,,საქართველოს საპატრიარქოსათვის ბორჯომის მუნიციპალიტეტის სოფელ ფოთოლეთის წმინდა კვირიკეს სახელობის ტაძრის მიმდებარედ სახელმწიფო ტყის ფონდის მიჩენილი უბნის (11.0 ჰა მიწის ფართობის) გამოყოფის შესახებ“

საქართველოს პრეზიდენტის

ბრძანებულება №176

2008 წლის 1 აპრილი

ქ. თბილისი

საქართველოს საპატრიარქოსათვის ბორჯომის მუნიციპალიტეტის სოფელ ფოთოლეთის წმინდა კვირიკეს სახელობის ტაძრის მიმდებარედ სახელმწიფო ტყის ფონდის მიჩენილი უბნის (11.0 ჰა მიწის ფართობის) გამოყოფის შესახებ

1. საქართველოს ტყის კოდექსის მე-17 მუხლის მე-2 ნაწილისა და „სახელმწიფო ტყის ფონდის მიჩენილი უბნის გამოყოფისა და ამ უბნის ტერიტორიაზე ტყითსარგებლობის, მისი შეზღუდვის, შეჩერებისა და აკრძალვის წესის შესახებ დებულების დამტკიცების თაობაზე“ საქართველოს პრეზიდენტის 2002 წლის 10 დეკემბრის №506 ბრძანებულების შესაბამისად:

ა) დაკმაყოფილდეს საქართველოს საპატრიარქოს თხოვნა და რელიგიური და სარიტუალო ღონისძიებებისათვის ხელშეწყობის მიზნით ბორჯომის მუნიციპალიტეტის სოფელ ფოთოლეთის წმინდა კვირიკეს სახელობის ტაძრის მიმდებარედ სახელმწიფო ტყის ფონდიდან გამოეყოს მიჩენილი უბანი;

ბ) მიჩენილ უბნად განისაზღვროს ბორჯომ-ხარაგაულის ეროვნული პარკის ნეძვის აღკვეთილის ტერიტორიაზე მდებარე ფოთოლეთის წმინდა კვირიკეს ტაძრის მიმდებარედ ნეძვის აღკვეთილის ახალდაბის უბნის კვარტალი №34-ის ლიტერი №1, 2, 4, 7, 9-დან 11.0 ჰა ფართობი;

გ) მიჩენილი უბნის მიწის ნაკვეთის საზღვრებისა და ფართობების დაზუსტება მოხდეს კოორდინატთა სისტემაში მომზადებული აზომვითი ნახაზის შესაბამისად;

დ) მიჩენის ვადად განისაზღვროს ოცი წელი;

ე) საქართველოს გარემოს დაცვისა და ბუნებრივი რესურსების სამინისტრომ მიჩენილი უბნის გამოყოფის მიზნით კანონმდებლობით დადგენილი წესით ერთ თვეში უზრუნველყოს საქართველოს საპატრიარქოსთან ხელშეკრულების გაფორმება და მიჩენილი უბნის გადაბარება.

2. ეს ბრძანებულება ამოქმედდეს გამოქვეყნებისთანავე.

მ. სააკაშვილი