ქვეყნის მოსახლეობის ურგენტული და ამბულატორიული მომსახურეობის სახელმწიფო პროგრამით გათვალისწინებული ღონისძიებების განსახორციელებლად საბიუჯეტო სახსრების აკუმულაციის წესის შესახებ

სახელმწიფო სარეგისტრაციო კოდი 470.230.000.11.119.005.263

საქართველოს შრომის, ჯანმრთელობისა და სოციალური დაცვის მინისტრისა და საქართველოს ფინანსთა

მინისტრის ერთობლივი ბრძანება №131/ნ-112

2002 წლის 30 აპრილი

ქ. თბილისი

ქვეყნის მოსახლეობის ურგენტული და ამბულატორიული მომსახურეობის სახელმწიფო პროგრამით გათვალისწინებული ღონისძიებების განსახორციელებლად საბიუჯეტო სახსრების აკუმულაციის წესის შესახებ

„საქართველოს 2002 წლის სახელმწიფო ბიუჯეტის შესახებ” საქართველოს კანონის 22 მუხლის მე-2 –მე-3 პუნქტების შესრულებისა და ქვეყნის მოსახლეობის ურგენტული და ამბულატორიული მომსახურეობის გაუმჯობესებისა და მოსახლეობისათვის გაწეული სამედიცინო მომსახურეობის ღირებულების ანაზღაურების მიზნით, ვბრძანებთ:

1. დამტკიცდეს ქვეყნის მოსახლეობის ურგენტული და ამბულატორიული მომსახურეობის სახელმწიფო პროგრამით გათვალისწინებული ღონისძიებების განსახორციელებლად საბიუჯეტო სახსრების აკუმულაციის თანდართული წესი.

2. დაევალოთ საქართველოს ფინანსთა მინისტრის მოადგილეს ვ. გიგოლაშვილს და საქართველოს შრომის, ჯანმრთელობისა და სოციალური დაცვის მინისტრის მოადგილეს ვ. ჭეიშვილს სისტემატიური კონტროლი განახორციელონ ამ ბრძანებით დამტკიცებული წესის შესრულების მიმდინარეობაზე.

3. ბრძანების შესრულების მიმდინარეობა განხილულ იქნეს საქართველოს შრომის, ჯანმრთელობისა და სოციალური დაცვის მინისტრის საბჭოს (კოლეგიის) ერთობლივ სხდომაზე კვარტალში ერთხელ.

4. ბრძანება ამოქმედდეს გამოქვეყნებისთანავე.

ა. გამყრელიძე

ზ. ნოღაიდელი

ქვეყნის მოსახლეობის ურგენტული და ამბულატორიული მომსახურეობის სახელმწიფო პროგრამით გათვალისწინებული ღონისძიებების განსახორციელებლად საბიუჯეტო სახსრების აკუმულაციის წესის შესახებ

„საქართველოს 2002 წლის სახელმწიფო ბიუჯეტის შესახებ” საქართველოს კანონის 22 მუხლის მე-2 – მე-3 პუნქტებით მოცემული დავალებების შესასრულებლად:

1. დაწყებული 2002 წლის 1 აპრილიდან ქ. თბილისის მერიამ საქართველოს სამედიცინო დაზღვევის სახელმწიფო კომპანიის ანგარიშზე ყოველთვიურად მაგრამ არაუგვიანეს საანგარიშო თვის 20 რიცხვისა გადარიცხოს ბიუჯეტით ამ დანიშნულებით გათვალისწინებული თანხებიდან ერთიმეთორმეტედი ნაწილი, ხოლო დანარჩენმა ქალაქებმა და რაიონებმა (მერებმა და გამგებლებმა) სამედიცინო დაზღვევის სახელმწიფო კომპანიის შესაბამის რეგიონალური ფილიალების ანგარიშზე დეკადაში ერთხელ ჩარიცხონ შესაბამისი ბიუჯეტებით დამტკიცებული წლიური ხარჯების საერთო მოცულობის არა ნაკლებ შვიდი პროცენტის 1/36 ნაწილი, ანუ წლიური ხარჯების საერთო მოცულობის არანაკლებ ერთი მეთორმეტედის 7 პროცენტის მესამედი ნაწილისა.

2. ქალაქებისა და რაიონების ბიუჯეტებიდან ფილიალის ანგარიშზე ჩარიცხული თანხების შესახებ სამედიცინო დაზღვევის სახელმწიფო კომპანიის ფილიალები ვალდებულნი არიან კომპანიის ანგარიში ჩააბარონ თვეში სამჯერ თვის 5,15 და 25 რიცხვში. პირველი დეკადის შესახებ – 15 რიცხვში, მეორე დეკადის შესახებ – 25 რიცხვში, ხოლო მესამე დეკადის (ნაზარდი ჯამით) შესახებ საანგარიშო თვის გასვლიდან 5 კალენდარულ დღეში.

3. სამედიცინო დაზღვევის სახელმწიფო კომპანიამ საქართველოს შრომის, ჯანმრთელობისა და სოციალური დაცვის სამინისტროს ინფორმაცია უნდა წარუდგინოს შესაბამისად თვეში სამჯერ თვის 10, 20 და 30 რიცხვში.

ინფორმაციას თვეში ერთხელ თან უნდა დაერთოს თუ როგორ მიმდინარეობს შესაბამისი სახელმწიფო პროგრამების შესრულება.

4. საქართველოს ფინანსთა სამინისტრომ საქართველოს შრომის, ჯანმრთელობისა და სოციალური დაცვის სამინისტროს თვეში ერთხელ მიაწოდოს ინფორმაცია ქვეყნის ქალაქებისა და რაიონების ბიუჯეტების ხარჯების შესრულების მიმდინარეობის შესახებ.

5. საქართველოს შრომის, ჯანმრთელობისა და სოციალური დაცვის სამინისტრომ და საქართველოს ფინანსთა სამინისტრომ საქართველოს სახელმწიფო მინისტრს თვეში ერთხელ უნდა წარუდგინონ ინფორმაცია “საქართველოს 2002 წლის სახელმწიფო ბიუჯეტის შესახებ” საქართველოს კანონის 22 მუხლის მეორე და მესამე პუნქტებით მოცემული დავალებების შესრულების მიმდინარეობის შესახებ.

6. ქალაქებისა და რაიონების მერებმა და გამგებლებმა 2002 წლის 30 მაისამდე საქართველოს ფინანსთა სამინისტროს წარუდგინონ ინფორმაციები თუ კანონის შესრულების უზრუნველსაყოფად შესაბამისი ბიუჯეტებიდან 2002 წლის 1 აპრილიდან წლის ბოლომდე რა თანხები გადაეცემა განკარგვისათვის საქართველოს სამედიცინო დაზღვევის სახელმწიფო კომპანიას (მისი ფილიალის) ურგენტული და ამბულატორიული მომსახურეობისათვის კომპანიის 2002 წლის შემოსავლებისა და ხარჯების დამტკიცებულ მოცულობაში დადგენილი წესით ცვლილებების შესატანად.

7. იმ შემთხვევაში თუ რომელიმე ქალაქის (რაიონის) ბიუჯეტი არ იქნება დროულად დამტკიცებული შესაბამისი ქალაქი (რაიონი) კომპანიის (ფილიალის) ანგარიშზე 1 აპრილიდან თვეში ჩარიცხავს 2001 წლის შესაბამისი ბიუჯეტის ფაქტიური ხარჯების 7 პროცენტის ერთმეთორმეტედ ნაწილს.