სადაზღვევო შემთხვევის დადგომისას მზღვეველისათვის მოძრავი ნივთის გადაცემის წესისა და პირობების დამტკიცების შესახებ

საქართველოს მთავრობის

დადგენილება №328

2010 წლის 20 ოქტომბერი

ქ. თბილისი

სადაზღვევო შემთხვევის დადგომისას მზღვეველისათვის მოძრავი ნივთის გადაცემის წესისა და პირობების დამტკიცების შესახებ

    მუხლი 1

„ სახელმწიფო ქონების შესახებ“ საქართველოს კანონის 46-ე მუხლის მე-4 პუნქტის შესაბამისად დამტკიცდეს სადაზღვევო შემთხვევის დადგომისას მზღვეველისათვის მოძრავი ნივთის გადაცემის თანდართული წესი და პირობები.

    მუხლი 2

ძალადაკარგულად გამოცხადდეს „ სადაზღვევო შემთხვევის დადგომისას მზღვეველისათვის მოძრავი ქონების გადაცემის წესისა და პირობების დამტკიცების თაობაზე“ საქართველოს მთავრობის 2009 წლის 29 დეკემბრის № 251 დადგენილება.

    მუხლი 3

დადგენილება ამოქმედდეს გამოქვეყნებისთანავე.

პრემიერ-მინისტრი     ნ. გილაური

სადაზღვევო შემთხვევის დადგომისას მზღვეველისათვის მოძრავი ნივთის გადაცემის წესი და პირობები

    მუხლი 1. ზოგადი დებულებები

სადაზღვევო შემთხვევის დადგომისას მზღვეველისათვის მოძრავი ნივთის გადაცემის წესი და პირობები შემუშავებულია „ სახელმწიფო ქონების შესახებ“ საქართველოს კანონის მოთხოვნათა შესაბამისად და განსაზღვრავს სადაზღვევო შემთხვევის დადგომისას სახელმწიფო ორგანოების სარგებლობაში არსებული მოძრავი ნივთის მზღვეველისათვის გადაცემის წესსა და პირობებს.

    მუხლი 2. ტერმინთა განმარტება

დებულებაში გამოყენებულ ტერმინებს აქვს შემდეგი მნიშვნელობები:

ა) მზღვეველი – კერძო სამართლის იურიდიული პირი, რომელიც შექმნილია სადაზღვევო საქმიანობის განხორციელებისათვის და მიღებული აქვს დაზღვევის შესაბამისი სახეობის განხორციელების ლიცენზია, აგრეთვე ეკონომიკური განვითარებისა და ურთიერთთანამშრომლობის ორგანიზაციის (OECD) წევრ ქვეყნებში რეგისტრირებული და შესაბამისი ორგანოების მიერ ლიცენზირებული სადაზღვევო და გადაზღვევის ორგანიზაციების მიერ საქართველოში კანონმდებლობით დადგენილი წესით დაფუძნებული ფილიალი (წარმომადგენლობა);

ბ) მოსარგებლე – სახელმწიფო ორგანო, რომელიც დაზღვევის ხელშეკრულებით გათვალისწინებულ შემთხვევაში, თავის სარგებლობაში არსებულ მოძრავ ნივთს საკუთრებაში გადასცემს მზღვეველს მის მიერ ამ მოძრავი ნივთის ღირებულების ანაზღაურების ან დაზიანებული მოძრავი ნივთის იდენტური დაუზიანებელი მოძრავი ნივთის გადაცემის სანაცვლოდ დაზღვევის ხელშეკრულებით გათვალისწინებული პირობებით;

გ) დაზღვეული მოძრავი ნივთი – სადაზღვევო ხელშეკრულებით გათვალისწინებული სახელმწიფო ორგანოს სარგებლობაში არსებული მოძრავი ნივთი;

დ) სადაზღვევო შემთხვევა – გარემოება, რომლის შედეგად მოძრავი ნივთი იმგვარად დაზიანდა, რომ მისი აღდგენა შეუძლებელია ან მისი აღდგენის ღირებულება აღემატება ამ მოძრავი ნივთის საბაზრო ღირებულების შესაბამისი დაზღვევის ხელშეკრულებით გათვალისწინებულ პროცენტულ ოდენობას.

    მუხლი 3. მოძრავი ნივთის გადაცემის წესი

1. სადაზღვევო შემთხვევის დადგომისას მოსარგებლე მოძრავ ნივთს, რომელიც სადაზღვევო შემთხვევის დადგომის შედეგად დაზიანდა, მზღვეველს საკუთრებაში გადასცემს:

ა) მის მიერ მოძრავი ნივთის ღირებულების ანაზღაურების დროისათვის ამ მოძრავი ნივთის იდენტური დაუზიანებელი მოძრავი ნივთის ღირებულების ანაზღაურების შემდეგ, ამ დებულების შესაბამისად და დაზღვევის ხელშეკრულებით გათვალისწინებული პირობებით;

     ბ) დაზიანებული მოძრავი ნივთის იდენტური დაუზიანებელი მოძრავი ნივთის მიღების შემდეგ, თუ სადაზღვევო ანაზღაურება მოძრავი ნივთის მიმწოდებელთან გადაირიცხება.

2. ამ მუხლის პირველი პუნქტით გათვალისწინებულ შემთხვევებში, მოძრავი ნივთის მზღვეველისათვის გადაცემა ხდება მზღვეველსა და მოსარგებლეს შორის გაფორმებული შესაბამისი მოძრავი ნივთის მიღება-ჩაბარების აქტით.

3. მოსარგებლის მხრიდან მიღება-ჩაბარების აქტზე ხელს აწერს დაზღვევის ხელშეკრულებაზე ხელმომწერი ან მოსარგებლის მიერ უფლებამოსილი თანამდებობის პირი, ხოლო მზღვეველის მხრიდან – შესაბამისი უფლებამოსილი წარმომადგენელი.

4. მზღვეველი სადაზღვევო შემთხვევის დადგომისას მოძრავი ნივთის ღირებულების ანაზღაურებას ახორციელებს თანხის მოსარგებლის მიერ მითითებულ ანგარიშზე (მათ შორის, კერძო სამართლის იურიდიული ან ფიზიკური პირის ანგარიშზე, თუ ადგილი აქვს ამ მუხლის პირველი პუნქტის „ ბ“ ქვეპუნქტით გათვალისწინებულ შემთხვევას) ჩარიცხვით.

5. მოსარგებლე ვალდებულია, მოძრავი ნივთის მზღვეველისათვის გადაცემის თაობაზე, გადაცემიდან არა უგვიანეს 1 თვისა, ინფორმაცია წარუდგინოს საქართველოს ეკონომიკისა და მდგრადი განვითარების სამინისტროს ან იმ ორგანოს, რომლისგანაც სარგებლობაში მიღებული აქვს ეს მოძრავი ნივთი კანონმდებლობით დადგენილი წესით.