„საკრედიტო საგარანტიო სქემის“ სახელმწიფო პროგრამის დამტკიცების შესახებ“ საქართველოს მთავრობის 2019 წლის 29 მარტის №163 დადგენილებაში ცვლილების შეტანის თაობაზე

1. პირველი მუხლი ჩამოყალიბდეს შემდეგი რედაქციით:

„მუხლი 1. პროგრამის მიზანი

სახელმწიფო პროგრამის − საკრედიტო საგარანტიო სქემის (შემდგომში − პროგრამა) მიზანია ფინანსებზე წვდომის გაუმჯობესება იმ მცირე და საშუალო ბიზნესებისთვის, რომელთაც არ აქვთ შესაძლებლობა, დააკმაყოფილონ სესხის უზრუნველყოფაზე არსებული მოთხოვნები (სრულად ან ნაწილობრივ),  ეკონომიკის დაკრედიტების ხელშეწყობა და ინკლუზიური ეკონომიკური ზრდის უზრუნველყოფა, მათ შორის, ახალი კორონავირუსის (COVID-19) პანდემიით  გამოწვეული უარყოფითი ეკონომიკური გავლენის შემცირება და ეკონომიკური გაჯანსაღების ხელშეწყობა.“.

2. მე-2 მუხლი ჩამოყალიბდეს შემდეგი რედაქციით:

„მუხლი 2. ტერმინთა განმარტება

 პროგრამაში გამოყენებულ ტერმინებს აქვს შემდეგი მნიშვნელობა:

ა) პროგრამა − სახელმწიფო პროგრამა − საკრედიტო საგარანტიო სქემა;

ბ) მეწარმე სუბიექტი − „მეწარმეთა შესახებ“ საქართველოს კანონის შესაბამისად რეგისტრირებული პირი;

გ) ბენეფიციარი − მეწარმე სუბიექტი, რომელიც იღებს ახალ სესხს კომერციული ბანკისგან/მიკროსაფინანსო ორგანიზაციისაგან ან/და ახდენს კომერციულ ბანკში/მიკროსაფინანსო ორგანიზაციაში არსებული სესხის რესტრუქტურიზაციას/რეფინანსირებას პროგრამის ფარგლებში;

დ) სესხი − კომერციული ბანკის/მიკროსაფინანსო ორგანიზაციის მიერ ამ პროგრამისა და ხელშეკრულების ფარგლებში ბენეფიციარზე გაცემული კრედიტი;

ე) რესტრუქტურიზებული სესხი – „კომერციული ბანკების მიერ აქტივების კლასიფიკაციისა და შესაძლო დანაკარგების რეზერვების შექმნისა და გამოყენების წესის დამტკიცების შესახებ“ საქართველოს ეროვნული ბანკის პრეზიდენტის 2017 წლის 10 აგვისტოს №117/04 ბრძანებით დამტკიცებული წესის მე-2 მუხლის მე-6 პუნქტის შესაბამისად განსაზღვრული კრედიტი;

ვ) ფაქტობრივი პორტფელი – პროგრამის ფარგლებში კომერციული ბანკის ან მიკროსაფინანსო ორგანიზაციის მიერ გაცემული/რესტრუქტურიზებული სესხების ძირი თანხის  ნაშთის ჯამური ოდენობა, რომელიც გამოხატულია ეროვნულ ვალუტაში. უცხოურ ვალუტაში რესტრუქტურიზებული სესხების შემთხვევაში, თითოეული სესხის ძირი თანხის  ნაშთის ოდენობა დაითვლება სესხის რესტრუქტურიზების დღეს არსებული ეროვნული ბანკის გაცვლითი კურსის შესაბამისად;

ზ) დეფოლტი − ბენეფიციარის მიერ ბანკის/მიკროსაფინანსო ორგანიზაციის წინაშე პროგრამის ფარგლებში გაფორმებული საკრედიტო ხელშეკრულებით აღებული ვალდებულებების შეუსრულებლობის საფუძველზე ბანკის/მიკროსაფინანსო ორგანიზაციის მიერ ბენეფიციარისთვის სესხის თანხის სრულად დაბრუნების შესახებ შეტყობინების გაგზავნა ან ბენეფიციარის გადახდისუუნარობის საქმის დაწყება და ბანკის/მიკროსაფინანსო ორგანიზაციის მიერ სესხის ამოღების მიზნით შესაბამისი ქმედებების განხორციელების დაწყება, მათ შორის და არამხოლოდ, სასამართლოსთვის ან/და არბიტრაჟისთვის მიმართვა, სააღსრულებო ფურცლის გაცემის მიზნით ნოტარიუსისთვის მიმართვა, აღსრულების ორგანოსთვის ან/და კერძო აღმასრულებლისთვის მიმართვა ან/და ქონების დასაკუთრების/რეალიზაციის პროცედურის  დაწყების მიზნით ან/და კანონმდებლობით გათვალისწინებული გადახდევინების მიქცევის სხვა პროცედურის  დაწყების მიზნით შესაბამისი უფლებამოსილი ორგანოსათვის/პირისთვის მიმართვა;

თ) რეფინანსირება − ბენეფიციარის მიერ საკუთარი, მიმდინარე კრედიტის მთლიანი ან ნაწილობრივი დაფარვა ან/და გაზრდა იმავე ან სხვა კომერციული ბანკისგან მიღებული ახალი კრედიტით, ხოლო მიკროსაფინანსო ორგანიზაციის შემთხვევაში, ბენეფიციარის მიერ საკუთარი, მიმდინარე კრედიტის გაზრდა იმავე მიკროსაფინანსო ორგანიზაციისგან მიღებული კრედიტით; 

ი) კაპიტალური ხარჯი − დანახარჯი, გაწეული ისეთ მატერიალურ ან/და არამატერიალურ აქტივზე (გარდა გუდვილისა), რომელსაც პირი იყენებს საქონლის წარმოებისთვის, საქონლის მიწოდებისთვის/ მომსახურების გაწევისთვის ან/და ადმინისტრაციული მიზნებისთვის და რომლის სასარგებლო გამოყენების ვადა ერთ წელზე მეტია;

კ) საბრუნავი საშუალებები – აქტივები, რომლებიც არ წარმოადგენენ კაპიტალურ ხარჯს;

ლ) კომერციული ბანკი − „კომერციული ბანკების საქმიანობის შესახებ“ საქართველოს კანონით განსაზღვრული კომერციული ბანკი, რომელთანაც ამ პროგრამის ფარგლებში სააგენტოს გაფორმებული აქვს შესაბამისი ხელშეკრულება;

მ) მიკროსაფინანსო ორგანიზაცია – „მიკროსაფინანსო ორგანიზაციების შესახებ“ საქართველოს კანონით განსაზღვრული მიკროსაფინანსო ორგანიზაცია, რომლის ბიზნესსესხების მოცულობა მის მთლიან საკრედიტო პორტფელში 2020 წლის 31 მარტის მდგომარეობით აღემატება 2 მილიონ ლარს და რომელთანაც ამ პროგრამის ფარგლებში სააგენტოს გაფორმებული აქვს შესაბამისი ხელშეკრულება;

ნ) სააგენტო − საქართველოს ეკონომიკისა და მდგრადი განვითარების სამინისტროს სისტემაში შემავალი სსიპ − აწარმოე საქართველოში;

ო) სამინისტრო − საქართველოს ეკონომიკისა და მდგრადი განვითარების სამინისტრო;

პ) ხაზინა − საქართველოს ფინანსთა სამინისტროს მმართველობის სფეროში შემავალი სახელმწიფო საქვეუწყებო დაწესებულება − სახაზინო სამსახური;

ჟ) ხელშეკრულება − სააგენტოსა და კომერციულ ბანკს/მიკროსაფინანსო ორგანიზაციას შორის ამ პროგრამის ფარგლებში გაფორმებული ხელშეკრულება;

რ) მიმართვის ფორმა – კომერციული ბანკის/მიკროსაფინანსო ორგანიზაციის მიერ სააგენტოში წარდგენილი დოკუმენტი, სადეპოზიტო ანგარიშზე ფაქტობრივი პორტფელის შემადგენელი ახალი, ხოლო ბანკის შემთხვევაში – ასევე რესტრუქტურიზებული სესხისთვის  გათვალისწინებული საგარანტიო თანხის ჩარიცხვის თაობაზე, რომელიც გამოხატულია ეროვნულ ვალუტაში;

ს) კვალიფიციური პორტფელი:

- სქემის ფარგლებში ჩართულ კომერციულ ბანკებს შორის საგარანტიო თანხის გადანაწილების კრიტერიუმი, რომელიც დაითვლება თითოეული ბანკის მიერ მცირე და საშუალო ბიზნესის დაკრედიტების მიმართულებით პროგრამით დადგენილი კრიტერიუმებისა და ლიმიტების შესაბამისად გაცემული სესხების შესაბამისად და რომლის პროპორციულადაც მოხდება კომერციული ბანკებისთვის გამოყოფილი საგარანტიო თანხის გადანაწილება;

- სქემის ფარგლებში ჩართულ მიკროსაფინანსო ორგანიზაციებს შორის საგარანტიო თანხის გადანაწილების კრიტერიუმი, რომელიც დაითვლება თითოეული მიკროსაფინანსო ორგანიზაციის მიერ მცირე და საშუალო ბიზნესის დაკრედიტების მიმართულებით პროგრამით დადგენილი კრიტერიუმებისა და ლიმიტების შესაბამისად გაცემული სესხების შესაბამისად და რომლის პროპორციულადაც მოხდება მიკროსაფინანსო ორგანიზაციებისთვის გამოყოფილი საგარანტიო თანხის გადანაწილება;

ტ) შემოსავალი – „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონის შესაბამისად განსაზღვრული შემოსავალი.“.

3. მე-3 მუხლში:

ა) მე-2 – მე-6 პუნქტები ჩამოყალიბდეს შემდეგი რედაქციით:

„2. სააგენტო, თავისი კომპეტენციიდან გამომდინარე, უზრუნველყოფს კომერციული ბანკების/მიკროსაფინანსო ორგანიზაციების მიერ პროგრამის ფარგლებში გაცემული სესხებიდან ან/და რესტრუქტურიზაციის სესხებიდან გამომდინარე კომერციული ბანკ(ებ)ის ფინანსური რისკის გადანაწილებას, ამ პროგრამის მე-4 მუხლით განსაზღვრული პირობებისა და ლიმიტების შესაბამისად.

3. სააგენტოსა და კომერციულ ბანკებს/მიკროსაფინანსო ორგანიზაციებს შორის, პროგრამის ეფექტიანად განხორციელების მიზნით ფორმდება შესაბამისი ხელშეკრულებები.

4. კომერციული ბანკი/მიკროსაფინანსო ორგანიზაცია, ამ პროგრამისა და ამ მუხლის მე-3 პუნქტის შესაბამისად გაფორმებული ხელშეკრულების საფუძველზე, უფლებამოსილია, ამ პროგრამის ფარგლებში გასცეს სესხი, ხოლო კომერციული ბანკის შემთხვევაში, მოახდინოს პროგრამის ფარგლებში სესხის რესტრუქტურიზებაც.

5. კომერციული ბანკი უფლებამოსილია, პროგრამის ფარგლებში სესხის რესტრუქტურიზაციის ან/და რეფინანსირების  შესაძლებლობა მისცეს იმ მსესხებლებსაც, რომელთა მიმდინარე სესხი/სესხები გაცემულია დადგენილების დანართ №1-ით გათვალისწინებული მიზნობრიობით და რომლებიც 2020 წლის 1 იანვრის მდგომარეობით  „კომერციული ბანკების  მიერ  აქტივების  კლასიფიკაციისა  და  შესაძლო დანაკარგების რეზერვების შექმნისა და გამოყენების წესის დამტკიცების შესახებ“ საქართველოს ეროვნული ბანკის პრეზიდენტის 2017 წლის 10 აგვისტოს №117/04 ბრძანების შესაბამისად კლასიფიცირდება „სტანდარტული“ სესხის კატეგორიაში.

6. კომერციული ბანკი ვალდებულია, პროგრამის ფარგლებში სესხის რესტრუქტურიზება არ მოახდინოს მიმდინარე სესხისთვის დაწესებულ საპროცენტო განაკვეთზე მაღალ განაკვეთში. ამასთან, თუ ხდება რამდენიმე განსხვავებული საპროცენტო განაკვეთის მქონე ადრე გაცემული სესხის რესტრუქტურიზება, ბანკი ვალდებულია, პროგრამის ფარგლებში რესტრუქტურიზებული სესხი არ გასცეს დასახელებული სესხების საშუალო შეწონილ საპროცენტო განაკვეთზე მაღალ განაკვეთში.“;

ბ) დაემატოს შემდეგი შინაარსის მე-7 – მე-12 პუნქტები:

„7. წინამდებარე მუხლის მე-6 პუნქტის დარღვევად არ მიიჩნევა კომერციული ბანკის მიერ რესტრუქტურიზებისას საპროცენტო განაკვეთის შესაძლო გაზრდა დადგენილების მე-4 მუხლის მე-9 პუნქტით განსაზღვრული სქემის საკომისიოს მოცულობის პროპორციულად.

8. რეფინანსირებისას თანხის დამატების შემთხვევაში ნამეტი თანხა მიიჩნევა პროგრამის ფარგლებში გაცემულ ახალ სესხად და მასზე არ ვრცელდება საპროცენტო განაკვეთის წინამდებარე პუნქტში განსაზღვრული შეზღუდვა.

9. თითოეული კომერციული ბანკისთვის ჩარიცხული საგარანტიო თანხის არაუმეტეს 60%-ისა შეიძლება, მიმართულ იქნეს პროგრამის ფარგლებში რესტრუქტურიზებული სესხებისთვის, კომერციულ ბანკსა და სააგენტოს შორის გაფორმებული ხელშეკრულების შესაბამისად.

10. სააგენტო უფლებამოსილია, ეკონომიკის გარკვეულ სექტორში (მათ შორის, სექტორში შემავალ ცალკეულ საქმიანობის სახეებში) ან/და რეგიონში სესხების მაღალი კონცენტრაციის შემთხვევაში, შესაბამისი ანალიზის საფუძველზე, მინიმუმ 30 კალენდარული დღით ადრე აცნობოს კომერციულ ბანკებს/მიკროსაფინანსო ორგანიზაციას სამომავლოდ კონკრეტულ სექტორში (მათ შორის, სექტორში შემავალ ცალკეულ საქმიანობის სახეებში) ან/და კონკრეტულ რეგიონში საკრედიტო გარანტიის გაცემის შეწყვეტის შესახებ. აღნიშნული არ გამოიწვევს უკვე გაცემული საკრედიტო გარანტიების გაუქმებას.

11. სააგენტო უფლებამოსილია, რისკების შეფასების საფუძველზე შეუჩეროს ან შეუწყვიტოს კონკრეტულ კომერციულ ბანკს/მიკროსაფინანსო ორგანიზაციას პროგრამაში მონაწილეობის უფლება, რის შესახებაც მინიმუმ 14 კალენდარული დღით ადრე უნდა აცნობოს მას. აღნიშნული არ გამოიწვევს უკვე გაცემული საკრედიტო გარანტიების გაუქმებას.

12. წინამდებარე მუხლის მე-10 და მე-11 პუნქტებით გათვალისწინებულ უფლებამოსილებების განხორციელებისას სააგენტო მოქმედებს კანონმდებლობით მისთვის მინიჭებული დისკრეციული უფლებამოსილების ფარგლებში, ბანკისათვის/მიკროსაფინანსო ორგანიზაციისათვის ყოველგვარი დასაბუთების წარდგენის გარეშე.“.

4. მე-4 მუხლი ჩამოყალიბდეს შემდეგი რედაქციით:

„მუხლი 4. საკრედიტო გარანტია

1. საკრედიტო გარანტია წარმოადგენს სააგენტოსა და კომერციულ ბანკ(ებ)ს/მიკროსაფინანსო ორგანიზაციებს შორის კომერციული ბანკ(ებ)ის/მიკროსაფინანსო ორგანიზაციების მიერ ამ პროგრამის ფარგლებში გაცემული და ბანკის შემთხვევაში ასევე რესტრუქტურიზებული სესხების დეფოლტის საფუძველზე წარმოქმნილი ფინანსური რისკის გადანაწილების ინსტრუმენტს, სახელმწიფო ბიუჯეტიდან აღნიშნული პროგრამით გათვალისწინებული ასიგნებების ფარგლებში და პროგრამით განსაზღვრული პირობების შესაბამისად.

2. პროგრამაში მონაწილე თითოეული კომერციული ბანკისთვის/მიკროსაფინანსო ორგანიზაციისთვის საკრედიტო გარანტია გაიცემა შემდეგი ლიმიტების შესაბამისად:

ა) პროგრამის ფარგლებში დროის ნებისმიერი მომენტისთვის არსებული ფაქტობრივი  პორტფელის არაუმეტეს 35 პროცენტის ოდენობაზე;

ბ) პროგრამის ფარგლებში კომერციული ბანკის/მიკროსაფინანსო ორგანიზაციის მიერ გაცემულ თითოეულ სესხზე სესხის ძირი თანხის არაუმეტეს 90 პროცენტის ოდენობაზე;

გ) პროგრამის ფარგლებში კომერციული ბანკის მიერ რესტრუქტურიზებულ სესხზე სესხის ძირი თანხის არაუმეტეს 30 პროცენტის ოდენობაზე.

3. კომერციული ბანკის მიერ გაცემული/რესტრუქტურიზებული სესხებისთვის საგარანტიო თანხის უზრუნველყოფის მიზნით:

ა) სააგენტო უფლებამოსილია, საქართველოს კანონმდებლობის შესაბამისად კომერციულ ბანკში გახსნას სადეპოზიტო ანგარიში;

ბ) სამინისტრო პროგრამით  განსაზღვრული  ასიგნების ფარგლებში უზრუნველყოფს სააგენტოსათვის  თანხის გადარიცხვას, სახელმწიფო ხაზინაში არსებულ სააგენტოს კანონმდებლობით ნებადართული სხვა (არასაბიუჯეტო სახსრები) შემოსავლების ანგარიშზე ამ მუხლის პირველი პუნქტით გათვალისწინებული საკრედიტო გარანტიის უზრუნველყოფის მიზნით, ამ პროგრამით გათვალისწინებული წესითა და ოდენობით;

გ) სააგენტო ვალდებულია, ამ დადგენილებით განსაზღვრული წესის დაცვით,  სახელმწიფო ხაზინაში მის ანგარიშზე, პროგრამის ფარგლებში ჩარიცხული თანხა განათავსოს კომერციულ ბანკში, საქართველოს საბიუჯეტო კოდექსის მე-7 მუხლის მე-8 პუნქტის „ა“ ქვეპუნქტისა და ამ პუნქტის „ა“ ქვეპუნქტის საფუძველზე გახსნილ სადეპოზიტო ანგარიშზე.  ამ ანგარიშზე   დარიცხული საპროცენტო სარგებელი  ეკუთვნის სახელმწიფო ბიუჯეტს და ამ დადგენილებით განსაზღვრულ ვადებში გადაირიცხება ხაზინის ერთიან ანგარიშზე და მიიმართება სახელმწიფო ბიუჯეტის შემოსავლებში. სახელმწიფო ბიუჯეტში ასევე მიიმართება პროგრამის ფარგლებში აუთვისებელი (უკან მობრუნებული) თანხები.

4. მიკროსაფინანსო ორგანიზაციის მიერ გაცემული სესხებისთვის საგარანტიო თანხის უზრუნველყოფის მიზნით:

ა) სააგენტო უფლებამოსილია, საქართველოს კანონმდებლობის შესაბამისად, კომერციულ ბანკში გახსნას სპეციალურად ამ მიზნისთვის განკუთვნილი სადეპოზიტო ანგარიში;

ბ) სამინისტრო, პროგრამით  განსაზღვრული  ასიგნების ფარგლებში, უზრუნველყოფს სააგენტოსათვის თანხის გადარიცხვას, სახელმწიფო ხაზინაში არსებულ სააგენტოს კანონმდებლობით ნებადართული სხვა (არასაბიუჯეტო სახსრები) შემოსავლების ანგარიშზე, ამ მუხლის პირველი პუნქტით გათვალისწინებული საკრედიტო გარანტიის უზრუნველყოფის მიზნით, ამ პროგრამით გათვალისწინებული წესითა და ოდენობით;

გ) სააგენტო ვალდებულია, სახელმწიფო ხაზინაში მის ანგარიშზე, პროგრამის ფარგლებში ჩარიცხული თანხა  განათავსოს კომერციულ ბანკში, საქართველოს საბიუჯეტო კოდექსის მე-7 მუხლის მე-8 პუნქტის „ა“ ქვეპუნქტისა და ამ პუნქტის „ა“ ქვეპუნქტის საფუძველზე გახსნილ სადეპოზიტო ანგარიშზე, რის შემდეგაც სააგენტოსა და მიკროსაფინანსო ორგანიზაციას შორის გაფორმებული ხელშეკრულების თანახმად აღნიშნულ თანხას კომერციული ბანკი გადარიცხავს მიკროსაფინანსო ორგანიზაციის შესაბამის ანგარიშზე.  ამ ანგარიშზე  დარიცხული საპროცენტო სარგებელი ეკუთვნის სახელმწიფო ბიუჯეტს და ამ დადგენილებით განსაზღვრულ ვადებში გადაირიცხება ხაზინის ერთიან ანგარიშზე და მიიმართება სახელმწიფო ბიუჯეტის შემოსავლებში. სახელმწიფო ბიუჯეტში ასევე მიიმართება  პროგრამის ფარგლებში აუთვისებელი (უკან მობრუნებული) თანხები.

5. კომერციული ბანკი უზრუნველყოფს წინამდებარე მუხლის მე-3 პუნქტისა და კომერციულ ბანკს/მიკროსაფინანსო ორგანიზაციასა და სააგენტოს შორის გაფორმებულ ხელშეკრულებაში დადგენილი წესის შესაბამისად გახსნილ სადეპოზიტო ანგარიშზე არსებულ საგარანტიო თანხაზე საპროცენტო სარგებლის დარიცხვას ყოველდღიურად, რეფინანსირების განაკვეთის შესაბამისად.

6. რეფინანსირების განაკვეთის ცვლილების შემთხვევაში, სადეპოზიტო ანგარიშზე პროცენტის ცვლილება ხორციელდება რეფინანსირების განაკვეთის ცვლილების მომდევნო სამუშაო დღეს.

7. 2020 წლის სახელმწიფო ბიუჯეტიდან პროგრამის ფარგლებში გამოყოფილი ასიგნებების მოცულობა, რომელიც კვალიფიციური პორტფელის პროპორციულად ნაწილდება პროგრამაში ჩართულ კომერციულ ბანკებს შორის, შეადგენს 300 მილიონ ლარს. ამ პროგრამის   მე-7 მუხლის მე-7 პუნქტის საფუძველზე, კომერციული ბანკებიდან სახელმწიფო ხაზინაში არსებული სააგენტოს კანონმდებლობით ნებადართული სხვა შემოსავლების ანგარიშზე დაბრუნებული სახსრები შესაძლებელია, გამოყენებულ იქნეს ამ პროგრამით გათვალისწინებული ახალი საკრედიტო გარანტიების გაცემისათვის ან უნდა დაბრუნდეს სახელმწიფო ბიუჯეტში. ამასთან, სააგენტო უფლებამოსილია, გამოყოფილი გარანტიის ათვისების მაჩვენებლის შესაბამისად მოახდინოს კომერციული ბანკისთვის გამოყოფილი გარანტიის კორექტირება/ხელახალი გადანაწილება სააგენტოსა და კომერციულ ბანკს შორის გაფორმებული ხელშეკრულების შესაბამისად.

8. 2020 წლის სახელმწიფო ბიუჯეტიდან პროგრამის ფარგლებში გამოყოფილი ასიგნებების მოცულობა, რომელიც კვალიფიციური პორტფელის პროპორციულად ნაწილდება პროგრამაში ჩართულ მიკროსაფინანსო ორგანიზაციებს შორის, შეადგენს 30 მილიონ ლარს. ამ პროგრამის მე-7 მუხლის მე-7 პუნქტის საფუძველზე კომერციული ბანკებიდან სახელმწიფო ხაზინაში არსებული სააგენტოს კანონმდებლობით ნებადართული სხვა შემოსავლების ანგარიშზე დაბრუნებული სახსრები შესაძლებელია, გამოყენებულ იქნეს ამ პროგრამით გათვალისწინებული ახალი საკრედიტო გარანტიების გაცემისათვის ან უნდა დაბრუნდეს სახელმწიფო ბიუჯეტში. ამასთან, სააგენტო უფლებამოსილია, გამოყოფილი გარანტიის ათვისების მაჩვენებლის შესაბამისად, მოახდინოს მიკროსაფინანსო ორგანიზაციისთვის გამოყოფილი გარანტიის კორექტირება/ხელახალი გადანაწილება სააგენტოსა და მიკროსაფინანსო ორგანიზაციას შორის გაფორმებული ხელშეკრულების შესაბამისად.

9. პროგრამის ფარგლებში გაცემულ სესხ(ებ)ზე კომერციული ბანკი/მიკროსაფინანსო ორგანიზაცია, ხოლო კომერციული ბანკი ასევე რესტრუქტურიზებულ სესხებზე ყოველთვიურად უზრუნველყოფს საკრედიტო გარანტიით სარგებლობის საკომისიოს ჩარიცხვას  ხაზინის ერთიან ანგარიშზე სესხის ნაშთის გარანტირებული ნაწილის წლიური 0.3%-ის ოდენობით, საკრედიტო გარანტიის მოქმედების ვადის განმავლობაში, კომერციულ ბანკს/მიკროსაფინანსო ორგანიზაციასა და სააგენტოს შორის გაფორმებული ხელშეკრულების შესაბამისად.  უცხოურ ვალუტაში რესტრუქტურიზებული სესხების შემთხვევაში, თითოეული სესხის ნაშთის ოდენობა დაითვლება სესხის რესტრუქტურიზაციის დღეს არსებული ეროვნული ბანკის გაცვლითი კურსის შესაბამისად.

10. პროგრამის ფარგლებში საკრედიტო გარანტია შესაძლოა, გაიცეს მხოლოდ იმ სესხების/რესტრუქტურიზებული სესხების მიმართ, რომელთა მსესხებელი მეწარმე სუბიექტები აკმაყოფილებენ პროგრამით განსაზღვრულ პირობებს.

11. პროგრამის ფარგლებში, კონკრეტულ სესხთან დაკავშირებით საკრედიტო გარანტიის გაცემის შემთხვევაში, ბენეფიციარი იმავე სესხზე დამატებით ვერ ისარგებლებს სხვა საგარანტიო სქემით და პირიქით, თუ კრედიტზე სხვა საგარანტიო სქემის/ფონდის ფარგლებში უკვე გაცემულია გარანტია, აღნიშნულ კრედიტთან დაკავშირებით, არ მოხდება პროგრამის ფარგლებში საკრედიტო გარანტიის გაცემა.

12. გარდა დადგენილების დანართ №1-ით განსაზღვრული ეკონომიკური საქმიანობების სახეებისა, რომლებიც ეხება ლაბორატორიულ საქმიანობას პროგრამის ფარგლებში, კონკრეტულ სესხთან დაკავშირებით საკრედიტო გარანტიის გაცემის შემთხვევაში, ბენეფიციარი იმავე სესხის ფარგლებში ვერ ისარგებლებს საქართველოს მთავრობის 2014 წლის 30 მაისის №365 დადგენილებით დამტკიცებული პროგრამის მე-5 მუხლით განსაზღვრული ფინანსებზე ხელმისაწვდომობის კომპონენტით.

13. პროგრამის ფარგლებში სესხის რესტრუქტურიზების/რეფინანსირების უფლება აქვს საქართველოს მთავრობის 2014 წლის 30 მაისის №365 დადგენილებით დამტკიცებული სახელმწიფო პროგრამის მე-5 მუხლით განსაზღვრულ ფინანსებზე ხელმისაწვდომობის კომპონენტში ჩართულ იმ ბენეფიციარს, რომლის მიმართაც დასრულებულია თანადაფინანსების თანხის ჩარიცხვის პროგრამით დადგენილი ოცდაოთხთვიანი ვადა.

14. კონკრეტულ სესხზე საკრედიტო გარანტიის გაცემის შემთხვევაში, ბენეფიციარს იმავე სესხზე შეუძლია, ისარგებლოს „შეღავათიანი აგროკრედიტის პროექტისა და გადამუშავებული და შემნახველი საწარმოების თანადაფინანსების პროექტის დამტკიცების შესახებ“ საქართველოს მთავრობის 2014 წლის 27 იანვრის №139 განკარგულების შეღავათიანი აგროკრედიტის პროექტის ფარგლებში.

15. პროგრამის ფარგლებში გაცემულ სესხზე უზრუნველყოფის საშუალებად შეიძლება, გამოყენებულ იქნეს საქართველოს მთავრობის 2014 წლის 30 მაისის №365 დადგენილებით დამტკიცებული პროგრამის მე-7 მუხლის შესაბამისად გადაცემული ქონება მხოლოდ იმ შემთხვევაში, როდესაც ბენეფიციარის მიერ პროგრამის ფარგლებში აღებული ყველა სახის ვალდებულება შესრულებულია და აღნიშნულის თაობაზე არსებობს საჯარო სამართლის იურიდიული პირის – სახელმწიფო ქონების ეროვნული სააგენტოს დადასტურება.

16. საკრედიტო გარანტია არ გაიცემა იმ სესხებთან დაკავშირებით, რომელთა მსესხებელს წარმოადგენს საწარმო, რომელშიც სახელმწიფო/საჯარო სამართლის იურიდიული პირი პირდაპირ ან არაპირდაპირ ფლობს 10 პროცენტზე მეტ წილს/აქციას ან/და პირდაპირ ან არაპირდაპირ მონაწილეობს საწარმოს მართვაში სესხის გაცემის მომენტისთვის.

17. პროგრამის ფარგლებში სესხის აღება არ შეუძლიათ იმ მეწარმე სუბიექტებს, რომლებმაც ამ სქემის ფარგლებში ერთხელ უკვე განიცადეს დეფოლტი ან/და დაარღვიეს ამ დადგენილებით განსაზღვრული პირობები ან/და დაარღვიეს საქართველოს მთავრობის 2014 წლის 30 მაისის №365 დადგენილებით დამტკიცებული „აწარმოე საქართველოში“ სახელმწიფო პროგრამის პირობები ან/და სესხის გაცემის მომენტისთვის გააჩნიათ სახელმწიფოს მიმართ ვადაგადაცილებული საგადასახადო დავალიანება ან/და რეგისტრირებულნი არიან მოვალეთა რეესტრში.

18. საკრედიტო გარანტია არ შეიძლება გაიცეს იმ სესხ(ებ)ზე, რომლებიც დაფინანსდა საქართველოს მთავრობის 2020 წლის 19 მარტის №177 დადგენილებით დამტკიცებული სახელმწიფო პროგრამის „თანადაფინანსების მექანიზმი მცირე, საშუალო და საოჯახო სასტუმრო ინდუსტრიის ხელშეწყობისათვის“ ფარგლებში.“.

5. მე-5 მუხლის:

ა) პირველი პუნქტი ჩამოყალიბდეს შემდეგი რედაქციით:

„1. პროგრამაში ჩართვის მსურველი მეწარმე სუბიექტები, ხოლო თანამსესხებლების მიერ სესხის აღების შემთხვევაში − თითოეული ცალ-ცალკე, სესხის აღების/რესტრუქტურიზების მომენტისთვის უნდა აკმაყოფილებდნენ შემდეგ კრიტერიუმებს:

ა) მეწარმე სუბიექტი „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონის შესაბამისად უნდა აკმაყოფილებდეს III ან IV კატეგორიის საწარმოსთვის დადგენილ მოთხოვნებს მხოლოდ შემოსავლის კომპონენტში;

ბ) მეწარმე სუბიექტის სასესხო ვალდებულებები არ უნდა აღემატებოდეს 12 000 000 (თორმეტი მილიონი) ლარს.“;

ბ) მე-3 და მე-4 პუნქტები ჩამოყალიბდეს შემდეგი რედაქციით:

„3. ბენეფიციარის მიერ აღნიშნული მუხლის მე-2 პუნქტის „ბ“ ქვეპუნქტის დარღვევის შემთხვევაში, ბენეფიციარს ეკისრება სანქცია, რომელიც გათვალისწინებული იქნება კომერციულ ბანკსა/მიკროსაფინანსო ორგანიზაციასა და ბენეფიციარს შორის გაფორმებულ ხელშეკრულებაში. ამასთან, ბენეფიციარის მიერ აღნიშნული მუხლის მე-2 პუნქტის „ბ“ ქვეპუნქტის დარღვევად არ მიიჩნევა საქმიანობის პროფილის ისეთი ცვლილება, რომელიც თავსდება დადგენილების დანართ №1-ით განსაზღვრულ ეკონომიკური საქმიანობის სახეების ჩამონათვალში.

4. ბენეფიციართან შეთანხმებით, კომერციული ბანკი/მიკროსაფინანსო ორგანიზაცია უფლებამოსილია, სრულად ან ნაწილობრივ უარი თქვას საკრედიტო გარანტიაზე ან/და ბენეფიციარის სურვილის შემთხვევაში, კომერციული ბანკი/მიკროსაფინანსო ორგანიზაცია უფლებამოსილია, სრულად ან ნაწილობრივ ჩაანაცვლოს საკრედიტო გარანტია სხვა უზრუნველყოფით.“;

გ) მე-5 პუნქტი ამოღებულ იქნეს.

6. მე-6 – მე-9 მუხლები ჩამოყალიბდეს შემდეგი რედაქციით:

„მუხლი 6. მოთხოვნები პროგრამის ფარგლებში გაცემულ სესხთან მიმართებით

1. კომერციული ბანკის მიერ პროგრამის ფარგლებში ბენეფიციარისთვის გაცემული სესხის მინიმალური მოცულობა შეადგენს 50 000 (ორმოცდაათი ათასი) ლარს, მიკროსაფინანსო ორგანიზაციის მიერ გაცემული სესხის მინიმალური მოცულობა – 20 000 (ოცი ათასი) ლარს, ხოლო მაქსიმალური მოცულობა − 5 000 000 (ხუთი მილიონი) ლარს. უცხოურ ვალუტაში გაცემული სესხ(ებ)ის რესტრუქტურიზებისას, ამ პუნქტით გათვალისწინებული სესხის მინიმალური და მაქსიმალური ოდენობები განისაზღვრება ეკვივალენტური/შესაბამისი ოდენობებით უცხოურ ვალუტაში, სესხის რესტრუქტურიზაციის დღისთვის არსებული ეროვნული ბანკის გაცვლითი კურსის შესაბამისად. სესხის მაქსიმალური მოცულობა არ იცვლება თანამსესხებლების მიერ სესხის აღების შემთხვევაში. ამასთან, პროგრამის ფარგლებში სესხის რესტრუქტურიზებისას სესხის მოცულობად მიიჩნევა რესტრუქტურიზების განხორციელების მომენტში არსებული სესხის ნაშთი და არა გაცემული სესხის თავდაპირველი ოდენობა.

2. პროგრამის ფარგლებში ბენეფიციარი უფლებამოსილია, ისარგებლოს რამდენიმე სესხით, თუ პროგრამის ფარგლებში გაცემული სესხების ჯამური მოცულობა არ აღემატება 5 000 000 (ხუთი მილიონი) ლარს. თანამსესხებლების მიერ სესხის აღების შემთხვევაში, მათ მიერ აღებული სესხების ჯამური ოდენობა (ცალ-ცალკე და ერთობლივად) არ უნდა აღემატებოდეს 5 000 000 (ხუთი მილიონი) ლარს.

3. პროგრამის ფარგლებში სესხი გაიცემა მხოლოდ ეროვნულ ვალუტაში, ხოლო სესხის რესტრუქტურიზება/რეფინანსირება შესაძლებელია როგორც უცხოურ, ასევე ეროვნულ ვალუტაში. ამასთან, პროგრამის ფარგლებში დასაშვებია უცხოურ ვალუტაში გაცემული სესხის რესტრუქტურიზაცია როგორც ეროვნულ ვალუტაში, ასევე იმავე ვალუტაში, რესტრუქტურიზების განხორციელების დღისათვის არსებული ეროვნული ბანკის გაცვლითი კურსის შესაბამისად.

4. საკრედიტო გარანტია მოქმედებს სესხის გაცემიდან/რესტრუქტურიზებიდან არაუმეტეს 10 წლის განმავლობაში.

5. საკრედიტო საგარანტიო სქემის ფარგლებში კომერციული ბანკი/მიკროსაფინანსო ორგანიზაცია უზრუნველყოფს სესხის გაცემას ან/და რეფინანსირებას, ხოლო ბანკის შემთხვევაში ასევე გაცემული სესხის რეფინანსირება/რესტრუქტურიზაციას ამ დადგენილების №1 დანართით განსაზღვრულ საქმიანობის სახეებში.

6. რეფინანსირება/რესტრუქტურიზება პროგრამის მიზნებისათვის არ მიიჩნევა ახალი სესხის გაცემად.

7. თუ პროგრამის ფარგლებში რეფინანსირებისას ხდება ბენეფიციარისთვის თანხის დამატება, ნამეტი თანხა მიიჩნევა პროგრამის ფარგლებში აღებულ ახალ სესხად, რომელიც შესაძლოა, არ აკმაყოფილებდეს წინამდებარე მუხლის პირველ პუნქტში დასახელებული სესხის მინიმალური მოცულობის მოთხოვნას, მხოლოდ იმ შემთხვევაში, თუ ნამეტი თანხა (ახალი სესხი) გაცემულია  რეფინანსირებული სესხის მომსახურების მიზნით, რომლებიც თავის მხრივ აკმაყოფილებდა პროგრამით დადგენილ ლიმიტებსა და კრიტერიუმებს.

8. პროგრამის ფარგლებში გაცემული სესხის რეფინანსირების შემთხვევაში, თუ სესხის მოცულობა არ აკმაყოფილებს სქემის ფარგლებში მოთხოვნილ კრიტერიუმს, საკრედიტო გარანტიის გამოყენება ხდება სესხის თავდაპირველი მახასიათებლ(ებ)ის შესაბამისად.

მუხლი 7. პროგრამის განხორციელების პროცესი და საკრედიტო გარანტიის თანხის მართვა

1. პროგრამაში მონაწილეობის მიღების მსურველი მეწარმე სუბიექტი მიმართავს შესაბამის ბანკს/მიკროსაფინანსო ორგანიზაციას.

2. კომერციული ბანკი/მიკროსაფინანსო ორგანიზაცია ამოწმებს მეწარმე სუბიექტის შესაბამისობას დადგენილების მე-5 მუხლის პირველ და მე-6 მუხლის პირველი, მე-2, მე-3 და მე-5  პუნქტების მოთხოვნებთან და დასახელებულ კრიტერიუმებთან შესაბამისობის დადგენის შემთხვევაში სააგენტოს უგზავნის მიმართვის ფორმასა და საგარანტიო თანხის ჩარიცხვის მოთხოვნას.

3. სააგენტო უზრუნველყოფს კომერციული ბანკის/მიკროსაფინანსო ორგანიზაციის მიერ წარდგენილი ინფორმაციის შესაბამისობის შემოწმებას პროგრამის კრიტერიუმებსა და პირობებთან.

4. კომერციული ბანკის/მიკროსაფინანსო ორგანიზაციის მიერ სესხის ძირითადი მახასიათებლების შესახებ ინფორმაციის სააგენტოსთვის მიწოდებიდან 2 სამუშაო დღის განმავლობაში სააგენტო ადასტურებს ან უარყოფს სესხის ძირითადი მახასიათებლების შესაბამისობას პროგრამის კრიტერიუმებსა და პირობებთან. სააგენტოს დასტურის შემთხვევაში, სესხი ითვლება პროგრამის ფარგლებში დამტკიცებულად.

5. სააგენტოს მიერ წინამდებარე დადგენილების მე-4 მუხლის მე-3 ან/და მე-4 პუნქტის შესაბამისად სადეპოზიტო ანგარიშზე ჩასარიცხი საგარანტიო თანხის ოდენობა, რომელიც გამოხატულია ეროვნულ ვალუტაში, განისაზღვრება კომერციული ბანკის/მიკროსაფინანსო ორგანიზაციის მიერ წინა თვის ბოლო დღის მდგომარეობით, წინა თვის განმავლობაში პროგრამის ფარგლებში გაცემული:

- ახალი სესხების შემთხვევაში, წინამდებარე დადგენილების მე-4 მუხლის მე-2 პუნქტის „ა“ და „ბ“ ქვეპუნქტებით დადგენილი ლიმიტების ფარგლებში – 31.5 პროცენტის ოდენობით, ხოლო

- კომერციული ბანკის მიერ რესტრუქტურიზებული სესხების შემთხვევაში, წინამდებარე დადგენილების მე-4 მუხლის მე-2 პუნქტის „ა“ და „გ“ ქვეპუნქტებით დადგენილი ლიმიტების ფარგლებში – 10.5 პროცენტის ოდენობით.

6. სააგენტო საკრედიტო გარანტიის თანხის ჩარიცხვას უზრუნველყოფს წინამდებარე დადგენილების მე-4 მუხლის მე-3 ან/და მე-4 პუნქტის შესაბამისად კომერციულ ბანკ(ებ)ში გახსნილ სადეპოზიტო ანგარიშზე ყოველი თვის 15 რიცხვამდე.

7. ყოველი თვის 10 რიცხვამდე კომერციული ბანკი/მიკროსაფინანსო ორგანიზაცია უზრუნველყოფს წინა თვის ბოლო დღის მდგომარეობით არსებული ფაქტობრივი პორტფელის შემადგენელი ახალი სესხების ძირი თანხის დაფარვების, 31.5 პროცენტის, ხოლო კომერციული ბანკის შემთხვევაში, ასევე რესტრუქტურიზებული სესხების ძირი თანხის დაფარვების 10.5 პროცენტის (რომელიც გამოხატულია ეროვნულ ვალუტაში) სახელმწიფო ხაზინაში სააგენტოს კანონმდებლობით ნებადართული სხვა (არასაბიუჯეტო სახსრები) შემოსავლების  ანგარიშზე ჩარიცხვას მხოლოდ იმ შემთხვევაში და იმ დრომდე, როდესაც სადეპოზიტო ანგარიშზე არსებული თანხა (სრულად ან ნაწილობრივ) არ არის ამოწურული გადეფოლტებული სესხების გარანტირებული ნაწილის ჩამოჭრების შედეგად. თანხის ამოწურვის შემთხვევაში დაფარვების მიხედვით თანხის ჩარიცხვის ვალდებულება კომერციულ ბანკს/მიკროსაფინანსო ორგანიზაციას წარმოეშობა სესხების გაცემის, ხოლო ბანკის შემთხვევაში, ასევე რესტრუქტურიზაციის შედეგად  წინამდებარე დადგენილების მე-4 მუხლის მე-3 და მე-4 პუნქტების შესაბამისად გახსნილ სადეპოზიტო ანგარიშზე თანხის არსებობის შემდეგ, რის საფუძველზეც ყოველი თვის 10 რიცხვამდე კომერციული ბანკი/მიკროსაფინანსო ორგანიზაცია უზრუნველყოფს წინა თვის ბოლო დღის მდგომარეობით არსებული ფაქტობრივი პორტფელის შემადგენელი სესხების ძირი თანხის მხოლოდ მიმდინარე დაფარვების შესაბამისი პროპორციული ოდენობის სახელმწიფო ხაზინაში არსებული სააგენტოს კანონმდებლობით ნებადართული სხვა შემოსავლების ანგარიშზე ჩარიცხვას.

8. ამ მუხლის მე-7 პუნქტის შესაბამისად კომერციული ბანკის/მიკროსაფინანსო ორგანიზაციის მიერ სახელმწიფო ხაზინაში სააგენტოს კანონმდებლობით ნებადართული სხვა შემოსავლების ანგარიშზე მიმდინარე დაფარვების შესაბამისი ჩასარიცხი თანხა განისაზღვრება:

- პროგრამის ფარგლებში გაცემული ახალი სესხების ძირი თანხის დაფარვების 31.5 პროცენტის ოდენობით;

-  პროგრამის ფარგლებში კომერციული ბანკის მიერ რესტრუქტურიზებული სესხების ძირი თანხის დაფარვების 10.5 პროცენტის ოდენობით.

9. სააგენტო ამოწმებს ამ მუხლის მე-7 და მე-8 პუნქტების შესაბამისად კომერციული ბანკის/მიკროსაფინანსო ორგანიზაციის მიერ სააგენტოს ანგარიშზე ჩარიცხული თანხის სისწორეს და აღმოჩენილი უზუსტობის შემთხვევაში, მხარეები უზრუნველყოფენ აღნიშნული უზუსტობის აღმოფხვრას, კომერციულ ბანკსა/მიკროსაფინანსო ორგანიზაციასა და სააგენტოს შორის გაფორმებული ხელშეკრულების თანახმად.

10. კომერციული ბანკი/მიკროსაფინანსო ორგანიზაცია უზრუნველყოფს საკრედიტო გარანტიის ვადის ამოწურვის, საკრედიტო გარანტიაზე სრულად უარის თქმის ან საკრედიტო გარანტიის უზრუნველყოფით სრულად ჩანაცვლების შემთხვევაში ახალი სესხის ძირი თანხის ნაშთის (ასეთის არსებობის შემთხვევაში) 31.5 პროცენტის, ხოლო კომერციული ბანკის შემთხვევაში ასევე რესტრუქტურიზებული სესხის ძირი თანხის ნაშთის (ასეთის არსებობის შემთხვევაში) 10.5 პროცენტის, რომელიც გამოხატულია ეროვნულ ვალუტაში,  ჩარიცხვას სახელმწიფო ხაზინაში არსებული სააგენტოს კანონმდებლობით ნებადართული სხვა შემოსავლების ანგარიშზე, საკრედიტო გარანტიის ვადის ამოწურვიდან, საკრედიტო გარანტიაზე სრულად უარის თქმიდან, საკრედიტო გარანტიის უზრუნველყოფით სრულად ჩანაცვლებიდან, 15 კალენდარული დღის განმავლობაში.

11. სესხის ტრანშებად გაცემის შემთხვევაში, საგარანტიო თანხის განთავსება კომერციულ ბანკში წინამდებარე დადგენილების მე-4 მუხლის მე-3 ან/და მე-4 პუნქტის შესაბამისად გახსნილ სადეპოზიტო ანგარიშზე ხორციელდება ტრანშის პროპორციულად.

12. კომერციული ბანკის მიერ გაცემული/რესტრუქტურიზებული სესხის დეფოლტის შემთხვევაში, სააგენტოსთვის შესაბამისი ინფორმაციის წარდგენის შემდეგ, კომერციული ბანკი მოახდენს სააგენტოს სადეპოზიტო ანგარიშიდან ასათვისებელი თანხის ჩამოჭრას პროგრამის მე-9 მუხლის მე-6 პუნქტის შესაბამისად.

13. მიკროსაფინანსო ორგანიზაციის მიერ გაცემული სესხის დეფოლტის შემთხვევაში, სააგენტოსთვის შესაბამისი ინფორმაციის წარდგენის შემდეგ, კომერციული ბანკი მისთვის სააგენტოს მიერ მინიჭებული უფლებამოსილების ფარგლებში მოახდენს სააგენტოს სადეპოზიტო ანგარიშიდან ასათვისებელი თანხის ჩამოჭრას პროგრამის მე-9 მუხლის მე-7 პუნქტის შესაბამისად და მიკროსაფინანსო ორგანიზაციის ანგარიშზე გადარიცხვას.

14. კომერციულ ბანკში მე-4 მუხლის მე-3 ან/და მე-4 პუნქტის შესაბამისად არსებულ სადეპოზიტო ანგარიშზე რიცხული ნაშთი არ ექვემდებარება ფისკალური წლის ბოლოს სახელმწიფო ბიუჯეტში უკან დაბრუნებას.

15. კომერციული ბანკი ყოველი თვის 15 რიცხვამდე უზრუნველყოფს წინამდებარე დადგენილების მე-4 მუხლის მე-3 ან/და მე-4 პუნქტის შესაბამისად გახსნილ სადეპოზიტო ანგარიშებზე ეროვნულ ვალუტაში გამოხატული დეპოზიტის საპროცენტო სარგებლისა და საკრედიტო გარანტიით სარგებლობის საკომისიოს თანხის ჩარიცხვას ხაზინის ერთიან ანგარიშზე. ამასთან, ყოველი თვის 15 რიცხვამდე მიკროსაფინანსო ორგანიზაცია უზრუნველყოფს  საკრედიტო გარანტიით სარგებლობის საკომისიოს თანხის ჩარიცხვას ხაზინის ერთიან ანგარიშზე.

16. კომერციული ბანკი/მიკროსაფინანსო ორგანიზაცია წინამდებარე დადგენილების მე-3 მუხლის მე-3 პუნქტის შესაბამისად სააგენტოსთან გაფორმებული ხელშეკრულებით შეთანხმებული ფორმითა (წერილობით, ელექტრონულად, პროგრამული უზრუნველყოფით) და პერიოდულობით უზრუნველყოფს/უზრუნველყოფენ სააგენტოსთვის პროგრამის ფარგლებში გაცემული, ხოლო ბანკის შემთხვევაში ასევე რესტრუქტურიზებული სესხების შესახებ ინფორმაციის მიწოდებას.

17. წინამდებარე დადგენილების მე-3 მუხლის მე-3 პუნქტის შესაბამისად სააგენტოსთან გაფორმებული ხელშეკრულებით შეთანხმებული ფორმითა (წერილობით, ელექტრონულად, პროგრამული უზრუნველყოფით) და პერიოდულობით კომერციული ბანკი/მიკროსაფინანსო ორგანიზაცია აწვდის სააგენტოს, განახლებულ ინფორმაციას სასესხო პორტფელის შესახებ, სესხის დაფარვების, ვადაგადაცილებების, დეფოლტისა და ახალი, კომერციული ბანკის შემთხვევაში ასევე რესტრუქტურიზებული სესხების შესახებ.

მუხლი 8. ხელშეკრულებით გასათვალისწინებელი პირობები

ამ პროგრამის მე-3 მუხლის მე-3 პუნქტის საფუძველზე, სააგენტოსა და კომერციულ ბანკებს/მიკროსაფინანსო ორგანიზაციებს შორის გასაფორმებელ ხელშეკრულებაში, მხარეთა შორის შეთანხმებულ სხვა პირობებთან ერთად, გათვალისწინებული უნდა იქნეს:

ა) სანქცია, რომელიც ეკისრება ბენეფიციარს ამ პროგრამის მე-5 მუხლის მე-2 და მე-3 პუნქტების დარღვევის შემთხვევაში;

ბ) სანქცია, რომელიც შესაძლოა დაეკისროს კომერციულ ბანკს/მიკროსაფინანსო ორგანიზაციას ამ პროგრამით განსაზღვრული ვალდებულებების შეუსრულებლობის შემთხვევაში;

გ) კომერციული ბანკსა/მიკროსაფინანსო ორგანიზაციასა და სააგენტოს შორის ინფორმაციის გაცვლის წესი და ფორმა.

მუხლი 9. საკრედიტო გარანტიის აღსრულების პროცედურა დეფოლტის დადგომის შემდეგ

1. კომერციული ბანკის მიერ გაცემული/რესტრუქტურიზებული სესხების დეფოლტის დადგომის შემდეგ წინამდებარე დადგენილების მე-4 მუხლის მე-3 პუნქტის შესაბამისად სადეპოზიტო ანგარიშზე რიცხული საგარანტიო თანხიდან კომერციული ბანკის მიერ ხდება საკრედიტო გარანტიის ათვისება პროგრამით გათვალისწინებული ლიმიტების ფარგლებში, ამ პროგრამის მე-4 მუხლის მე-2 პუნქტის შესაბამისად.

2. მიკროსაფინანსო ორგანიზაციის მიერ გაცემული სესხების დეფოლტის დადგომის შემდეგ წინამდებარე დადგენილების მე-4 მუხლის მე-4 პუნქტის შესაბამისად სადეპოზიტო ანგარიშზე რიცხული საგარანტიო თანხიდან სააგენტოს დასტურის შემდეგ კომერციული ბანკის მიერ ხდება საკრედიტო გარანტიის ჩამოჭრა და მიკროსაფინანსო ორგანიზაციის ანგარიშზე გადარიცხვა, რომლის მიერ, თავის მხრივ, ხდება საგარანტიო თანხის  ათვისება პროგრამით გათვალისწინებული ლიმიტების ფარგლებში, ამ პროგრამის მე-4 მუხლის მე-2 პუნქტის შესაბამისად.

3. დეფოლტის დადგომის თაობაზე კომერციული ბანკი/მიკროსაფინანსო ორგანიზაცია დაუყოვნებლივ აცნობებს სააგენტოს და აწვდის ინფორმაციას საკრედიტო გარანტიის თანხიდან ასათვისებელი თანხის ოდენობის თაობაზე (შემდგომში − ასათვისებელი თანხა).

4. ასათვისებელი თანხა წარმოადგენს პროგრამის ფარგლებში გაცემული, ხოლო კომერციული ბანკის შემთხვევაში, ასევე რესტრუქტურიზებული, სესხის დეფოლტის საფუძველზე წარმოქმნილი ფინანსური რისკის გადანაწილების მიზნით კომერციული ბანკის/მიკროსაფინანსო ორგანიზაციის (სააგენტოს მიერ მინიჭებული უფლებამოსილების ფარგლებში ბანკის მეშვეობით) მიერ სააგენტოს სადეპოზიტო ანგარიშიდან ჩამოსაჭრელი თანხის მოცულობას, რომელიც განისაზღვრება ამ მუხლის მე-5 პუნქტის შესაბამისად.

5. ასათვისებელი თანხის ოდენობა განისაზღვრება გადეფოლტებული სესხის ძირი თანხის (გადასახდელი პროცენტებისა და საკომისიოს გარეშე) ნაშთის გარანტირებული ნაწილის შესაბამისად, დეფოლტის მომენტისთვის არსებული კომერციული ბანკის/მიკროსაფინანსო ორგანიზაციის ფაქტობრივი პორტფელის 35 პროცენტის ოდენობაზე. კერძოდ, ამ პროგრამით განსაზღვრული პირობების შესაბამისად, გადეფოლტებული სესხ(ებ)ი ანაზღაურდება მანამ, სანამ თითოეული კომერციული ბანკისთვის/მიკროსაფინანსო ორგანიზაციისთვის პროგრამის ფარგლებში გადეფოლტებული სესხების თანხის ჯამური მოცულობა მიაღწევს ფაქტობრივი პორტფელის 35 პროცენტს.

6. კომერციულ ბანკსა და სააგენტოს შორის გაფორმებული ხელშეკრულების შესაბამისად, სააგენტოს მიერ ასათვისებელი თანხის ოდენობის სისწორის დადასტურების შემდეგ, კომერციული ბანკი უფლებამოსილია, ჩამოჭრას სადეპოზიტო ანგარიშზე რიცხული თანხიდან  ასათვისებელი თანხის  ოდენობა.

7. მიკროსაფინანსო ორგანიზაციის მიერ გაცემული სესხის გადეფოლტების შედეგად ასათვისებელი თანხის სისწორის სააგენტოს მიერ დადასტურებისა და ბანკისთვის შესაბამისი უფლებამოსილების მინიჭების შემდეგ კომერციული ბანკი ვალდებულია, წინამდებარე დადგენილების მე-4 მუხლის მე-4 პუნქტის შესაბამისად არსებული სადეპოზიტო ანგარიშიდან ჩამოჭრას ასათვისებელი თანხა და გადაურიცხოს მიკროსაფინანსო ორგანიზაციას შესაბამის ანგარიშზე, რომელიც, თავის მხრივ, მოახდენს ამ თანხის ათვისებას.

8. დეფოლტის დადგომის საფუძველზე, კომერციული ბანკი/მიკროსაფინანსო ორგანიზაცია უზრუნველყოფს გადეფოლტებული სესხის ამოღების მიზნით შესაბამისი ქმედებების განხორციელებას.

9. სესხის ამოღების შედეგად მიღებული თანხის გადანაწილება 2020 წლის 31 დეკემბრის ჩათვლით გაცემულ, ბანკის შემთხვევაში ასევე რესტრუქტურიზებულ, სესხების შემთხვევაში ხდება სესხის გარანტირებული და არაგარანტირებული ნაწილის პროპორციულად. ამოღებული თანხის არაუმეტეს 90 პროცენტისა კომერციული ბანკის/მიკროსაფინანსო ორგანიზაციის მიერ გაცემული ახალი სესხის შემთხვევაში ან/და 30 პროცენტისა კომერციული ბანკის მიერ რესტრუქტურიზებული სესხის შემთხვევაში ჩაირიცხება ხაზინის ანგარიშზე, ხოლო დანარჩენი ნაწილი ჩაერიცხება კომერციულ ბანკს/მიკროსაფინანსო ორგანიზაციას.

10. სესხის ამოღების შედეგად ამ მუხლის მე-9 პუნქტის შესაბამისად მიღებული თანხის გადანაწილების საფუძველზე, ხაზინის ერთიან ანგარიშზე გადარიცხული თანხა არ უნდა აღემატებოდეს ამ მუხლის მე-6 ან/და მე-7 პუნქტის შესაბამისად სადეპოზიტო ანგარიშიდან კომერციული ბანკის მიერ ჩამოჭრილი ასათვისებელი თანხის ფაქტობრივ ოდენობას.

11. თუ სესხის ამოღების პროცესში ვერ მოხდა უზრუნველყოფილი ქონების რეალიზაცია და, აქედან გამომდინარე, განხორციელდა კომერციული ბანკის/მიკროსაფინანსო ორგანიზაციის მიერ ბენეფიციარის ქონების დასაკუთრება, კომერციული ბანკის/მიკროსაფინანსო ორგანიზაციის მიერ დასაკუთრებული ქონების რეალიზაცია უნდა განხორციელდეს მაქსიმუმ ორი წლის განმავლობაში. სააგენტოსთვის კუთვნილი ნაწილის ჩარიცხვა ხაზინის ერთიან ანგარიშზე განხორციელდება კომერციული ბანკის/მიკროსაფინანსო ორგანიზაციის მიერ დასაკუთრებული ქონების რეალიზაციის შემდეგ, ამ მუხლის მე-9 და მე-10 პუნქტების შესაბამისად.

12. თუ ამ მუხლის მე-11 პუნქტით განსაზღვრულ ვადაში არ მოხდა დასაკუთრებული ქონების რეალიზაცია, აღნიშნული ქონების სალიკვიდაციო ღირებულების ხელახალი შეფასების საფუძველზე, ორი თვის განმავლობაში კომერციული ბანკი/მიკროსაფინანსო ორგანიზაცია უზრუნველყოფს სააგენტოსთვის კუთვნილი ნაწილის ჩარიცხვას ხაზინის ერთიან ანგარიშზე, ამ მუხლის მე-9 და მე-10 პუნქტების შესაბამისად.

13. თუ პროგრამის ფარგლებში გასაცემი/დასარესტრუქტურიზებელი სესხის ხელშეკრულებიდან გამომდინარე მოთხოვნის უზრუნველყოფის საშუალებად ბენეფიციარის მიერ ხდება ისეთი ქონების მითითება, რომელზეც უკვე რეგისტრირებულია მოთხოვნის უზრუნველყოფის სხვა საშუალებები (იპოთეკა/გირავნობა), მოთხოვნის წარმოშობის მომენტში კრედიტორთა დაკმაყოფილების რიგითობა განისაზღვრება საქართველოს სამოქალაქო კოდექსით დადგენილი წესის შესაბამისად.“.

7. მე-11 მუხლის:

ა) მე-2 – მე-7 პუნქტები ჩამოყალიბდეს შემდეგი რედაქციით:

„2. სააგენტო უზრუნველყოფს ბენეფიციარის მიერ პროგრამით გათვალისწინებული ვალდებულებების შესრულების მონიტორინგს. ბენეფიციარის მიერ პროგრამით გათვალისწინებული ვალდებულებების შეუსრულებლობის შემთხვევაში, სააგენტო ოფიციალურად აცნობებს კომერციულ ბანკს/მიკროსაფინანსო ორგანიზაციას.

3. სააგენტო ახორციელებს კომერციული ბანკების/მიკროსაფინანსო ორგანიზაციის მიერ გაცემული სესხების, ხოლო კომერციული ბანკის შემთხვევაში ასევე რესტრუქტურიზებული სესხების პორტფელის, მათ შორის, პორტფელის ხარისხის მაჩვენებლების, სექტორულ და გეოგრაფიულ განაწილებასთან დაკავშირებული საკითხების, სექტორებისა და ბენეფიციარების კატეგორიების მიხედვით დეფოლტის მაჩვენებლების ანალიზს (საკმარისი ინფორმაციის არსებობის შემთხვევაში),  საჭიროების შემთხვევაში, ამზადებს რეკომენდაციებს საგარანტიო სქემაში ცვლილებების შეტანის შესახებ და წარუდგენს სამინისტროს.

4. პროგრამის ფარგლებში სააგენტო უფლებამოსილია, კომერციული ბანკისგან/მიკროსაფინანსო ორგანიზაციისგან მოითხოვოს დამატებითი ინფორმაციის/დოკუმენტაციის წარდგენა.

5. ყოველკვარტალურად სააგენტო ახორციელებს პროგრამის შესახებ ანგარიშების მომზადებასა და სააგენტოს ოფიციალურ ვებგვერდზე გამოქვეყნებას.

6. პროგრამის შედეგების მონიტორინგის მიზნით, სააგენტო უფლებამოსილია, პროგრამის ამოქმედებიდან ყოველწლიურად განახორციელოს გარე აუდიტი.

7. პროგრამის ფარგლებში, სააგენტო ბუღალტრულ და ფინანსურ ანგარიშგებას ახორციელებს მოქმედი კანონმდებლობის შესაბამისად.“;

ბ) მე-8 – მე-12 პუნქტები ამოღებულ იქნეს.

8.  მე-12 მუხლი ჩამოყალიბდეს შემდეგი რედაქციით:

„მუხლი 12. პროგრამის შეწყვეტის პირობები

1. პროგრამის მოქმედება შეიძლება, შეწყდეს საქართველოს კანონმდებლობითა და ამ პროგრამით გათვალისწინებულ შემთხვევებში.

2. პროგრამის მოქმედების შეწყვეტის შემთხვევაში, გაცემული საკრედიტო გარანტიების ანაზღაურება მოხდება საკრედიტო გარანტიის გაცემისას, პროგრამით განსაზღვრული პირობების შესაბამისად.

3. ამ პროგრამის განხორციელებიდან გამომდინარე, ნებისმიერი დავა განიხილება საქართველოს საერთო სასამართლოების მიერ, საქართველოს კანონმდებლობით დადგენილი წესით.“.

9. დაემატოს შემდეგი შინაარსის მე-13 მუხლი:

„მუხლი 13. სხვა არსებითი დებულებები

1. ამ დადგენილების მე-4 მუხლის მე-2 პუნქტის შესაბამისად დადგენილი საკრედიტო გარანტიის გაცემის ლიმიტები დასახელებული რედაქციით მოქმედებს 2020 წლის 31 დეკემბრის ჩათვლით გაცემული სესხებისათვის/რესტუქტურიზებული სესხებისათვის.

2. 2021 წლის 1 იანვრიდან დადგენილების მე-4 მუხლის მე-2 პუნქტი ჩამოყალიბდეს შემდეგი რედაქციით:

„2. პროგრამაში მონაწილე თითოეული კომერციული ბანკისთვის საკრედიტო გარანტია გაიცემა შემდეგი ლიმიტების შესაბამისად:

ა) პროგრამის ფარგლებში დროის ნებისმიერი მომენტისთვის არსებული ფაქტობრივი  პორტფელის არაუმეტეს 35 პროცენტის ოდენობაზე;

ბ) პროგრამის ფარგლებში კომერციული ბანკის/მიკროსაფინანსო ორგანიზაციის მიერ გაცემულ თითოეულ სესხზე სესხის ძირი თანხის არაუმეტეს 80 პროცენტის ოდენობაზე.“.

3. 2021 წლის 1 იანვრიდან დადგენილების მე-7 მუხლის მე-5 პუნქტი ჩამოყალიბდეს შემდეგი რედაქციით:

„5. სააგენტოს მიერ ამ დადგენილების მე-4 მუხლის მე-3 ან/და მე-4 პუნქტის შესაბამისად სადეპოზიტო ანგარიშზე ჩასარიცხი საგარანტიო თანხის ოდენობა (იმ სესხებისათვის, რომლებიც გაცემულია 2021 წლის 1 იანვრიდან), რომელიც გამოხატულია ეროვნულ ვალუტაში, განისაზღვრება კომერციული ბანკის/მიკროსაფინანსო ორგანიზაციის მიერ წინა თვის ბოლო დღის მდგომარეობით; წინა თვის განმავლობაში პროგრამის ფარგლებში გაცემული ახალი სესხების შემთხვევაში, წინამდებარე დადგენილების მე-4 მუხლის მე-2 პუნქტის „ა“ და „ბ“ ქვეპუნქტებით დადგენილი ლიმიტების ფარგლებში – 28 პროცენტის ოდენობით.“.

4. 2021 წლის 1 იანვრიდან დადგენილების მე-7 მუხლის მე-7, მე-8 და მე-10 პუნქტები ჩამოყალიბდეს შემდეგი რედაქციით:

„7. ყოველი თვის 10 რიცხვამდე კომერციული ბანკი/მიკროსაფინანსო ორგანიზაცია უზრუნველყოფს წინა თვის ბოლო დღის მდგომარეობით არსებული ფაქტობრივი პორტფელის შემადგენელი ახალი სესხების ძირი თანხის დაფარვების, 2021 წლის 1 იანვრამდე გაცემული სესხების შემთხვევაში – 31.5 პროცენტის, ხოლო კომერციული ბანკის შემთხვევაში, ასევე რესტრუქტურიზებული სესხების (რომლებიც გაცემულია 2021 წლის 1 იანვრამდე) ძირი თანხის დაფარვების 10.5 პროცენტის (რომელიც გამოხატულია ეროვნულ ვალუტაში) სახელმწიფო ხაზინაში სააგენტოს კანონმდებლობით ნებადართული სხვა (არასაბიუჯეტო სახსრები) შემოსავლების  ანგარიშზე ჩარიცხვას მხოლოდ იმ შემთხვევაში და იმ დრომდე, როდესაც სადეპოზიტო ანგარიშზე არსებული თანხა (სრულად ან ნაწილობრივ) არ არის ამოწურული გადეფოლტებული სესხების გარანტირებული ნაწილის ჩამოჭრების შედეგად. თანხის ამოწურვის შემთხვევაში, დაფარვების მიხედვით თანხის ჩარიცხვის ვალდებულება კომერციულ ბანკს/მიკროსაფინანსო ორგანიზაციას წარმოეშობა სესხების გაცემის შემთხვევაში ასევე რესტრუქტურიზაციის შედეგად  წინამდებარე დადგენილების მე-4 მუხლის მე-3 და მე-4 პუნქტების შესაბამისად გახსნილ სადეპოზიტო ანგარიშზე თანხის არსებობის შემდეგ, რის საფუძველზეც ყოველი თვის 10 რიცხვამდე კომერციული ბანკი/მიკროსაფინანსო ორგანიზაცია უზრუნველყოფს წინა თვის ბოლო დღის მდგომარეობით არსებული ფაქტობრივი პორტფელის შემადგენელი სესხების ძირი თანხის მხოლოდ მიმდინარე დაფარვების შესაბამისი პროპორციული ოდენობის სახელმწიფო ხაზინაში არსებული სააგენტოს კანონმდებლობით ნებადართული სხვა შემოსავლების ანგარიშზე ჩარიცხვას.

8. ამ მუხლის მე-7 პუნქტის შესაბამისად, კომერციული ბანკის/მიკროსაფინანსო ორგანიზაციის მიერ სახელმწიფო ხაზინაში სააგენტოს კანონმდებლობით ნებადართული სხვა შემოსავლების ანგარიშზე მიმდინარე დაფარვების შესაბამისი ჩასარიცხი თანხა განისაზღვრება:

- პროგრამის ფარგლებში 2021 წლის 1 იანვრამდე გაცემული ახალი სესხების ძირი თანხის დაფარვების 31.5 პროცენტის ოდენობით;

-  პროგრამის ფარგლებში 2021 წლის 1 იანვრის შემდგომ გაცემული ახალი სესხების ძირი თანხის დაფარვების 28 პროცენტის ოდენობით;

- პროგრამის ფარგლებში კომერციული ბანკის მიერ 2021 წლის 1 იანვრამდე რესტრუქტურიზებული სესხების ძირი თანხის დაფარვების 10.5 პროცენტის ოდენობით.“.

„10. კომერციული ბანკი/მიკროსაფინანსო ორგანიზაცია უზრუნველყოფს საკრედიტო გარანტიის ვადის ამოწურვის, საკრედიტო გარანტიაზე სრულად უარის თქმის ან საკრედიტო გარანტიის უზრუნველყოფით სრულად ჩანაცვლების შემთხვევაში 2021 წლის 1 იანვრამდე გაცემული ახალი სესხის ძირი თანხის ნაშთის (ასეთის არსებობის შემთხვევაში) 31.5 პროცენტის, 2021 წლის 1 იანვრის შემდეგ გაცემული ახალი სესხის ნაშთის (ასეთის არსებობის შემთხვევაში) 28 პროცენტის, ხოლო კომერციული ბანკის შემთხვევაში, ასევე რესტრუქტურიზებული სესხის (რომელიც გაცემულია 2021 წლის 1 იანვრამდე) გაცემული  ძირი თანხის ნაშთის (ასეთის არსებობის შემთხვევაში) 10.5 პროცენტის, რომელიც გამოხატულია ეროვნულ ვალუტაში, ჩარიცხვას სახელმწიფო ხაზინაში არსებული სააგენტოს კანონმდებლობით ნებადართული სხვა შემოსავლების ანგარიშზე, საკრედიტო გარანტიის ვადის ამოწურვიდან, საკრედიტო გარანტიაზე სრულად უარის თქმიდან, საკრედიტო გარანტიის უზრუნველყოფით სრულად ჩანაცვლებიდან, 15 კალენდარული დღის განმავლობაში.“.

5. 2021 წლის 1 იანვრიდან დადგენილების მე-9 მუხლს დაემატოს შემდეგი შინაარსის 9¹ პუნქტი:

„9¹. სესხის ამოღების შედეგად მიღებული თანხის გადანაწილება 2020 წლის 31 დეკემბრის შემდგომ გაცემული სესხების შემთხვევაში ხდება სესხის გარანტირებული და არაგარანტირებული ნაწილის პროპორციულად. ამოღებული თანხის არაუმეტეს 80 პროცენტისა ჩაირიცხება ხაზინის ანგარიშზე, ხოლო დანარჩენი ნაწილი ჩაერიცხება კომერციულ ბანკს/მიკროსაფინანსო ორგანიზაციას.“.

6. 2021 წლის 1 იანვრიდან პროგრამის ფარგლებში დაუშვებელია ადრე გაცემული სესხის/სესხების რესტრუქტურიზაცია, შესაბამისად, დასახელებული თარიღიდან იურიდიულ ძალას კარგავს ყველა ის მუხლი/პუნქტი/ქვეპუნქტი, რომელიც არეგულირებს პროგრამის ფარგლებში სესხის რესტრუქტურიზებას. ამასთან, აღნიშნული არ გამოიწვევს უკვე გაცემული გარანტიების მოქმედების გაუქმებას 2020 წლის 31 დეკემბრის ჩათვლით პროგრამის ფარგლებში გაცემულ რესტრუქტურიზებული სესხებისათვის.

7. ამ დადგენილების მე-10 მუხლის შესაბამისად დადგენილი პროგრამის ფარგლებში გაცემული სესხის მიზნობრიობის თანაფარდობა არ ვრცელდება 2020 წლის 31 დეკემბრის ჩათვლით გაცემულ სესხებზე/რესტრუქტურიზებულ სესხებზე.“.

10.  დადგენილების დანართი №1 ჩამოყალიბდეს შემდეგი რედაქციით:

„ დანართი №1: საქმიანობის სახეები

   * ხსენებული ეკონომიკური საქმიანობის ფარგლებში დასაშვებია პროგრამის ფარგლებში მხოლოდ ახალი სესხის აღება, დანართ №2-ით დადგენილი კრიტერიუმების შესაბამისი სასტუმროს მშენებლობის ან გაფართოების/გადაიარაღების მიზნით.

   ** ხსენებული ეკონომიკური საქმიანობის ფარგლებში დასაშვებია პროგრამის ფარგლებში მხოლოდ ახალი სესხის აღება, რომლის მიზნობრიობა უნდა იყოს ქვემოთ ჩამოთვლილი შემდეგი საოპერაციო ხარჯების (ერთ-ერთის ან რამდენიმეს) უზრუნველყოფა:

            ა) უძრავი ქონების იჯარის, ქირის ხარჯი;

            ბ) ხელფასის ხარჯი;

            გ) ტრანსპორტირების ხარჯი (მხოლოდ ქვეყნის შიგნით);

             დ) რეკლამის ხარჯი;

            ე) კომუნალური ხარჯი;

            ვ) საოფისე ხარჯი;

            ზ) ქონების დაზღვევის ხარჯი.“.

11. დანართი №2 ჩამოყალიბდეს შემდეგი რედაქციით:

„დანართი №2

სასტუმროს (მხოლოდ მშენებარე/არაოპერირებადი) მინიმალური კრიტერიუმები ( 55.10.1 – სასტუმროები რესტორნებით, 55.10.2  – სასტუმროები რესტორნების გარეშე და 55.20.0 –  დასასვენებელი და სხვა მოკლევადიანი განთავსების საშუალებები საქმიანობის სახეებისთვის)

ახალი სასტუმროს მშენებლობის შემთხვევაში – მინ. 10 ნომერი ან არსებული სასტუმროს გაფართოება/გადაიარაღება მინ. 10 ახალი ნომრის დამატება (სავალდებულოა სასტუმროს მინიმალური კრიტერიუმების დაკმაყოფილება № 2 დანართის შესაბამისად)

• სასტუმროს ერთი ნომრის ოთახ(ებ)ის ფართობი – არანაკლებ 18 კვ. მ-ისა, მათ შორის – სააბაზანო/სანიტარიული კვანძის ფართობი არანაკლებ 4კვ. მ-ისა;
• ლიფტი – იმ შემთხვევაში, თუ შენობა 2-ზე მეტსართულიანია;
• სანიტარიული კეთილმოწყობა:

• საშხაპე/საპირფარეშო ან სააბაზანო/საპირფარეშო;
• პირსაბანი;

• ელექტრომომარაგება:

• გარე განათება;
• შენობის შიდა ფართობის განათება;
• სასტუმრო ოთახ(ებ)ის და სანიტარიული კვანძის სათანადო განათება და ელექტრომომარაგება;

• ხმაურის კონტროლი/ჰაერის კონდიცირება:

• ხმაურდამცავი მინაპაკეტის ფანჯარა;
• ოთახებში ცენტრალური ან/და ინდივიდუალური კონდიცირება (გათბობის/გაგრილების სისტემა) აღჭურვილი ინდივიდუალური მართვის საშუალებებით;
• დამხმარე ოთახებისა (საჭიროების მიხედვით) და საზოგადოებრივი ადგილების ცენტრალური ან/და ინდივიდუალური კონდიცირება (გათბობის/გაგრილების სისტემა);

• პირობები შეზღუდული შესაძლებლობის მქონე პირთათვის:

• სასტუმროსთან ეტლით მისასვლელი პანდუსი;
• შენობის შიგნით შეუფერხებელი გადაადგილება;
• ლიფტით, ეტლით გადაადგილება;
• შეზღუდული შესაძლებლობის მქონე პირების სასტუმროში განთავსების საშუალება.

• სტუმართა რეგისტრაცია (რეცეფცია):

• განცალკევებული, დამოუკიდებელი რეგისტრაციის ადგილი;
• მინიმუმ სამადგილიანი მოსასვენებელი რეცეფციასთან;
• სანიტარიული კვანძი მისაღებ სივრცეში.

• კვების ობიექტი – სასადილო ან რესტორანი.
• ტელეკომუნიკაციები:

• ტელეფონი და ინტერნეტი ოთახში;
• ტელეფონი და ინტერნეტი საზოგადოებრივ ადგილას;
• სატელევიზიო მაუწყებლობა.  

         საჭირო დოკუმენტების ჩამონათვალი: 

• ადგილობრივი მუნიციპალიტეტის მიერ დამტკიცებული სასტუმროს პროექტი;
• მშენებლობის სანებართვო მოწმობა, გაცემული ადგილობრივი მუნიციპალიტეტის მიერ;
• მიწის საკუთრების  დამადასტურებელი ამონაწერი, გაცემული საჯარო რეესტრის მიერ;
• ბიზნესგეგმა.“.