საქართველოს კვოტით ევროპის საბჭოს ევროპელ მოსამართლეთა საკონსულტაციო საბჭოს (CCJE) წევრობის კანდიდატის შესარჩევი კონკურსის ჩატარების წესის დამტკიცების შესახებ

ა) საქართველოს იუსტიციის მინისტრის მოადგილე (კომისიის თავმჯდომარე);

ბ) საქართველოს საგარეო საქმეთა მინისტრის მოადგილე (კომისიის თავმჯდომარის მოადგილე);

გ) საქართველოს უზენაესი სასამართლოს წარმომადგენელი;

დ) საქართველოს იუსტიციის უმაღლესი საბჭოს წარმომადგენელი;

ე) საქართველოს იუსტიციის სამინისტროს საერთაშორისო საჯარო სამართლის დეპარტამენტის უფროსი.

მუხლი 1. საქართველოს კვოტით ევროპის საბჭოს ევროპელ მოსამართლეთა საკონსულტაციო საბჭოს წევრობის კანდიდატის შესარჩევი კონკურსის ჩატარების წესის რეგულირების სფერო

1. საქართველოს კვოტით ევროპის საბჭოს ევროპელ მოსამართლეთა საკონსულტაციო საბჭოს (CCJE) წევრობის კანდიდატის შესარჩევი კონკურსის ჩატარების წესით (შემდგომ − წესი) განისაზღვრება საქართველოს კვოტით ევროპის საბჭოს ევროპელ მოსამართლეთა საკონსულტაციო საბჭოს (CCJE) (შემდგომ − საკონსულტაციო საბჭო) წევრობის კანდიდატის შესარჩევი კონკურსის ჩატარების პროცედურა და ეტაპები.

2. უფლებამოსილებათა განხორციელებისას საკონსულტაციო საბჭოს წევრობის კანდიდატის შესარჩევი კომისია (შემდგომ − კომისია) ხელმძღვანელობს მიუკერძოებლობის, სამართლიანობის, საჯაროობისა და გამჭვირვალობის პრინციპებით.

მუხლი 2. კონკურსის მიზანი და ამოცანა

1. კონკურსის მიზანია საქართველოს კვოტით საკონსულტაციო საბჭოს წევრობისათვის ამ წესის შესაბამისად ერთი კანდიდატის შერჩევა და ევროპის საბჭოსთვის მისი წარდგენა. 

2. კონკურსის ჩატარებისას კომისიის ამოცანაა სამართლიანი და გამჭვირვალე შერჩევის პროცედურის შესაბამისად საკონსულტაციო საბჭოს წევრობის კანდიდატის შერჩევა.

მუხლი 3. კომისიის საქმიანობა

1. კომისიას ხელმძღვანელობს კომისიის თავმჯდომარე.

2. კომისიის თავმჯდომარე ორგანიზებას უწევს კომისიის მუშაობას, იწვევს კომისიის სხდომებს და უძღვება მათ. კომისიის თავმჯდომარის არყოფნისას მის უფლებამოსილებას ასრულებს კომისიის თავმჯდომარის მოადგილე.

3. კომისიის სხდომა იმართება საჭიროებისამებრ.

4. კომისია უფლებამოსილია, თუ მის სხდომას ესწრება კომისიის სრული შემადგენლობის ნახევარზე მეტი.

5. კომისია გადაწყვეტილებას იღებს სხდომაზე დამსწრე პირთა ხმების უმრავლესობით.

6. ხმების თანაბრად გაყოფის შემთხვევაში გადამწყვეტია სხდომის თავმჯდომარის ხმა.

7. კომისიის სხდომები და მის მიერ მიღებული გადაწყვეტილებები ფორმდება ოქმით, რომელსაც ხელს აწერს კომისიის/სხდომის თავმჯდომარე.

8. კომისიის საქმიანობის ადმინისტრირებასა და ორგანიზაციულ მხარდაჭერას, ასევე, საკონსულტაციო საბჭოს წევრობის კანდიდატის შესარჩევი პროცედურების კოორდინაციას უზრუნველყოფს საქართველოს იუსტიციის სამინისტროს ადამიანური რესურსების მართვის დეპარტამენტი (შემდგომ − ადამიანური რესურსების მართვის დეპარტამენტი).

მუხლი 4. საკონსულტაციო საბჭოს წევრობის კანდიდატის მიმართ დადგენილი მოთხოვნები

ევროპული კომისიის წევრობის კანდიდატად შეიძლება შერჩეულ იქნეს საქართველოს მოქალაქე, რომელიც აკმაყოფილებს შემდეგ მოთხოვნებს:

ა) სრულყოფილად (C2 დონე) ფლობს სახელმწიფო ენას;

ბ) აქვს უმაღლესი იურიდიული განათლება;

გ) კარგად (B2 დონე) ფლობს ევროპის საბჭოს ერთ-ერთ სამუშაო ოფიციალურ ენას (ინგლისური ან ფრანგული);

დ) სრულყოფილად ფლობს ადამიანის უფლებათა და ძირითად თავისუფლებათა დაცვის შესახებ ევროპის საბჭოს კონვენციას;

ე) სრულყოფილად ფლობს საერთაშორისო საჯარო სამართლის პრინციპებსა და საქართველოს კანონმდებლობას;

ვ) არის მოქმედი მოსამართლე და აქვს საფუძვლიანი ცოდნა სასამართლო სისტემის ფუნქციონირებასთან დაკავშირებულ საკითხებზე;

ზ) აქვს მაღალი მორალური და პროფესიული რეპუტაცია და არსებობს მოლოდინი, რომ დაკისრებულ ფუნქციებს შეასრულებს მიუკერძოებლად და დამოუკიდებლად.

მუხლი 5. კონკურსის გამოცხადება და ეტაპები

1. საკონსულტაციო საბჭოს წევრობის კანდიდატის შერჩევის მიზნით, ადამიანური რესურსების მართვის დეპარტამენტი საჯაროდ აქვეყნებს ინფორმაციას კონკურსის შესახებ ვებგვერდზე: hr.gov.ge.

2. კონკურსი ტარდება ორ ეტაპად:

ა) პირველი ეტაპი − კონკურსში მონაწილეობისთვის წარდგენილი განაცხადის ამ წესით განსაზღვრულ მოთხოვნებთან შესაბამისობის დადგენა;

ბ) მეორე ეტაპი − კანდიდატთა შესარჩევი კომისიის მიერ გასაუბრების ჩატარება.

მუხლი 6. კონკურსში მონაწილეობისთვის განაცხადისა და დოკუმენტების წარდგენა

1. კონკურსში მონაწილეობისთვის კანდიდატი განაცხადსა და შესაბამის დოკუმენტებს (შემდგომ – განაცხადი) წარადგენს ელექტრონულად, ვებგვერდ hr.gov.ge-ის მეშვეობით ან აგზავნის ელექტრონული ფოსტის მისამართზე: hrdep@justice.gov.ge.  

2. კანდიდატი ვალდებულია, კომისიას მიაწოდოს სრულყოფილი და უტყუარი ინფორმაცია და დოკუმენტები საკონკურსო მოთხოვნებთან მისი შესაბამისობის შესახებ.

3. კონკურსში მონაწილეობისთვის კანდიდატმა უნდა წარადგინოს:

ა) უმაღლესი იურიდიული განათლების დამადასტურებელი დოკუმენტი, ხოლო განათლების უცხო ქვეყანაში მიღების შემთხვევაში − საჯარო სამართლის იურიდიული პირის − განათლების ხარისხის განვითარების ეროვნული ცენტრის მიერ გაცემული დოკუმენტი განათლების აღიარების შესახებ;

ბ) მოსამართლედ მუშაობის დამადასტურებელი დოკუმენტი;

გ) რეზიუმე ქართულ და, ასევე, ინგლისურ ან ფრანგულ ენებზე;

დ) სამოტივაციო წერილი;

ე) ინგლისური ან ფრანგული ენის ცოდნის დამადასტურებელი ერთ-ერთი შემდეგი დოკუმენტი:

ე.ა) ინგლისურ ან ფრანგულ ენაზე გამოქვეყნებული სტატია;

ე.ბ) ინგლისურ ან ფრანგულ ენაზე სწავლის დამადასტურებელი დოკუმენტი;

ე.გ) ინგლისურ ან ფრანგულ ენაზე მუშაობის დამადასტურებელი დოკუმენტი;

ე.დ) ინგლისური ან ფრანგული ენის კარგად (B2 დონე) ცოდნის დამადასტურებელი სერტიფიკატი;

ვ) ბოლო ერთი თვის განმავლობაში გაცემული ცნობა ნასამართლობის შესახებ.

4. განაცხადის წარსადგენად განისაზღვრება, სულ მცირე, 10 კალენდარული დღის ვადა, რომელიც აითვლება კონკურსის გამოცხადების დღიდან.

5. არასრულყოფილი ინფორმაციის/დოკუმენტაციის წარდგენის შემთხვევაში კანდიდატს განაცხადის წარდგენის ვადის ამოწურვის შემდეგ ეცნობება ამის შესახებ და ეძლევა 3 სამუშაო დღის ვადა ხარვეზის აღმოსაფხვრელად. აღნიშნულ ვადაში ხარვეზის გამოუსწორებლობის შემთხვევაში კანდიდატი არ იქნება დაშვებული კონკურსის მეორე ეტაპზე.

მუხლი 7. კონკურსის შედეგების შეჯამება

1. კონკურსის პირველ ეტაპზე ადამიანური რესურსების მართვის დეპარტამენტი ადგენს კანდიდატების მიერ წარდგენილი განაცხადების შესაბამისობას კონკურსის ფორმალურ მოთხოვნებთან და კონკურსის მეორე ეტაპზე გადასულ, ასევე, წარუმატებელ კანდიდატთა განაცხადებს დასამტკიცებლად ელექტრონულად წარუდგენს კომისიას, რის შესახებაც ფორმდება ოქმი. კომისია პირველადი გადარჩევის შედეგებს ამტკიცებს სრული შემადგენლობის უმრავლესობით.  

2. კონკურსის მეორე ეტაპზე ტარდება გასაუბრება კანდიდატთან. კანდიდატს, სულ მცირე, 2 დღით ადრე მიეწოდება ინფორმაცია გასაუბრების ჩატარების ადგილისა და დროის შესახებ. გასაუბრებისას ფასდება კანდიდატის შესაბამისობა ამ წესის მე-4 მუხლით დადგენილ მოთხოვნებთან.

3. კომისია ადამიანური რესურსების მართვის დეპარტამენტის მეშვეობით კონკურსის პირველი და მეორე ეტაპების შედეგებს კანდიდატს ატყობინებს ელექტრონულად.

4. კომისია კონკურსის შედეგებს აჯამებს სხდომაზე და გადასცემს საქართველოს იუსტიციის მინისტრს ევროპის საბჭოსთვის წარსადგენად.