,,სახელმწიფო სასწავლო გრანტის საფასურის რაოდენობის განსაზღვრის შესახებ”

საქართველოს მთავრობის

დადგენილება №13

2005 წლის 25 იანვარი

ქ. თბილისი

სახელმწიფო სასწავლო გრანტის საფასურის რაოდენობის განსაზღვრის შესახებ

უმაღლეს საგანმანათლებლო დაწესებულებებში 2005/06 სასწავლო წელს და შემდგომ, ერთიანი ეროვნული გამოცდების საფუძველზე ჩარიცხული სტუდენტების უმაღლესი განათლების სახელმწიფო დაფინანსების ახალ წესზე ეტაპობრივი გადასვლის უზრუნველყოფის მიზნით, ,,უმაღლესი განათლების შესახებ” საქართველოს კანონის მე-6 მუხლის პირველი პუნქტის ,,ბ“ ქვეპუნქტის, 88-ე მუხლის მე-6 და მე-8 პუნქტებისა და ,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის ,,პ“ ქვეპუნქტის საფუძველზე:

1. სახელმწიფო სასწავლო გრანტის საფასურის მაქსიმალური, საშუალო და მინიმალური რაოდენობა 2005/06, 2006/07, 2007/08 სასწავლო წლებისათვის განისაზღვროს შემდეგნაირად:

ა) მაქსიმალური რაოდენობა – 1500 ლარი;

ბ) საშუალო რაოდენობა – 1250 ლარი;

გ) მინიმალური რაოდენობა – 1000 ლარი.

2. საჯარო სამართლის იურიდიული პირი – უმაღლესი საგანმანათლებლო დაწესებულება, რომელიც აკრედიტებულია საქართველოს კანონმდებლობით დადგენილი წესით, ყოველი წლის პირველ თებერვლამდე საქართველოს განათლებისა და მეცნიერების სამინისტროს წარუდგენს მომავალი სასწავლო წლისათვის მისი ფაკულტეტების ან/და სპეციალობების საგანმანათლებლო პროგრამების საფასურის ჩამონათვალს.

3. ,,უმაღლესი განათლების შესახებ“ საქართველოს კანონით განსაზღვრული წესის შესაბამისად, საჯარო სამართლის იურიდიული პირის – უმაღლესი საგანმანათლებლო დაწესებულების მართვის ორგანოების არჩევამდე ფაკულტეტების ან/და სპეციალობათა მიხედვით საგანმანათლებლო პროგრამების საფასურის ჩამონათვალს ადგენს დაწესებულების რექტორის მოვალეობის შემსრულებელი ფაკულტეტების დეკანების მოვალეობის შემსრულებლებთან ერთად.

პრემიერ-მინისტრი        ზ. ჟვანია