ადიგენის მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახურის დებულების დამტკიცების შესახებ

ადიგენის მუნიციპალიტეტის საკრებულოს

დადგენილება №26

2010 წლის 5 ოქტომბერი

დ. ადიგენი

ადიგენის მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახურის დებულების დამტკიცების შესახებ

„ადგილობრივი თვითმმართველობის შესახებ“ საქართველოს ორგანული კანონის 22-ე მუხლის პირველი პუნქტის „თ“ ქვეპუნქტისა და 43-ე მუხლის მე-2 პუნქტის, აგრეთვე „ნორმატიული აქტების შესახებ“ საქართველოს კანონის 25-ე მუხლის პირველი პუნქტის „ბ“ ქვეპუნქტის შესაბამისად:

1. დამტკიცდეს ადიგენის მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახურის დებულება (დანართი №1).

2. ძალადაკარგულად გამოცხადდეს „ადიგენის მუნიციპალიტეტის გამგეობის სტრუქტურული ერთეულის სამხედრო აღრიცხვის, გაწვევისა და მობილიზაციის სამსახურის დებულების დამტკიცების შესახებ“ ადიგენის მუნიციპალიტეტის საკრებულოს 2009 წლის 31 მარტის №8 დადგენილება.

3. ეს დადგენილება ამოქმედდეს გამოქვეყნებისთანავე.

საკრებულოს თავმჯდომარე                                                           გ. ენდელაძე

 დანართი № 1

ადიგენის მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახურის დებულება

    მუხლი 1. გამგეობის სამხედრო აღრიცხვის, გაწვევისა და მობილიზაციის სამსახური

1. მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახური (ტექსტში შემდგომ – სამსახური) არის მუნიციპალიტეტის გამგეობის სტრუქტურული ერთეული, რომლის ძირითადი ფუნქციებია: სამხედრო აღრიცხვის, გაწვევისა და მობილიზაციის საკითხებში მუნიციპალიტეტისათვის დელეგირებული უფლებამოსილების განხორციელების უზრუნველყოფა – ,,ადგილობრივი თვითმმართველობის შესახებ” საქართველოს ორგანული კანონის, ,,სამხედრო ვალდებულებისა და სამხედრო სამსახურის შესახებ”, ,,სამხედრო სარეზერვო სამსახურის შესახებ” და ,,მობილიზაციის შესახებ” საქართველოს კანონების შესაბამისად საქართველოს მოქალაქეთა სამხედრო აღრიცხვაზე აყვანა, სამხედრო სამსახურისთვის მომზადება, სამხედრო სავალდებულო სამსახურში გაწვევა, მობილიზაციისა და სამხედრო ძალების რეზერვთან დაკავშირებული საკითხების გადაწყვეტა.

2. მუნიციპალიტეტის გამწვევი პუნქტის ნორმალური მუშაობის უზრუნველსაყოფად, პირველადი სამხედრო აღრიცხვისა და სამხედრო სამსახურში გაწვევის ღონისძიებათა განსახორციელებლად ადგილობრივი თვითმმართველობის ხელმძღვანელობა, სამსახურს მისი განცხადების საფუძველზე უზრუნველყოფს სამედიცინო და ტექნიკური პერსონალით.

3. სამსახური თავის საქმიანობას წარმართავს საქართველოს კანონმდებლობის, გამგეობის დებულების, ამ დებულებისა და მუნიციპალიტეტის სხვა სამართლებრივი აქტების შესაბამისად.

 4. სამსახურის საშტატო განრიგი და მოხელეთა თანამდებობრივი სარგოები განისაზღვრება გამგეობის საშტატო ნუსხით.

    მუხლი 2. სამსახურის სტრუქტურა

1. სამსახური შედგება სამსახურის უფროსისა და სამსახურის მოხელეებისგან:

ა) სამსახურის უფროსი;

ბ) უფროსი სპეციალისტი წვევამდელთა პირველადი სამხედრო აღრიცხვისა და გაწვევის საკითხებში;

გ) უფროსი სპეციალისტი წვევამდელთა პირველადი სამხედრო აღრიცხვისა და გაწვევის საკითხებში;

დ) სპეციალისტი რეზერვისტთა აღრიცხვის, გაწვევისა და მობილიზაციის საკითხებში;

ე) უფროსი სპეციალისტი საქმისწარმოების საკითხებში;

ვ) ექიმი სპეციალისტი.

2. სამსახურის საქმიანობას წარმართავს სამსახურის უფროსი. სამსახურის უფროსის არყოფნის შემთხვევაში გამგებლის დავალებით მის უფლება-მოვალეობებს ახორციელებს სამსახურის ერთ-ერთი მოხელე.

 3. სამსახურის უფროსისა და სამსახურის მოხელეთა თანამდებობაზე დანიშვნა-გათავისუფლების წესები განისაზღვრება „ადგილობრივი თვითმმართველობის შესახებ“ საქართველოს ორგანული კანონისა და ,,საჯარო სამსახურის შესახებ" საქართველოს კანონის შესაბამისად.

 4. სამსახურს აქვს შტამპი, ბეჭედი დადგენილი ფორმის სახელმწიფო გერბის გამოსახულებით, ბლანკი სამსახურის სახელწოდების აღნიშვნითა და სხვა საჭირო რეკვიზიტებით.

    მუხლი 3. სამსახურის მოხელეთა ფუნქციები

1. სამსახურის უფროსი:

ა) წარმართავს სამსახურის საქმიანობას მოქმედი კანონმდებლობით, გამგეობის დებულებით, ამ დებულებით და მუნიციპალიტეტის სამართლებრივი აქტებით დადგენილი წესის შესაბამისად, პასუხისმგებელია სამსახურის მიერ დაკისრებული ამოცანებისა და ფუნქციების შესრულებაზე;

ბ) ახორციელებს საერთო კონტროლს და ზედამხედველობას სამსახურის მოხელეთა მხრიდან ამ დებულებით და მუნიციპალიტეტის სხვა სამართლებრივი აქტებით განსაზღვრულ თანამდებობრივ მოვალეობათა შესრულებაზე;

გ) ანაწილებს ფუნქციებს სამსახურის მოსამსახურეთა შორის;

დ) გამგებელს წარუდგენს წინადადებებს სამსახურის საკადრო საკითხებთან დაკავშირებით; მოსამსახურეთა წახალისებისა და მათთვის დისციპლინური პასუხისმგებლობის დაკისრების, მოსამსახურეთა მიერ მორიგი და დამატებითი შვებულებების გამოყენების, მოსამსახურეთა სამსახურებრივი მივლინებების, კვალიფიკაციის ამაღლებისა და სწავლების შესახებ;

ე) გამგებელს წარუდგენს სამსახურის მიერ მომზადებულ საკითხებს, წინადადებებს, დასკვნებსა და რეკომენდაციებს;

ვ) გამგებელს პერიოდულად წარუდგენს ანგარიშს სამსახურის მიერ შესრულებულ სამუშაოთა შესახებ;

ზ) ახორციელებს მოქმედი კანონმდებლობითა და მუნიციპალიტეტის სამართლებრივი აქტებით განსაზღვრულ სხვა ფუნქციებს;

თ) ანგარიშვალდებულია გამგებლის წინაშე.

2. უფროსი სპეციალისტი წვევამდელთა პირველადი სამხედრო აღრიცხვისა და გაწვევის საკითხებში უზრუნველყოფს:

ა) მისაწერ ჭაბუკთა სიების და საბუთების გამოთხოვას საჯარო სკოლებიდან, მუნიციპალიტეტის ტერიტორიული ერთეულებიდან და წარმოება- დაწესებულებებიდან;

ბ) მისაწერ ჭაბუკთა პირველად სამხედრო აღრიცხვაზე აყვანას და საერთო სიის (ფორმა 2) შედგენას;

გ) ანბანური წიგნების წარმოებას;

დ) სამხედრო-სააღრიცხვო მოწმობების გაცემას;

ე) ანბანური წიგნიდან წვევამდელთა აღრიცხვიდან მოხსნას და რეზერვში ჩარიცხვის ამონაწერების შევსებას;

ვ) წვევამდელთა მოძრაობის ჟურნალის წარმოებას;

ზ) გაწვევის, მიწერისა და სხვა წლიური ანგარიშების შედგენას;

თ) პირველად სამხედრო აღრიცხვაზე აყვანილ ჭაბუკთა პირადი ბარათის შევსებას;

ი) წვევამდელთა პირადი საქმის აკინძვას;

კ) წვევამდელთა პირადი საქმის მოწესრიგებას;

ლ) სარეგისტრაციო სამსახურიდან გადმოცემული შეტყობინებების შედარებას ანბანურ წიგნებთან;

მ) გასაწვევ წვევამდელთა საერთო სიის შედგენას;

ნ) გასაწვევ წვევამდელთა პირადი საქმის მოწესრიგებას;

ო) წვევამდელთა კარტოთეკის მოწესრიგებას; პასუხისმგებელია კართოტეკაში დაცულ წვევამდელთა პირადი საქმეების რაოდებობაზე;

პ) გამგეობის შესაბამის ტერიტორიული ორგანოს მოხელეთა მეშვეობით უწყებების დარიგებას წვევამდელებში;

ჟ) უაღრიცხვო წვევამდელთა მოძიებას;

რ) მოქმედი კანონმდებლობითა და მუნიციპალიტეტის სამართლებრივი აქტებით განსაზღვრული სხვა ფუნქციების განხორციელებას.

3. სპეციალისტი რეზერვისტთა აღრიცხვის, გაწვევისა და მობილიზაციის საკითხებში უზრუნველყოფს:

ა) რეზერვისტთა აღრიცხვაზე აყვანა-მოხსნას;

ბ) სამხედო ბილეთების და დროებითი მოწმობების გაცემას;

გ) რეზერვისტთა მოძრაობის ჟურნალის წარმოებას;

დ) წლიური ანგარიშების შედგენას:

ე) სამხედრო სამსახურში ხელშეკრულებით გაწვეულ რეზერვისტთა საქმის აკინძვას;

ვ) რეზერვისტთა სპეციალური აღრიცხვის, დაჯავშნის ორგანიზებას;

ზ) სარეგისტრაციო სამსახურიდან გადმოცემული შეტყობინებების კარტოთეკასთან შედარებას;

თ) ინდივიდუალურ, აქტიურ და ეროვნული გვარდიის რეზერვისტთა შერჩევას, მოზიდვას და გაწვეულთა შეიარაღებული ძალების დანაყოფებში გაგზავნას;

ი) ომისა და სამხედრო ძალების ვეტერანების, მათთან გათანაბრებული პირების აღრიცხვას და მათთან მუშაობის ორგანიზებას;

კ) შვებულებიდან ჩამოსული სამხედრო მოსამსახურეთა ჟურნალის წარმოებას;

ლ) რეზერვისტთა კარტოთეკის მოწესრიგებას; პასუხისმგებელია კარტოთეკაში დაცულ რეზერვისტთა სააღრიცხვო ბარათებისა და პირადი საქმეების რაოდებობაზე;

მ) ტექნიკის აღრიცხვიანობის მოწესრიგებას და წლიური ანგარიშის მომზადებას;

ნ) დადგენილი წესით სამობილიზაციო რესურსების აღრიცხვას, მათ გაწვევას და ტექნიკის მიწოდებას შეიარაღებულ ძალებში მშვიდობიანობისა და მობილიზაციის დროს იმ მოცულობითა და იმ ვადებში, რომლებიც განსაზღვრულია დავალებით;

ო) მოქმედი კანონმდებლობითა და მუნიციპალიტეტის სამართლებრივი აქტებით განსაზღვრული სხვა ფუნქციების განხორციელებას.

4. სპეციალისტი საქმისწარმოების საკითხებში უზრუნველყოფს:

ა) სამსახურში შემოსული და ადგილზე შექმნილი დოკუმენტების აღრიცხვას;

ბ) სამსახურში დოკუმენტების გადაცემას შემსრულებლისათვის;

გ) სამსახურში ადმინისტრაციული წარმოების წესებისა და პროცედურების დაცვას;

დ) დავალებების სათანადოდ გაფორმებას;

ე) დოკუმენტების შესრულების კონტროლს და შესრულების მიმდინარეობის შესახებ ინფორმაციის მომზადებას;

ვ) გასული დოკუმენტების გაგზავნას;

ზ) საქმეთა მომზადებას არქივისათვის ჩასაბარებლად;

თ) საქმეთა ნომენკლატურის შედგენას;

ი) საქმისწარმოებაში ბეჭდების, შტამპების, ბლანკების სათანადო გამოყენებას;

კ) მოქმედი კანონმდებლობითა და მუნიციპალიტეტის სამართლებრივი აქტებით განსაზღვრული სხვა ფუნქციების განხორციელებას.

5. ექიმი სპეციალისტი უზრუნველყოფს:

ა) წვევამდელთა სამხედრო სავალდებულო სამსახურში გაწვევის, რეზერვისტთა მობილიზაციისა და სარეზერვო ბატალიონებში გაწვევის მომენტისათვის წვევამდელთა და რეზერვისტთა ჯანმრთელობის მდგომარეობის წინასწარ შემოწმებას;

 ბ) მოქმედი კანონმდებლობითა და მუნიციპალიტეტის სამართლებრივი აქტებით განსაზღვრული სხვა ფუნქციების განხორციელებას.

    მუხლი 4. სამსახურის თანამშრომელთა უფლება-მოვალეობები

1. სამსახურის თანამშრომლებს უფლება აქვთ:

ა) უშუალო ხელმძღვანელს წარუდგინონ წინადადებები მათი საქმიანობის სრულყოფის თაობაზე;

ბ) მიიღონ მათი მუშაობისათვის აუცილებელი კონსულტაციები;

გ) ისარგებლონ საჭირო სამართლებრივი აქტებით, საინფორმაციო და სხვა მასალებით;

დ) დადგენილი წესით ისარგებლონ ორგანიზაციული, გასამრავლებელი, საინფორმაციო-საკომუნიკაციო ტექნიკითა და სხვა შესაბამისი ტექნიკური საშუალებებით;

ე) ისარგებლონ „საჯარო სამსახურის შესახებ“ საქართველოს კანონით გათვალისწინებული საჯარო მოსამსახურის სხვა უფლებებითა და გარანტიებით.

2. სამსახურის თანამშრომლები ვალდებულნი არიან:

ა) ზუსტად შეასრულონ და დაიცვან მოქმედი კანონმდებლობით, გამგეობის დებულებით, ამ დებულებითა და მუნიციპალიტეტის სამართლებრივი აქტებით განსაზღვრული მოვალეობანი;

ბ) დროულად და სრულყოფილად შეასრულონ უშუალო და ზემდგომი ხელმძღვანელების დავალებები;

გ) შესაბამისი საფუძვლის არსებობისას დაიცვან საიდუმლოების რეჟიმი.