თბილისის საქალაქო სასამართლოს განჩინება კრედიტორთა კრების მოწვევის შესახებ

გ ა ნ ჩ ი ნ ე ბ ა

საქართველოს სახელით

კრედიტორთა კრების მოწვევის შესახებ

 2010 წლის 24 სექტემბერი

ქ. თბილისი

თბილისის საქალაქო სასამართლოს სამოქალაქო საქმეთა კოლეგიის მოსამართლე ლაშა ქოჩიაშვილმა განვიხილე შპს ,,ენერგოგენერაციის“ კრედიტორთა კრების მოწვევის საკითხი,

 გ ა მ ო ვ ა რ კ ვ ი ე:

 2010 წლის 4 მაისს შპს „ენერგოგენერაციის“ დირექტორმა გიორგი ეზუგბაიამ განცხადებით მომართა თბილისის საქალაქო სასამართლოს სამოქალაქო საქმეთა კოლეგიას შპს „ენერგოგენერაციის“ გადახდისუუნარობისა და მოვალის გაკოტრების შესახებ.

 თბილისის საქალაქო სასამართლოს სამოქალაქო საქმეთა კოლეგიის 2010 წლის 2 ივნისის განჩინებით, შპს ,,ენერგოგენერაციის“ განცხადება გადახდისუუნარობის შესახებ მიღებულ იქნა წარმოებაში და კრედიტორთა პირველი კრება დაინიშნა 2010 წლის 20 ივლისს 11:00 საათზე თბილისის საქალაქო სასამართლოს სამოქალაქო საქმეთა კოლეგიის №23 სხდომის დარბაზში.

 კრედიტორთა პირველი კრება შპს „ენერგოგენერაციის“ კრედიტორთა შუამდგომლობით გადადებულ იქნა, ვინაიდან შპს ,,ენერგოგენერაციის“ მეურვის მიერ კანონით დადგენილ ვადაში ვერ იქნა წარმოდგენილი ინფორმაცია მოვალის ქონების, ფინანსური მდგომარეობის და ვალდებულებების, ასევე უზრუნველყოფილ კრედიტორების შესახებ.

 სასამართლოს მიაჩნია, რომ მოწვეულ უნდა იქნეს კრედიტორთა კრება მოვალის ქონების, ფინანსური მდგომარეობის და ვალდებულებების, ასევე უზრუნველყოფილი კრედიტორების შესახებ მეურვის მოხსენების, კრედიტორთა მოთხოვნების შემოწმების და გაკოტრების მმართველის დანიშვნის დღის წესრიგით. „გადახდისუუნარობის საქმის წარმოების შესახებ“ საქართველოს კანონის 27-ე მუხლის მე-4 პუნქტის თანახმად, კრედიტორთა კრების მოწვევის თაობაზე შეტყობინება უნდა გამოქვეყნდეს „საქართველოს საკანონმდებლო მაცნეში“.

 სასამართლომ იხელმძღვანელა „გადახდისუუნარობის საქმეთა წარმოების შესახებ“ საქართველოს კანონის მე-5, მე-7, მე-8, 25-ე, 27-ე, 30-ე მუხლებით, საქართველოს სამოქალაქო საპროცესო კოდექსის 284-285-ე მუხლებით და

დ ა ა დ გ ი ნ ა:

1. მოწვეულ იქნეს შპს ,,ენერგოგენერაციის“ კრედიტორთა კრება შემდეგი დღის წესრიგით:

1.1. მეურვის მოხსენება მოვალის ქონების, ფინანსური მდგომარეობის და ვალდებულებების, ასევე უზრუნველყოფილი კრედიტორების შესახებ.

1.2. კრედიტორთა მოთხოვნების შემოწმება.

1.3. გაკოტრების მმართველის დანიშვნა.

2. კრედიტორთა კრება მოწვეულ იქნეს 2010 წლის 1 ოქტომბერს 11:00 საათზე თბილისის საქალაქო სასამართლოს სამოქალაქო საქმეთა კოლეგიის №23 სხდომის დარბაზში (ქ. თბილისი, დავით აღმაშენებლის ხეივანი, მე-12 კმ, №6).

3. დაევალოს შპს ,,ენერგოგენერაციის“ მეურვეს კრედიტორთათვის კრედიტორთა კრების ჩატარების შესახებ შეტყობინებების დაგზავნა, მასვე დაევალოს განჩინების „საქართველოს საკანონმდებლო მაცნეში“ გამოქვეყნება, განჩინება ასევე გამოქვეყნდეს სასამართლოს დაფაზე.

4. გადახდისუუნარობის საქმის წარმოების პროცესის მხარეებს განჩინებაზე შეუძლიათ კერძო საჩივრის შეტანა განჩინების გადაცემიდან ან გაცნობიდან 5 (ხუთი) დღის ვადაში.

 მოსამართლე ლ. ქოჩიაშვილი