დიპლომისშემდგომი სამედიცინო განათლების 2010 წლის პროგრამის დამტკიცების შესახებ

სახელმწიფო სარეგისტრაციო კოდი 470.230.000.22.035.014.321

საქართველოს შრომის, ჯანმრთელობისა და სოციალური დაცვის მინისტრის ბრძანება №71/ნ

2010 წლის 9 მარტი

ქ. თბილისი

დიპლომისშემდგომი სამედიცინო განათლების 2010 წლის პროგრამის დამტკიცების შესახებ

„საქართველოს 2010 წლის სახელმწიფო ბიუჯეტის შესახებ“ საქართველოს კანონის მე-14 მუხლისა (ორგანიზაციული კოდი 35 12 03) და 34-ე მუხლის მე-3 პუნქტის საფუძველზე, ვბრძანებ:

1. დამტკიცდეს თანდართული „დიპლომისშემდგომი სამედიცინო განათლების 2010 წლის პროგრამა“ (დანართი №1).

2. ბრძანება ამოქმედდეს გამოქვეყნებისთანავე.

მინისტრის მოვალეობის

შემსრულებელი  ი. გიორგობიანი

დანართი №1

დიპლომისშემდგომი სამედიცინო განათლების 2010 წლის პროგრამა

თავი I

პროგრამის ანოტაცია

    მუხლი 1. პროგრამის მიზანი

პროგრამის მიზანია თანამედროვე სტანდარტებისა და საერთაშორისო რეკომენდაციების შესაბამისი დონის ექიმი-სპეციალისტების მომზადება და დიპლომისშემდგომი სამედიცინო განათლების რეფორმის ხელშეწყობა.

    მუხლი 2. პროგრამის ამოცანა

პროგრამის ამოცანაა 2007 წლამდე სახელმწიფო დაკვეთით მიღებული რეზიდენტების მომზადება და დიპლომისშემდგომი სამედიცინო განათლების (პროფესიული მზადების) სისტემისა და რეგულირების შესაბამისი ინსტრუმენტების ეფექტურობის ამაღლება.

    მუხლი 3. პროგრამის კომპონენტები

პროგრამა შედგება შემდეგი კომპონენტებისაგან:

ა) 2007 წლამდე სახელმწიფო დაკვეთით მიღებული რეზიდენტების მომზადების კომპონენტი;

ბ) დიპლომისშემდგომი სამედიცინო განათლების რეფორმის მხარდაჭერის კომპონენტი.

    მუხლი 4. განხორციელების მეთოდოლოგია

1. „საქართველოს 2010 წლის სახელმწიფო ბიუჯეტის შესახებ“ საქართველოს კანონის შესაბამისად, პროგრამას ახორციელებს საქართველოს შრომის, ჯანმრთელობისა და სოციალური დაცვის სამინისტროს სახელმწიფო კონტროლს დაქვემდებარებული საჯარო სამართლის იურიდიული პირი – საქართველოს ჯანმრთელობისა და სოციალური დაცვის პროექტების განმახორციელებელი ცენტრი.

2. დიპლომისშემდგომი სამედიცინო განათლების პროგრამის ფარგლებში  გათვალისწინებული მომსახურების შესყიდვა განხორციელდება „სახელმწიფო შესყიდვების შესახებ“ საქართველოს კანონის შესაბამისად.

    მუხლი 5. პროგრამის ბიუჯეტი

პროგრამის დაფინანსების წყაროს წარმოადგენს სახელმწიფო ბიუჯეტი და ამ მიზნით 2010 წელს გათვალისწინებულია 200 000 (ორასი ათასი) ლარი, რომელიც ნაწილდება შემდეგი ცხრილის შესაბამისად:

    მუხლი 6. განხორციელების ვადები

დიპლომისშემდგომი სამედიცინო განათლების პროგრამა ხორციელდება 2010 წლის 31 დეკემბრის ჩათვლით.

    მუხლი 7. პროგრამის შედეგები

პროგრამის მოსალოდნელი შედეგებია:

ა) სამედიცინო სფეროს ადამიანური რესურსის სიმძლავრის განვითარება;

ბ) დიპლომისშემდგომი სამედიცინო განათლების პროცესის სრულყოფა;

გ) შეფასების მექანიზმების გაუმჯობესება;

დ) ექიმთა კვალიფიკაციის ამაღლება;

ე) სამედიცინო მომსახურების ხარისხის სახელმწიფო რეგულირების სისტემის სრულყოფა და ქმედითუნარიანობის გაზრდა.

თავი II

2007 წლამდე სახელმწიფო დაკვეთით მიღებული რეზიდენტების მომზადების კომპონენტი

    მუხლი 8. კომპონენტის ამოცანები      

კომპონენტის ამოცანებია:

ა) სახელმწიფო პროგრამის ფარგლებში დამტკიცებული სტანდარტებისა და შესრულებული სამუშაოს ყოველთვიური ანგარიშის საფუძველზე დადგენილი წესით დაფინანსების უზრუნველყოფა;       

ბ) უმაღლესი საგანმანათლებლო დაწესებულების კურსდამთავრებული (დიპლომის მქონე) პირის დახელოვნება შესაბამის საექიმო სპეციალობაში და კვალიფიციური სპეციალისტის მომზადება შესაბამისი პროფილის კლინიკაში (როგორც სტაციონარულ, ასევე, ამბულატორიულ) რეზიდენტის პრაქტიკული მუშაობის გზით;

გ) რეზიდენტურაში მზადების პერიოდში რეზიდენტის მიერ წარმოებული პრაქტიკული საქმიანობის მეთვალყურეობის უზრუნველყოფა სათანადო კვალიფიკაციის დამოუკიდებელი საექიმო საქმიანობის უფლების მქონე პირის მიერ და ანგარიშების მომზადება.

    მუხლი 9. კომპონენტის განხორციელების გეგმა

ა) სარეზიდენტო მზადების პროგრამ-დირექტორებთან შეთანხმებით რეზიდენტთა მზადების ინდივიდუალური გეგმა-გრაფიკების (როტაციების გრაფიკი) მომზადების უზრუნველყოფა;

ბ) კლინიკებში რეზიდენტთა მზადების მონიტორინგის უზრუნველყოფა;

გ) მზადების შუალედური შეფასების უზრუნველყოფა;

დ) კურსდამთავრებული რეზიდენტების მომზადების დონის საბოლოო შეფასების უზრუნველყოფა.

    მუხლი 10. კომპონენტის მოსარგებლეები

კომპონენტის ფარგლებში გათვალისწინებულია 2007 წლამდე სახელმწიფო დაკვეთით მიღებული 23 რეზიდენტის მზადების დაფინანსება. 2010 წლის 31 დეკემბრისათვის სახელმწიფო დაკვეთით სარეზიდენტო მზადებას დაასრულებს 23 რეზიდენტი.

    მუხლი 11. კომპონენტის განხორციელების მეთოდოლოგია

რეზიდენტები მზადებას გაივლიან საქართველოს შრომის, ჯანმრთელობისა და სოციალური დაცვის სამინისტროს პროფესიული განვითარების საბჭოს მიერ აკრედიტებული სარეზიდენტო პროგრამის შესაბამისად. საქართველოს განათლებისა და მეცნიერების სამინისტროსთან შეთანხმებით სარეზიდენტო პროგრამას ამტკიცებს საქართველოს შრომის, ჯანმრთელობისა  და სოციალური დაცვის სამინისტრო.

    მუხლი 12. კომპონენტის ბიუჯეტი

კომპონენტის დაფინანსების წყაროს წარმოადგენს სახელმწიფო ბიუჯეტი და ამ მიზნით 2010 წელს გათვალისწინებულია 22 600 (ოცდაორი ათას ექვსასი)  ლარი, თანდართული ცხრილის შესაბამისად (დანართი №2).

თავი III

დიპლომისშემდგომი სამედიცინო განათლების რეფორმის მხარდაჭერის კომპონენტი

    მუხლი 13. კომპონენტის ამოცანა

კომპონენტის ამოცანაა საექიმო სპეციალობებისათვის დიპლომისშემდგომი განათლების/სარეზიდენტო პროგრამების შემუშავება/გადახედვა, სახელმწიფო სასერტიფიკაციო გამოცდების მექანიზმების (გამოცდის ფორმატი, სასერტიფიკაციო ტესტ-კითხვარები) გაუმჯობესება და საექიმო სპეციალობებისათვის პროფესიული სტანდარტების (კომპეტენციების) მომზადება.

    მუხლი 14. კომპონენტის განხორციელების მეთოდოლოგია

1. კომპონენტი ითვალისწინებს მომსახურების (რომლის მიზანია ტექნიკური დავალების შედგენა) შესყიდვას საექიმო სპეციალობებისათვის დიპლომისშემდგომი განათლების/სარეზიდენტო პროგრამების მომზადება/გადახედვის, სახელმწიფო სასერტიფიკაციო გამოცდების მექანიზმების (გამოცდის ფორმატი, სასერტიფიკაციო ტესტ-კითხვარები) გაუმჯობესებისა და პროფესიული სტანდარტების შემუშავების მიზნით და შესყიდული ტექნიკური დავალების შესაბამისად, საექიმო სპეციალობებისათვის დიპლომისშემდგომი განათლების/სარეზიდენტო პროგრამების შემუშავება /გადახედვას, სახელმწიფო სასერტიფიკაციო გამოცდების ტესტ-კითხვარებისა და საექიმო სპეციალობებისათვის პროფესიული სტანდარტების (კომპეტენციების) მომზადებას.

2. კომპონენტის განხორციელებისას გამოყენებულ იქნება შემდეგი პრინციპები:

ა) საექიმო სპეციალობები, რომელთათვისაც განხორციელდება დიპლომისშემდგომი განათლების/სარეზიდენტო პროგრამების შემუშავება/გადახედვა, სახელმწიფო სასერტიფიკაციო გამოცდების მექანიზმების გაუმჯობესება და პროფესიული სტანდარტების (კომპეტენციების) მომზადება მიმდინარე ეტაპზე,  განისაზღვრება საქართველოს შრომის, ჯანმრთელობისა და სოციალური დაცვის სამინისტროს პროფესიული განვითარების საბჭოს რეკომენდაციის საფუძველზე, მედიცინის დარგის პრიორიტეტულობისა და არსებული საჭიროებების გათვალისწინებით;

ბ) საექიმო სპეციალობებისათვის დიპლომისშემდგომი განათლების/ სარეზიდენტო პროგრამების მომზადება/გადახედვის, სახელმწიფო სასერტიფიკაციო გამოცდების მექანიზმების (გამოცდის ფორმატი, სასერტიფიკაციო ტესტ-კითხვარები) გაუმჯობესებისა და პროფესიული სტანდარტების შემუშავების მიზნით შესყიდული ტექნიკური დავალების შეფასება განხორციელდება საქართველოს შრომის, ჯანმრთელობისა და სოციალური დაცვის სამინისტროს პროფესიული განვითარების საბჭოს მიერ;

გ) მომწოდებელთა მიერ წარმოდგენილი დოკუმენტების (დიპლომისშემდგომი განათლების/სარეზიდენტო პროგრამები, სახელმწიფო სასერტიფიკაციო გამოცდების ტესტ-კითხვარები, საექიმო სპეციალობებისათვის პროფესიული სტანდარტები (კომპეტენციები)) შეფასების მიზნით, დარგის სპეციალისტებისაგან შეიქმნება სამუშაო ჯგუფი, რომლის შემადგენლობასა და ფუნქციებს განსაზღვრავს საქართველოს შრომის, ჯანმრთელობისა და სოციალური დაცვის მინისტრი ინდივიდუალური ადმინისტრაციულ-სამართლებრივი აქტით.

3. ცალკეული საექიმო სპეციალობისათვის დიპლომისშემდგომი განათლების/სარეზიდენტო პროგრამების, სახელმწიფო სასერტიფიკაციო გამოცდების მექანიზმების (ტესტ-კითხვარები) და საექიმო სპეციალობებისათვის პროფესიული სტანდარტების (კომპეტენციების) შესყიდვა განხორციელდება ერთიანი პაკეტის ფარგლებში ერთი მომწოდებლისგან.

4. დეტალურ სამუშაოთა აღწერილობას, რომელიც ითვალისწინებს საექიმო სპეციალობებისათვის დიპლომისშემდგომი განათლების/ სარეზიდენტო პროგრამების მომზადება/გადახედვის, სახელმწიფო სასერტიფიკაციო გამოცდების მექანიზმების (გამოცდის ფორმატი, სასერტიფიკაციო ტესტ-კითხვარები) გაუმჯობესებისა და პროფესიული სტანდარტების შემუშავების მიზნით მომსახურების (ტექნიკური დავალების) შესყიდვას, შეიმუშავებს საქართველოს შრომის, ჯანმრთელობისა და სოციალური დაცვის სამინისტროს ჯანმრთელობის დაცვის დეპარტამენტი საქართველოს შრომის, ჯანმრთელობისა და სოციალური დაცვის სამინისტროს პროფესიული განვითარების საბჭოს რეკომენდაციების საფუძველზე; ხოლო საექიმო სპეციალობებისათვის დიპლომისშემდგომი განათლების/სარეზიდენტო პროგრამების შემუშავება/გადახედვა, სახელმწიფო სასერტიფიკაციო გამოცდების მექანიზმების (სასერტიფიკაციო ტესტ-კითხვარები) და საექიმო სპეციალობებისათვის პროფესიული სტანდარტების (კომპეტენციების) მომზადება განხორციელდება შესყიდული  ტექნიკური დავალების თანახმად.

5. შესყიდვის პროცედურებს, კანონმდებლობის შესაბამისად, უზრუნველყოფს საქართველოს შრომის, ჯანმრთელობისა და სოციალური დაცვის სამინისტროს სახელმწიფო კონტროლს დაქვემდებარებულ საჯარო სამართლის იურიდიული პირი – საქართველოს ჯანმრთელობისა და სოციალური დაცვის პროექტების განმახორციელებელი ცენტრი.

6. მომწოდებლის მიერ წარმოდგენილი დოკუმენტების (დიპლომისშემდგომი განათლების/სარეზიდენტო პროგრამები, სახელმწიფო სასერტიფიკაციო გამოცდების მექანიზმები (სასერტიფიკაციო ტესტ-კითხვარები) და საექიმო სპეციალობებისათვის პროფესიული სტანდარტები (კომპეტენციები)) შეფასება განხორციელდება ამ მუხლის მე-2 პუნქტის „გ“ ქვეპუნქტის შესაბამისად შექმნილ სამუშაო ჯგუფის მიერ, ამის შემდგომ, არსებული დასკვნის თანახმად, მომწოდებელი უზრუნველყოფს დოკუმენტების საბოლოო ვარიანტის მომზადებას.

7. მომწოდებელს დოკუმენტების (დიპლომისშემდგომი განათლების/ სარეზიდენტო პროგრამები, სახელმწიფო სასერტიფიკაციო გამოცდების ტესტ-კითხვარები და საექიმო სპეციალობებისათვის პროფესიული სტანდარტები (კომპეტენციები)) საბოლოო ვარიანტის მომზადებისათვის დაუწესედება განსაზღვრული გონივრული ვადა; ამ შემთხვევაში წარმოდგენილი დოკუმენტების მიღება, ასევე, განხორციელდება დარგის სპეციალისტებისაგან შექმნილი სამუშაო ჯგუფის რეკომენდაციის საფუძველზე.

    მუხლი 15. კომპონენტის ფარგლებში განსახორციელებელი ღონისძიებები და კომპონენტის განხორციელების გეგმა

1. კომპონენტის ფარგლებში განსახორციელებელი ღონისძიებებია:

ა) საექიმო სპეციალობებისათვის დიპლომისშემდგომი განათლების/ სარეზიდენტო პროგრამების მომზადება/გადახედვის, სახელმწიფო სასერტიფიკაციო გამოცდების მექანიზმების (გამოცდის ფორმატი, სასერტიფიკაციო ტესტ-კითხვარები) გაუმჯობესებისა და პროფესიული სტანდარტების შემუშავების მიზნით მომსახურების (რომლის მიზანია ტექნიკური დავალების შედგენა) შესყიდვა ექსპერტის/ექსპერტებისაგან;

ბ) ტექნიკური დავალების შესაბამისად, ექსპერტის/ორგანიზაციის მიერ დიპლომისშემდგომი განათლების/სარეზიდენტო პროგრამების მომზადება/ გადახედვა;

გ) ტექნიკური დავალების შესაბამისად, ექსპერტის/ორგანიზაციის მიერ სახელმწიფო სასერტიფიკაციო გამოცდების ტესტ-კითხვარების შემუშავება;

დ) ტექნიკური დავალების შესაბამისად, ექსპერტის/ორგანიზაციის მიერ პროფესიული სტანდარტების მომზადება;

ე) მომწოდებლის მიერ წარმოდგენილი დოკუმენტების შეფასება/ექსპერტიზა.

 2. კომპონენტის განხორციელების გეგმა 2010 წლის განმავლობაში მოცემულია შემდეგ ცხრილში:

    მუხლი 16. კომპონენტის ბიუჯეტი

კომპონენტის დაფინანსების წყაროს წარმოადგენს სახელმწიფო ბიუჯეტი და ამ მიზნით 2010 წელს გათვალისწინებულია 177 400 (ასსამოცდაჩვიდმეტი ათას ოთხასი)  ლარი, შემდეგი ცხრილის შესაბამისად:

დანართი №2

2007 წლამდე სახელმწიფო დაკვეთით მიღებული რეზიდენტების მზადების ხარჯთაღრიცხვა

 (იანვარი – დეკემბერი)