Об участии Вооруженных Сил Грузии в миротворческих операциях

საქართველოს კანონი

საქართველოს თავდაცვის ძალების სამშვიდობო ოპერაციებში მონაწილეობის შესახებ

საქართველოს 2018 წლის 31 ოქტომბრის კანონი №3596  – ვებგვერდი, 21.11.2018წ.

ეს კანონი აწესრიგებს საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა სახის სამშვიდობო საქმიანობაში საქართველოს თავდაცვის ძალებისა და სამოქალაქო პერსონალის მონაწილეობასთან დაკავშირებით საქართველოს მიერ საერთაშორისო ხელშეკრულებების საფუძველზე ნაკისრი ვალდებულებების შესრულებისას წარმოშობილ სამართლებრივ ურთიერთობებს.

საქართველოს 2018 წლის 31  ოქტომბრის  კანონი №3596  – ვებგვერდი, 21.11.2018წ.

    მუხლი 1

1. საქართველო მონაწილეობს საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა სახის სამშვიდობო საქმიანობაში საქართველოს კონსტიტუციის, საქართველოს საერთაშორისო ხელშეკრულებებისა და შეთანხმებების საფუძველზე ნაკისრი საერთაშორისო ვალდებულებებისა და საქართველოს კანონმდებლობის შესაბამისად.

2. ყოველ ცალკეულ შემთხვევაში საქართველო დამოუკიდებლად განსაზღვრავს ოპერაციებში მონაწილეობის მიზანშეწონილობას.

3. ამ კანონის მიზნების განსახორციელებლად საქართველოს კანონმდებლობით დადგენილი წესით დამტკიცებული საქართველოს თავდაცვის ძალების რაოდენობის ფარგლებში იქმნება სამშვიდობო ძალები (ქვედანაყოფები და შენაერთები), რომლებიც გადიან სპეციალურ მომზადებასა და სწავლებას (ცეცხლის შეწყვეტის შეთანხმების შესრულების კონტროლი, დაპირისპირებული მხარეების დაშორიშორება, განიარაღება და დაშლა, საინჟინრო სამუშაოების წარმოება).

4. სამშვიდობო ძალების სტრუქტურა განისაზღვრება საქართველოს თავდაცვის ძალების შემადგენლობიდან, საქართველოს კანონმდებლობით დადგენილი წესით.

საქართველოს 2018 წლის 31  ოქტომბრის  კანონი №3596  – ვებგვერდი, 21.11.2018წ.

    მუხლი 2

საქართველოს სამშვიდობო ძალების წარდგენა და გამოყენება საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებისა და სხვა სახის სამშვიდობო საქმიანობის განსახორციელებლად, რომელიც აგრეთვე შეიძლება ითვალისწინებდეს იძულებითი ზომების გატარებას, დაუშვებელია საქართველოს პარლამენტის თანხმობის გარეშე.

    მუხლი 3

საქართველოს მთავრობა საქართველოს საგარეო საქმეთა და თავდაცვის სამინისტროების წარდგინებით იღებს გადაწყვეტილებას ცალკეული სამხედრო მოსამსახურეების ცეცხლის შეწყვეტის შეთანხმების შესრულების, დაპირისპირებულ მხარეთა დაშორიშორებისა და სხვა ფუნქციების შესასრულებლად საერთაშორისო მშვიდობისა და უსაფრთხოების შენარჩუნებისა და აღდგენისათვის და სხვა ისეთი სახის სამშვიდობო საქმიანობის განსახორციელებლად, რომელიც არ არის დაკავშირებული იძულებითი ზომებისა და სამშვიდობო ძალის გამოყენებასთან, ნებაყოფლობითი გაგზავნის შესახებ.

    მუხლი 4

    მუხლი 5

1. საქართველოს თავდაცვის სამინისტრო საქართველოს შინაგან საქმეთა სამინისტროსთან შეთანხმებით საქართველოს მთავრობას წარუდგენს წინადადებებს საერთაშორისო მშვიდობისა და უსაფრთხოების შენარჩუნებისა და აღდგენის ოპერაციების უზრუნველსაყოფად და სხვა სახის სამშვიდობო საქმიანობაში მონაწილეობის მისაღებად სახელმწიფო მატერიალური რეზერვებიდან მატერიალურ-ტექნიკური, სახმელეთო, საჰაერო და საზღვაო სატრანსპორტო საშუალებების გამოყოფის შესახებ.

2. ამ მუხლის პირველ პუნქტში აღნიშნული მატერიალურ-ტექნიკური საშუალებების სახელმწიფო რეზერვებიდან გამოყოფის შესახებ გადაწყვეტილებას იღებს საქართველოს მთავრობა.

საქართველოს 2005 წლის 10 ივნისის კანონი №1610 - სსმ I, №33, 01.07.2005 წ., მუხ.204

    მუხლი 6

1. თუ საქართველომ საერთაშორისო ხელშეკრულებებისა და შეთანხმებების შესაბამისად დაიწყო სამშვიდობო ძალების ფორმირება საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა ისეთი სახის სამშვიდობო საქმიანობაში მონაწილეობის მისაღებად, რომელიც დაკავშირებულია იძულებითი ზომებისა და სამშვიდობო ძალების გამოყენებასთან, საქართველოს საგარეო საქმეთა სამინისტრო საქართველოს პრეზიდენტის დავალებით, საქართველოს მთავრობასთან შეთანხმებით აწარმოებს მოლაპარაკებებს შესაბამისი ხელშეკრულებებისა და შეთანხმებების ხელმოწერის მიზნით, რომლებიც განსაზღვრავს ჯარების რაოდენობას, სახეობას, საერთო განლაგებას, მზადყოფნის ხარისხს, მომსახურებისა და დახმარების საშუალებების ხასიათს.

2. ამ მუხლის პირველ პუნქტში აღნიშნული საერთაშორისო ხელშეკრულებები და შეთანხმებები საქართველოს კანონმდებლობით დადგენილი წესით ექვემდებარება რატიფიცირებას.

    მუხლი 7

საქართველოს ყველა საერთაშორისო შეთანხმება და ხელშეკრულება, რომელიც ითვალისწინებს საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა სახის სამშვიდობო საქმიანობაში სამშვიდობო ძალებისა და სამოქალაქო პერსონალის მონაწილეობას, საქართველოს კანონმდებლობით დადგენილი წესით ექვემდებარება რატიფიცირებას.

    მუხლი 8

1. საქართველოს მთავრობა სამშვიდობო ძალების ან/და სამოქალაქო პერსონალის საერთაშორისო მშვიდობისა და უსაფრთხოების აღდგენისა და შენარჩუნების ოპერაციებში ან/და სხვა სახის სამშვიდობო საქმიანობაში მონაწილეობის მისაღებად წარგზავნისათვის ამტკიცებს ორგანიზაციულ ღონისძიებათა გეგმას.

2. საქართველოს სამშვიდობო ძალების ფინანსური უზრუნველყოფა ხორციელდება საქართველოს სახელმწიფო ბიუჯეტიდან საქართველოს თავდაცვის სამინისტროს ბიუჯეტის ფარგლებში, აგრეთვე სხვა წყაროებიდან.

    მუხლი 9

1. სამშვიდობო ძალების მოსამზადებლად საერთაშორისო მშვიდობისა და უსაფრთხოების ამოცანების შესრულების უზრუნველყოფის მიზნით საქართველოს თავდაცვის სამინისტრო:

ა) საქართველოს პრეზიდენტს – საქართველოს თავდაცვის ძალების უმაღლეს მთავარსარდალს წარუდგენს წინადადებებს სამშვიდობო ძალების სტრუქტურისა და რაოდენობის შესახებ;

ბ) შეიმუშავებს საქართველოს სამშვიდობო ძალების შემადგენლობაში შემავალი იმ ქვედანაყოფებისა და შენაერთების ნუსხას, რომლებიც მონაწილეობას მიიღებენ საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა სახის სამშვიდობო საქმიანობაში;

გ) ახორციელებს სამშვიდობო ძალების მომზადებასა და შეიარაღებას, აგრეთვე უზრუნველყოფს მათ ტექნიკითა და სხვა მატერიალურ-ტექნიკური საშუალებებით;

დ) საერთაშორისო ნორმების შესაბამისად შეიმუშავებს სამშვიდობო ძალების სამხედრო მოსამსახურეთა ფორმის ტანსაცმლის ნიმუშს, რომელსაც ამტკიცებს საქართველოს თავდაცვის მინისტრი;

ე) შეიმუშავებს სამშვიდობო ძალების სამხედრო მოსამსახურეთა ფორმის ტანსაცმლის განმასხვავებელ ნიშნებს, რომლებსაც ამტკიცებს საქართველოს თავდაცვის მინისტრი „სახელმწიფო მნიშვნელობის სიმბოლოების შესახებ“ საქართველოს კანონით დადგენილი წესით.

2. სამშვიდობო ძალების მომზადება ხორციელდება საქართველოს სახელმწიფო ბიუჯეტის ხარჯზე.

       მუხლი 10 

საქართველოს თავდაცვის სამინისტრო და საქართველოს საგარეო საქმეთა სამინისტრო წელიწადში არანაკლებ ერთხელ საქართველოს პარლამენტს წარუდგენენ მოხსენებას საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა სახის სამშვიდობო საქმიანობაში საქართველოს თავდაცვის ძალების მონაწილეობის შესახებ.

საქართველოს 2018 წლის 31  ოქტომბრის  კანონი №3596  – ვებგვერდი, 21.11.2018წ.

    მუხლი 11

ეს კანონი ამოქმედდეს გამოქვეყნებისთანავე.

საქართველოს პრეზიდენტი        ე. შევარდნაძე

თბილისი,

1999 წლის 22 ივლისი

№2292-რს