შესყიდვის ობიექტების იდენტიფიცირებისა და ერთგვაროვნების დადგენის წესის დამტკიცების შესახებ

სახელმწიფო შესყიდვების სააგენტოს თავმჯდომარის

ბრძანება №7

2010 წლის 20 სექტემბერი

 ქ. თბილისი

შესყიდვის ობიექტების ერთგვაროვნების დადგენის წესის დამტკიცების შესახებ

„სახელმწიფო შესყიდვების შესახებ“ საქართველოს კანონის მე-3 მუხლის პირველი პუნქტის „დ“ ქვეპუნქტის, მე-4 მუხლის მე-6 პუნქტის „მ“ ქვეპუნქტისა და 24-ე მუხლის მე-6 პუნქტის შესაბამისად, ვბრძანებ:

1. დამტკიცდეს „შესყიდვის ობიექტების ერთგვაროვნების დადგენის წესი“ თანდართულ დანართთან ერთად (დანართი №1).

2. ბრძანება ამოქმედდეს გამოქვეყნებისთანავე.

ტ. ურჯუმელაშვილი

 შესყიდვის ობიექტების ერთგვაროვნების დადგენის წესი

    მუხლი 1. ზოგადი დებულებები

1. „შესყიდვის ობიექტების ერთგვაროვნების დადგენის წესი“ (შემდგომში – წესი) შემუშავებულია „სახელმწიფო შესყიდვების შესახებ“ საქართველოს კანონის (შემდგომში - კანონი) მე-3 მუხლის პირველი პუნქტის, მე-4 მუხლის მე-6 პუნქტის „მ“ ქვეპუნქტისა და 24-ე მუხლის მე-7 პუნქტის საფუძველზე.

2. წესის მიზანია შესყიდვის ობიექტების იდენტიფიკაცია, კლასიფიკაცია და შესყიდვის ობიექტების ერთგვაროვნების დადგენა საერთაშორისო ორგანიზაციების მიერ მიღებული კლასიფიკატორის გამოყენებით, გამარტივებული შესყიდვის, გამარტივებული ელექტრონული ტენდერისა, ელექტრონული ტენდერისა და კონსოლიდირებული შესყიდვის შემთხვევებში.

    მუხლი 2. ტერმინთა განმარტებები

1. ამ წესის მიზნებისთვის, მასში გამოყენებულ ტერმინებს აქვს შემდეგი მნიშვნელობა:

ა) შესყიდვების ერთიანი ელექტრონული სისტემა – სახელმწიფო შესყიდვების პორტალი, (www.tenders.gov.ge) რომელიც უზრუნველყოფს ღია, გამჭვირვალე და კონკურენტუნარიან გარემოს სახელმწიფო შესყიდვების პროცედურებში მონაწილე ნებისმიერი პირისათვის – (შემდგომში – სისტემა);

ბ) საერთაშორისო ორგანიზაციების მიერ მიღებული კლასიფიკატორი – ევროკავშირის EC #213/2008 დირექტივით გათვალისწინებული შესყიდვების ერთიანი ლექსიკონი (Common Procurement Vocabulary – CPV), რომელიც ადგენს სახელმწიფო შესყიდვის ობიექტების ერთიან სისტემას და მიზნად ისახავს შემსყიდველი ორგანიზაციების მიერ შესყიდვის ობიექტის აღწერისას გამოყენებული მითითებების სტანდარტიზაციას (შემდგომში – კლასიფიკატორი);

გ) შესყიდვის ერთგვაროვანი ობიექტები – იდენტური, ასევე არაიდენტური, მაგრამ მსგავსი კომპონენტების, ტექნიკური მაჩვენებლების (მახასიათებლების) ან/და ფუნქციების მქონე შესყიდვის ობიექტები, რომლებიც დადგენილია წესის შესაბამისად.

2. წესში გამოყენებულ სხვა ტერმინებს აქვთ იგივე მნიშვნელობა, რაც კანონში.

    მუხლი 3. კლასიფიკატორის ხელმისაწვდომობა

1. კლასიფიკატორის ოფიციალური ვერსია წარმოადგენს სისტემის შემადგენელ ნაწილს, რომლის ფუნქციონირებას უზრუნველყოფს სახელმწიფო შესყიდვების სააგენტო (შემდგომში – სააგენტო).

2. კლასიფიკატორის ოფიციალური ვერსია ხელმისაწვდომია სისტემაში და სააგენტოს ვებგვერდზე (www.spa.gov.ge).

    მუხლი 4. კლასიფიკატორის სტრუქტურა

1. კლასიფიკატორი იყოფა 4 ერთმანეთთან ლოგიკურად დაკავშირებულ შესყიდვების იერარქიულ დონედ, რომელთაგან ყველაზე გამსხვილებულ დონეს წარმოადგენს დანაყოფი, რომელიც შედგება ჯგუფებისგან, ჯგუფები, თავის მხრივ, შედგება კლასებისგან, ხოლო კლასები – კატეგორიებისგან. ზოგიერთ შემთხვევებში კატეგორიები შედგება ქვეკატეგორიებისგან.

2. კლასიფიკატორი შედგება ძირითადი კოდებისგან, რომლებიც განსაზღვრავს შესყიდვის ობიექტს.

3. კლასიფიკატორის ძირითადი კოდი შედგება 8 ციფრისგან, სადაც:

ა) პირველი ორი ციფრი განსაზღვრავს დანაყოფს (მაგ., XX000000 – სადაც XX არის დანაყოფის განმსაზღვრელი ციფრები);

ბ) პირველი სამი ციფრი განსაზღვრავს ჯგუფს (მაგ., XXX00000 – სადაც XXX არის ჯგუფის განმსაზღვრელი ციფრები);

გ) პირველი ოთხი ციფრი განსაზღვრავს კლასს (მაგ., XXXX0000 – სადაც XXXX არის კლასის განმსაზღვრელი ციფრები);

დ) პირველი ხუთი ციფრი განსაზღვრავს კატეგორიას (მაგ., XXXXX000 – სადაც XXXXX არის კატეგორიის განმსაზღვრელი ციფრები);

ე) უკანასკნელი სამი ციფრი გამოიყენება შესყიდვის ობიექტის იდენტიფიკაციის მიზნით.

    მუხლი 5. შესყიდვის ობიექტების ერთგვაროვნება

1. სახელმწიფო შესყიდვის საშუალების შერჩევისას, კანონის მოთხოვნათა დაცვის უზრუნველსაყოფად, შესყიდვის ობიექტების ერთგვაროვნება განისაზღვრება კლასიფიკატორის დანაყოფების შესაბამისად (დანართი №1).

მაგალითი 1. შესყიდვის ობიექტი 8 ნიშნა კოდით: 18100000 (სამუშაო ტანსაცმელი, სპეცტანსაცმელი და აქსესუარები) და შესყიდვის ობიექტი 8 ნიშნა კოდით: 18800000 (ფეხსაცმელი) შედიან ერთ დანაყოფში (18000000 ტანსაცმელი, ფეხსაცმელი, საბარგო ნივთები და აქსესუარები), რადგან ორივე ობიექტის 8 ნიშნა კოდის პირველი ორი ციფრი (18) არის იდენტური, შესაბამისად, აღნიშნული შესყიდვის ობიექტები წარმოადგენენ შესყიდვის ერთგვაროვან ობიექტებს.

2. განსაკუთრებულ შემთხვევებში, თუ შემსყიდველი ორგანიზაცია დაასაბუთებს, რომ ერთი ჯგუფის კლასებსა და კატეგორიებში შემავალი შესყიდვის კონკრეტული ობიექტები არ შეიძლება განხილულ იქნენ ერთგვაროვნად და აღნიშნული შესყიდვის ობიექტების არაერთგვაროვნად ცნობის შესახებ დასაბუთებულ წერილობით მიმართვას წარადგენს სააგენტოში, სააგენტო არა უგვიანეს 10 სამუშაო დღის ვადაში იღებს გადაწყვეტილებას შესყიდვის ობიექტების ერთგვაროვნებასთან დაკავშირებით და აცნობებს შემსყიდველ ორგანიზაციას აღნიშნულის თაობაზე.

3. ამ მუხლის მე-2 პუნქტით გათვალისწინებული მიმართვა და სააგენტოს გადაწყვეტილების გაცნობა შესაძლებელია განხორციელდეს სისტემის ან სააგენტოს ვებგვერდის მეშვეობით (www.spa.gov.ge).

დანართი № 1

კლასიფიკატორის დანაყოფები