და ექსპერტთა მომზადების გაუმჯობესების ღონისძიებათა შესახებ

საქართველოს პრეზიდენტის

ბრძანებულება №468

1999 წლის 2 აგვისტო

ქ. თბილისი

საქართველოს ტურისტულ-საკურორტო დარგისათვის კადრებისა და ექსპერტთა მომზადების გაუმჯობესების ღონისძიებათა შესახებ

საქართველოს ეკონომიკის პრიორიტეტულ დარგად ტურიზმისა და კურორტების გამოცხადებასთან დაკავშირებით გადაუდებელი მნიშვნელობის ამოცანაა ტურისტული ინდუსტრიისა და საკურორტო პოტენციალის ამოქმედება და საერთაშორისო სტანდარტების დონეზე აყვანა. ამის მიღწევისათვის მნიშვნელოვანი ამოცანაა დარგში დასაქმებული კვალიფიციური კადრების არსებობა.

ქვეყანაში დაჩქარებული ტემპით ვითარდება კერძო ბიზნესი, იხსნება მრავალი საშუალო და პატარა სასტუმრო, ტურისტული დანიშნულების ობიექტი, მაგრამ მათი სათანადო დონეზე ფუნქციონირებისათვის საჭირო მასობრივ პროფესიათა და საშუალო რგოლის კვალიფიციური კადრების მწვავე ნაკლებობაა.

დღეისათვის არ არსებობს ისეთი სასწავლებელი, რომელიც ტურისტულ-საკურორტო დარგისათვის მაღალ­კვალი­ფიციურ კადრებსა და ექსპერტებს მოამზადებს.

საქართველოში ტურისტულ-საკურორტო დარგის შემდგომი განვითარებისათვის, ტურისტულ-საკურორტო ინდუსტრიაში საერთაშორისო სტანდარტების დამკვიდრებისათვის, დარგის მაღალკვალიფიციური კადრებითა და ექსპერტების უზრუნველყოფის მიზნით:

1. საქართველოს ტურიზმისა და კურორტების სახელმწიფო დეპარტამენტმა (ვ. შუბლაძე) საქართველოს განათლების სამინისტროსთან (ალ. კარტოზია) ერთად სამ თვეში შეიმუშაოს დარგში კადრების მომზადებისა და გადამზადების დარგობრივ-მიზნობრივი სახელმწიფო პროგრამა 2001-2005 წლებისათვის

2. საქართველოს განათლების სამინისტრომ:

ა) შეარჩიოს და განსაზღვროს საბაზო სასწავლებლები დაწყებითი და საშუალო პროფესიული სწავლებისათვის;

ბ) გაითვალისწინოს საქართველოს უმაღლეს სასწავლებლებში ტურიზმის სპეციალობებზე დასაქმებულ პედაგოგთა კვალიფიკაციის ამაღლება;

გ) საქართველოს ტურიზმისა და კურორტების სახელმწიფო დეპარტამენტთან ერთად 3 თვეში შეიმუშაოს და წარმოადგინოს წინადადებები ტურისტულ-საკურორტო დარგის პროფესიათა სასწავლო-მეთოდური ცენტრის შექმნის შესახებ.

3. საქართველოს ეკონომიკის სამინისტრომ (ვ. პაპავა):

ა) 2001-2005 სასწავლო წლიდან გაითვალისწინოს ტურისტულ-საკურორტო დარგის პროფესიებზე სახელმწიფო დაკვეთები;

ბ) უზრუნველყოს 2002-2005 წლებში ტურიზმისა და საკურორტო დარგის საერთაშორისო ექსპერტთა მომზადება საზღვარგარეთ და სპეციალური ღონისძიებები საინფორმაციო ლიტერატურისა და სახელმძღვანელოების შექმნისა და გამოცემისათვის.

4. საქართველოს ვაჭრობისა და საგარეო-ეკონომიკური ურთიერთობების სამინისტრომ (თ. ბერუჩაშვილი) თავის საქმიანობაში საერთაშორისო ორგანიზაციებთან ერთად გაითვალისწინოს ტურიზმისა და კურორტების სფეროსათვის კადრების კვალიფიკაციის ამაღლებისა და სტაჟირების საკითხები.

5. საქართველოს სტანდარტიზაციის, მეტროლოგიისა და სერტიფიკაციის სახელმწიფო დეპარტამენტმა (ჯ. მანჯგალაძე) ტურიზმისა და კურორტების სახელმწიფო დეპარტამენტთან ერთად დადგენილი წესით უზრუნველყოს ექსპერტთა მომზადება ტურისტულ-საკურორტო დარგისათვის.

6. საქართველოს პრეზიდენტთან არსებულმა საინვესტიციო საბჭომ მიაღწიოს საქართველოს დონორი ქვეყნებისა და სხვა საინვესტიციო კომპანიებისაგან 2005 წლამდე პერიოდში ტურისტულ-საკურორტო დარგში კადრების მომზადების მიზნობრივი პროგრამების დაფინანსებისათვის სახსრების გამოყოფას.

ე. შევარდნაძე