საქართველოს სახელმწიფო არქივების მშენებლობის, არსებული შენობების რეკონსტრუქციისა და აღჭურვის 1999-2003 წლებში კომპლექსური პროგრამის შესახებ

საქართველოს პრეზიდენტის

ბრძანებულება №91

1998 წლის 21 თებერვალი

ქ. თბილისი

საქართველოს სახელმწიფო არქივების მშენებლობის, არსებული შენობების რეკონსტრუქციისა და აღჭურვის 1999-2003 წლების კომპლექსური პროგრამის შესახებ

საქართველოში ეროვნული საარქივო ფონდის განვითარებაში შექმნილ პრობლემათა გადაჭრის, არქივების მატერიალურ-ტექნიკური ბაზის სრულყოფის მიზნით:

1. დამტკიცდეს სახელმწიფო არქივების მშენებლობის, არსებული შენობების რეკონსტრუქციისა და აღჭურვის 1999-2003 წლების კომპლექსური თანდართული პროგრამა.

2. სახელმწიფო არქივების მშენებლობის, არსებული შენობების რეკონსტრუქციისა და აღჭურვის 1999-2003 წლების კომპლექსური პროგრამით განსაზღვრული ღონისძიებები საქართველოს ეკონომიკის სამინისტრომ გაითვალისწინოს 1999 წლისა და მომდევნო წლების ინდიკატური გეგმების პროექტების შემუშავებისას.

3. საქართველოს ფინანსთა სამინისტრომ (მ. ჭკუასელი) 1999 და მომდევნო წლების ბიუჯეტების ფორმირებისას გაითვალისწინოს საბიუჯეტო ასიგნებათა გამოყოფა პროგრამაში ასახული ღონისძიებების განსახორციელებლად.

4. საქართველოს ურბანიზაციისა და მშენებლობის სამინისტრომ (მ. ჩხენკელი) განახორციელოს ზედამხედველობა და კოორდინაცია სახელმწიფო არქივების შენობების დაპროექტებისა და მშენებლობისადმი.

5. აჭარის ავტონომიური რესპუბლიკის მინისტრთა საბჭომ, მხარეებში საქართველოს პრეზიდენტის სახელმწიფო რწმუნებულებმა, ქალაქების მერიებმა და რაიონულმა გამგეობებმა უზრუნველყონ საჭიროების შემთხვევაში სახელმწიფო არქივებისათვის დამატებითი ფართობისა და დოკუმენტების დაცვისათვის გამოსადეგი შენობების დადგენილი წესით გამოყოფა.

6. საქართველოს საარქივო სახელმწიფო დეპარტამენტმა (ზ. მახარაძე) პერიოდულად მომახსენოს აღნიშნული ბრძანებულების შესრულების მიმდინარეობა.

ე. შევარდნაძე

საქართველოს სახელმწიფო არქივების მშენებლობის, არსებული შენობების რეკონსტრუქციისა და აღჭურვის 1999-2003 წლების კომპლექსური პროგრამა

საქართველოში არსებული ცენტრალური, საქალაქო და რაიონული 81 სახელმწიფო არქივიდან მხოლოდ 30 სახელმწიფო არქივს გააჩნია სპეციალური შენობები. დანარჩენი საქალაქო და რაიონული სახელმწიფო არქივები ძირითადად განთავსებულია სხვადასხვა ადმინისტრაციული შენობებისა და საცხოვრებელი ბინების პირველ სართულებზე ამორტიზებულ შენობებში, სარდაფებში, რომლებიც მინიმალურადაც ვერ უზრუნველყოფენ ეროვნული საარქივო ფონდის დოკუმენტების დაცვას. არსებულ შენობათა უმრავლესობა მოითხოვს შეკეთებას, რეკონსტრუქციას, გაფართოებას. რიგ მათგანში არ არის დამონტაჟებული, გაუმართავ მდგომარეობაში ან უსახსრობის გამო პულტიდან ამორთულია სახანძრო-დაცვითი სიგნალიზაცია, სახელმწიფო არქივების ნაწილს არ გააჩნია ხანძრის ქრობის პირველადი საშუალებები, არქივსაცავების განათების სისტემა ვერ პასუხობს ხანძარსაწინააღმდეგო უსაფრთხოების მოთხოვნებს, ბევრი სახელმწიფო არქივი არ არის აღჭურვილი ლითონის სტელაჟებით, ხოლო არსებული ხის კონსტრუქციები არ არის დამუშავებული ცეცხლდამცავი ხსნარით, საცავებში დარღვეულია საჭირო ტემპერატურულ-ტენიანობის და შრომითი რეჟიმი.

ბოლო წლებში მომხდარი მიწისძვრების შედეგად დაინგრა ამბროლაურის და დაზიანდა ონის რაიონული სახელმწიფო არქივების შენობები, დაიწვა ადიგენის რაიონული სახელმწიფო არქივი, ცნობილი მოვლენების დროს მთლიანად დაიწვა აფხაზეთის ავტონომიური რესპუბლიკის ცენტრალური და მარტვილის რაიონული სახელმწიფო არქივების შენობები, განადგურდა დოკუმენტები, 1992 წელს დაკონსერვდა კინოფოტოფონოდოკუმენტების ცენტრალური სახელმწიფო არქივის საცავების მშენებლობა, ვერ განხორციელდა ასპინძის, წალკის, ხონის რაიონული და რუსთავის საქალაქო სახელმწიფო არქივების მშენებლობა, ასევე ვერ განხორციელდა საპროექტო სახარჯთაღრიცხვო დოკუმენტაციის შედგენა სიღნაღის და ჩხოროწყუს რაიარქივების შენობების ასაგებად.

წლების მანძილზე ჭიანურდება სადაზღვევო ფონდის სახელმწიფო არქივის (ქ. დუშეთში) კაპიტალური შეკეთების სამუშაოები, კატასტროფულ მდგომარეობაშია თიანეთის არქივისათვის აგებული სპეციალური შენობა, დღეისათვის იგი გაძარცულია, დაკარგული და განიავებულია ხის მასალა, ლითონის სტელაჟები.

ტექნიკური გაუმართაობის გამო დღევანდელ მოთხოვნებს ვერ აკმაყოფილებს დოკუმენტების რესტავრაციისა და მიკროფილმირების რესპუბლიკური და კინოფოტოფონოდოკუმენტების ცენტრალური სახელმწიფო არქივის კინოდოკუმენტების ლაბორატორიები, შეწყვეტილია როგორც წერილობითი, ისე კინო, ფოტო, ფონო დოკუმენტების სადაზღვევო ფონდის შექმნის სამუშაოები, შეზღუდულია ქრობად ტექსტებიანი და სუსტი ხილვადობის დოკუმენტების პირების გადაღება, მინიმუმამდეა დაყვანილი ყველა სახის დოკუმენტების რესტავრაციის სამუშაოები, თანხის უქონლობის გამო შეჩერებულია ნიტროფუძიანი აალებადი კინოდოკუმენტების ტრიაცეტატურ არააალებად ფირზე გადატანის სამუშაოები, წლების მანძილზე გადაუჭრელი რჩება აღნიშნული ლაბორატორიების სათანადო მანქანა-დანადგარებით აღჭურვის და საჭირო ქიმიკატებით მომარაგების საკითხი.

სახელმწიფო არქივებში ეროვნული საარქივო ფონდის დოკუმენტების დაცვის პირობების შემდგომი გაუმჯობესების, არქივების მატერიალურ-ტექნიკური ბაზის სრულყოფის მიზნით:

1. განხორციელდეს სახელმწიფო არქივებისათვის დამატებითი ფართობისა და დოკუმენტების დასაცავად გამოსადეგი შენობების გამოყოფა

                                           1999-2003 წლები

აჭარის ავტონომიური რესპუბლიკის მინისტრთა საბჭო, მხარეებში საქართველოს პრეზიდენტის სახელმწიფო რწმუნებულები, ქალაქების მერები, რაიონული გამგებლები

2. გათვალისწინებულ იქნეს კინოფოტოფონოდოკუმენტების ცენტრალური სახელმწიფო არქივის საცავების, ამბროლაურის, მარტვილის, საგარეჯოს, სიღნაღის, მესტიის, ჩხოროწყუს რაიონული სახელმწიფო არქივების მშენებლობა (ცხრილი №1).

საქართველოს ფინანსთა სამინისტრო, ურბანიზაციისა და მშენებლობის სამინისტრო, რაჭა-ლეჩხუმისა და ქვემო სვანეთის, სამეგრელო-ზემო სვანეთის, კახეთის მხარეებში საქართველოს პრეზიდენტის სახელმწიფო რწმუნებულები, ამბროლაურის, მარტვილის, მესტიის, საგარეჯოს, სიღნაღის, ჩხოროწყუს რაიონების გამგებლები

3. დამთავრდეს ასპინძის, თიანეთის რაიონული სახელმწიფო არქივების შენობების მშენებლობა (ცხრილი №2)

                                           1999-2000 წლები

საქართველოს ფინანსთა სამინისტრო, ურბანიზაციისა და მშენებლობის სამინისტრო, სამცხე-ჯავახეთის, მცხეთა-მთიანეთის მხარეებში საქართველოს პრეზიდენტის სახელმწიფო რწმუნებულები, ასპინძის და თიანეთის რაიონების გამგებლები.

4. ჩატარდეს სადაზღვევო ფონდის სახელმწიფო არქივის (ქ. დუშეთში), ქ. თბილისის ცენტრალური, ფოთის და ჭიათურის საქალაქო, ახალციხის, ბოლნისის, გარდაბნის, გორის, დედოფლისწყაროს, ვანის, ზესტაფონის, ზუგდიდის, ოზურგეთის, ყაზბეგის, ხაშურის, ქედის, ხელვაჩაურის, ხულოს რაიონული სახელმწიფო არქივების შენობების რემონტის სამუშაოები (ცხრილი №3).

                                              1998-2002 წლები

საქართველოს ფინანსთა სამინისტრო, აჭარის ავტონომიური რესპუბლიკის მინისტრთა საბჭო, მხარეებში საქართველოს პრეზიდენტის სახელმწიფო რწმუნებულები, აღნიშნული ქალაქებისა და რაიონების მერები და გამგებლები.

5. განხორციელდეს ცენტრალური სახელმწიფო არქივების, დოკუმენტების რესტავრაციისა და მიკროფილმირების, რესპუბლიკური და კინოფოტოფონოდოკუმენტების ცენტრალური სახელმწიფო არქივის კინოდოკუმენტების ლაბორატორიების სათანადო ტექნიკით აღჭურვა და ქიმიკატებით უზრუნველყოფა (ცხრილები №4 და №5).

1999-2003 წლები

საქართველოს ფინანსთა სამინისტრო, საქართველოს საარქივო სახელმწიფო დეპარტამენტი.

ცხრილი №1

სახელმწიფო არქივების ახალი შენობების მშენებლობა

ცხრილი №2

სახელმწიფო არქივების დასამთავრებელი ნაგებობების მშენებლობა

ცხრილი №3

სახელმწიფო არქივების შენობების კაპიტალური რემონტი

ცხრილი №4

ცენტრალური სახელმწიფო არქივებისა და რესპუბლიკური ლაბორატორიის

დანადგარ-მოწყობილობითა და მასალებით აღჭურვა

ცხრილი №5

ნუსხა კინოფოტოფონოდოკუმენტების ცენტრალური სახელმწიფო არქივის

ლაბორატორიის დანადგარების, აპარატურისა და მასალებისა