„ვიზის გაცემის, გაგრძელებისა და მოქმედების ვადის შეწყვეტის წესის შესახებ დებულების დამტკიცების თაობაზე“ საქართველოს პრეზიდენტის 2006 წლის 28 ივნისის №399 ბრძანებულებაში ცვლილებისა და დამატების შეტანის შესახებ“

საქართველოს პრეზიდენტის

ბრძანებულება №142

2010 წლის 26 თებერვალი

ქ. თბილისი

„ვიზის გაცემის, გაგრძელებისა და მოქმედების ვადის შეწყვეტის წესის შესახებ დებულების დამტკიცების თაობაზე“ საქართველოს პრეზიდენტის 2006 წლის 28 ივნისის №399 ბრძანებულებაში ცვლილებისა და დამატების შეტანის შესახებ

1. „ნორმატიული აქტების შესახებ“ საქართველოს კანონის მე-20 მუხლის შესაბამისად, „ვიზის გაცემის, გაგრძელებისა და მოქმედების ვადის შეწყვეტის წესის შესახებ დებულების დამტკიცების თაობაზე“ საქართველოს პრეზიდენტის 2006 წლის 28 ივნისის №399 ბრძანებულებით (სსმ III, №88, 2006 წ., მუხ. 1168) დამტკიცებულ დებულებაში შეტანილ იქნეს შემდეგი ცვლილება და დამატება:

ა) მე-4 მუხლს დაემატოს შემდეგი შინაარსის 11 პუნქტი:

„11. საქართველოს საგარეო საქმეთა მინისტრი უფლებამოსილია საქართველოს შინაგან საქმეთა სამინისტროსთან შეთანხმებით დააწესოს შეზღუდვა ცალკეულ სასაზღვრო გამტარ პუნქტებზე ვიზის გაცემასთან დაკავშირებით.“;

ბ) მე-15 მუხლის მე-3 პუნქტის პირველი აბზაცი ჩამოყალიბდეს შემდეგი რედაქციით:

„3. სასაზღვრო კონტროლის ქვედანაყოფების მიერ სასაზღვრო გამტარ პუნქტებში, გარდა იმ სასაზღვრო გამტარი პუნქტებისა, რომელზეც ვრცელდება ამ დებულების მე-4 მუხლის 11 პუნქტით გათვალისწინებული შეზღუდვა, საქართველოს ვიზები გაიცემა იმ შემთხვევებში, თუ:“.

2. ეს ბრძანებულება ამოქმედდეს გამოქვეყნებისთანავე.

მ. სააკაშვილი