„ტექნიკური რეგლამენტის – ბოსტნეულისა და ბაღჩეულის გასამრავლებელი (გარდა თესლისა) და სარგავი მასალის ბაზარზე განთავსების პროცედურების დამტკიცების თაობაზე“ საქართველოს მთავრობის 2018 წლის 16 ნოემბრის №553 დადგენილებაში ცვლილების შეტანის შესახებ

1. მე-2 მუხლის პირველ პუნქტს დაემატოს შემდეგი შინაარსის „ზ“, „თ“, „ი“  და „კ“ ქვეპუნქტები:

„ზ) სერტიფიცირების ორგანო –  საქართველოს გარემოს დაცვისა და სოფლის მეურნეობის სამინისტროს სახელმწიფო კონტროლს დაქვემდებარებული სსიპ – სოფლის მეურნეობის სამეცნიერო-კვლევითი ცენტრი, საქართველოს კანონმდებლობით დადგენილი წესით აკრედიტებული პირი, აგრეთვე საერთაშორისო აკრედიტაციის მქონე შესაბამისობის შემფასებელი პირი;

თ) გასამრავლებელი და სარგავი მასალის ხარისხი – ბოსტნეულისა და ბაღჩეულის (გარდა თესლისა) გასამრავლებელი და სარგავი მასალის წარმოშობის, ჯიშისა და პოპულაციის აუთენტურობის, ვეგეტატიური განვითარებისა და სიჯანსაღის საქართველოს კანონმდებლობით დადგენილი ტექნიკური მახასიათებლები;

ი) რეგულირებადი არასაკარანტინო მავნე ორგანიზმი – არასაკარანტინო მავნე ორგანიზმი, რომლის არსებობა გამოყენებისათვის განკუთვნილ გასამრავლებელ და სარგავ მასალაზე ახდენს ეკონომიკურად მიუღებელ ზემოქმედებას  და ამის გამო რეგულირდება იმპორტიორი ხელშემკვრელი მხარის ტერიტორიაზე;

კ) მასალა – გასამრავლებელი და სარგავი მასალა.“.

2. მე-2 მუხლის  მე-2 პუნქტი ჩამოყალიბდეს შემდეგი რედაქციით:

„2. ამ ტექნიკური რეგლამენტის მიზნებისთვის ასევე გამოიყენება სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსითა და ფიტოსანიტარიული ზომების საერთაშორისო სტანდარტით (ISPM-5) განსაზღვრული ტერმინები, თუ ამ ტექნიკური რეგლამენტით სხვაგვარად არ არის დადგენილი.“.

3. მე-3 მუხლის მე-2 პუნქტი ჩამოყალიბდეს შემდეგი რედაქციით:

„2. ქვეყნის ტერიტორიაზე წარმოებული და ბაზარზე განთავსებისთვის განკუთვნილი მასალა თავისუფალი უნდა იყოს ამ ტექნიკური რეგლამენტის დანართ №2-ში („ბოსტნეულისა და ბაღჩეული კულტურების გასამრავლებელი და სარგავი მასალის რეგულირებადი არასაკარანტინო მავნე ორგანიზმების ნუსხა“) ჩამოთვლილი მავნე ორგანიზმებისაგან და უნდა აკმაყოფილებდეს ამ ტექნიკური რეგლამენტით დადგენილ მოთხოვნებს.“.

4. მე-3 მუხლის მე-5 პუნქტი ჩამოყალიბდეს შემდეგი რედაქციით:

„5. ხახვის (შალოტი) და ნივრის შემთხვევაში, მასალა მიღებული უნდა იყოს უშუალოდ იმ მასალისგან, რომელიც კულტურის ზრდის პროცესში შემოწმდა და მიჩნეულ იქნა, როგორც ამ ტექნიკური რეგლამენტის დანართ №2-ში ჩამოთვლილი რეგულირებადი არასაკარანტინო მავნე ორგანიზმების ან მათი სიმპტომებისაგან თავისუფალი.“.

5. მე-3 მუხლს დაემატოს შემდეგი შინაარსის მე-7 და მე-8 პუნქტები:

„7. მასალა პრაქტიკულად თავისუფალი უნდა იყოს იმ დაზიანებებისგან, რომლებიც აუარესებს მისი, როგორც გასამრავლებელი ან სარგავი მასალის ხარისხს.

8. მასალის ზომები და სიძლიერე ვარგისიანობის თვალსაზრისით უნდა იყოს დამაკმაყოფილებელი. ფესვებს, ღეროებსა და ფოთლებს შორის დაცული უნდა იყოს სათანადო ბალანსი, საქართველოს კანონმდებლობით დადგენილი ტექნიკური მახასიათებლების მოთხოვნათა შესაბამისად.“.

6. მე-4 მუხლის მე-3 პუნქტის შემდეგ დაემატოს შემდეგი შინაარსის 3¹ პუნქტი:

„3¹. ამ მუხლის მე-2 და მე-3 პუნქტები არ ვრცელდება იმ ბიზნესოპერატორზე, რომელიც ახორციელებს ბოსტნეულის გასამრავლებელი და სარგავი მასალის მცირე რაოდენობით ადგილობრივ ბაზარზე მიწოდებას იმ საბოლოო მომხმარებლებისთვის, რომლებიც არ არიან ჩართულნი აღნიშნულ საქმიანობაში.“.

7. მე-4 მუხლის მე-5 პუნქტის „ზ“ ქვეპუნქტი ჩამოყალიბდეს შემდეგი რედაქციით:

„ზ) სათესლე პარტიების საიდენტიფიკაციო ნომრის შესახებ იმ ახალგაზრდა მცენარეებზე, რომლებიც გამოყვანილია „ბოსტნეულისა და ბაღჩეულის თესლის ბაზარზე განთავსების პირობების დამტკიცების თაობაზე“ საქართველოს მთავრობის 2020 წლის 20 იანვრის №44 დადგენილების შესაბამისად, რომელიც ხელმისაწვდომი უნდა იყოს სერტიფიცირების ორგანოსათვის;“.

8. მე-5 მუხლის მე-3 პუნქტი ჩამოყალიბდეს შემდეგი რედაქციით:

„3. სააგენტომ, თავისი კომპეტენციის ფარგლებში, სულ მცირე, წელიწადში ერთხელ უნდა განახორციელოს ბიზნესოპერატორისა და საწარმოს/საწარმოების სახელმწიფო კონტროლი, საქართველოს კანონმდებლობით დადგენილი წესით.“.

9.  მე-5 მუხლს  დაემატოს  შემდეგი შინაარსის მე-5 – მე-11 პუნქტები:

„5. სააგენტო ვალდებულია, განახორციელოს ბიზნესოპერატორის მონიტორინგი, გარდა იმ ბიზნესოპერატორისა, რომლის საქმიანობა დაკავშირებულია იმ ბოსტნეულის გასამრავლებელი და სარგავი მასალის (გარდა თესლისა)  ბაზარზე განთავსებასთან, რომელიც ხორციელდება ამ ტექნიკური რეგლამენტის  მე-9 მუხლით დადგენილი სახელმწიფო კონტროლის ფარგლებში და  მე-4 მუხლის მე-2 პუნქტის შესაბამისად თავად ახორციელებს მონიტორიგისა და შეფასების პროცედურებს.

6. სააგენტო ამოწმებს:

ა) ბიზნესოპერატორის მიერ კრიტიკული წერტილების მონიტორინგისას დაცულია თუ არა:

ა.ა) ფიტოსანიტარიული საკარანტინო ღონისძიებები, საქართველოს კანონმდებლობით დადგენილი წესით;

ა.ბ) ჰიგიენა;

ა.გ) დამუშავება (შესხურება);

ა.დ) შეფუთვა;

ა.ე) შენახვა;

ა.ვ) ტრანსპორტირება;

ა.ზ) ადმინისტრაციული პროცედურები;

ბ)  ბიზნესოპერატორი  აწარმოებს თუ არა ჩანაწერებს მცენარეების/ნარგაობების ან სხვა მასალების შესახებ, რომლებიც:

ბ.ა) შეძენილია შესანახად ან შენობაში დარგვისთვის, ან მიწოდებულია სხვებისთვის ან შემდგომი წარმოებისთვის;

ბ.ბ) ინფორმაციას ნებისმიერი ქიმიური დამუშავების შესახებ, რომელიც გამოყენებული იყო მცენარეებზე და დაცულია თუ არა დოკუმენტების შენახვის ერთწლიანი ვადა;

გ) აქვს თუ არა მას ან მის მიერ დანიშნულ უფლებამოსილ პირს მცენარეთა სიჯანსაღესთან დაკავშირებით სათანადო გამოცდილება, შესაბამის დაწესებულებებთან კომუნიკაციისათვის;

დ) ახორციელებს ვიზუალურ დათვალიერებას საჭიროებისამებრ და შესაბამის დროს, კანონმდებლობით დადგენილი წესით.

7. სერტიფიცირების ორგანო ამოწმებს:

ა) ბიზნესოპერატორის მიერ კრიტიკული წერტილების მონიტორინგისას დაცულია თუ არა:

ა.ა) საწარმოო პროცესის დასაწყებად გამოყენებული ბოსტნეულის გასამრავლებელი და სარგავი მასალის ხარისხი;

ა.ბ) გამრავლების პროცედურები.

8.  ამ ტექნიკური რეგლამენტის მე-9 მუხლით დადგენილი სახელმწიფო კონტროლის ფარგლებში სააგენტომ უნდა შეამოწმოს, ბიზნესოპერატორის მიერ მე-4 მუხლის მე-2 პუნქტით განსაზღვრული კრიტიკული წერტილების მონიტორინგის წარმოების მეთოდების შესრულება, განსაკუთრებული  ყურადღება გამახვილებული უნდა იქნეს:

ა) თითოეული კრიტიკული წერტილის შესამოწმებლად მეთოდების ხელმისაწვდომობასა და ფაქტობრივ გამოყენებაზე;

ბ) ამ მეთოდების სანდოობაზე;

გ) მათ შესაბამისობაზე წარმოებისა და მარკეტინგული ღონისძიებების შინაარსის შესაფასებლად, ადმინისტრაციული ასპექტების ჩათვლით;

დ) მიმწოდებლის პერსონალის კომპეტენციაზე განახორციელოს შემოწმებები.

9. ბიზნესოპერატორის მიერ ნიმუშის აღებისას, აკრედიტებულ ლაბორატორიაში შემოწმების მიზნით, სააგენტო ვალდებულია, ზედამხედველობა და მონიტორინგი გაუწიოს ბიზნესოპერატორს, რათა დარწმუნდეს, რომ:

ა) ნიმუშების აღება  ხდება შესაბამისი მეთოდით, წარმოების სხვადასხვა ეტაპზე,  სააგენტოს მიერ დადგენილი პერიოდულობით;

ბ) იმის გათვალისწინებით, თუ რა სახის ანალიზი უნდა ჩატარდეს,  ნიმუშები აღებული უნდა იქნეს საქართველოს კანონმდებლობით დადგენილი წესით.

10. სააგენტო ვალდებულია, შეამოწმოს ნიმუშის ამღები პირების კვალიფიკაციის დამადასტურებელი დოკუმენტი.

11. ნიმუშების ანალიზი უნდა ჩატარდეს აკრედიტებულ ლაბორატორიაში, ამ ტექნიკური რეგლამენტის მე-10 მუხლის შესაბამისად.“.

10. დანართი №1 და დანართი №2  ჩამოყალიბდეს შემდეგი რედაქციით:

„დანართი №1

მასალის გვარებისა და სახეობების ჩამონათვალი

დანართი №2

ბოსტნეულისა და ბაღჩეული კულტურების გასამრავლებელი და სარგავი მასალის რეგულირებადი არასაკარანტინო მავნე ორგანიზმების ნუსხა

.“.