„ტექნიკური რეგლამენტის „საჰაერო ხომალდის ექსპლუატანტის სერტიფიცირების წესის“ დამტკიცების შესახებ“ საქართველოს ეკონომიკური განვითარების სამინისტროს ერთიანი სატრანსპორტო ადმინისტრაციის უფროსის 2008 წლის 21 იანვრის №10 ბრძანებაში ცვლილებებისა და დამატებების შეტანის თაობაზე

სახელმწიფო სარეგისტრაციო კოდი 300.160.070.47.052.014.375

საქართველოს რეგიონული განვითარებისა და ინფრასტრუქტურის სამინისტროს ერთიანი სატრანსპორტო ადმინისტრაციის

უფროსის ბრძანება №53

2010 წლის 18 მარტი

ქ. თბილისი

„ტექნიკური რეგლამენტის „საჰაერო ხომალდის ექსპლუატანტის სერტიფიცირების წესის“ დამტკიცების შესახებ“ საქართველოს ეკონომიკური განვითარების სამინისტროს ერთიანი სატრანსპორტო ადმინისტრაციის უფროსის 2008 წლის 21 იანვრის №10 ბრძანებაში ცვლილებებისა და დამატებების შეტანის თაობაზე

საქართველოს ზოგადი ადმინისტრაციული კოდექსის 63-ე მუხლის, „ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად, ვბრძანებ:

    მუხლი 1

„ტექნიკური რეგლამენტის „საჰაერო ხომალდის ექსპლუატანტის სერტიფიცირების წესის“ დამტკიცების შესახებ“ საქართველოს ეკონომიკური განვითარების სამინისტროს ერთიანი სატრანსპორტო ადმინისტრაციის უფროსის 2008 წლის 21 იანვრის №10 ბრძანებით (სსმ III, 28.01.2008წ., №13, მუხ.173) დამტკიცებულ ტექნიკურ რეგლამენტში „საჰაერო ხომალდის ექსპლუატანტის სერტიფიცირების წესი“ შეტანილ იქნეს შემდეგი ცვლილებები და დამატებები:

1. მე-2 მუხლის მე-3 პუნქტი ჩამოყალიბდეს შემდეგი რედაქციით:

„3. საქართველოში რეგისტრირებულ პირს არა აქვს უფლება განახორციელოს კომერციული საჰაერო გადაყვანა-გადაზიდვები და/ან საავიაციო სამუშაოები, თუ მას არ გააჩნია ამ წესის შესაბამისად გაცემული მოქმედი სერტიფიკატი და მისი დანართი №1. სერტიფიკატი ადასტურებს მისი მფლობელის შესაძლებლობას უსაფრთხოდ განახორციელოს კომერციული საჰაერო გადაყვანა-გადაზიდვები და/ან საავიაციო სამუშაოები იმ  შეზღუდვებისა და პირობების შესაბამისად, რომლებიც განსაზღვრულია სერტიფიკატით და მისი დანართებით.“.

2. მე-2 მუხლს დაემატოს მე-13 პუნქტი შემდეგი რედაქციით:

„13. დაუშვებელია საქართველოში რეგისტრირებული სხ-ის ექსპლუატანტის სერტიფიკატის №1 დანართით გათვალისწინებული სხ-ის, იმავდროულად, საქართველოში რეგისტრირებული სხვა სხ-ის ექსპლუატანტის სერტიფიკატის №1 დანართში შეტანა.“. 

3. მე-4 მუხლის მე-3 პუნქტის „მ.ა“ ქვეპუნქტი ჩამოყალიბდეს შემდეგი რედაქციით:

„მ.ა) ბაზირების აეროპორტთან და აეროპორტში მყოფ სხვა სამსახურებთან (სხ-ის ტექნიკური მომსახურების უზრუნველყოფაზე, აფრენა-დაფრენისა და სახმელეთო მომსახურების სამუშაოთა უზრუნველყოფაზე, სამედიცინო მომსახურებაზე, საწვავ-საცხები მასალებით გამართვის მომსახურებაზე, საავიაციო უშიშროების უზრუნველყოფაზე, საავარიო-სამაშველო სამუშაოებით უზრუნველყოფაზე);“.

4. მე-8  მუხლის პირველი პუნქტი ჩამოყალიბდეს შემდეგი რედაქციით:

„1. კომისიის დადებითი დასკვნის შემთხვევაში ადმინისტრაცია, საქართველოს ზოგადი ადმინისტრაციული კოდექსით გათვალისწინებული წესით, ღებულობს გადაწყვეტილებას სხ-ის ექსპლუატანტის სერტიფიკატის გაცემის თაობაზე და გასცემს სერტიფიკატს და ამ სერტიფიკატის №1 დანართს.“.

5. მე-9 მუხლის:

ა) პირველ  პუნქტს  დაემატოს „ბ¹“ და „ბ²“ ქვეპუნქტები შემდეგი რედაქციით: 

„ბ¹) მოითხოვს სერტიფიკატის მფლობელი;

ბ²) სერტიფიკატის დანართი №1-ით გათვალისწინებულ ყველა სხ-ს გასული აქვს საფრენად ვარგისობის მოწმობის მოქმედების ვადა;“;

ბ) მე-3 პუნქტი ჩამოყალიბდეს შემდეგი რედაქციით:

„3. სერტიფიკატის მოქმედება შეჩერდება იმ დრომდე, ვიდრე არ გამოსწორდება დარღვევა, მაგრამ გადაწყვეტილების მიღებიდან არა უმეტეს ერთი თვით.“;

გ) მე-5 პუნქტი ჩამოყალიბდეს შემდეგი რედაქციით:

„5. სერტიფიკატის გაუქმება ნიშნავს სერტიფიკატისა და მისი დანართ(ებ)ის გაცემის თაობაზე ადმინისტრაციის გადაწყვეტილებების ძალადაკარგულად გამოცხადებას.“; 

დ) მე-6 პუნქტს დაემატოს „გ¹“ ქვეპუნქტი შემდეგი რედაქციით:

„გ¹) თუ სერტიფიკატის დანართი №1 არ ითვალისწინებს არც ერთ  სხ-ს;“.

6. მე-9 მუხლს დაემატოს მე-10 პუნქტი შემდეგი რედაქციით:

„10. იმ შემთხვევაში, თუ სერტიფიკატის დანართი №1-ით გათვალისწინებულ  სხ-ს  გასული  აქვს საფრენად ვარგისობის მოწმობის მოქმედების ვადა და ექსპლუატანტი, ვადის გასვლიდან ერთი თვის ვადაში არ წარმოადგენს მოქმედ სხ-ის საფრენად ვარგისობის მოწმობას, მაშინ აღნიშნული სხ ამოღებულ იქნება სერტიფიკატის  დანართი №1-დან, ექსპლუატანტის განცხადების გარეშე.“.

7. მე-10 მუხლის მე-4 და მე-5 პუნქტები ჩამოყალიბდეს შემდეგი რედაქციით:

„4. სერტიფიკატში სავალდებულოდ აღინიშნება, რომ სერტიფიკატი ძალაშია მხოლოდ მის  დანართ №1-თან ერთად. სერტიფიკატით და მისი დანართებით გათვალისწინებული მონაცემები განსაზღვრულია ამ  წესის  დანართები  №3, 4 და 5-ით.

5. სერტიფიკატის დანართი №2 გაიცემა სერტიფიკატის მფლობელის მოთხოვნის საფუძველზე, იმ შემთხვევაში, თუ  მას, საქართველოს კანონმდებლობის და იკაო-ს ოფიციალური გამოცემის Doc 8335-An/879 („საექსპლუატაციო ინსპექციის, სერტიფიცირებისა და მუდმივი ზედამხედველობის პროცედურების სახელმძღვანელო“)   მე-10 თავის 10.3 პუნქტის („სხ-ის იჯარა ეკიპაჟით“) და ამავე ოფიციალური გამოცემის დამატება „B“-ს ნაწილი „G“-ის  შესაბამისად  გაფორმებული აქვს ხელშეკრულება სხ-ის ექსპლუატანტთან ამ უკანასკნელის მფლობელობაში არსებული სხ-ით და ეკიპაჟ(ებ)ით ფრენ(ებ)ის შესრულების თაობაზე. სერტიფიკატის დანართი №2 გაიცემა ამ პუნქტით გათვალისწინებული ხელშეკრულებით განსაზღვრული თითოეული სხ-ს თვის ცალ-ცალკე.“    

8. წესის დანართი №3 და №4 ჩამოყალიბდეს თანდართული რედაქციით.

9. წესის დანართი №6 ამოღებულ იქნეს.

    მუხლი 2

ბრძანება ამოქმედდეს გამოქვეყნებისთანავე.

ლ. ჭიჭინაძე