,,ქ. თბილისში, საბურთალოს პლატოზე არსებული საქართველოს მეცნიერებათა აკადემიის ,,აკადემქალაქისა” და მის მიმდებარე ტერიტორიაზე განაშენიანების პროცესის მოწესრიგების შესახებ”

საქართველოს მთავრობის

დადგენილება №103

2004 წლის 8 ნოემბერი

ქ. თბილისი

ქ. თბილისში საბურთალოს პლატოზე არსებული საქართველოს მეცნიერებათა აკადემიის ,,აკადემქალაქისა“ და მის მიმდებარე ტერიტორიაზე განაშენიანების პროცესის მოწესრიგების შესახებ

,,საქართველოს დედაქალაქის – თბილისის შესახებ“ საქართველოს კანონის მე-6 და მე-9 მუხლების, აგრეთვე ,,საქართველოს მეცნიერებათა აკადემიის შესახებ“ საქართველოს კანონის 29-ე მუხლის შესაბამისად ქ. თბილისში საბურთალოს პლატოზე არსებული საქართველოს მეცნიერებათა აკადემიის ,,აკადემქალაქისა“ და მის მიმდებარე ტერიტორიაზე ქაოსური ქალაქთმშენებლობის პროცესის მოწესრიგების მიზნით:

1. ეთხოვოს საქართველოს კონტროლის პალატას (ზ. სოსელია) შეამოწმოს საქართველოს მეცნიერებათა აკადემიის ,,აკადემქალაქისა“ და მის მიმდებარე ტერიტორიაზე ქონების განკარგვის კანონიერება.

2. ეთხოვოს ქ. თბილისის მერიას (ზ. ჭიაბერაშვილი):

ა) განახორციელოს ,,აკადემქალაქის“ ტერიტორიის მართვის ჯეროვანი კონტროლი, რისთვისაც გაითვალისწინოს ,,ქ. თბილისის მერიის მუნიციპალიტეტის კაბინეტის 1993 წლის 16 აპრილის დადგენილების გაუქმების შესახებ“ ქ. თბილისის მერიის მუნიციპალიტეტის კაბინეტის 1994 წლის 10 თებერვლის დადგენილება ,,აკადემქალაქისათვის“ დამაგრებული ტერიტორიის ქალაქის მიწის ფონდისათვის დაბრუნების მიზნით;

ბ) შეისწავლოს აღნიშნულ ტერიტორიაზე მენაშენეთა საქმიანობა და კანონსაწინააღმდეგო მოქმედების აღმოჩენის შემთხვევაში კანონმდებლობის საფუძველზე დასვას საკითხი შესაბამისი ორგანოების წინაშე;

გ) საქართველოს განათლებისა და მეცნიერების სამინისტროსთან შეთანხმებით მოამზადოს წინადადებები საქართველოს პრეზიდენტის 2000 წლის 3 თებერვლის №30 ბრძანებულებით დამტკიცებული საქართველოს მეცნიერებათა აკადემიის მფლობელობაში არსებული ქონების ნუსხაში ცვლილებების შეტანის თაობაზე, მიწათსარგებლობის ნორმატივების გათვალისწინებითა და მიწის ნაკვეთების ზუსტი მისამართების ჩვენებით;

დ) განიხილოს მეცნიერებათა აკადემიისათვის მიკუთვნებული, ეგრეთ წოდებულ ,,წითელ ზოლში“ მოქცეული ტერიტორიისა და კერძო საკუთრებაში არსებული მიწის ნაკვეთების გამიჯვნის საკითხი;

ე) მიიღოს ზომები ქ. თბილისის მთავრობის 2002 წლის 16 მაისის №09.26.166 დადგენილებით გათვალისწინებული დავალების შესასრულებლად; უწინარესად, მშენებლობაში წილობრივი მონაწილეობის განსაზღვრის წესის შემუშავებისა და დამტკიცების შესახებ;

ვ) უზრუნველყოს საქართველოს მეცნიერებათა აკადემიის ,,აკადემქალაქის” კორექტირებული გენგეგმისა და ტერიტორიული მოწყობის (განვითარების) პროექტის“ შეფასება იმის გათვალისწინებით, თუ რამდენადაა შესაძლებელი ამ დოკუმენტის საფუძველზე ,,აკადემქალაქის“ ტერიტორიაზე შექმნილი მდგომარეობის დარეგულირება და აკმაყოფილებს თუ არა იგი ,,განაშენიანების გეგმისათვის “ დადგენილ სტანდარტებს;

ზ) შესაბამის სახელმწიფო უწყებებთან ერთად დაუწესოს მკაცრი კონტროლი ამ ტერიტორიაზე მიწათსარგებლობაში, დაპროექტებასა და მშენებლობაში საკანონმდებლო და ნორმატიული აქტების მოთხოვნათა დაცვას;

თ) საქართველოს ეკონომიკური განვითარების სამინისტროსთან და შესაბამის სახელმწიფო უწყებებთან ერთად, საქართველოს მეცნიერებათა აკადემიის მონაწილეობით განიხილოს აკადემიისათვის მისაკუთვნებელი უძრავი ქონების (მიწის ნაკვეთებისა და შენობა-ნაგებობების) გადაცემის საკითხი უსასყიდლო უზუფრუქტის ფორმით;

ი) ქ. თბილისის არქმშენინსპექციასთან ერთად მიიღოს ქმედითი ზომები (სასამართლოში სარჩელების შეტანის ჩათვლით) ,,აკადემქალაქისა“ და მის მიმდებარე ტერიტორიაზე კანონმდებლობის დარღვევით წარმოებული მშენებლობების აღსაკვეთად.

2. დადგენილების კონტროლი განახორციელონ ქ. თბილისის მერიამ (ზ. ჭიაბერაშვილი) და საქართველოს განათლებისა და მეცნიერების სამინისტრომ (ა. ლომაია).

პრემიერ-მინისტრი ზ. ჟვანია