საქართველოს კანონის პროექტი - საქართველოს საგადასახადო კოდექსში ცვლილების შეტანის შესახებ

პროექტი

საქართველოს კანონი

საქართველოს საგადასახადო კოდექსში ცვლილების

შეტანის შესახებ

 

მუხლი 1. საქართველოს საგადასახადო კოდექსში (საქართველოს საკანონმდებლო მაცნე, №54, 12.10.2010, მუხ. 343) შეტანილ იქნეს შემდეგი ცვლილება:

1.მე-4 მუხლს დაემატოს შემდეგი შინაარსის მე-12 და მე-13 ნაწილები:

„12. ზარალის 3 წლით ან მეტი ხნით გადატანისას ამ მუხლის პირველი, მე-3 და მე-5 ნაწილებით გათვალისწინებული ხანდაზმულობის ვადა, ზარალის წარმოშობის კალენდარული წლის საგადასახადო ვალდებულებების მიმართ, რომლის ოდენობაზეც გავლენას ახდენს აღნიშნული ზარალი, გრძელდება და იგი ერთი წლით აღემატება ზარალის გადატანის ვადას. ამ შემთხვევაში ხანდაზმულობის ვადა აითვლება ზარალის წარმოშობის კალენდარული წლის დასრულებიდან.

13. გადასახადის გადამხდელისათვის საგადასახადო მოთხოვნის წარდგენის ამ მუხლის პირველი და მე-3 ნაწილებით გათვალისწინებული ხანდაზმულობის ვადა გაშვებულად არ ჩაითვლება, თუ საგადასახადო ორგანომ შესაბამისი საგადასახადო მოთხოვნა გადასახადის გადამხდელის ავტორიზებული მომხმარებლის გვერდზე განათავსა ხანდაზმულობის ვადის გასვლამდე .“

2. მე-8 მუხლის:

ა) მე-5 ნაწილს დაემატოს „ე“ ქვეპუნქტი:

„ე) პირი, წერილობითი განცხადებით უარს აცხადებს საგადასახადო დავის განმხილველი ორგანოს გადაწყვეტილების გასაჩივრებაზე.“;

ბ) 29-ე ნაწილის „ა“ და „ბ“ ქვეპუნქტები ჩამოყალიბდეს შემდეგი რედაქციით:

„ა) სასამართლოს/არბიტრაჟის კანონიერ ძალაში შესული გადაწყვეტილება მოთხოვნის დაკმაყოფილებაზე უარის თქმის შესახებ;

ბ) ცნობა აღსრულების ორგანოდან სააღსრულებო ფურცლის აღსასრულებლად მიქცევის შედეგად კრედიტორის მიერ კუთვნილი თანხის მიუღებლობის ან ნაწილობრივ მიღების თაობაზე;“;

გ) 45-ე ნაწილი ჩამოყალიბდეს შემდეგი რედაქციით:

„45. ლომბარდი – პირი, რომლის ძირითადი საქმიანობაა უზრუნველყოფილი სესხების (კრედიტების) გაცემა და კალენდარული წლის განმავლობაში ამ საქმიანობიდან მიღებული შემოსავალი მისი შემოსავლის არანაკლებ 70 პროცენტია.“

3. 39-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„1. საგადასახადო ორგანოს მიერ პირის შესახებ მიღებული ნებისმიერი ინფორმაცია, გარდა ამ მუხლის 1¹ ნაწილში აღნიშნულისა, განეკუთვნება საგადასახადო საიდუმლოებას.“.

ბ) პირველი ნაწილის შემდეგ დაემატოს შემდეგი შინაარსის 1¹ ნაწილი:

„1¹. საგადასახადო საიდუმლოებას არ განეკუთვნება და საჯაროა პირის შესახებ შემდეგი ინფორმაცია:

ა) გადასახადის გადამხდელად რეგისტრაციის შესახებ;

ბ) დღგ-ის გადამხდელად რეგისტრაციის შესახებ;

გ) სტატუსი;

დ) სახელწოდება;

ე) სამართლებრივი ფორმა;

ვ) მისამართი;

ზ) საიდენტიფიკაციო ნომერი;

თ) საიდენტიფიკაციო ნომრის მინიჭების თარიღი;

ი) მარეგისტრირებელი ორგანო;

კ) საგადასახადო დავალიანება;

ლ) ხელმძღვანელობაზე/წარმომადგენლობაზე უფლებამოსილი პირები;

მ) დამფუძნებლები;

ნ) საგადასახადო გირავნობა/იპოთეკის უფლებისა და ქონებაზე დადებული ყადაღის შესახებ;

ო) მეწარმეთა და არასამეწარმეო (არაკომერციული) იურიდიული პირების რეესტრში რეგისტრირებული სხვა საჯარო ინფორმაცია;

პ) მოქალაქეთა პოლიტიკური გაერთიანებების (პარტიების) რეესტრში რეგისტრირებული საჯარო ინფორმაცია.“.

გ) მე-2 ნაწილის „უ“ ქვეპუნქტის შემდეგ დაემატოს შემდეგი შინაარსის „ფ“ ქვეპუნქტი:

„ფ) საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს – საქართველოს კანონმდებლობით გათვალისწინებული უფლებამოსილებების განხორციელებისას;“.

4. 44-ე მუხლის:

ა) მე-6 ნაწილის „ე“ ქვეპუნქტი ჩამოყალიბდეს შემდეგი რედაქციით:

„ე) სამართალდარღვევის ოქმის, მიმდინარე კონტროლის პროცედურების ან/და საგადასახადო დავალიანების გადახდევინების უზრუნველყოფის ღონისძიებების განხორციელების შესახებ უფლებამოსილი პირის ბრძანების შემთხვევაში − ფიზიკური პირის ეკონომიკური საქმიანობის უშუალოდ განმახორციელებელ პირს.“

ბ) მე-7 ნაწილის „დ“ ქვეპუნქტი ჩამოყალიბდეს შემდეგი რედაქციით:

„დ) სამართალდარღვევის ოქმის, მიმდინარე კონტროლის პროცედურების ან/და საგადასახადო დავალიანების გადახდევინების უზრუნველყოფის ღონისძიებების განხორციელების შესახებ უფლებამოსილი პირის ბრძანების შემთხვევაში − გადასახადის გადამხდელის ეკონომიკური საქმიანობის უშუალოდ განმახორციელებელ პირს.“

5. 69-ე მუხლის მე-4 ნაწილი ჩამოყალიბდეს შემდეგი რედაქციით:

„4. იმ პერიოდზე ან საკითხზე, რომელზეც მიმდინარეობს ან უნდა ჩატარდეს საგადასახადო შემოწმება, პირის მიერ საგადასახადო დეკლარაციის (მათ შორის, შესწორებული საგადასახადო დეკლარაციის) წარდგენა დაუშვებელია საგადასახადო შემოწმების ჩატარების შესახებ სასამართლოს/საგადასახადო ორგანოს შესაბამისი გადაწყვეტილების/შეტყობინების ჩაბარებიდან ან ამ გადაწყვეტილების/შეტყობინების გადასახადის გადამხდელის ავტორიზებული მომხმარებლის გვერდზე ელექტრონულად განთავსებიდან ან საგადასახადო სამართალდარღვევის ოქმის შედგენიდან შესაბამისი საგადასახადო მოთხოვნის ამ პირისათვის ჩაბარებამდე პერიოდში”.

6. 82-ე მუხლის:

ა) პირველი ნაწილის „მ“ ქვეპუნქტის შემდეგ დაემატოს შემდეგი შინაარსის „მ¹“ ქვეპუნქტი:

„მ¹) „ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების შესახებ“ საქართველოს კანონის შესაბამისად, საკუთრების აღიარების შედეგად წარმოშობილი სარგებელი;“.

ბ) პირველ ნაწილს დაემატოს შემდეგი შინაარსის „ჰ ⁴ “ ქვეპუნქტი:

„ჰ ⁴ ) მიკროსიმძლავრის ელექტროსადგურის მფლობელი საცალო მომხმარებლის მიერ წარმოებული ჭარბი ელექტროენერგიის განაწილების ლიცენზიანტისათვის მიწოდებით მიღებული შემოსავალი.“.

7. 98¹ მუხლის:

ა) მე-2 ნაწილის „ა“ ქვეპუნქტი ჩამოყალიბდეს შემდეგი რედაქციით:

„ა) საწარმოს ლიკვიდაციისას ან აქციის/წილის გამოსყიდვისას ფულადი ან ნატურალური ფორმით განხორციელებული გადახდა/განაცემი, რომელიც კაპიტალში (საწესდებოსა და საემისიოში) პარტნიორის მიერ განხორციელებული შენატანის ოდენობას არ აღემატება.

ამ ქვეპუნქტის მიზნებისთვის, პარტნიორის მიერ კაპიტალში (საწესდებოსა და საემისიოში) განხორციელებულ შენატანად არ განიხილება ამ ნაწილის „ბ“ ქვეპუნქტის შესაბამისად ოპერაციის განხორციელების შემდეგ საწარმოს კაპიტალის გაზრდა“;

ბ) მე-4 ნაწილის „გ“ ქვეპუნქტი ჩამოყალიბდეს შემდეგი რედაქციით:

„გ) საწარმოს მიერ საშემოსავლო გადასახადისაგან/მოგების გადასახადისაგან გათავისუფლებულ პირთან (გარდა საბიუჯეტო ორგანიზაციისა და საქართველოს ეროვნული ბანკისა) განხორციელებული ოპერაცია, თუ მათ შორის დადებული გარიგების ფასი განსხვავდება მისი საბაზრო ფასისაგან. ასეთ შემთხვევაში განაწილებული მოგების ოდენობა შეადგენს:

გ.ა) გარიგების საბაზრო ფასსა და მიღებულ/მისაღებ შემოსავალს შორის სხვაობას, თუ გარიგების საბაზრო ფასი აღემატება მიღებულ/მისაღებ შემოსავალს;

გ.ბ) გარიგების შედეგად გაწეულ ხარჯსა და გარიგების საბაზრო ფასს შორის სხვაობას, თუ გარიგების შედეგად გაწეული ხარჯი აღემატება გარიგების საბაზრო ფასს.“.

8. 98² მუხლი მე-3 ნაწილის:

ა) „ა“- „გ“ ქვეპუნქტები ჩამოყალიბდეს შემდეგი რედაქციით:

ა) შეღავათიანი დაბეგვრის მქონე ქვეყანაში რეგისტრირებული პირის, აგრეთვე ამ კოდექსის შესაბამისად მოგების გადასახადისაგან გათავისუფლებული პირის (გარდა საბიუჯეტო ორგანიზაციისა და საქართველოს ეროვნული ბანკისა) მიერ გამოშვებული სასესხო ფასიანი ქაღალდის შესაძენად განხორციელებული გადახდა;

ბ) შეღავათიანი დაბეგვრის მქონე ქვეყანაში რეგისტრირებული პირისათვის, აგრეთვე ამ კოდექსის შესაბამისად მოგების გადასახადისაგან გათავისუფლებული პირისათვის (გარდა საბიუჯეტო ორგანიზაციისა და საქართველოს ეროვნული ბანკისა) გადახდილი, სახელშეკრულებო ურთიერთობიდან წარმოშობილი პირგასამტეხლო ან/და სხვა ჯარიმა;

გ) შეღავათიანი დაბეგვრის მქონე ქვეყანაში რეგისტრირებული პირისათვის, აგრეთვე ამ კოდექსის შესაბამისად მოგების გადასახადისაგან გათავისუფლებული პირისათვის (გარდა საბიუჯეტო ორგანიზაციისა და საქართველოს ეროვნული ბანკისა) ავანსის გადახდა;

ბ) „ვ“ და „ზ“ ქვეპუნქტები ჩამოყალიბდეს შემდეგი რედაქციით:

„ვ) არარეზიდენტის, აგრეთვე ამ კოდექსის შესაბამისად მოგების გადასახადისაგან გათავისუფლებული პირის კაპიტალში შენატანი ან აქციის/წილის (გარდა უცხო ქვეყნის აღიარებულ საფონდო ბირჟაზე განთავსებული აქციისა/წილისა) შესაძენად განხორციელებული გადახდა;

„ზ) ფიზიკური პირისათვის ან არარეზიდენტისათვის სესხის გაცემა (გარდა უცხო ქვეყნის აღიარებულ საფონდო ბირჟაზე განთავსებული სასესხო ფასიანი ქაღალდის შეძენისა). ეს ქვეპუნქტი არ ვრცელდება კომერციული ბანკის, საკრედიტო კავშირის, მიკროსაფინანსო ორგანიზაციისა და ლომბარდის მიერ განხორციელებულ ოპერაციებზე;

გ) „ზ“ ქვეპუნქტის შემდეგ დაემატოს შემდეგი შინაარსის ზ¹ ნაწილი

ზ¹) პარტნიორი ფიზიკური პირის ან პარტნიორი არარეზიდენტის მიერ მესამე პირისაგან აღებული სესხის, საბანკო ანგარიშზე განთავსებული ფულადი სახსრებით უზრუნველყოფა. ამ შემთხვევაში მოგების გადასახადით დაბეგვრის ობიექტის თანხა შეადგენს სესხის უზრუნველსაყოფად საბანკო ანგარიშზე განთავსებული ფულადი სახსრების ოდენობას.“;

დ) მე-9 ნაწილი ჩამოყალიბდეს შემდეგი რედაქციით:

„9. თუ გაუქმდა სესხის საბანკო ანგარიშზე განთავსებული ფულადი სახსრებით უზრუნველყოფა, პირი უფლებამოსილია უზრუნველყოფის გაუქმების საანგარიშო პერიოდში გაუქმებული, საბანკო ანგარიშზე განთავსებული ფულადი სახსრებით, უზრუნველყოფის შესაბამისად გამოანგარიშებული მოგების გადასახადის ოდენობით ჩაითვალოს და ამ კოდექსით დადგენილი წესით დაიბრუნოს ადრე გადახდილი მოგების გადასახადის თანხა.“.

9. მე-100 მუხლის მე-4 ნაწილს:

ა) „ვ“ ქვეპუნქტის შემდეგ დაემატოს შემდეგი შინაარსის „ვ¹“ ქვეპუნქტი:

„ვ¹) საგადასახადო შეთანხმების საფუძველზე მოსაკრებლის თანხის და მასთან დაკავშირებული ჯარიმის და საურავის შემცირებით მიღებული სარგებელი.“;

ბ) დაემატოს შემდეგი შინაარსის „ლ“ ქვეპუნქტი:

„ლ) მიკროსიმძლავრის ელექტროსადგურის მფლობელი საცალო მომხმარებელი ორგანიზაციის მიერ მის მიერ წარმოებული ჭარბი ელექტროენერგიის განაწილების ლიცენზიანტისათვის მიწოდება.“.

10. 105-ე მუხლის მე-4 ნაწილს დაემატოს შემდეგი შინაარსის „დ“ ქვეპუნქტი:

„დ) ამ კოდექსის 99-ე მუხლის პირველი ნაწილის „მ“ ქვეპუნქტის შესაბამისად მოგების გადასახადისაგან გათავისუფლებულ შემოსავალთან (მოგებასთან) დაკავშირებული ხარჯი.“.

11.131-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„ 1. არარეზიდენტის მუდმივი დაწესებულების ან რეზიდენტის მიერ ან მათი სახელით ფიზიკური პირისათვის, ორგანიზაციისთვის ან საქართველოში მუდმივი დაწესებულების არმქონე არარეზიდენტისათვის გადახდილი პროცენტები იბეგრება გადახდის წყაროსთან გადასახდელი თანხის 5-პროცენტიანი განაკვეთით.“

ბ) მე-2 ნაწილი ამოღებულ იქნეს;

გ) მე-4 ნაწილი ჩამოყალიბდეს შემდეგი რედაქციით:

„4. მოგების გადასახადის გადამხდელ ორგანიზაციას, რომელმაც მიიღო საქართველოში გადახდის წყაროსთან დაბეგრილი პროცენტები, უფლება აქვს, ჩაითვალოს გადახდის წყაროსთან ბიუჯეტში გადახდილი გადასახადის თანხა.“.

12. 145-ე მუხლის:

ა) მე-6 ნაწილის შემდეგ დაემატოს 6¹ ნაწილი შემდეგი რედაციით:

„6¹. გადასახადის გადამხდელი უფლებამოსილია, ამ მუხლის მე-6 ნაწილში აღნიშნული პირობების გაუთვალისწინებლად, ჩამოწეროს დაუძლეველი ძალის (მიწისძვრა, წყალდიდობა, მეწყერი, ზვავი, ხანძარი, ავარია და სხვა საგანგებო ან განსაკუთრებული გარემოება, რომლის შედეგადაც გადასახადის გადამხდელისაგან დამოუკიდებელი მიზეზებით მოხდა სასაქონლო-მატერიალური ფასეულობების განადგურება/დაკარგვა) ზემოქმედების შედეგად განადგურებული ან დაკარგული სასაქონლო-მატერიალური ფასეულობები.“;

ბ) მე-8 ნაწილი ჩამოყალიბდეს შემდეგი რედაქციით:

,,8. ამ მუხლის მე-6 და 6¹ ნაწილებით გათვალისწინებულ შემთხვევებში სასაქონლო-მატერიალური ფასეულობის ჩამოწერის წესს განსაზღვრავს საქართველოს ფინანსთა მინისტრი.“.

13. 154-ე მუხლის პირველი ნაწილის:

ა) „დ“ ქვეპუნქტი ჩამოყალიბდეს შემდეგი რედაქციით:

„დ) საწარმო/ორგანიზაცია ან მეწარმე ფიზიკური პირი, რომელიც გაწეული მომსახურების ღირებულებას უნაზღაურებს ფიზიკურ პირს, რომელიც არ არის რეგისტრირებული ინდივიდუალურ მეწარმედ;“;

ბ) „თ“ ქვეპუნქტი ჩამოყალიბდეს შემდეგი რედაქციით:

„თ) პირი, რომელიც პირს უხდის პროცენტს – ამ კოდექსის 131-ე მუხლით გათვალისწინებულ შემთხვევაში;“.

გ) „მ“ ქვეპუნქტი ჩამოყალიბდეს შემდეგი რედაქციით:

მ) პირი, რომელიც უსასყიდლოდ გადასცემს ქონებას ფიზიკურ პირს, რომელიც არ არის რეგისტრირებული ინდივიდუალურ მეწარმედ, გარდა ამ პირის მიერ ამავე ფიზიკური პირისათვის საგადასახადო წლის განმავლობაში 1000 ლარამდე ღირებულების ქონების უსასყიდლოდ გადაცემისა;“.

14. 168-ე მუხლის:

ა) პირველი ნაწილის „ჰ“ქვეპუნქტი ჩამოყალიბდეს შემდეგი რედაქციით:

„ჰ) ფიზიკური პირისათვის საცხოვრებელი ბინის (სახლის) მასზე დამაგრებული მიწით მიწოდება, თუ მიმწოდებელი ამ ქონებას აწვდის:

ჰ.ა) იმ ფიზიკურ პირს, რომლისგანაც ეს ქონება მიიღო მისი ან/და სხვა ფიზიკური პირის სახელშეკრულებო ვალდებულების შესრულების უზრუნველყოფის ღონისძიების ფარგლებში;

ჰ.ბ) იმ ფიზიკურ პირს, რომლის ქონებაც აუქციონის ან სხვა წესით შეიძინა მისი ან/და სხვა ფიზიკური პირის ფულადი ვალდებულების გადახდევინების მიზნით.“;

ბ) მე-4 ნაწილის:

ბ.ა) „გ²“ ქვეპუნქტის შემდეგ დაემატოს შემდეგი შინაარსის „გ³“ და „გ⁴“ ქვეპუნქტები:

„გ³) საქართველოს ტერიტორიაზე არარეზიდენტის კუთვნილი ვაგონით/კონტეინერით სარკინიგზო გადაზიდვის განხორციელებისას, არარეზიდენტის მიერ ვაგონით/კონტეინერით სარგებლობის მომსახურების გაწევა, გარდა ვაგონის/კონტეინერის საიჯარო ხელშეკრულებით გადაცემის შემთხვევისა;

„გ⁴) საქართველოს ტერიტორიის ფარგლებს გარეთ საქართველოს რეზიდენტის კუთვნილი ვაგონით/კონტეინერით სარკინიგზო გადაზიდვის განხორციელებისას, საქართველოს რეზიდენტის მიერ ვაგონით/კონტეინერით სარგებლობის მომსახურების გაწევა, გარდა ვაგონის/კონტეინერის საიჯარო ხელშეკრულებით გადაცემის შემთხვევისა;“.

ბ.ბ) „ე“ ქვეპუნქტი ჩამოყალიბდეს შემდეგი რედაქციით:

 „ე) საერთაშორისო საავიაციო და საერთაშორისო საზღვაო რეისების განსახორცილებლად ბორტზე მისაწოდებლად განკუთვნილი საქონლის იმპორტი ან/და მიწოდება, ასევე საქართველოს სახელმწიფო საზღვრის ფარგლებში სამოქალაქო საავიაციო რეისებისა და საავიაციო სამუშაოების განსახორციელებლად ბორტზე მისაწოდებლად განკუთვნილი საწვავის, საპოხი და სხვა დამხმარე საშუალებების იმპორტი ან/და მიწოდება;“.

ბ.გ) „ც“ ქვეპუნქტის შემდეგ დაემატოს შემდეგი შინაარსის „ძ“ ქვეპუნქტი:

 „ძ) საქართველოს სახელმწიფო საზღვრის ფარგლებში საჰაერო გადაყვანა-გადაზიდვის და საავიაციო სამუშაოების მომსახურების გაწევა.“.

15. 185-ე მუხლის:

ა) პირველი ნაწილის „ბ“ ქვეპუნქტი ჩამოყალიბდეს შემდეგი რედაქციით:

„ბ) ალკოჰოლიანი სასმელისათვის – ალკოჰოლიანი სასმელის მოცულობით ან ალკოჰოლიან სასმელში სუფთა ალკოჰოლის მოცულობით ან ალკოჰოლის შემცველობის პროცენტული მაჩვენებლის მიხედვით;“;

ბ) პირველ ნაწილს დაემატოს „თ“ ქვეპუნქტი შემდეგი რედაქციით:

„თ) ელექტრონული სიგარეტის სითხისათვის - სითხის მოცულობით.“.

16. 188-ე მუხლის:

ა) პირველი ნაწილის:

ა.ა) ცხრილის პირველი, მე-2 და მე-3 გრაფები ჩამოყალიბდეს შემდეგი რედაქციით:

 

„1	ლუდი
	2203 00	ალაოს ლუდი	1 ლიტრი/1%Vol	0.12
2	ეთილის სპირტი და ალკოჰოლიანი სასმელები
	2206 00	სხვა დადუღებული სასმელები (მაგალითად, სიდრი, პერი (მსხლის სიდრი), თაფლის სასმელი); ნარევები დადუღებული სასმელებისაგან და დადუღებული სასმელებისა და უალკოჰოლო სასმელების ნარევები, სხვა ადგილას დაუსახელებელი ან ჩაურთველი, რომელშიც ალკოჰოლის შემცველობა აღმატება 5%	1 ლ		5
		სხვა დადუღებული სასმელები (მაგალითად, სიდრი, პერი (მსხლის სიდრი), თაფლის სასმელი); ნარევები დადუღებული სასმელებისაგან და დადუღებული სასმელებისა და უალკოჰოლო სასმელების ნარევები, სხვა ადგილას დაუსახელებელი ან ჩაურთველი, რომელშიც ალკოჰოლის შემცველობა არ აღმატება 5%	1 ლ		0.6
	2207	ეთილის სპირტი არადენატურირებული, სპირტის კონცენტრაციით 80 მოც.% ან მეტი; ეთილის სპირტი და სხვა დენატურირებული სპირტები ნებისმიერი კონცენტრაციით	1 ლიტრი სუფთა სპირტი		7.5
	2208 20	– სპირტის ნაყენები, მიღებული ყურძნის ღვინის ან ჭაჭის დისტილაციით (გამოხდით)	1 ლიტრი სუფთა სპირტი		15
	2208 30	– ვისკი	1 ლიტრი სუფთა სპირტი		22.5
	2208 40	– რომი და ტაფია	1 ლიტრი სუფთა სპირტი		22.5
	2208 50	– ჯინი და ღვიის ნაყენი	1 ლიტრი სუფთა სპირტი		22.5
	2208 60	– არაყი	1 ლიტრი სუფთა სპირტი		15
	2208 70	– ლიქიორები	1 ლიტრი სუფთა სპირტი		22.5
	2208 90 110 00	– – –არაკი (arrack) ჭურჭელში ტევადობით 2 ლ ან 2 ლ-ზე ნაკლები	1 ლიტრი სუფთა სპირტი		22.5
	2208 90 190 00	– – – არაკი (arrack) ჭურჭელში ტევადობით 2 ლ-ზე მეტი	1 ლიტრი სუფთა სპირტი		22.5
	2208 90 330 00	– – – ქლიავის, მსხლის ან ალუბლის სპირტიანი ნაყენები (ლიქიორების გარდა) ჭურჭელში ტევადობით 2 ლ ან 2 ლ-ზე ნაკლები	1 ლიტრი სუფთა სპირტი		15
	2208 90 380 00	– – – ქლიავის, მსხლის ან ალუბლის სპირტიანი ნაყენები (ლიქიორების გარდა) ჭურჭელში ტევადობით 2 ლ-ზე მეტი	1 ლიტრი სუფთა სპირტი		15
	2208 90 410 00	– – – – უზო	1 ლიტრი სუფთა სპირტი		22.5
	2208 90 450 00	– – – – კალვადოსი	1 ლიტრი სუფთა სპირტი		22.5
	2208 90 480 00	– – – –დანარჩენი	1 ლიტრი სუფთა სპირტი		15
	2208 90 520 00	– – – –კორნი	1 ლიტრი სუფთა სპირტი		22.5
	2208 90 540 00	– – – –ტეკილა	1 ლიტრი სუფთა სპირტი		22.5
	2208 90 560 00	– – – – დანარჩენი	1 ლიტრი სუფთა სპირტი		22.5
	2208 90 690 01	– – – – სპირტის ფაქტობრივი კონცენტრაციით არაუმეტეს 7 მას.%-ისა	1 ლიტრი სუფთა სპირტი		22.5
	2208 90 690 09	– – – – დანარჩენი	1 ლიტრი სუფთა სპირტი		22.5
	2208 90 710 00	– – – – ხილისგან გამოხდილი	1 ლიტრი სუფთა სპირტი		15
	2208 90 750 00	– – – – ტეკილა	1 ლიტრი სუფთა სპირტი		22.5
	2208 90 770 00	– – – – დანარჩენი	1 ლიტრი სუფთა სპირტი		22.5
	2208 90 780 00	– – – – დანარჩენი სპირტიანი სასმელები	1 ლიტრი სუფთა სპირტი		22.5
	2208 90 910 00	– – – 2 ლ ან 2 ლ-ზე ნაკლები	1 ლიტრი სუფთა სპირტი		22.5
	2208 90 990 00	– – – 2 ლ-ზე მეტი	1 ლიტრი სუფთა სპირტი		22.5
3	თამბაქოს ნაწარმი (თამბაქოს ნედლეულის გარდა)
	2402 10 000 01	– სიგარები , სიგარები წაჭრილი ბოლოებით ,თამბაქოს შემცველობით	1 ღერი		1.9
	2402 10 000 02	– – სიგარილები ( წვრილი სიგარები ), თამბაქოს შემცველობით	20 ღერი		2.2
	2402 20	ფილტრიანი სიგარეტები , თამბაქოს შემცველობით	20 ღერი		1.7
		უფილტრო სიგარეტები , თამბაქოს შემცველობით	20 ღერი		0.6
	2403 11 000 00*	– – ყალიონით მოსაწევი თამბაქო , ამ ჯგუფის სუბპოზიციისათვის 1- ლი შენიშვნის შესაბამისად	1 კგ		35
	2403 19 000 00*	– – დანარჩენი	1 კგ		35
	2403 99 100 00	– – – საღეჭი ან საყნოსი ( ბურნუთი ) თამბაქო	1 კგ		35
	2403 99 900 01	– – – – – კაფსულები და მსგავსი სახის პოდუქტები თამბაქოს შემცველობით	1 ცალი		1.7
	2403 99 900 02	– – – – – თამბაქოს ნაწარმი, წვის პროცესის გარეშე, ორთქლის მისაღებად გამოსაყენებელი	20 ღერი		1.7

 

 

ა.ბ) ცხრილის მე-11 გრაფა ჩამოყალიბდეს შემდეგი რედაქციით:

 

11	საპოხი მასალები და საშუალებები
	3403 11 000 00	– – ტექსტილის მასალების, ტყავის, ბეწვეულის ან დანარჩენი მასალების დამამუშავებელი საშუალებები	1 ტ	800
	3403 19 100 00	– – – ნავთობისაგან ან ბიტუმოვანი ქანებისაგან მიღებული ნავთობპროდუქტების არაძირითადი კომპონენტის სახით შემცველობით 70 მას.% ან 70 მას.%-ზე მეტი	1 ტ	800
	3403 19 910 00	– – – – მანქანების, მექანიზმებისა და სატრანსპორტო საშუალებების საპოხი საშუალებები	1 ტ	800
	3403 19 990 00	– – – – დანარჩენი	1 ტ	800
	3403 91 000 00	– – ტექსტილის მასალების, ტყავის, ბეწვეულის ან დანარჩენი მასალების დამამუშავებელი საშუალებები	1 ტ	800
	3403 99 100 00	– – – მანქანების, მექანიზმებისა და სატრანსპორტო საშუალებების საპოხი საშუალებები	1 ტ	800
	3403 99 900 00	– – – დანარჩენი	1 ტ	800

 

ა.გ) ცხრილს დაემატოს მე-12 გრაფა შემდეგი რედაქციით:

 

12

3824 90 980 01

– – – – – სითხეები ნიკოტინის შემცველობით ან შემცველობის გარეშე, განკუთვნილი ელექტრონული სიგარეტით მოხმარებისთვის

1 მლ.

0.2

 

ა.დ) შენიშვნის მე-2 ქვეპუნქტი ჩამოყალიბდეს შემდეგი რედაქციით:

„2. სახელმწიფო საკუთრებაში მიქცეული ალკოჰოლიანი სასმელის რეალიზაციისას, თუ ვერ ხორციელდება სარეალიზაციოდ განკუთვნილი საქონლის ამ ცხრილის მე-2 გრაფაში მითითებული საქონლისათვის მიკუთვნება,აღნიშნული საქონლისთვის აქციზის განაკვეთი 1 ლიტრ სუფთა სპირტზე 15 ლარია.“.

ბ) 1¹ და 1² ნაწილები ჩამოყალიბდეს შემდეგი რედაქციით:

„1 ¹. საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული ფილტრიანი სიგარეტებისათვის, თამბაქოს შემცველობით, 20 ღერზე და უფილტრო სიგარეტებისათვის, თამბაქოს შემცველობით 20 ღერზე, სეს ესნ 2403 99 900 01 კოდში მითითებული საქონლისათვის ერთ ერთეულზე, 2403 99 900 02 კოდში მითითებული საქონლისათვის 20 ღერზე აქციზის განაკვეთია ამ მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 10 პროცენტის ჯამი. აქციზის თანხის გამოანგარიშების მიზნისათვის საქონლის საცალო სარეალიზაციო ფასი დგინდება ამ საქონლის მწარმოებლის/იმპორტიორის მიერ საგადასახადო ორგანოში წარდგენილი საცალო სარეალიზაციო ფასებისა და საგადასახადო ორგანოში არსებული სხვა ინფორმაციის საფუძველზე არაუგვიანეს ყოველი წლის 1 დეკემბრისა და გამოიყენება მომდევნო წლის 1 იანვრიდან ერთი წლის განმავლობაში.

1². საგარეო-ეკონომიკური საქმიანობის ეროვნული სასაქონლო ნომენკლატურის  2402 20 კოდში მითითებულ ფილტრიან და უფილტრო სიგარეტებზე, ასევე სეს ესნ 2403 99 900 01,
2403 99 900 02 კოდებში მითითებული საქონელზე აქციზის თანხის გამოანგარიშების მიზნისათვის საცალო სარეალიზაციო ფასს და მისი დადგენის წესს განსაზღვრავს საქართველოს ფინანსთა მინისტრი.

გ) მე-4 ნაწილის შემდეგ დაემატოს შემდეგი შინაარსის მე-5 და მე-7 ნაწილები:

„5. ამ მუხლის პირველი ნაწილის ცხრილის პირველი გრაფით გათვალისწინებულ სეს ესნ 2203 00 სასაქონლო სუბპოზიციაში მითითებულ ალაოს ლუდზე გადასახდელი აქციზის თანხა შეადგენს აქციზის განაკვეთის, საქონლის მოცულობის რაოდენობრივ მაჩვენებლის და მოცემულ საქონელში ალკოჰოლის შემცველობის პროცენტული მაჩვენებელის ნამრავლს.

6. ამ მუხლის პირველი ნაწილის ცხრილის მე-2 გრაფით გათვალისწინებულ სეს ესნ 2206 00 სუბპოზიციით გათვალისწინებული საქონელზე გადასახდელი აქციზის თანხა შეადგენს შესაბამისი აქციზის განაკვეთის ნამრავლს მოცემული საქონლის მოცულობის რაოდენობრივ მაჩვენებელზე.

7. ამ მუხლის პირველი ნაწილის ცხრილის მე-2 გრაფით გათვალისწინებულ სეს ესნ კოდებში მითითებულ საქონელზე (გარდა სეს ესნ 2206 00 სუბპოზიციით გათვალისწინებული საქონლისა) გადასახდელი აქციზის თანხა შეადგენს შესაბამისი აქციზის განაკვეთის ნამრავლს მოცემულ საქონელში სუფთა სპირტის მოცულობის რაოდენობრივ მაჩვენებელზე.“.

17. 192-ე მუხლის მე-2 ნაწილის „ი“ ქვეპუნქტი ჩამოყალიბდეს შემდეგი რედაქციით:

„ი) იმპორტირებული (მათ შორის, საფოსტო გზავნილის შემთხვევაში) 200 ღერი სიგარეტი ან 50 სიგარა ან 50 სიგარილა ან სეს ესნ 2403 99 900 02 კოდით გათვალისწინებული 200 ღერი თამბაქოს ნაწარმი ან სეს ესნ 2403 99 900 01 კოდით გათვალისწინებული 10 ცალი კაფსულა და მსგავსი სახის პროდუქტი ან 250 გრამი თამბაქოს სხვა ნაწარმი ან ამ ქვეპუნქტში დასახელებული თამბაქოს ნაწარმის სახეობათა ნაკრები, თუ მასში შემავალი თითოეული სახის თამბაქოს ნაწარმის წილის პროცენტულ მაჩვენებელთა (პროცენტული მაჩვენებელი შესაბამის ზღვრულ ოდენობასთან მიმართებით) ჯამი 100 -ს არ აღემატება.“.

18. 194-ე მუხლის:

ა) მე-5 ნაწილის:

ა.ა) „ბ“ და „ბ¹“ ქვეპუნქტები ჩამოყალიბდეს შემდეგი რედაქციით:

„ბ) ფიზიკური პირის მიერ საჰაერო ტრანსპორტით შემოტანის შემთხვევაში ერთი კალენდარული დღის, ხოლო სხვა შემთხვევაში − 30 კალენდარული დღის განმავლობაში 200 ღერი სიგარეტის ან 50 სიგარის ან 50 სიგარილას ან სეს ესნ 2403 99 900 02 კოდით გათვალისწინებული 200 ღერი თამბაქოს ნაწარმის ან სეს ესნ 2403 99 900 01 კოდით გათვალისწინებული 10 ცალი კაფსულის და მსგავსი სახის პროდუქტის ან 250 გრამი თამბაქოს სხვა ნაწარმის იმპორტი, ან ამ ქვეპუნქტში დასახელებული თამბაქოს ნაწარმის ნაკრების იმპორტი, თუ მასში შემავალი თითოეული სახის თამბაქოს ნაწარმის წილის პროცენტულ მაჩვენებელთა (პროცენტული მაჩვენებელი შესაბამის ზღვრულ ოდენობასთან მიმართებით) ჯამი 100-ს არ აღემატება, ან სეს ესნ 3824 90 980 01 კოდით გათვალისწინებული 50 მლ. საქონლის იმპორტი; ასევე 4 ლიტრი ალკოჰოლიანი სასმელის იმპორტი;

ბ¹ ) საფოსტო გზავნილის შემთხვევაში 200 ღერი სიგარეტის ან 50 სიგარის ან 50 სიგარილას ან სეს ესნ 2403 99 900 02 კოდით გათვალისწინებული 200 ღერი თამბაქოს ნაწარმის ან სეს ესნ 2403 99 900 01 კოდით გათვალისწინებული 10 ცალი კაფსულის და მსგავსი სახის პროდუქტის ან 250 გრამი თამბაქოს სხვა ნაწარმის იმპორტი, ან ამ ქვეპუნქტში დასახელებული თამბაქოს ნაწარმის ნაკრების იმპორტი, თუ მასში შემავალი თითოეული სახის თამბაქოს ნაწარმის წილის პროცენტულ მაჩვენებელთა (პროცენტული მაჩვენებელი შესაბამის ზღვრულ ოდენობასთან მიმართებით) ჯამი 100-ს არ აღემატება, ან სეს ესნ 3824 90 980 01 კოდით გათვალისწინებული 50 მლ. საქონლის იმპორტი; ასევე 4 ლიტრი ალკოჰოლიანი სასმელის იმპორტი;“;

ა.ბ) „ე“ ქვეპუნქტი ჩამოყალიბდეს შემდეგი რედაქციით:

„ე) საერთაშორისო საავიაციო და საერთაშორისო საზღვაო რეისების განსახორცილებლად ბორტზე მისაწოდებლად განკუთვნილი საქონლის იმპორტი ან/და მიწოდება, ასევე საქართველოს სახელმწიფო საზღვრის ფარგლებში სამოქალაქო საავიაციო რეისებისა და საავიაციო სამუშაოების განსახორციელებლად ბორტზე მისაწოდებლად განკუთვნილი საწვავის, საპოხი და სხვა დამხმარე საშუალებების იმპორტი ან/და მიწოდება;“.

ა.გ) მე-2 შენიშვნა ჩამოყალიბდეს შემდეგი რედაქციით:

„შენიშვნა: 

1. თუ ფიზიკური პირის მიერ შემოტანილი ან საფოსტო გზავნილით შემოტანილი ალკოჰოლიანი სასმელის ან/და თამბაქოს ნაწარმის ან/და სეს ესნ 3824 90 980 01 კოდით გათვალისწინებული საქონლის ოდენობა აღემატება ამ ნაწილის „ბ“ ან „ბ¹“ ქვეპუნქტებით გათვალისწინებულ ზღვრულ ოდენობას, ამავე მუხლით გათვალისწინებული აქციზისაგან გათავისუფლება გამოიყენება საქონლის ზემოთ მითითებული ზღვრული ოდენობის ფარგლებში.

2. ამ ნაწილის „ბ“ და „ბ¹“ ქვეპუნქტებით გათვალისწინებული საგადასახადო შეღავათებით სარგებლობის უფლება ფიზიკურ პირს წარმოეშობა 18 წლის ასაკიდან.“.

ბ) მე-6 ნაწილს:

ბ.ა) დაემატოს შემდეგი შინაარსის „ე“ ქვეპუნქტი:

„ე) მწარმოებლის მიერ დამკვეთის ნედლეულით საგარეო-ეკონომიკური საქმიანობის ეროვნული სასაქონლო ნომენკლატურის 2208 20 სასაქონლო სუბპოზიციით გათვალისწინებული ყურძნის ღვინის დისტილაციით მიღებული სპირტის წარმოება და დამკვეთისათვის გადაცემა, თუ წარმოებული საქონელი დამკვეთის მიერ გამოიყენება ამავე სასაქონლო სუბპოზიციით გათვალისწინებული საქონლის საწარმოებლად.“;

ბ.ბ) დაემატოს შენიშვნა შემდეგი რედაქციით:

„შენიშვნა: ამ ნაწილის „დ“ ან „ე“ ქვეპუნქტით გათვალისწინებული შეღავათის გამოყენების შემთხვევაში, თუ 2208 20 სასაქონლო სუბპოზიციით გათვალისწინებული ყურძნის ღვინის დისტილაციით მიღებული სპირტის შემძენის/დამკვეთის მიერ არ ხდება ამ საქონლის ამავე სასაქონლო სუბპოზიციით გათვალისწინებული საქონლის საწარმოებლად გამოყენება, შეძენილ/გადმოცემულ საქონელთან მიმართებით აქციზის გადახდელად განიხილება საქონლის შემძენი/დამკვეთი, რა დროსაც დასაბეგრი ოპერაციის განხორციელების დროდ განიხილება შემძენის/დამკვეთის მიერ საქონლის სხვა საქმიანობაში გამოყენების დაწყების მომენტი.“.

19. 199-ე მუხლის:

ა) „დ.ბ“ ქვეპუნქტი ჩამოყალიბდეს შემდეგი რედაქციით:

„დ.ბ) 30 კალენდარულ დღეში ერთხელ საგარეო-ეკონომიკური საქმიანობის ეროვნული სასაქონლო ნომენკლატურის  28-ე–97-ე ჯგუფებით (სეს ესნ 3824 90 980 01 კოდით გათვალისწინებული საქონლის გარდა) გათვალისწინებული 500 ლარამდე ღირებულების, 30 კგ-მდე საერთო წონის საქონლის იმპორტი, რომელიც არ არის განკუთვნილი ეკონომიკური საქმიანობისათვის;“;

ბ) „დ.გ” ქვეპუნქტი ჩამოყალიბდეს შემდეგი რედაქციით:

„დ.გ) საჰაერო ტრანსპორტით შემოტანის შემთხვევაში ერთი კალენდარული დღის, ხოლო სხვა შემთხვევაში – 30 კალენდარული დღის განმავლობაში 200 ღერი სიგარეტის ან 50 სიგარის ან 50 სიგარილას ან სეს ესნ 2403 99 900 02 კოდით გათვალისწინებული 200 ღერი თამბაქოს ნაწარმის ან სეს ესნ 2403 99 900 01 კოდით გათვალისწინებული 10 ცალი კაფსულის და მსგავსი სახის პროდუქტის ან 250 გრამი თამბაქოს სხვა ნაწარმის (გარდა თამბაქოს ნედლეულისა) იმპორტი ან ამ ქვეპუნქტში დასახელებული თამბაქოს ნაწარმის სახეობების ნაკრების იმპორტი, თუ მასში შემავალი თითოეული სახის თამბაქოს ნაწარმის წილის პროცენტულ მაჩვენებელთა (პროცენტული მაჩვენებელი შესაბამის ზღვრულ ოდენობასთან მიმართებით) ჯამი 100-ს არ აღემატება, ან სეს ესნ 3824 90 980 01 კოდით გათვალისწინებული 50 მლ. საქონლის იმპორტი; ასევე 4 ლიტრი ყველა სახის ალკოჰოლიანი სასმელის იმპორტი;“;

გ) „დ.ვ” ქვეპუნქტი ჩამოყალიბდეს შემდეგი რედაქციით:

„დ.ვ) საფოსტო გზავნილის შემთხვევაში საგარეო-ეკონომიკური საქმიანობის ეროვნული სასაქონლო ნომენკლატურის  28-ე–97-ე ჯგუფების შესაბამისი 300 ლარამდე ღირებულების, 30 კგ-მდე საერთო წონის საქონლის (სეს ესნ 3824 90 980 01 კოდით გათვალისწინებული საქონლის გარდა) იმპორტი, რომელიც არ არის განკუთვნილი ეკონომიკური საქმიანობისათვის, აგრეთვე 200 ღერი სიგარეტის ან 50 სიგარის ან 50 სიგარილას ან სეს ესნ 2403 99 900 02 კოდით გათვალისწინებული 200 ღერი თამბაქოს ნაწარმის ან სეს ესნ 2403 99 900 01 კოდით გათვალისწინებული 10 ცალი კაფსულის და მსგავსი სახის პროდუქტის ან 250 გრამი თამბაქოს სხვა ნაწარმის (გარდა თამბაქოს ნედლეულისა) იმპორტი ან ამ ქვეპუნქტში დასახელებული თამბაქოს ნაწარმის სახეობების ნაკრების იმპორტი, თუ მასში შემავალი თითოეული სახის თამბაქოს ნაწარმის წილის პროცენტულ მაჩვენებელთა (პროცენტული მაჩვენებელი შესაბამის ზღვრულ ოდენობასთან მიმართებით) ჯამი 100-ს არ აღემატება, ან სეს ესნ 3824 90 980 01 კოდით გათვალისწინებული 50 მლ. საქონლის იმპორტი; ასევე 4 ლიტრი ყველა სახის ალკოჰოლიანი სასმელის იმპორტი;“;

დ) „ვ” ქვეპუნქტი ჩამოყალიბდეს შემდეგი რედაქციით:

„ვ) საერთაშორისო საავიაციო და საერთაშორისო საზღვაო რეისების განსახორციელებლად ბორტზე მისაწოდებლად განკუთვნილი საქონლის იმპორტი, ასევე საქართველოს სახელმწიფო საზღვრის ფარგლებში სამოქალაქო საავიაციო რეისებისა და საავიაციო სამუშაოების განსახორციელებლად ბორტზე მისაწოდებლად განკუთვნილი საწვავის, საპოხი და სხვა დამხმარე საშუალებების იმპორტი;“;

 ე) „ო” ქვეპუნქტი ჩამოყალიბდეს შემდეგი რედაქციით:

„ო) საფოსტო გზავნილის შემთხვევაში (გარდა ამ მუხლის „დ.ვ“ ქვეპუნქტით გათვალისწინებული შემთხვევისა) საგარეო-ეკონომიკური საქმიანობის ეროვნული სასაქონლო ნომენკლატურის  28-ე–97-ე ჯგუფების შესაბამისი 300 ლარამდე ღირებულების, 30 კგ-მდე საერთო წონის საქონლის (სეს ესნ 3824 90 980 01 კოდით გათვალისწინებული საქონლის გარდა) იმპორტი, აგრეთვე 200 ღერი სიგარეტის ან 50 სიგარის ან 50 სიგარილას ან სეს ესნ 2403 99 900 02 კოდით გათვალისწინებული 200 ღერი თამბაქოს ნაწარმის ან სეს ესნ 2403 99 900 01 კოდით გათვალისწინებული 10 ცალი კაფსულის და მსგავსი სახის პროდუქტის ან 250 გრამი თამბაქოს სხვა ნაწარმის (გარდა თამბაქოს ნედლეულისა) იმპორტი ან ამ ქვეპუნქტში დასახელებული თამბაქოს ნაწარმის სახეობების ნაკრების იმპორტი, თუ მასში შემავალი თითოეული სახის თამბაქოს ნაწარმის წილის პროცენტული მაჩვენებლების (პროცენტული მაჩვენებელი შესაბამის ზღვრულ ოდენობასთან მიმართებით) ჯამი 100-ს არ აღემატება, ასევე სეს ესნ 3824 90 980 01 კოდით გათვალისწინებული 50 მლ. საქონლის ან 4 ლიტრი ყველა სახის ალკოჰოლიანი სასმელის იმპორტი;“.

ე) შენიშვნა ჩამოყალიბდეს შემდეგი რედაქციით:

„შენიშვნა:

1. თუ ფიზიკური პირის მიერ შემოტანილი ან საფოსტო გზავნილით შემოტანილი ალკოჰოლიანი სასმელის ან/და თამბაქოს ნაწარმის ან/და სეს ესნ 3824 90 980 01 კოდით გათვალისწინებული საქონლის ოდენობა აღემატება ამ მუხლის „დ.გ“, „დ.ვ“ ან „ო“ ქვეპუნქტებით გათვალისწინებულ ზღვრულ ოდენობას, ამავე მუხლით გათვალისწინებული იმპორტის გადასახადისაგან გათავისუფლება გამოიყენება საქონლის ზემოთ მითითებული ზღვრული ოდენობის ფარგლებში.“.

2. ამ მუხლის „დ.გ“ და „დ.ვ“ ქვეპუნქტებით გათვალისწინებულ აქციზურ საქონელზე საგადასახადო შეღავათებით სარგებლობის უფლება ფიზიკურ პირს წარმოეშობა 18 წლის ასაკიდან.“.

20. 214-ე მუხლის შემდეგ დაემატოს შემდეგი შინაარსის 214 ¹  მუხლი:

„მუხლის 214 ¹ . წინასწარი ინფორმაცია

საერთაშორისო საჰაერო გადაზიდვების განმახორციელებელი პირი ვალდებულია საგადასახადო ორგანოს წარუდგინოს წინასწარი ინფორმაცია საერთაშორისო საჰაერო გადაზიდვების განმახორციელებელი სატრანსპორტო საშუალების, ამ სატრანსპორტო საშუალებით გადასაადგილებელი საქონლის ან/და მგზავრების შესახებ საქართველოს ფინანსთა მინისტრის მიერ განსაზღვრული წესის შესაბამისად.“.

21. 217-ე მუხლი ჩამოყალიბდეს შემდეგი რედაქციით:

 „ მუხლი 217. სასაქონლო ოპერაციის განსაზღვრის ვადა

1. ზოგადი დეკლარირების განხორციელების შემდეგ სასაქონლო ოპერაციის განსაზღვრის პროცედურები ზოგადი დეკლარირებიდან 30 დღეში უნდა განხორციელდეს.

2. შემოსავლების სამსახური უფლებამოსილია შეამციროს ამ მუხლის პირველ ნაწილში აღნიშნული ვადა, ასევე გაზარდოს ეს ვადა 60 დღით.

3. საბაჟო საწყობში საქონლის დროებით შენახვის შემთხვევაში ამ მუხლის პირველ ნაწილში აღნიშნული ვადა შეადგენს 180 დღეს. 

4. საქონელი, რომელზეც უკვე განსაზღვრულია სასაქონლო ოპერაცია (გარდა ექსპორტისა), პირის მოთხოვნით, შეიძლება საბაჟო საწყობში დროებით ინახებოდეს არა უმეტეს 180 დღისა, ხოლო ექსპორტის შემთხვევაში − არაუმეტეს 120 დღისა.

5. შემოსავლების სამსახური უფლებამოსილია გაზარდოს ამ მუხლის მე-3 და მე-4 ნაწილებში აღნიშნული ვადა, არა უმეტეს 180 დღით.“.

22. 221-ე მუხლის მე-2 ნაწილს დაემატოს შემდეგი შინაარსის „დ“-„ვ“ ქვეპუნქტები:

 „დ) რომელზეც კანონმდებლობით დადგენილ ვადაში არ არის განსაზღვრული სასაქონლო ოპერაცია (მათ შორის, დროებით შენახულ საქონელზე) ან ამ ვადის ამოწურვამდე არ არის გამოყენებული ამ მუხლის მე-4 ნაწილით გათვალისწინებული საქონლის განკარგვის ღონისძიება;“;

ე) რომელზეც განსაზღვრულია სასაქონლო ოპერაცია და ამოწურულია ამ კოდექსის 217-ე მუხლის მე-4 ნაწილით განსაზღვრული ვადა, თუ არ დასრულდა სასაქონლო ოპეარაცია ან არ არის სხვა სასაქონლო ოპერაცია განსაზღვრული ან არ არის გამოყენებული ამ მუხლის მე-4 ნაწილით გათვალისწინებული საქონლის განკარგვის ღონისძიება;

ვ) რომელზეც ამოწურულია საწყობის სასაქონლო ოპერაციაში შენახვის ვადა და არ არის განხორციელებული აღნიშნული ვადის გაგრძელება ან არაა განსაზღვრული სხვა სასაქონლო ოპერაცია ან არ არის გამოყენებული ამ მუხლის მე-4 ნაწილით გათვალისწინებული საქონლის განკარგვის ღონისძიება;“.

23. 231-ე მუხლის:

ა) მე-2 ნაწილი ჩამოყალიბდეს შემდეგი რედაქციით:

„2. საწყობის სასაქონლო ოპერაციაში მოქცეული საქონლის შენახვის ვადა არ უნდა აღემატებოდეს 2 წელს. აღნიშნული ვადა დეკლარანტის მიერ შეიძლება გაგრძელდეს შეუზღუდავი რაოდენობით იმ პირობით, რომ თითოეული გაგრძელებული ვადა არ უნდა აღემატებოდეს 2 წელს.“;

ბ) მე-4 ნაწილი ჩამოყალიბდეს შემდეგი რედაქციით:

„4. საბაჟო საწყობის საქმიანობა ხორციელდება შემოსავლების სამსახურის მიერ გაცემული ნებართვის საფუძველზე. აკრძალულია ნებართვის სხვა პირისათვის გადაცემა.“.

24. 238-ე მუხლის 8¹ ნაწილი ჩამოყალიბდეს შემდეგი რედაქციით:

„8¹. საგადასახადო ორგანოს გადაწყვეტილებით, ამ მუხლის მე-8 ნაწილით გათვალისწინებული უზრუნველყოფის საშუალების წარდგენის გარეშე აღიარებული საგადასახადო დავალიანების გადახდევინება შეიძლება გადავადდეს არაუმეტეს 1 წლით, თუ აღიარებული საგადასახადო დავალიანების თანხა 50 000 ლარს არ აღემატება.“.

25.270-ე მუხლის მე-7 ნაწილი ჩამოყალიბდეს შემდეგი რედაქციით:

„7. ამ კოდექსის 279-ე მუხლის მე-4 ნაწილით, 281-ე მუხლით, 286-ე მუხლის მე-11 ნაწილით, 289-ე მუხლის მე-6, მე-14 და მე-15 ნაწილებითა და 291-ე მუხლით გათვალისწინებული სამართალდარღვევებისათვის (გარდა განმეორებით ჩადენილებისა) ფულადი ჯარიმის ნაცვლად შესაძლებელია გამოყენებულ იქნეს გაფრთხილება.“.

26. 275-ე მუხლის მე-4 ნაწილი ჩამოყალიბდეს შემდეგი რედაქციით:

„პირის მიერ საგადასახადო დეკლარაციაში გადასახადის თანხის 100 000 ლარზე მეტით შემცირება ითვლება გადასახადისგან თავის არიდებად და იწვევს პასუხისმგებლობას საქართველოს სისხლის სამართლის კანონმდებლობით დადგენილი წესით.

27. 279-ე მუხლს დაემატოს შემდეგი შინაარსის მე- 4-მე-5 ნაწილები:

4. საგადასახადო ორგანოსათვის საერთაშორისო საჰაერო გადაზიდვების განმახორციელებელი სატრანსპორტო საშუალების, ამ სატრანსპორტო საშუალებით გადასაადგილებელი საქონლის ან/და მგზავრების შესახებ საერთაშორისო საჰაერო გადაზიდვების განმახორციელებელი პირის მიერ წინასწარი ინფორმაციის დადგენილი წესით წარუდგენლობა –

იწვევს პირის დაჯარიმებას 2 000 ლარის ოდენობით.

5. ამ მუხლის მე-4 ნაწილით გათვალისწინებული ქმედება, ჩადენილი განმეორებით, –

იწვევს პირის დაჯარიმებას 4 000 ლარის ოდენობით.“.

28. 286-ე მუხლს დაემატოს შემდეგი შინაარსის 3¹ და 3² ნაწილები:

„3¹. ამ მუხლის პირველი ნაწილით გათვალისწინებული ქმედება, თუ სასაქონლო ზედნადების გარეშე ტრანსპორტირებული ან მიწოდებული/მისაწოდებელი საქონლის საბაზრო ღირებულება აღემატება 10 000 ლარს - იწვევს პირის დაჯარიმებას 10 000 ლარის ოდენობით.

„3². ამ მუხლის 1¹ და 1² ნაწილებით გათვალისწინებული ქმედება, თუ სასაქონლო ზედნადების გარეშე ტრანსპორტირებული ან მიწოდებული/მისაწოდებელი საქონლის საბაზრო ღირებულება აღემატება 10 000 ლარს - იწვევს პირის დაჯარიმებას 10 000 ლარის ოდენობით და საქონლის ჩამორთმევას.“.

29. 288¹ მუხლის პირველი ნაწილი ჩამოყალიბდეს შემდეგი რედაქციით:

„1. სპეციალური სავაჭრო კომპანიის მიერ ამ კოდექსის 24¹ მუხლის მე-4 ნაწილის „დ.გ“ ქვეპუნქტით გათვალისწინებული შემოსავლის გადამეტება იმავე ქვეპუნქტით დადგენილ ზღვრულ ოდენობაზე –

იწვევს დაჯარიმებას გადამეტებული თანხის 10 პროცენტის ოდენობით.“.

30. 288 ³  მუხლი ჩამოყალიბდეს შემდეგი რედაქციით:

„მუხლი 288 ³ . სავალდებულო მარკირებას დაქვემდებარებული არააქციზური საქონლის მარკირების გარეშე მიწოდება, ტრანსპორტირება, იმპორტი

1. სავალდებულო მარკირებას დაქვემდებარებული არააქციზური საქონლის მარკირების გარეშე მიწოდება, ტრანსპორტირება −

იწვევს მწარმოებელი პირის დაჯარიმებას მარკირების გარეშე გამოვლენილი სავალდებულო მარკირებას დაქვემდებარებული არააქციზური საქონლის საბაზრო ღირებულების ოდენობით, მაგრამ არანაკლებ 500 ლარისა.

2. სავალდებულო მარკირებას დაქვემდებარებული არააქციზური საქონლის მარკირების გარეშე იმპორტი −

იწვევს იმპორტიორი პირის დაჯარიმებას მარკირების გარეშე გამოვლენილი სავალდებულო მარკირებას დაქვემდებარებული არააქციზური საქონლის საბაჟო ღირებულების ოდენობით, მაგრამ არანაკლებ 500 ლარისა.“.

31. 289-ე მუხლის მე-19 ნაწილის შემდეგ დაემატოს შემდეგი შინაარსის 19 ¹  ნაწილი:

„19 ¹ . ამ მუხლის მე-19 ნაწილით განსაზღვრული ქმედება, თუ უკანონოდ განკარგული საქონელზე არსებობს მისი მიწოდების დამადასტურებელი პირველადი საგადასახადო დოკუმენტი, –

იწვევს ვალდებული პირის დაჯარიმებას იმავე/იდენტური/მსგავსი საქონლის ან/და სატრანსპორტო საშუალების იმპორტის გადასახდელების 10 პროცენტის ოდენობით.“

გ) 24-ე ნაწილი ჩამოყალიბდეს შემდეგი რედაქციით:

„24. საბაჟო დეკლარაციაში აღნიშნული იმ დოკუმენტის შენახვის ვადის დარღვევა, რომლის შემოსავლების სამსახურში წარდგენის ვალდებულება არ ეკისრებოდა პირს, –

იწვევს ვალდებული პირის დაჯარიმებას 1 000 ლარის ოდენობით.“;

32. 290-ე მუხლი ჩამოყალიბდეს შემდეგი რედაქციით:

„მუხლი 290. სანებართვო პირობების შეუსრულებლობა

1. საბაჟო საწყობის ან თავისუფალი ვაჭრობის პუნქტის საქართველოს კანონმდებლობით დადგენილი სანებართვო პირობის დარღვევა –

იწვევს ნებართვის მფლობელის დაჯარიმებას 2 000 ლარის ოდენობით .

2. ამ მუხლის პირველი ნაწილით გათვალისწინებული ქმედება (იმავე პირობის დარღვევა), ჩადენილი განმეორებით, –

იწვევს ამ მუხლის პირველი ნაწილით გათვალისწინებული ჯარიმის ოდენობის გასამმაგებას.“.

33. 292-ე მუხლი ჩამოყალიბდეს შემდეგი რედაქციით:

„მუხლი 292. საგადასახადო შეთანხმების არსი

1. საგადასახადო შეთანხმება შესაძლებელია გაფორმდეს შემოსავლების სამსახურსა და გადასახადის გადამხდელს შორის გადასახადის გადამხდელის:

ა) საგადასახადო დავალიანების/საგადასახადო დავალიანების ნაწილის შემცირების მიზნით;

ბ) იმ მოსაკრებლის თანხების ან/და მასთან დაკავშირებული ჯარიმებისა და საურავების შემცირების მიზნით, რომლის ადმინისტრირებას ახორციელებს საგადასახადო ორგანო .

2. ამ მუხლის მოქმედება არ ვრცელდება ამ კოდექსის 155-ე და 205-ე მუხლებით დარიცხულ მიმდინარე გადასახდელებზე;

3. ამ მუხლის პირველი ნაწილის „ბ“ ქვეპუნქტით გათვალისწინებულ შემთხვევაში, შესაბამისად გამოიყენება ამ კოდექსის 293-ე - 295-ე მუხლები.“.

34. 293-ე მუხლის მე-8 ნაწილის „ა“ ქვეპუნქტი ჩამოყალიბდეს შემდეგი რედაქციით:

ა) მაკონტროლებელი/სამართალდამცავი ორგანოს მიერ შემოწმებული პერიოდის ან საკითხის გადამოწმება ან/და გადასახადის გადამხდელისათვის გადასახადის/სანქციის დარიცხვა, გარდა იმ პირთან დაკავშირებული საგადასახადო პერიოდის ან საკითხისა, რომელიც შეერწყა გადასახადის გადამხდელს მასთან საგადასახადო შეთანხმების გაფორმების შემდეგ.

35. 309-ე მუხლის:

ა) 37-ე ნაწილის „ა“ და „ბ“ ქვეპუნქტები ჩამოყალიბდეს შემდეგი რედაქციით:

ა) 2011 წლის 1 იანვრამდე წარმოშობილი და ამ ქვეპუნქტის ამოქმედებამდე გადაუხდელი აღიარებული საგადასახადო დავალიანება და მასზე დარიცხული საურავი, თუ პირს 2011 წლის 1 იანვრის შემდგომი პერიოდისათვის (თანხის ჩამოწერამდე) საგადასახადო ორგანოსთვის არ წარუდგენია საგადასახადო დეკლარაცია/გაანგარიშება (გარდა პირის ქონების გადასახადის დეკლარაციისა/გაანგარიშებისა, აგრეთვე ამ კოდექსის 176 ¹ მუხლის პირველი ნაწილის ან 309-ე მუხლის 58-ე და 59-ე ნაწილის მიხედვით განხორციელებული დეკლარირებისა ან/და დარიცხვისა) ან საგადასახადო ორგანოსთვის წარდგენილი საგადასახადო დეკლარაციის/გაანგარიშების (გარდა პირის ქონების გადასახადის დეკლარაციისა/გაანგარიშებისა, აგრეთვე ამ კოდექსის 176 ¹ მუხლის პირველი ნაწილის ან 309-ე მუხლის 58-ე და 59-ე ნაწილის მიხედვით განხორციელებული დეკლარირებისა ან/და დარიცხვისა) საფუძველზე გადასახდელად დასარიცხი გადასახადის თანხა ნულის ტოლია (გარდა იმ შემთხვევისა, როდესაც წარდგენილი საგადასახადო დეკლარაციით/გაანგარიშებით ერთობლივი შემოსავლის თანხა ნულზე მეტია ან/და ჩასათვლელი თანხა დარიცხულ თანხას აღემატება);

ბ) 2013 წლის 1 იანვრამდე წარმოშობილ აღიარებულ საგადასახადო დავალიანებაზე დარიცხული საურავი და 2013 წლის 1 იანვრამდე დარიცხული აღიარებული ჯარიმა, თუ გადახდილია 2013 წლის 1 იანვრისათვის არსებული აღიარებული საგადასახადო დავალიანება – გადასახადის თანხის ნაწილში და პირს 2013 წლის 1 იანვრის შემდგომი პერიოდისათვის (თანხის ჩამოწერამდე) საგადასახადო ორგანოსთვის არ წარუდგენია საგადასახადო დეკლარაცია/გაანგარიშება (გარდა პირის ქონების გადასახადის დეკლარაციისა/გაანგარიშებისა, აგრეთვე ამ კოდექსის 176 ¹ მუხლის პირველი ნაწილის ან 309-ე მუხლის 58-ე და 59-ე ნაწილის მიხედვით განხორციელებული დეკლარირებისა ან/და დარიცხვისა) ან საგადასახადო ორგანოსთვის წარდგენილი საგადასახადო დეკლარაციის/გაანგარიშების (გარდა პირის ქონების გადასახადის დეკლარაციისა/გაანგარიშებისა, აგრეთვე ამ კოდექსის 176 ¹ მუხლის პირველი ნაწილის ან 309-ე მუხლის 58-ე და 59-ე ნაწილის მიხედვით განხორციელებული დეკლარირებისა ან/და დარიცხვისა) საფუძველზე გადასახდელად დასარიცხი გადასახადის თანხა ნულის ტოლია (გარდა იმ შემთხვევისა, როდესაც წარდგენილი საგადასახადო დეკლარაციით/გაანგარიშებით ერთობლივი შემოსავლის თანხა ნულზე მეტია ან/და ჩასათვლელი თანხა დარიცხულ თანხას აღემატება);

ბ) 79-ე ნაწილი ჩამოყალიბდეს შემდეგი რედაქციით:

„79. დღგ-ისაგან ჩათვლის უფლებით თავისუფლდება უძრავი ქონების მიწოდება, ასევე, უძრავი ქონების მიმწოდებლის მიერ მიწოდებულ ქონებასთან დაკავშირებით, სამშენებლო-სამონტაჟო მომსახურების გაწევა, თუ შესრულებულია ყველა შემდეგი პირობა:

ა) უძრავი ქონების მიწოდება და მასთან დაკავშირებით, სამშენებლო-სამონტაჟო მომსახურების გაწევა განხორციელდა 2015 წლის 1 იანვრიდან 2020 წლის 1 იანვრამდე პერიოდში;

ბ) მიწოდებული უძრავი ქონება განთავსებულია 2008 წლის 8 აგვისტოსთვის ძალაში მყოფი მშენებლობის ნებართვით გათვალისწინებულ ობიექტში ან იმ ობიექტში, რომელზეც, 2008 წლის 8 აგვისტოს მდგომარეობით, საპროექტო დოკუმენტაცია (არქიტექტურული პროექტი) უფლებამოსილ ორგანოსთან შეთანხმებული იყო, მშენებლობის ნებართვა კი შემდგომ გაიცა;

გ) უძრავი ქონების მიწოდების განმახორციელებელი პირი არის ამ ნაწილის „ბ“ ქვეპუნქტით გათვალისწინებულ ობიექტზე გაცემული მშენებლობის ნებართვის მფლობელი (იგი შეიძლება არ იყოს ამ ნაწილის „ბ“ ქვეპუნქტით გათვალისწინებული მშენებლობის ნებართვის/საპროექტო დოკუმენტაციის (არქიტექტურული პროექტის) მფლობელი);

დ) იმ ობიექტის ექსპლუატაციაში მისაღებად, სადაც განთავსებულია მიწოდებული უძრავი ქონება, უფლებამოსილი ორგანო ინდივიდუალურ ადმინისტრაციულ-სამართლებრივ აქტს 2020 წლის 1 იანვრამდე გამოსცემს;

ე) ობიექტი, სადაც განთავსებულია მიწოდებული უძრავი ქონება, მთლიანად ან ნაწილობრივ საცხოვრებლადაა განკუთვნილი;

ვ) ობიექტი, სადაც განთავსებულია მიწოდებული უძრავი ქონება, ამ მუხლის 81-ე ნაწილით გათვალისწინებულ ნუსხაშია შეტანილი.

შენიშვნა:  ამ ნაწილის მიზნისთვის, თუ 2008 წლის 8 აგვისტოდან 2015 წლის 1 იანვრამდე პერიოდში ამ მუხლის 81-ე ნაწილით გათვალისწინებულ ნუსხაში შეტანილ ობიექტში განთავსებულ უძრავ ქონებაზე, როგორც მშენებარე ობიექტზე, საკუთრების უფლება საჯარო რეესტრში დარეგისტრირდა შემძენზე, ამ ქონების მიწოდებასთან დაკავშირებით, ქონების მიმწოდებლის მიერ გაწეული სამშენებლო-სამონტაჟო მომსახურება ჩაითვლება უძრავი ქონების მიწოდების ნაწილად, ხოლო მიწოდების დროდ ჩაითვლება სამშენებლო-სამონტაჟო მომსახურების დასრულების მომენტი.

გ) 81-ე ნაწილის შემდეგ დაემატოს შემდეგი შინაარსის 81¹ და 81² ნაწილები:

„81¹. პირი უფლებამოსილია მუნიციპალიტეტის აღმასრულებელ ორგანოს მიმართოს მის საკუთრებაში არსებული ობიექტის ამ მუხლის 81-ე ნაწილით გათვალისწინებულ ნუსხაში შეტანის მოთხოვნით. მუნიციპალიტეტის აღმასრულებელი ორგანო აღნიშნულ ობიექტს ნუსხაში შეიტანს, თუ იგი პირის მიერ მუნიციპალიტეტის აღმასრულებელი ორგანოსათვის მიმართვისას აკმაყოფილებს ამ მუხლის 79-ე ნაწილის „ბ“ და „ე“ ქვეპუნქტის მოთხოვნებს.“.

81². ამ მუხლის 79-ე - მე-80 ნაწილებით გათვალისწინებული საგადასახადო შეღავათის საფუძველზე 2015 წლის 1 იანვრიდან 2017 წლის 1 იანვრამდე საანგარიშო პერიოდებში განხორციელებულ გათავისუფლებულ დასაბეგრ ოპერაციებთან მიმართებით, შესაბამისი საანგარიშო პერიოდის ამ კოდექსის მე-4 მუხლით გათვალისწინებული ხანდაზმულობის ვადა შეადგენს:

ა) 2015 წლის 1 იანვრიდან 2016 წლის 1 იანვრამდე საანგარიშო პერიოდებში განხორციელებულ გათავისუფლებულ დასაბეგრ ოპერაციებთან მიმართებით - 5 წელს;

ბ) 2016 წლის 1 იანვრიდან 2017 წლის 1 იანვრამდე საანგარიშო პერიოდებში განხორციელებულ გათავისუფლებულ დასაბეგრ ოპერაციებთან მიმართებით - 4 წელს;

 დ) 98-ე ნაწილი ჩამოყალიბდეს შემდეგი რედაქციით;

„98. 2017 წლის 1 იანვრის შემდგომ პერიოდში მიწოდებულ საქონელზე/გაწეულ მომსახურებაზე, რომელზეც საკომპენსაციო თანხის/თანხის ნაწილის გადახდა განხორციელდა 2017 წლის 1 იანვრამდე (საქონლის მიწოდებამდე/მომსახურების გაწევამდე), დასაბეგრი ოპერაციის განხორციელების დროდ ითვლება საქონლის მიწოდების/მომსახურების გაწევის მომენტი. ამასთან, 2017 წლის შემდგომ პერიოდში ამავე ოპერაციაზე საქონლის მიწოდებამდე/მომსახურების გაწევამდე გადახდილი საკომპენსაციო თანხა/თანხის ნაწილი დღგ-ით იბეგრება, ამ კოდექსის 161-ე მუხლის პირველი ნაწილის ა.ბ.დ ქვეპუნქტის შესაბამისად“;

ე) 101-ე ნაწილის შემდეგ დაემატოს შემდეგი შინაარსის 102-ე - 107-ე ნაწილები:

„102. 2014-2016 წლების საანგარიშო პერიოდზე შესაბამის პერიოდში მოქმედი ამ კოდექსის 99-ე მუხლის პირველი ნაწილის „ვ“ და „რ“ ქვეპუნქტით გათვალისწინებული შეღავათით სარგებლობის შემთხვევაში შესაბამისი საანგარიშო პერიოდის ამ კოდექსის მე-4 მუხლით გათვალისწინებული ხანდაზმულობის ვადა გრძელდება ერთი წლით.

103. ამ კოდექსის 98¹ მუხლის მიზნებისთვის:

ა) 2008 წლის 1 იანვრიდან 2017 წლის 1 იანვრამდე საანგარიშო პერიოდებში მიღებული წმინდა მოგებიდან დივიდენდის განაწილება ითვლება მოგების განაწილებად, ხოლო ამ დივიდენდის მიმღები, ,,მეწარმეთა შესახებ“ კანონის მე-2 მუხლის პირველი პუნქტით განსაზღვრული პირის, (გარდა ინდივიდუალური საწარმოსი და ამ კოდექსის შესაბამისად მოგების გადასახადისაგან გათავისუფლებული პირისა) მიერ მისი შემდგომი განაწილება არ ითვლება მოგების განაწილებად.

ბ) 2017 წლის 1 იანვრამდე საანგარიშო პერიოდებში მიღებული დივიდენდის შემდგომი განაწილება არ ითვლება მოგების განაწილებად.

104. საწარმოს მოგების გადასახადით დაბეგვრის ობიექტია, სხვაობა კალენდარული წლის განმავლობაში მიღებულ ერთობლივ შემოსავალსა და ამ კოდექსით გათვალისწინებული გამოქვითვების თანხებს შორის, თუ მან შესაბამისი კალენდარული წლის განმავლობაში მიიღო ამ მუხლის 94-ე ნაწილით გათვალისწინებული პირის სტატუსი (დადგინდა, რომ იგი არის ამ მუხლის 94-ე ნაწილით გათვალისწინებული პირი). ამ შემთხვევაში:

ა) შესაბამისი კალენდარული წლის განმავლობაში, ამ კოდექსის 97-ე მუხლის პირველი ნაწილით გათვალისწინებული დაბეგვრის ობიექტის მიხედვით წარდგენილი მოგების გადასახადის დეკლარაციის საფუძველზე განხორციელებული დარიცხვები უქმდება.

ბ) ამ მუხლის 94-ე ნაწილით გათვალისწინებულ პირის სტატუსის მიღებამდე ( ამ კატეგორიის გადასახადის გადამხდელად მიჩნევამდე) პერიოდზე, ამ კოდექსის 155-ე მუხლით გათვალისწინებული სავადოების მიხედვით მიმდინარე გადასახადელების დარიცხვა არ ხორციელდება.

105. საწარმოს მოგების გადასახადით დაბეგვრის ობიექტია, სხვაობა კალენდარული წლის განმავლობაში მიღებულ ერთობლივ შემოსავალსა და ამ კოდექსით გათვალისწინებული გამოქვითვების თანხებს შორის, თუ მან შესაბამისი კალენდარული წლის განმავლობაში, დაკარგა ამ მუხლის 94-ე ნაწილით გათვალისწინებული პირის სტატუსი (დადგინდა, რომ იგი აღარ არის ამ მუხლის 94-ე ნაწილით გათვალისწინებულ პირი).

106. თუ საწარმო, რომელიც 2017 წლის 1 იანვრიდან იბეგრება ამ კოდექსის 97-ე მუხლის პირველი და მე-3 ნაწილებით გათვალისწინებული დაბეგვრის ობიექტების მიხედვით, დაფუძნდა 2016 წლის 1 დეკემბრიდან 31 დეკემბრის ჩათვლით, მისთვის პირველი საგადასახადო პერიოდია დროის მონაკვეთი დაფუძნების დღიდან 2016 წლის ბოლომდე, რომლის მიხედვით მოგების გადასახადის შესახებ დეკლარაციას საგადასახადო ორგანოს წარუდგენს 2018 წლის 1 აპრილამდე.

107. ამ კოდექსის 82-ე მუხლის პირველი ნაწილის „ჟ“ ქვეპუნქტის, 99-ე მუხლის პირველი ნაწილის „ი“ ქვეპუნქტის, 130-ე მუხლის მე-5 ნაწილისა და 131-ე მუხლის მე-6 ნაწილის დებულებებით გათვალისწინებული საგადასახადო შეღავათების გამოყენების წესს ადგენს საქართველოს ფინანსთა მინისტრი.

მუხლი 2.

1. ეს კანონი, გარდა პირველი მუხლის მე-13 პუნქტის „ა“ და „გ“ ქვეპუნქტების, მე-16 და 17 პუნქტების, მე-18 პუნქტის „ა.ა“ და „ა.გ“ ქვეპუნქტების, მე-19 პუნქტის „ა“ „ბ“ „გ“ და „ე“ ქვეპუნქტების, მე-20, 25-ე და 27-ე პუნქტებისა ამოქმედდეს გამოქვეყნებისთანავე.

2. ამ კანონის, პირველი მუხლის მე-2 პუნქტის „ბ“ და „გ“ ქვეპუნქტების, მე-6 პუნქტის „ა“ ქვეპუნქტის, მე-7 მე-8 და მე-11 პუნქტების, მე-13 პუნქტის „ბ“ ქვეპუნქტის და 35-ე პუნქტის „დ“ და „ე“ ქვეპუნქტების მოქმედება გავრცელდეს 2017 წლის 1 იანვრიდან წარმოშობილ სამართლებრივ ურთიერთობებზე.

3. ამ კანონის, პირველი მუხლის მე-6 პუნქტის „ბ“ ქვეპუნქტის და მე-9 პუნქტის „ბ“ ქვეპუნქტის მოქმედება გავრცელდეს 2016 წლის 1 იანვრიდან წარმოშობილ სამართლებრივ ურთიერთობებზე.

4. ამ კანონის, პირველი მუხლის 35-ე პუნქტის „ბ“ და „გ“ ქვეპუნქტების მოქმედება გავრცელდეს 2015 წლის 1 იანვრიდან წარმოშობილ სამართლებრივ ურთიერთობებზე.

5. ამ კანონის, პირველი მუხლის მე-10, მე-14 პუნქტის „ბ.ა“ ქვეპუნქტის და მე- 18 პუნქტის „ბ.ა“ ქვეპუნქტის მოქმედება გავრცელდეს 2014 წლის 1 იანვრიდან წარმოშობილ სამართლებრივ ურთიერთობებზე.

6. ამ კანონის პირველი მუხლის მე-13 პუნქტის „ა“ და „გ“ ქვეპუნქტები, მე-20 და 27-ე პუნქტები ამოქმედდეს 2018 წლის 1 იანვრიდან.

7. ამ კანონის პირველი მუხლის მე-16 და მე-17 პუნქტები, მე-18 პუნქტის „ა.ა“ და „ა.გ“ ქვეპუნქტები, მე-19 პუნქტის „ა“ „ბ“ „გ“ და „ე“ ქვეპუნქტები, და 25-ეპუნქტი ამოქმედდეს 2017 წლის 1 ივლისიდან.

მუხლი 3. იმ საქონელზე, რომელიც საბაჟო საწყობში ან საქონლის შენახვის სხვა ადგილზე შესანახად მიბარებულია ამ კანონის ამოქმედებამდე ამავე კანონის პირველი მუხლის 21-ე და 22-ე პუნქტების მოქმედება გავრცელდეს 2018 წლის 1 იანვრიდან.“

საქართველოს პრეზიდენტი                                                  გიორგი მარგველაშვილი

 

 

 

 

 

 

 

 

 

 

 

 

 

 

 

განმარტებითი ბარათი

„საქართველოს საგადასახადო კოდექსში ცვლილების შეტანის შესახებ“

საქართველოს კანონის პროექტზე

ა) ზოგადი ინფორმაცია კანონპროექტის შესახებ

ა.ა) კანონპროექტის მიღების მიზეზი:

კანონპროექტის შემუშავების მიზეზია მოგების გადასახადის დაბეგვრის რეჟიმის, გადასახადების ადმინისტრირებისა და საბაჟო პროცედურების სრულყოფის აუცილებლობა.

 ა.ბ) კანონპროექტის მიზანი:

კანონპროექტის შემუშავების მიზანია მოგების გადასახადის დაბეგვრის რეჟიმის, გადასახადების ადმინისტრირებისა და საბაჟო პროცედურების სრულყოფა.

ა.გ) კანონპროექტის ძირითადი არსი:

1. საგადასახადო კოდექსის მე-4 მუხლს ემატება მე-12 ნაწილი, რომლის თანახმად ზარალის გადატანის შემთხვევებში ხანდაზმულობის ვადის გაგრძელება შეეხება მხოლოდ იმ საგადასახადო ვალდებულებებს, რომლის ოდენობაზეც გავლენას ახდენს ზარალის გადატანა. ამასთან, ზუსტდება, რომ საგადასახადო კოდექსით გათვალისწინებული ზარალის 3 წლით ან მეტი ხნით გადატანისას ამავე კოდექსით გათვალისწინებული საგადასახადო შემოწმების და საგადასახადო მოთხოვნის წარდგენის ხანდაზმულობის ვადა გრძელდება და იგი ერთი წლით აღემატება ზარალის გადატანის ვადას. ამ შემთხვევაში ხანდაზმულობის ვადა აითვლება ზარალის წარმოშობის კალენდარული წლის დასრულებიდან..

საგადასახადო კოდექსის მე-4 მუხლით დადგენილია ხანდაზმულობის ვადა გადასახადის გადამხდელისათვის გადასახადის თანხის დარიცხვისა და საგადასახადო ვალდებულების შესახებ საგადასახადო მოთხოვნის წარდგენის თაობაზე. ამ ვადებში უნდა გამოიცეს შემოწმების აქტი და შესაბამისი საგადასახადო მოთხოვნა. ამ მუხლით დადგენილი ვადის გასვლის შემდეგ საგადასახადო მოთხოვნის წარდგენა გასაჩივრების შემთხვევაში იწვევს მის გაუქმებას.

აღსანიშნავია, რომ წერილობითი დოკუმენტის ჩაბარების კოდექსით დადგენილი წესი, გადამხდელს აძლევს შესაძლებლობას თავი აარიდოს წერილობითი დოკუმენტის (ამ შემთხვევაში საგადასახადო მოთხოვნის) ჩაბარებას, დაელოდოს მისი ხანდაზმულობის ვადის გასვლას და მხოლოდ ამის შემდეგ ჩაიბაროს იგი, ხოლო შემდგომ მოითხოვოს მისი გაუქმება, დარიცხვის ხანდაზმულობის ვადის დარღვევის საფუძვლით.

აღნიშნული პრობლემის გადაწყვეტის მიზნით, მე-4 მუხლს ემატება მე-13 ნაწილი, რომლითაც დგინდება, რომ გადასახადის გადამხდელისათვის საგადასახადო მოთხოვნის წარდგენის ხანდაზმულობის ვადა გაშვებულად არ ჩაითვლება, თუ საგადასახადო ორგანომ შესაბამისი საგადასახადო მოთხოვნა გადასახადის გადამხდელის ავტორიზებული მომხმარებლის გვერდზე განათავსა ამ ხანდაზმულობის ვადის გასვლამდე.

2. მე-8 მუხლის მე-5 ნაწილს ემატება „ე“ ქვეპუნქტი, რომლის თანახმად აღიარებულად ჩაითვლება საგადასახადო დავალიანება, თუ პირი წერილობითი განცხადებით უარს აცხადებს საგადასახადო დავის განმხილველი ორგანოს მიერ მიღებული გადაწყვეტილების გასაჩივრებაზე.

ცვლილებები შედის მე-8 მუხლის 29-ე ნაწილში.

საგადასახადო კოდექსით უიმედო ვალის გამოქვითვისათვის დადგენილი ერთ-ერთი დოკუმენტია ცნობა აღსრულების ორგანოდან სააღსრულებო ფურცლის აღსასრულებლად მიქცევის შედეგად კრედიტორის მიერ სასამართლოს გადაწყვეტილებით კუთვნილი თანხის მიუღებლობის ან ნაწილობრივ მიღების თაობაზე; აღნიშნული მუხლი აწესებს დოკუმენტების შეზღუდულ ჩამონათვალს, კერძოდ, ა) „ცნობა აღსრულების ორგანოდან“ - „სააღსრულებო წარმოებათა შესახებ“ საქართველოს კანონი ითვალისწინებს შესაბამისი კანონით გათვალისწინებული საქმეების აღსასრულებელი გადაწყვეტილებების იძულებით აღსრულებას კერძო აღმასრულებელის მიერ.

„სასამართლოს გადაწყვეტილებით კუთვნილი თანხის მიუღებლობის ან ნაწილობრივ მიღების თაობაზე“ - სამოქალაქო კანონმდებლობით მხარეებს უფლება აქვთ დამოუკიდებლად განსაზღვრონ დავის გადაწყვეტის გზა, მიმართონ სასამართლოს ან არბიტრაჟს. მეტიც, თუ მხარეები დავის გადაწყვეტის ფორმად აირჩევენ არბიტრაჟს, ისინი საერთოდ ვეღარ მიმართავენ სასამართლოს, შესაბამისად, ასეთი ხელშეკრულების საფუძველზე წარმოშობილი ვალის უიმედოდ აღიარება არსებული კანონმდებლობით ვერ მოხდება. აღნიშნულიდან გამომდინარე, ვინაიდან სამოქალაქო ურთიერთობაში დავის გადაწყვეტის ფორმის არჩევა დამოკიდებულია მხარეების ნებაზე, საგადასახადო კოდექსით დადგენილი წესი არაპირდაპირ ზღუდავს მხარეებს დამოუკიდებლად, თავისუფალი ნების საფუძველზე გადაწყვიტონ მათ შორის წარმოშობილი დავა. შესაბამისად,  მე-8 მუხლის 29-ე ნაწილის „ბ“ ქვეპუნქტში ხორციელდება ცვლილება და სასამართლო გადაწყვეტილების მსგავსად საარბიტრაჟო გადაწყვეტილებაც მიჩნეულ იქნეს უიმედო ვალის არსებობის დამადასტურებელ ერთ-ერთ დოკუმენტად. ანალოგიურად, არბიტრაჟზე მითითება ემატება ასევე მე-8 მუხლის 29-ე ნაწილის „ა“ ქვეპუნქტსაც.

ზუსტდება მე-8 მუხლის 45-ე ნაწილი, კერძოდ, სხვა ფინანსურ ინსტიტუტებთან ერთად ლომბარდი წარმოადგენს გადასახადის გადამხდელთა იმ კატეგორიას, რომელიც 2019 წლამდე მოგების გადასახადით იბეგრება კლასიკური რეჟიმის შესაბამისად, რის გამოც ტერმინი „ლომბარდი“ საგადასახადო კოდექსში ცალკე არის განმარტებული. ცვლილების შესაბამისად ზუსტდება ლომბარდის საქმიანობის სფერო და ამ პირთა კატეგორიის საქმიანობის სპეციფიკის გათვალისწინებით განისაზღვრება, რომ მისთვის ძირითად საქმიანობას ასევე წარმოადგენს იპოთეკით უზრუნველყოფილი სესხების გაცემა.

3. ახალი რედაქციით ყალიბდება 39-ე მუხლის პირველი ნაწილი, კერძოდ, საჯარო ინფორმაციის ჩამონათვალი განისაზღვრა 39-ე მუხლის 1¹ ნაწილით, ხოლო პირველ ნაწილში დაკონკრეტდა, რომ საგადასახადო საიდუმლოება ეხება არა მარტო გადასახადის გადამხდელის, არამედ ნებისმიერი პირის შესახებ საგადასახადო ორგანოში არსებულ ინფორმაციას.

39-ე მუხლის 1¹ ნაწილით გაფართოვდა საჯარო ინფორმაციის ჩამონათვალი და შესაბამისობაში იქნა მოყვანილი მეწარმეთა და არასამეწარმეო (არაკომერციული) იურიდიული პირების რეესტრის მონაცემებთან, მათ შორის: საიდენტიფიკაციო ნომრის მინიჭების თარიღი, მარეგისტრირებელი ორგანო, ხელმძღვანელობაზე/წარმომადგენლობაზე უფლებამოსილი პირები, დამფუძნებლები, საგადასახადო გირავნობა/იპოთეკის უფლებისა და ქონებაზე დადებული ყადაღის შესახებ ინფორმაცია. გარდა ამისა, დაკონკრეტდა რომ საჯარო ინფორმაციას განეკუთვნება გადასახადის გადამხდელად რეგისტრაციის შესახებ ინფორმაცია.

39-ე მუხლის მე-2 ნაწილს ემატება „ფ“ ქვეპუნქტი, რის შემდეგაც, საგადასახადო ორგანო უფლებამოსილი იქნება გადასცეს ინფორმაცია საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს - საქართველოს კანონმდებლობით გათვალისწინებული უფლებამოსილებების განხორციელებისას. აღნიშნული ცვლილება განაპირობა იმ გარემოებამ, რომ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს დევნილის შემწეობის შეწყვეტის საფუძვლების კონტროლისათვის (საქართველოს ოკუპირებული ტერიტორიებიდან იძულებით გადაადგილებულ პირთა-დევნილთა შესახებ“ საქართველოს კანონის მე-11 მუხლის მე-2 პუნქტის „ე“ ქვეპუნქტი) ესაჭიროება ინფორმაცია დევნილის მიერ მიღებული შემოსავლების შესახებ.

4. 44-ე მუხლის მე-6 ნაწილის „ე“ და მე-7 ნაწილის „დ“ ქვეპუნქტებში განსახორციელებელი ცვლილებების შესაბამისად, ზუსტდება გადასახადის გადამხდელებისთვის დოკუმენტის ჩაბარების შემთხვევები. კერძოდ, სამართალდარღვევის ოქმის, მიმდინარე კონტროლის პროცედურების ან/და საგადასახადო დავალიანების გადახდევინების უზრუნველყოფის ღონისძიებების განხორციელების შესახებ უფლებამოსილი პირის ბრძანება გადასახადის გადამხდელისათვის ჩაბარებულად ჩაითვლება, თუ აღნიშნული დოკუმენტი ჩაბარდა ამ პირის ეკონომიკური საქმიანობის უშუალოდ განმახორციელებელ პირს..

5. 69-ე მუხლის მე-4 ნაწილი ჩამოყალიბდა ახალი რედაქციით, დგინდება, რომ საგადასახადო შემოწმების ჩატარების შესახებ სასამართლოს ან საგადასახადო ორგანოს გადაწყვეტილების გადასახადის გადამხდელის ავტორიზებული მომხმარებლის გვერდზე ელექტრონულად განთავსების შემთხვევაში, გადამხდელის ავტორიზებული მომხმარებლის გვერდზე ელექტრონულად განთავსებიდან შესაბამისი საგადასახადო მოთხოვნის ამ პირისათვის ჩაბარებამდე პერიოდში დაუშვებელია იმ პერიოდზე ან იმ საკითხზე რომელზე მიმდინარეობს ან უნდა ჩატარდეს საგადასახადო შემოწმება, პირის მიერ საგადასახადო დეკლარაციის (მათ შორის, შესწორებული საგადასახადო დეკლარაციის) წარდგენა.

6. 82-ე მუხლს ემატება ახალი ქვეპუნქტი, რომლის თანახმად, საშემოსავლო გადასახადისაგან თავისუფლდება „ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების შესახებ“ საქართველოს კანონის შესაბამისად, საკუთრების აღიარების შედეგად წარმოშობილი სარგებელი.

საშემოსავლო გადასახადით არ დაიბეგრება მიკროსიმძლავრის ელექტროსადგურის მფლობელი ფიზიკური პირის მიერ წარმოებული ჭარბი ელექტროენერგიის განაწილების ლიცენზიანტისათვის მიწოდებით მიღებული შემოსავალი.

7. საწარმოს მიერ პარტნიორისთვის დივიდენდის, აქციის/წილის საკუთრებაში გადაცემის ფორმით განაწილება არ იბეგრება მოგების გადასახადით; ცვლილების შესაბამისად გადაცემული წილის/აქციის ღირებულება არ განიხილება კაპიტალში შენატანად, შესაბამისად მომავალში აღნიშნული ღირებულებით კაპიტალის შემცირების შემთხვევაში შემცირებული თანხა დაექვემდებარება მოგების გადასახადით დაბეგვრას. ამ მიზნით, სსკ-ის 98¹ მუხლის მე-2 ნაწილის „ა“ ქვეპუნქტში ხორციელდება დაზუსტებითი ხასიათის ცვლილება, რომლის შესაბამისად საწარმოს მიერ პარტნიორზე, ამავე საწარმოს აქციის/წილის საკუთრებაში გადაცემით, გადახდის განხორციელების შემთხვევაში (რაც არ ითვლება მოგების განაწილებად), ოპერაციის შედეგად საწარმოს კაპიტალის გაზრდა, არ ჩაითვლება პარტნიორის მიერ კაპიტალში განხორციელებულ შენატანად.

ამავე მუხლის მე-4 ნაწილის „გ“ ქვეპუნქტში ზუსტდება, რომ საბიუჯეტო ორგანიზაციებთან განხორციელებული ოპერაციების ანალოგიურად მოგების გადასახადით არ დაიბეგრება საქართველოს ეროვნულ ბანკთან განხორციელებული ოპერაციები.

8. 98² მუხლი მე-3 ნაწილის „ა“- „გ“ ქვეპუნქტებში განსახორციელებელი ცვლილება ატარებს დაზუსტებით ხასიათს, რომლის შესაბამისად საბიუჯეტო ორგანიზაციებთან განხორციელებული ოპერაციების ანალოგიურად მოგების გადასახადით არ დაიბეგრება საქართველოს ეროვნულ ბანკთან განხორციელებული ოპერაციები.

ამავე მუხლში განსახორციელებელი ცვლილებების შესაბამისად მოგების გადასახადით არ დაიბეგრება უცხო ქვეყნის აღიარებულ საფონდო ბირჟაზე ნებისმიერი ფორმით სავაჭროდ დაშვებული/განთავსებული არარეზიდენტი კომპანიის აქციების/წილის ან სასესხო ფასიანი ქაღალდის შესაძენად გადახდილი თანხა. ამასთან, აღნიშნული გამონაკლისი არ შეეხება შეღავათიანი დაბეგვრის მქონე ქვეყნებში რეგისტრირებულ პირებთან განხორციელებულ ოპერაციებს, ვინაიდან აღნიშნული საკითხი სხვა დებულებებით რეგულირდება.

ფიზიკური პირის ან არარეზიდენტის მიერ მესამე პირისაგან აღებული სესხის დეპოზიტით უზრუნველყოფისას, მოგების გადასახადით დაბეგვრის ობიექტის თანხის ოდენობა, ნაცვლად სესხის თანხისა, განისაზღვრება უზრუნველყოფის მიზნით განთავსებული დეპოზიტის თანხის მოცულობით ;

ამასთან, მოგების გადასახადით დაბეგვრას დაექვემდებარება მხოლოდ პარტნიორი ფიზიკური და არარეზიდენტი პირის მიერ აღებული სესხის უზრუნველყოფა, ხოლო დეპოზიტით უზრუნველყოფის ნაცვლად, დაბეგვრას დაექვემდებარება ანგარიშზე განთავსებული სახსრებით უზრუნველყოფა, რომლის გამოყენებაც შეზღუდულია.

9. მე-100 მუხლის მე-4 ნაწილის „ვ¹“ ქვეპუნქტის დამატება განპირობებულია საგადასახადო კოდექსის 292-ე მუხლში ცვლილების განხორციელებით, რომლის შესაბამისად საგადასახადო შეთანხმების გაფორმება ასევე შესაძლებელი გახდება გადაუხდელი მოსაკრებლის თანხების, მასთან დაკავშირებული ჯარიმებისა და საურავების შემცირების მიზნით.

ორგანიზაციების მიერ მიკროსიმძლავრის ელექტროსადგურის დამონტაჟების წახალისების მიზნით, ხორციელდება ცვლილება საგადასახადო კოდექსის მე-100 მუხლის მე-4 ნაწილში. კერძოდ, ემატება ახალი ქვეპუნქტი, რომლის მიხედვით, ერთობლივ შემოსავალში არ აისახება და შესაბამისად დაბეგვრას არ დაექვემდებარება მიკროსიმძლავრის ელექტროსადგურის მფლობელი საცალო მომხმარებელი ორგანიზაციის მიერ წარმოებული ჭარბი ელექტროენერგიის განაწილების ლიცენზიანტისათვის მიწოდება.

10. საგადასახადო კოდექსის 99-ე მუხლის პირველი ნაწილის „მ“ ქვეპუნქტის შესაბამისად, გადასახადისგან თავისუფლდება სახელმწიფოს, საქართველოს ეროვნული ბანკის, საერთაშორისო ფინანსური ინსტიტუტის სასესხო ფასიანი ქაღალდების რეალიზაციით და ამ ფასიანი ქაღალდებიდან პროცენტის სახით მიღებული მოგება ან მოგების განაწილება და საქართველოს ეროვნულ ბანკში ანგარიშებზე განთავსებულ სახსრებზე დარიცხული პროცენტებიდან მიღებული მოგება ან მოგების განაწილება. დადგენილი შეღავათის გამოყენების შემთხვევაში, გადასახადის გადამხდელების მიერ ვერ ხორციელდება გამოსაქვითი ხარჯებიდან გათავისუფლებულ მოგების მიღებასთან დაკავშირებული ხარჯების გამიჯვნა, რის გამოც ზუსტდება, რომ ერთობლივი შემოსავლიდან გამოიქვითება საგადასახადო კოდექსის 99-ე მუხლის პირველი ნაწილის „მ“ ქვეპუნქტის შესაბამისად გათავისუფლებულ მოგებასთან დაკავშირებული ხარჯი. ამასთან , მიზანშეწონილია აღნიშნული დაზუსტება შეეხოს 2014 წლის 1 იანვრიდან წარმოშობილ სამართლებრივ ურთიერთობებს.

11. ცვლილება ხორციელდება სსკ-ის 131-ე მუხლში, რომლის შესაბამისადაც უქმდება საწარმოებისთვის გადახდილი პროცენტის გადახდის წყაროსთან დაკავების ვალდებულება. შედეგად, ახალ რეჟიმზე მყოფი საწარმოს მოგება არც ერთ შემთხვევაში აღარ დაექვემდებარება განაწილებამდე დაბეგვრას. დღევანდელი რედაქციით ამგვარი პროცენტი ისედაც აღარ წარმოადგენს დაბეგვრის ობიექტს და პროცენტის დაკავება 131-ე მუხლის შესაბამისად ეწინააღმდეგება 97-ე მუხლის მოთხოვნებს.

12. 145-ე მუხლს ემატება 6¹ ნაწილი, ასევე ახალი რედაქციით ყალიბდება მე-8 ნაწილი. ცვლილების მიხედვით, გადასახადის გადამხდელს ეძლევა უფლება ჩამოწეროს დაუძლეველი ძალის ზემოქმედების შედეგად განადგურებული ან დაკარგული სასაქონლო-მატერიალური ფასეულობები საგადასახადო ორგანოსათვის შეტყობინების ვალდებულების და მისი დადასტურების გარეშე.

13. მოქმედი რედაქციით, გადასახადის წყაროსთან გადასახადების დაკავების სტატუსის გასარკვევად საჭიროა კომპენსაციის მიმღებ პირს ჰქონდეს საგადასახადოს მიერ გაცემული მოწმობა. დიდი ხანია ეს პრაქტიკა აღარ გამოიყენება, რადგან გადასახადის გადამხდელები დარეგისტრირებულნი არიან ერთიან ელექტრონულ რეესტრში, რომელიც მისაწვდომია rs.ge საიტზე ნებისმიერი გადამხდელისთვის.

ზემოაღნიშნულის გათვალისწინებით, ცვლილება ხორციელდება სსკ-ის 154-ე მუხლის პირველი ნაწილის „დ“ და „მ“ ქვეპუნქტებში, რომლის შესაბამისად საგადასახადო აგენტი რომელიც ანაზღაურებს მომსახურების კომპენსაციას ან გადასცემს ქონებას უსასყიდლოდ ფიზიკურ პირს, გადახდის წყაროსთან დააკავებს საშემოსავლო გადასახადს, გარდა იმ შემთხვევისა როდესაც მიმღები ფიზიკური პირი წარმოადგენს მეწარმე ფიზიკურ პირს. შესაბამისად, მომსახურების განმახორციელებელ, ასევე ქონების უსასყიდლოდ მიმღებ გადასახადის გადამხდელად რეგისტრირებულ ფიზიკურ პირებს, აღარ ექნება შემოსავლის დეკლარირებისა და გადასახადის გადახდის ვალდებულება.

ასევე, 154-ე მუხლის პირველი ნაწილის „თ“ ქვეპუნქტი, ყალიბდება ახალი რედაქციით 131-ე მუხლში (პროცენტის გადახდის წყაროსთან დაბეგვრა) განსახორციელებელი ცვლილებებიდან გამომდინარე.

14. ზუსტდება, რომ დღგ-სგან თავისუფლდება საცხოვრებელი ბინის (სახლის) მასზე დამაგრებული მიწით მიწოდება, თუ მესამე ფიზიკური პირის ქონება იქნა აუქციონზე შეძენილი, რომელიც სხვა ფიზიკური პირის ვალის უზრუნველსაყოფად იყო დატვირთული იპოთეკით;

კანონპროექტის თანახმად ცვლილება ხორციელდება 168-ე მუხლის მე-4 ნაწილში და ჩათვლის უფლებით დღგ-ისგან განთავისუფლდება საქართველოს ტერიტორიაზე არარეზიდენტის კუთვნილი ვაგონით/კონტეინერით სარკინიგზო გადაზიდვის განხორციელებისას, არარეზიდენტის მიერ ვაგონით/კონტეინერით სარგებლობის მომსახურების გაწევა, გარდა ვაგონის/კონტეინერის საიჯარო ხელშეკრულებით გადაცემის შემთხვევისა და საქართველოს ტერიტორიის ფარგლებს გარეთ საქართველოს რეზიდენტის კუთვნილი ვაგონით/კონტეინერით სარკინიგზო გადაზიდვის განხორციელებისას, საქართველოს რეზიდენტის მიერ ვაგონით/კონტეინერით სარგებლობის მომსახურების გაწევა, გარდა ვაგონის/კონტეინერის საიჯარო ხელშეკრულებით გადაცემის შემთხვევისა. გასათვალისწინებელია, რომ სამთავრობო დონეზე ქალაქ მინსკში 1993 წლის 12 მარტს გაფორმდა დსთ-ის ქვეყნებსა, აზერბაიჯანსა, საქართველოს, ლიტვის, ლატვიის და ესტონეთის რესპუბლიკებს შორის - „სატვირთო ვაგონებისა და კონტეინერების ერთობლივი გამოყენების შესახებ“ შეთანხმება, რომლითაც რეგულირდება ტვირთების საერთაშორისო გადაზიდვა, ვაგონების სახელმწიფოთაშორისო მიმოსვლა. აღნიშნული შეთანხმების თანახმად, შეთანხმების მონაწილე მხარეთა მიერ სარკინიგზო გადაზიდვა ხორციელდება ერთობლივად. აქედან გამომდინარე, შესაძლებელია სარკინიგზო გადაზიდვა ხორციელდებოდეს, როგორც საქართველოს ტერიტორიაზე არარეზიდენტის კუთვნილი ვაგონით/კონტეინერით, ასევე საქართველოს ტერიტორიის ფარგლებს გარეთ საქართველოს რეზიდენტის კუთვნილი ვაგონით/კონტეინერით. საგადასახადო კოდექსის მოქმედი რედაქცია არ ითვალისწინებს რაიმე საგადასახადო შეღავათს სარკინიგზო მიმოსვლისას ვაგონით/კონტეინერით სარგებლობის მომსახურების გაწევაზე. წარმოდგენილი პროექტით საქართველოს ტერიტორიაზე/საქართველოს ტერიტორიის ფარგლებს გარეთ ვაგონით/კონტეინერით სარგებლობის მომსახურების გაწევისას საგადასახადო შეღავათით სარგებლობის უფლება მიენიჭება როგორც საქართველოს რეზიდენტს, ასევე არარეზიდენტს. ამასთან, აღნიშნული შეღავათი გავრცელდება 2014 წლის 1 იანვრიდან წარმოშობილ სამართლებრივ ურთიერთობებზე.

საგადასახადო კოდექსის 168-ე მუხლის მე-4 ნაწილის „ე“ ქვეპუნქტით, ჩათვლის უფლებით დღგ-ისგან გათავისუფლებულია საერთაშორისო საავიაციო და საერთაშორისო საზღვაო რეისების განსახორციელებლად ბორტზე მისაწოდებლად განკუთვნილი საქონლის იმპორტი ან/და მიწოდება. წარმოდგენილი ცვლილებით კი, ასევე ჩათვლის უფლებით დღგ-საგან თავისუფლდება საქართველოს სახელმწიფო საზღვრის ფარგლებში სამოქალაქო საავიაციო რეისებისა და საავიაციო სამუშაოების განსახორციელებლად ბორტზე მისაწოდებლად განკუთვნილი საწვავის, საპოხი და სხვა დამხმარე საშუალებების იმპორტი ან/და მიწოდება.

საგადასახადო კოდექსის 168-ე მუხლის მე-4 ნაწილის „ძ“ ქვეპუნქტის დამატებით ჩათვლის უფლებით დღგ-ისგან თავისუფლდება ასევე საქართველოს სახელმწიფო საზღვრის ფარგლებში საჰაერო გადაყვანა-გადაზიდვის და საავიაციო სამუშაოების მომსახურების გაწევაც.

15. 185-ე მუხლის პირველი ნაწილის „ბ“ ქვეპუნქტი ყალიბდება ახალი რედაქციით, რომლის მიხედვითაც ალკოჰოლური სასმელებისათვის დასაბეგრი ოპერაცია, აქციზური საქონლის იმპორტისა და აქციზური საქონლის ექსპორტის თანხა განისაზღვრება შემდეგნაირად:

ა) ლუდისათვის - სასმელში ალკოჰოლის პროცენტული მაჩვენებლის მიხედვით;

ბ) სეს ესნ 2206 00 სუბპოზიციით განსაზღვრული საქონლისათვის - მოცულობის მიხედვით;

გ) ეთილის სპირტის შემცველ დანარჩენ საქონელზე - სასმელში სუფთა ალკოჰოლის მოცულობით.

 ასევე, ამავე ნაწილს დაემატა „თ“ ქვეპუნქტი, რომლის მიხედვითაც ელექტრონული სიგარეტის სითხისათვის აქციზის თანხა განისაზღვრება სითხის მოცულობის მიხედვით.

16. იცვლება 188-ე მუხლი პირველი ნაწილის ცხრილის პირველი და მე-2 გრაფები, რომლის მიხედვითაც:

ა) იცვლება ალაოს ლუდზე აქციზის განაკვეთის სტრუქტურა, კოდექსის არსებული დებულებებით ალაოს ლუდზე აქციზის დღეს არსებული განაკვეთი წარმოადგენს ერთ ლიტრზე 0.6 ლარს, ხოლო პროექტის მიხედვით 1 ლიტრ ალაოს ლუდზე აქციზის განაკვეთი იქნება 0.12 ლარი ლუდში ალკოჰოლის შემცველობის პროცენტული მაჩვენებლის (%vol) ყოველ ერთეულზე, რითაც აქციზის გადასახადის სტრუქტურა შესაბამისობაში მოდის ევროპულ ქვეყნებში არსებული სტანდარტებთან;

ბ) ცხრილის მე-2 გრაფაში არსებული სეს ესნ-ის 2206 00 სუბპოზიციით განსაზღვრული ალკოჰოლური სასმელები იყოფა ორ კატეგორიად:

ბ.ა) სეს ესნ 2206 00 სუბპოზიციით განსაზღვრული საქონელი, რომელშიც ალკოჰოლის შემცველობა აღემატება 5%-ს და აღნიშნული საქონლისათვის აქციზის განაკვეთი არ იცვლება.

ბ.ბ) სეს ესნ 2206 00 სუბპოზიციით განსაზღვრული საქონელი არ აღემატება 5%-ს, აღნიშნული საქონლისათვის მცირდება აქციზის განაკვეთი და იგი დგინდება ერთ ლიტრ სასმელზე 0.6 ლარის ოდენობით.

გ) იცვლება 188-ე მუხლის მე-2 გრაფაში მითითებული სეს ესნ-ის 2207 და 2208 პოზიციით გათვალისწინებულ ალკოჰოლურ სასმელებზე აქციზის განაკვეთის სტრუქტურა. კოდექსის არსებული დებულებებით ზემოაღნიშნულ კოდებში მითითებულ ალკოჰოლიან სასმელებზე დღეს არსებული განაკვეთები დადგენილია საქონლის ერთ ლიტრზე ფიქსირებული ოდენობით და დიფერენცირებულია ალკოჰოლური სასმელების სახეობების მიხედვით. ხოლო პროექტის მიხედვით სეს ესნ-ის 2207 და 2208 პოზიციით გათვალისწინებულ ალკოჰოლურ სასმელებზე აქციზის განაკვეთი დგინდება მასში 20⁰ C ტემპერატურაზე სუფთა ალკოჰოლის მოცულობის რაოდენობის მიხედვით, ხოლო აქციზის განაკვეთის ოდენობა მცირდება იმდაგვარად, რომ ყველა სასმელთან მიმართებაში დაფიქსირდება ერთიდაიგივე განაკვეთი გარდა ჭაჭის, ხილის და ჩვეულებრივი არყისა. აღნიშნულ გამონაკლისებზე დაწესდება შედარებით ნაკლები განაკვეთი.

დ) ცხრილის მე-3 გრაფას დაემატა 2 ახალი აქციზური საქონელი. კერძოდ, სეს ესნ 2403 99 900 01 კოდი, რომელიც წარმოდგენს კაფსულას და მსგავსი სახის პროდუქციას ელექტრონული სიგარეტით მოხმარებისათვის და სეს ესნ 2403 99 900 02 კოდი, რომელიც წარმოადგენს ე.წ. IQOS მოსაწევი აპარატით მოსაწევ თამბაქოს ნაწარმის ღერებს. შესაბამისად, ამ მათთვის აქციზის განაკვეთად განისაზღვრა ჩვეულებრივი სიგარეტისათვის დადგენილი ოდენობის განაკვეთი (1.7 ლარი).

ე) ცხრილს დაემატა მე-12 გრაფა აქციზურ საქონლად დამატებით განისაზღვრა სეს ესნ 3824 90 980 01 კოდი, რომელიც წარმოადგენს სითხეებს ნიკოტინის შემცველობით ან მის გარეშე, განკუთვნილს ასევე ელექტრონული სიგარეტით მოხმარებისათვის. აღნიშნული საქონლისათვის აქციზის განაკვეთი დადგინდა 1 მლ. პროდუქციისათვის 0.2 ლარის ოდენობით.

ასევე იცვლება ამავე ნაწილის მე-2 შენიშვნა, რომლის მიხედვითაც სახელმწიფო საკუთრებაში მიქცეული ალკოჰოლიანი სასმელის რეალიზაციისას, თუ ვერ ხორციელდება სარეალიზაციოდ განკუთვნილი საქონლის ამ ცხრილის მე-2 გრაფაში მითითებული საქონლისათვის მიკუთვნება, აღნიშნული საქონლისთვის აქციზის განაკვეთი იქნება 1 ლიტრ სუფთა სპირტზე 15 ლარი.

188-ე მუხლის 1¹ და 1² ნაწილები ჩამოყალიბდა ახალი რედაქციით, რომელიც ითვალისწინებს სეს ესნ 2403 99 900 01 და 2403 99 900 02 კოდებით გათვალისწინებული აქციზური საქონლისათვის აქციზის განაკვეთის ადვალური კომპონენტის დაწესებას სარეალიზაციო ფასის 10%-ის ოდენობით.

188-ე მუხლის პირველი ნაწილის შენიშვნას ემატება მე-5-მე-7 ქვეპუნქტები და დგინდება ალკოჰოლურ სასმელებზე აქციზის თანხის გამოთვლის წესი, კერძოდ:

ა) ალაოს ლუდზე გადასახდელი აქციზის თანხა შეადგენს აქციზის განაკვეთის, საქონლის მოცულობის რაოდენობრივი მაჩვენებლის და მოცემულ საქონელში ალკოჰოლის შემცველობის პროცენტული მაჩვენებლის ნამრავლს;

ბ) სეს ესნ 2206 00 სუბპოზიციით განსაზღვრული საქონელზე (სიდრი, პერი და სხვა სასმელები) გადასახდელი აქციზის თანხა შეადგენს შესაბამისი აქციზის განაკვეთის ნამრავლს მოცემული საქონლის მოცულობის რაოდენობრივ მაჩვენებელზე;

გ) 188-ე მუხლის მე-2 გრაფაში მითითებულ სეს ესნ-ის 2207 და 2208 პოზიციით გათვალისწინებულ ალკოჰოლურ სასმელებზე გადასახდელი აქციზის თანხა შეადგენს შესაბამისი აქციზის განაკვეთის ნამრავლს მოცემულ საქონელში 200 ⁰ C ტემპერატურაზე სუფთა ალკოჰოლის მოცულობის რაოდენობრივ მაჩვენებელზე.

188-ე მუხლის მე-11 გრაფის მოქმედი რედაქციის შესაბამისად ავტომობილის ძრავას სინთეტიკური ზეთი იბეგრება აქციზის 400 ლარიანი განაკვეთით ტონაზე, ხოლო ავტომობილის ძრავას მინერალური ზეთი იბეგრება ტონა 800 ლარით. ამ ზეთების ვიზუალური მსგავსებისა და მახასიათებლების გამო საბაჟო კონტროლის განხორციელებისას იქმნება გარკვეული პრობლემები მათი იდენტიფიცირებისათვის. წარმოდგენილი პროექტით გათვალისწინებულია მინერალური და სინთეტიკური ზეთის ერთნაირი განაკვეთით - ტონაზე 800 ლარით დაბეგვრა, რაც უზრუნველყოფს ეფექტურ ადმინისტრირებას საქონლის საბაჟო გაფორმებისას.

17. 192-ე მუხლის მე-2 ნაწილის „ი“ ქვეპუნქტი ჩამოყალიბდა ახალი რედაქციით და ან სეს ესნ 2403 99 900 02 კოდით გათვალისწინებული თამბაქოს ნაწარმი და სეს ესნ 2403 99 900 01 კოდით გათვალისწინებული კაფსულის და მსგავსი სახის პროდუქტისათვის განისაზღვრა მარკირების ვალდებულებისაგან გათავისუფლებული ოდენობები. ცვლილება ასევე გამოწვეულია 194-ე მუხლის ცვლილებით და ითვალისწინებს სიგარეტის იმპორტის გათავისუფლების ლიმიტის შემცირებიდან გამომდინარე აქციზური მარკებით სიგარეტის მარკირებისაგან გათავისუფლების ლიმიტის შესაბამის შემცირებას.

18. 194-ე მუხლის ცვლილებით იმპორტის გადასახდელებისაგან გათავისუფლდება საქართველოს საბაჟო ტერიტორიაზე ფიზიკური პირის მიერ შემოტანილი ან საფოსტო გზავნილით შემოტანილი 200 ღერი სიგარეტი, ნაცვლად 400 ღერისა. ამასთან, იცვლება თამბაქოს ნაწარმის ნაკრების იმპორტის შემთხვევისათვის გათვალისწინებული ზღვრული ოდენობებიც. კერძოდ, გათავისუფლება გავრცელდება თამბაქოს ნაწარმის ნაკრებზე, თუ მასში შემავალი თითოეული დასახელების თამბაქოს ნაწარმის პროცენტული მაჩვენებლების (პროცენტული მაჩვენებელი შესაბამის ზღვრულ ოდენობასთან მიმართებით) ჯამი არ აღემატება 100%-ს. მაგალითად: 100 ღერი სიგარეტი (დადგენილი ზღვრული ოდენობის 50%) + 25 სიგარა (დადგენილი ზღვრული ოდენობის 50%) = თამბაქოს ნაწარმის საერთო ზღვრულ ოდენობას. გარდა ამისა, ლიმიტებს ემატება ახალი აქციზური საქონლების (სეს ესნ 2403 99 900 01, 2403 99 900 02 და 3824 90 980 01 კოდებით გათვალისწინებული) ლიმიტები. შესაბამისად, 200 ღერი, 10 კაფსულა და 50 მლ. ელ. სიგარეტის სითხე. წარმოდგენილი ცვლილებით, „თამბაქოს კონტროლის შესახებ“ საქართველოს კანონის შესაბამისად ალკოჰოლიანი სასმელის ან/და თამბაქოს ნაწარმის იმპორტის შემთხვევაში, იმპორტის გადასახდელებისაგან გათავისუფლებით სარგებლობის უფლება ფიზიკურ პირს წარმოეშობა 18 წლის ასაკიდან. ცვლილება ასევე ხორციელდება ამავე მუხლის მე-5 ნაწილის „ე“ ქვეპუნქტში, რომლის შესაბამისად დამატებული ღირებულების გადასახადის ანალოგიურად აქციზისგან თავისუფლდება საქართველოს სახელმწიფო საზღვრის ფარგლებში სამოქალაქო საავიაციო რეისებისა და საავიაციო სამუშაოების განსახორციელებლად ბორტზე მისაწოდებლად განკუთვნილი საწვავის, საპოხი და სხვა დამხმარე საშუალებების იმპორტი ან/და მიწოდება;“.

194-ე მუხლის მე-6 ნაწილს ემატება „ე“ ქვეპუნქტი, რომლის თანახმად მწარმოებლის მიერ დამკვეთის ნედლეულით საგარეო-ეკონომიკური საქმიანობის ეროვნული სასაქონლო ნომენკლატურის 2208 20 სასაქონლო სუბპოზიციით გათვალისწინებული ყურძნის ღვინის დისტილაციით მიღებული სპირტის ამავე სასაქონლო სუბპოზიციით გათვალისწინებული საქონლის მწარმოებელი დამკვეთისათვის, საქონლის საწარმოებლად გადაცემა, თავისუფლდება აქციზის გადასახადისგან. ამასთან, ამავე ნაწილს ემატება შენიშვნა, რომლის შესაბამისადაც ზუსტდება, რომ „შეღავათის გამოყენების შემთხვევაში, თუ სპირტის შემძენის/დამკვეთის მიერ არ განხორციელდება ამ საქონლის ამავე სასაქონლო სუბპოზიციით გათვალისწინებული საქონლის საწარმოებლად გამოყენება, შეძენილ/გადმოცემულ საქონელთან მიმართებით აქციზის გადახდელად განიხილება საქონლის შემძენი/დამკვეთი, რა დროსაც დასაბეგრი ოპერაციის განხორციელების დროდ განიხილება შემძენის/დამკვეთის მიერ საქონლის სხვა საქმიანობაში გამოყენების დაწყების მომენტი.

19. 199-ე მუხლში წარმოდგენილი ცვლილებები გამოწვეულია 194-ე მუხლის ცვლილებით და ითვალისწინებს სიგარეტის იმპორტის გათავისუფლების ლიმიტის შემცირებიდან გამომდინარე აქციზური მარკებით სიგარეტის მარკირებისაგან გათავისუფლების ლიმიტის შესაბამის შემცირებას. ცვლილება ასევე ხორციელდება ამავე მუხლის პირველი ნაწილის „ვ“ ქვეპუნქტში, რომლის შესაბამისად დამატებული ღირებულების გადასახადის და აქციზის ანალოგიურად იმპორტის გადასახადისგან თავისუფლდება საქართველოს სახელმწიფო საზღვრის ფარგლებში სამოქალაქო საავიაციო რეისებისა და საავიაციო სამუშაოების განსახორციელებლად ბორტზე მისაწოდებლად განკუთვნილი საწვავის, საპოხი და სხვა დამხმარე საშუალებების იმპორტი.

20. 214 ¹  მუხლის რედაქციის თანახმად, საერთაშორისო საჰაერო გადაზიდვების განმახორციელებელი პირები ვალდებულნი ხდებიან საგადასახადო ორგანოს წარუდგინონ მათ მიერ საქართველოს საბაჟო ტერიტორიაზე შემოსატანი/საქართველოს საბაჟო ტერიტორიიდან გასატანი სატრანსპორტო საშუალების, ამ სატრანსპორტო საშუალებით გადასაადგილებელი საქონლისა და მგზავრების შესახებ წინასწარი ინფორმაცია, საქართველოს ფინანსთა მინისტრის მიერ განსაზღვრული წესის შესაბამისად. აღნიშნული ცვლილება მიზნად ისახავს ეფექტური საბაჟო კონტროლის განხორციელებას. ინფორმაციის წინასწარ მოწოდება მნიშვნელოვანია, ვინაიდან საშუალებას იძლევა სატრანსპორტო საშუალების საზღვრის გადაკვეთამდე მოხდეს ინფორმაციის დამუშავება-ანალიზი და რისკების წინასწარ განსაზღვრა. რისკის პროფილების გამოყენებით შესაძლებელია მოწოდებული ინფორმაციის ავტომატურ რეჟიმში დამუშავება, რაც თავის მხრივ ამარტივებს და უფრო ეფექტურს ხდის სამუშაო პროცესს. გასათვალისწინებელია, რომ ევროკავშირის ევროპული საბჭოს 2004 წლის 29 აპრილის 2004/82/EC დირექტივის (გადამყვანების ვალდებულება მოახდინონ მგზავრთა მონაცემების კომუნიკაცია) პირველი და მესამე მუხლები ავალდებულებს წევრ სახელმწიფოებს დაავალდებულონ მგზავრთა გადამყვანი კომპანიები, უზრუნველყონ წინასწარი ინფორმაციის მოწოდება შესაბამისი უწყებების მოთხოვნის საფუძველზე.

21. 217-ე მუხლის 2¹ და მე-3 ნაწილების თანახმად, საბაჟო საწყობში საქონლის დროებით შენახვის ვადა 5 კალენდარული წელია, მათ შორის, იმ საქონელზეც, რომელზედაც უკვე განსაზღვრულია სასაქონლო ოპერაცია. ამასთან, საქონლის დროებით შენახვა შესაძლებელია როგორც სასაქონლო ოპერაციის შერჩევამდე, ასევე შერჩეული სასაქონლო ოპერაციის გამოყენების შემდეგ. საგულისხმოა ის გარემოება, რომ სასაქონლო ოპერაციის შერჩევისათვის და, მით უმეტეს, შერჩეული სასაქონლო ოპერაციის შესაბამისად საქონლის განკარგვისათვის 5-წლიანი ვადის საჭიროება არარეალურია. ამასთან, აღნიშნული ვადა რიგ შემთხვევებში საქონლის მფლობელის ან/და გადამზიდავი კომპანიის მიერ გამოიყენება პასუხისმგებლობისაგან თავის არიდების მიზნით. შედეგად კი ვიღებთ შენახვის ადგილზე ფაქტობრივად მიტოვებულ საქონელს (ზოგჯერ ტრანსპორტირების საშუალებებთან ერთად), რომლის განკარგვის უფლებამოსილება არც საბაჟო საწყობს და არც საგადასახადო ორგანოს არ გააჩნია. აღნიშნული პრობლემების გადაწყვეტის მიზნით, 217-ე მუხლის ახალი რედაქციით, მე-3 და მე-4 ნაწილებით, საბაჟო საწყობში საქონლის დროებით შენახვის ვადა (გარდა ექსპორტისა), 5 წლის ნაცვლად, განისაზღვრება 180 დღით. ამავე მუხლის მე-5 ნაწილით კი დგინდება შემოსავლების სამსახურის უფლებამოსილება – გაზარდოს ეს ვადა არა უმეტეს 180 დღით.

22. საქონლის შენახვა დროებით ან საწყობის სასაქონლო ოპერაციის გამოყენებით, რიგ შემთხვევებში გამოიყენება დეკლარირების ვადის გაგრძელების ან/და საგადასახადო პასუხისმგებლობისაგან თავის არიდების მიზნით. საბაჟო საწყობებში ფაქტობრივად მიტოვებული (ზოგჯერ ტრანსპორტირების საშუალებებთან ერთად) და მოუკითხავი საქონლის განკარგვის უფლებამოსილება არც საბაჟო საწყობს და არც საგადასახადო ორგანოს არ გააჩნია, ვიდრე არ ამოიწურება კანონმდებლობით განსაზღვრული საქონლის შენახვის ვადა. აღნიშნული კი, ხშირად, საქონლის გაფუჭების, აგრეთვე საწყობში საქონლის შენახვის ხარჯების დაგროვების წინაპირობაა. პრობლემის გადაწყვეტის მიზნით, 221-ე მუხლის მე-2 ნაწილს ემატება „დ“, „ე“ და „ვ“ ქვეპუნქტები, რომლის თანახმად, საგადასახადო ორგანოს ინიციატივით საქონლის განადგურება ან სახელმწიფო საკუთრებაში გადაცემა განხორციელდება იმ საქონლის მიმართაც, რომელზეც კანონმდებლობით დადგენილ ვადაში არ არის განსაზღვრული სასაქონლო ოპერაცია ან არ არის გამოყენებული ამ მუხლის მე-4 ნაწილით გათვალისწინებული საქონლის განკარგვის ღონისძიება; ან რომელზეც განსაზღვრულია სასაქონლო ოპერაცია და ამოწურულია დროებით შენახვის ვადა, თუ არ დასრულდა სასაქონლო ოპერაცია ან არ არის სხვა სასაქონლო ოპერაცია განსაზღვრული ან არ არის გამოყენებული ამ მუხლის მე-4 ნაწილით გათვალისწინებული საქონლის განკარგვის ღონისძიება; ან რომელზეც ამოწურულია საწყობის სასაქონლო ოპერაციაში შენახვისას საქონლის შენახვის ადგილის მფლობელსა და დეკლარანტს შორის გაფორმებული შენახვის ხელშეკრულების ვადა და არ არის გაფორმებული ახალი ხელშეკრულება ან არაა განსაზღვრული სხვა სასაქონლო ოპერაცია ან არ არის გამოყენებული ამ მუხლის მე-4 ნაწილით გათვალისწინებული საქონლის განკარგვის ღონისძიება“.

23. 231-ე მუხლის მე-2 ნაწილის მოქმედი რედაქციის თანახმად, საწყობის სასაქონლო ოპერაციაში მოქცეული საქონლის შენახვის ვადა არ არის შეზღუდული. შესაბამისად, საქონელი საბაჟო ზედამხედველობის ქვეშ შესაძლებელია ინახებოდეს განუსაზღვრელი ვადის განმავლობაში. მათ შორისაა მალფუჭებადი, ფიზიკურად ან/და მორალურად მოძველებული საქონელიც, რომელიც მესაკუთრის მიერ ფაქტობრივად მიტოვებულია, მაგრამ ვერ ხერხდება ამის დადასტურება და ფორმალური მხარის მოგვარება. გრძელდება ასეთი საქონლის შენახვა საბაჟო კონტროლის ზონაში, მოქმედი კანონმდებლობით კი არც საგადასახადო ორგანოს და არც საბაჟო საწყობს არა აქვს ასეთი საქონლის განკარგვის უფლებამოსილება. შესაბამისად, იცვლება მუხლის მე-2 ნაწილი, რომლის მიხედვითაც საწყობის სასაქონლო ოპერაციაში მოქცეული საქონლის შენახვის ვადა არ უნდა აღემატებოდეს 2 წელს. აღნიშნული ვადა შეიძლება გაგრძელდეს შეუზღუდავი რაოდენობით იმ პირობით, რომ თითოეული გაგრძელებული ვადა არ უნდა აღემატებოდეს 2 წელს.

 231-ე მუხლის მე-4 ნაწილის შესაბამისად საბაჟო საწყობის საქმიანობა ხორციელდება შემოსავლების სამსახურის მიერ გაცემული ნებართვის საფუძველზე. საბაჟო საწყობის საქმიანობის სპეციფიკიდან გამომდინარე „საწყობისა და თავისუფალი ვაჭრობის პუნქტის საქმიანობის ნებართვების გაცემის წესების შესახებ ინსტრუქციის დამტკიცების თაობაზე“ საქართველოს მთავრობის 2015 წლის 14 სექტემბრის №471 დადგენილებით დამტკიცებული ინსტრუქციის მე-3 მუხლის მე-5 პუნქტის მიხედვით აკრძალულია ნებართვის სხვა პირისთვის გადაცემა, მათ შორის ნებართვის მფლობელის საწარმოს სხვა საწარმოსთან შერწყმისას ან სხვა საწარმოსთან (საწარმოებთან) გაერთიანებისას ან ნებართვის მფლობელის საწარმოს გაყოფისას. შესაბამისად, ცვლილება შედის 231-ე მუხლის მე-4 ნაწილში და ზემოაღნიშნული აკრძალვა აისახება საქართველოს საგადასახადო კოდექსში.

24. იზრდება საგადასახადო დავალიანების თანხის ზღვარი 5000 - დან 50 000 ლარამდე, რომლის გადახდის 1 წლის ვადით გადავადებაც შესაძლებელი იქნება უზრუნველყოფის წარდგენის გარეშე;

25. ცვლილება ხორციელდება 270-ე მუხლის მე-7 ნაწილში. დგინდება, რომ 279-ე მე-4 ნაწილით (საერთაშორისო საჰაერო გადაზიდვების განმახორციელებელი პირის მიერ წინასწარი ინფორმაციის დადგენილი წესით წარუდგენლობა), 289-ე მუხლის მე-6 (ფიზიკური პირის მიერ 3 000 ლარამდე ღირებულების საქონელზე წარდგენილ საბაჟო დეკლარაციასა და მის თანმხლებ დოკუმენტაციაში არასწორი მონაცემის არსებობისას იმპორტის/ექსპორტის გადასახდელების ოდენობის შემცირება) და მე-15 ნაწილებით (საგადასახადო ორგანოს თანხმობის გარეშე საქონლის ან/და სატრანსპორტო საშუალების მიერ საბაჟო კონტროლის ზონის დატოვება, საბაჟო ზედამხედველობის ქვეშ მყოფი საქონლის გადატვირთვა ან გადმოტვირთვა) გათვალისწინებული სამართალდარღვევებისათვის ფულადი ჯარიმის ნაცვლად შესაძლებელია გამოყენებულ იქნეს გაფრთხილება.

26. 275-ე მუხლის მე-4 ნაწილში განსახორციელებელი ცვლილება გამოწვეულია სისხლის სამართლის კოდექსის 218-ე მუხლში გადასახადის თავის არიდებისათვის სისხლისსამართლებრივი პასუხისმგებლობისათვის არსებული გადასახადის ოდენობის 50 000 ლარიდან 100 000 ლარამდე გაზრდის გამო.

27. 279-ე მუხლში მე-4 და მე-5 ნაწილების დამატებით განსახორციელებელი ცვლილებით, საქართველოს საგადასახადო კოდექსს ემატება სამართალდარღვევის ახალი სახე საგადასახადო ორგანოსათვის საჰაერო ტრანსპორტით საქართველოს საბაჟო ტერიტორიაზე შემოსატანი/საქართველოს საბაჟო ტერიტორიიდან გასატანი სატრანსპორტო საშუალების ან/და ამ სატრანსპორტო საშუალებით გადასაადგილებელი საქონლისა ან/და მგზავრების შესახებ წინასწარი ინფორმაციის დადგენილი წესით წარუდგენლობა. საერთაშორისო საჰაერო გადაზიდვების განმახორციელებელი პირის მიერ აღნიშნული სამართალდარღვევისათვის პასუხისმგებლობა განისაზღვრება ფულადი ჯარიმით 2 000 ლარის ოდენობით, ხოლო იგივე ქმედების განმეორებით ჩადენისათვის – 4 000 ლარის ოდენობით.

28. საქართველოს საგადასახადო კოდექსის 288¹ მუხლის პირველი ნაწილის მოქმედი რედაქციის შესაბამისად, სპეციალური სავაჭრო კომპანიის მიერ საგადასახადო კოდექსის 24¹ მუხლის მე-4 ნაწილის „დ.გ“ ქვეპუნქტით გათვალისწინებული შემოსავლის დადგენილ ზღვრულ ოდენობაზე (სხვა ნებადართული საქმიანობებიდან მიღებული შემოსავლის გარდა, მიღებული შემოსავალი, რომელიც საქართველოში არსებული წყაროდან საგადასახადო პერიოდის (წლის) მიხედვით არ უნდა აღემატებოდეს 1 მილიონ ლარს და მის მიერ საქართველოში შემოტანილი უცხოური საქონლის საბაჟო ღირებულების 5 პროცენტს) გადამეტება, იწვევს დაჯარიმებას გადამეტებული თანხის 50 პროცენტის ოდენობით. როგორც საგადასახადო შემოწმებებით დარიცხული გადასახადის თანხისა და ჯარიმის ოდენობის შესახებ არსებული სტატისტიკური მონაცემების დამუშავებისა და ანალიზის შედეგად ირკვევა, ჯარიმის თანხა მნიშვნელოვნად აღემატება კომპანიებისათვის დარიცხული გადასახადების ოდენობას. ამასთანავე, გათვალისწინებულ იქნა ის გარემოებაც, რომ ხსენებულ დადგენილ ზღვრულ ოდენობაზე მეტი შემოსავლის მიღების შემთხვევაში, სპეციალურ სავაჭრო კომპანიის სტატუსის მქონე საწარმო კარგავს საგადასახადო შეღავათს და საერთო წესით იბეგრება მოგების გადასახადით. ყოველივე აღნიშნულისა და საგადასახადო სანქციების ოპტიმიზაცია/ლიბერალიზაციის პროცესების გათვალისწინებით, წარმოდგენილი კანონპროექტით მცირდება სპეციალური სავაჭრო კომპანიის მიერ საქმიანობის წესის დარღვევისთვის გათვალისწინებული ჯარიმის ოდენობა და გადამეტებული თანხის 50 პროცენტის ოდენობის ნაცვლად განისაზღვრება 10 პროცენტის ოდენობით“.

29. 286-ე მუხლს ემატება 3¹ და 3² ნაწილები, რაც გამოწვეულია სისხლის სამართლის კოდექსში განსახორციელებელი ცვლილებებით, რომლის მიხედვით დანაშაულად აღარ ჩაითვლება სისხლის სამართლის კოდექსის 200³ მუხლებით გათვალისწინებული ქმედება, რომლის მიხედვითა სისხლის სამართლებრივი პასუხისმგებლობა დგებოდა იმ შემთხვევაში, თუ სასაქონლო ზედნადების გარეშე ტრანსპორტირებული ან მიწოდებული/მისაწოდებელი საქონლის საბაზრო ღირებულება აღემატება 10 000 ლარს. პროექტის მიხედვით ასეთი ქმედება აღარ იქნება სისხლისსამართლებრივად დასჯადი და გამოიწვევს პირის დაჯარიმებას 10 000 ლარის ოდენობით.

30. ახალი რედაქციით ყალიბდება 288³ მუხლი და იყოფა ორ ნაწილად, პირველი ნაწილი - მარკირების გარეშე მიწოდება, ტრანსპორტირება და მე-2 ნაწილი - მარკირების გარეშე იმპორტი. ამასთან, იმპორტის შემთხვევაში ჯარიმად განისაზღვრება არა საბაზრო ღირებულების ოდენობა, არამედ საბაჟო ღირებულების ოდენობა. აღნიშნული განაპირობა იმ გარემოებამ, რომ იმპორტის შემთხვევაში საბაზრო ღირებულების ოდენობით დაჯარიმება რთულდება, ვინაიდან საქონელზე ჯერ არ არის დადგენილი საბაზრო ფასი და ცნობილია მხოლოდ მისი საბაჟო ღირებულება. აღნიშნული იწვევს იმპორტიორების უკმაყოფილებას, საბაზრო ფასის დადგენასთან დაკავშირებული ხარჯების გაზრდის გამო და ამასთანავე, ართულებს ჯარიმის შეფარდებას.ამასთანავე, ხსენებული მუხლის შინაარსიდან ამოღებულ იქნა ექსპორტზე მითითება, ვინაიდან სავალდებულო მარკირებას დაქვემდებარებული არააქციზური საქონელი ექპორტისას არ ექვემდებარება მარკირებას, „გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის №996 ბრძანებით დამტკიცებული ინსტრუქციის 78 ¹  მუხლის მე-6 პუნქტის „გ“ ქვეპუნქტის (სავალდებულო მარკირებისაგან თავისუფლდება ექსპორტისთვის განკუთვნილი ადგილობრივი წარმოების საქონელი) შესაბამისად.

31. 289-ე მუხლს ემატება 19 ¹  ნაწილი. კერძოდ, იმ შემთხვევაში, თუ სასაქონლო ოპერაციის განხორციელებამდე შემოსავლების სამსახურთან შეუთანხმებელი ქმედების განხორციელებ ის ან სასაქონლო ოპერაციის პირობების დარღვევ ისას (რამაც გამოიწვია საბაჟო ზედამხედველობის ქვეშ მყოფი საქონლის ან/და სატრანსპორტო საშუალების უკანონო განკარგვა, დაკარგვა ან განადგურება) შესაძლებელია უკანონოდ განკარგული საქონლის ან მისი მიწოდების დოკუმენტის (დადასტურებული საგადასახადო ანგარიშ-ფაქტურა, სასაქონლო ზედნადები ან სხვა) წარდგენა, ვალდებულ პირს პასუხისმგებლობა დაეკისრება არა მე-19, არამედ 191 მუხლით გათვალისწინებული სამართალდარღვევისათვის და შესაბამისად დაჯარიმდება იმავე/იდენტური/მსგავსი საქონლის ან/და სატრანსპორტო საშუალების იმპორტის გადასახდელების 10 პროცენტის ოდენობით.

32. 290-ე მუხლით გათვალისწინებული სამართალდარღვევისათვის (საბაჟო საწყობის ან თავისუფალი ვაჭრობის პუნქტის საქართველოს კანონმდებლობით დადგენილი სანებართვო პირობის დარღვევა) განსაზღვრული ჯარიმა (4000 ლარი) ნახევრდება 2000 ლარამდე. შესაბამისად, ასევე ნახევრდება ამავე ქმედების განმეორებით ჩადენისათვის განსაზღვრული ჯარიმის ოდენობაც და პირი დაჯარიმდება 12000 ლარის ნაცვლად 6000 ლარით.

33. ახალი რედაქციით ყალიბდება საგადასახადო კოდექსის 292-ე მუხლი, რომლის შესაბამისად საგადასახადო შეთანხმების გაფორმება ასევე შესაძლებელი გახდება გადაუხდელი მოსაკრებლის (რომლის ადმინისტრირებას ახორციელებს საგადასახადო ორგანო) თანხების, მასთან დაკავშირებული ჯარიმებისა და საურავების შემცირების მიზნით. შესაბამისი ცვლილებები ხორციელდება სსკ-ის მე-5, მე-7 და მე-8 ნაწილებში, ასევე მე-100 მუხლის მე-4 ნაწილის „ზ“ ქვეპუნქტში.

34. 293-ე მუხლი: საქართველოს საგადასახადო კოდექსის 293-ე მუხლის მე-8 ნაწილით განსაზღვრულია, რომ საგადასახადო კონტროლის შედეგად დამატებით დარიცხული თანხის (საგადასახადო დავალიანების) შემცირების შესახებ საგადასახადო შეთანხმების გაფორმების შემდეგ დაუშვებელია: ა) მაკონტროლებელი/სამართალდამცავი ორგანოს მიერ შემოწმებული პერიოდის ან საკითხის გადამოწმება ან/და გადასახადის გადამხდელისათვის გადასახადის/სანქციის დარიცხვა;

ბ) გადასახადის გადამხდელის მიერ დავის დაწყება ან განახლება ახლად აღმოჩენილი/ახლად გამოვლენილი გარემოებების ან მტკიცებულებების საფუძვლით.“ თუ რეორგანიზაციის შედეგად ორი პირი ერწყმის ერთმანეთს, ან ერთი უერთდება მეორე საწარმოს და იმ შემთხვევაში, თუ რეორგანიზაციამდე პერიოდში რეორგანიზაციის მხარე ერთ-ერთ პირთან გაფორმებულია საგადასახადო შეთანხმება, რეორგანიზაციის შემდეგ საქართველოს საგადასახადო კოდექსის 293-ე მუხლის მე-8 ნაწილის „ა“ ქვეპუნქტის ჩანაწერი უკრძალავს საგადასახადო ორგანოს შეამოწმოს რეორგანიზაციის მხარე მეორე საწარმო. 293-ე მუხლის მე-8 ნაწილის „ა“ ქვეპუნქტის ცვლილება ხორციელდება .აღნიშნული ხარვეზის აღმოფხვრის მიზნით.

35. 309-ე მუხლი: საქართველოს საგადასახადო კოდექსის 99-ე მუხლის პირველი ნაწილის „ვ“ და „რ“ ქვეპუნქტებით შეღავათი ვრცელდება იმ შემთხვევაში, თუ მიღებული მოგების რეინვესტირება ხორციელდება საგადასახადო წლის დასრულებიდან 3 წლის განმავლობაში. თუ ამ შეღავათით მოსარგებლე პირებთან მიმართებაშიც ხანდაზმულობის ვადად განისაზღვრება სამი წელი, საგადასახადო ორგანო ვერ განხორციელებს შეღავათის გამოყენების მიზანშეწონილობაზე კონტროლს. შესაბამისად, გარდამავალ პერიოდში მიზანშეწონილია, რეინვესტირების შემთხვევაში ხანდაზმულობის ვადა 1 წლით გაიზარდოს.

დგინდება, რომ საგადასახადო დავალიანების ჩამოწერის შემაფერხებელი გარემოება აღარ იქნება არარეზიდენტისათვის და ფიზიკური პირისათვის აუნაზღაურებელი პროცენტების მიხედვით საგადასახადო ორგანოს მიერ გადასახადის გადამხდელისათვის თანხის დარიცხვა;

309-ე მუხლს ემატება 81¹ ნაწილი, რომლითაც ზუსტდება, რომ საგადასახადო შეღავათების გამოყენების მიზნით, პირი უფლებამოსილია მიმართოს მუნიციპალიტეტის აღმასრულებელ ორგანოს ობიექტის შესაბამის ნუსხაში შეყვანის მოთხოვნით, თუ აღნიშნული ობიექტი აკმაყოფილებს ნუსხაში შეყვანისთვის საქართველოს საგადასახადო კოდექსით გათვალისწინებულ მოთხოვნებს.

2 წლით იზრდება დაუსრულებელი მშენებლობებისათვის დაწესებული საგადასახადო შეღავათის გამოყენების ვადა. მშენებლობის დასრულების საბოლოო ვადად განისაზღვრება 2019 წლის 31 დეკემბერი; თუ მშენებარე ობიექტი დააკმაყოფილებს საგადასახადო შეღავათების გავრცელების მიზნით შესაბამის ნუსხაში შეყვანისთვის დადგენილ მოთხოვნებს, მასზე გავრცელდება დღგ-ში დაწესებული საგადასახადო შეღავათები; ზუსტდება, რომ შეღავათი ასევე ეხება იმ სუბიექტებს, რომლებმაც ფიზიკურ პირებზე განახორციელეს მშენებარე საცხოვრებელი ფართის რეალიზაცია და 2019 წლის 31 დეკემბრამდე დაასრულეს სამშენებლო სამუშაოები.

ზუსტდება, რომ 2017 წლის შემდეგ საქონლის მიწოდების/მომსახურების გაწევისათვის გადახდილი ავანსის თანხა დღგ-ით იბეგრება იმ შემთხვევაშიც, როცა ამ მიწოდებისათვის/მომსახურებისათვის თანხის ნაწილი გადახდილია 2017 წლის 1 იანვრამდე.

309-ე მუხლისათვის 103-ე ნაწილის დამატების შედეგად საწარმო, რომელიც დამფუძნებელ საწარმოზე ანაწილებს 2008-2016 წლებში მიღებულ მოგებას, დაიბეგრება მისი განაწილებისას. ამ შემთხვევაში საწარმო ჩაითვლის 2017 წლის 1 იანვრამდე გადახდილ მოგების გადასახადს კანონით გათვალისწინებული ფორმულის მიხედვით და მოგება აღარ დაიბეგრება მისი ყოველი შემდგომი განაწილებისას; ამასთან, აღნიშნული ცვლილების შესაბამისად, 2008-2016 წლებში მიღებული დივიდენდის შემდგომი განაწილება არ ჩაითვლება მოგების განაწილებად და, შესაბამისად შემდგომ დაბეგვრას არ დაექვემდებარება.

კალენდარული წლის დასრულებამდე ფინანსური ინსტიტუტის სტატუსის მოპოვების შემთხვევაში მთელი კალენდარული წლის მიხედვით პირი დაიბეგრება კლასიკური დაბეგვრის რეჟიმის შესაბამისად, წინა კალენდარული თვეების მიხედვით ახალი რეჟიმით დაბეგრილი ოპერაციები დაექვემდებარება გაუქმებას და გადახდილი მოგების გადასახადი სხვა გადასახადებში ჩათვლას/დაბრუნებას მიმდინარე გადასახდელების დარიცხვა არ განხორციელდება.

თავისუფლად მიმოქცევად ფასიან ქაღალდებთან დაკავშირებული საგადასახადო შეღავათების რეალურად ამოქმედების და კაპიტალის ბაზრის ხელშეწყობის მიზნით აუცილებელია კანონქვემდებარე აქტით განიმარტოს აღნიშნული შეღავათის გამოყენების წესები და პირობები. წარმოდგენილი ცვლილებების შესაბამისად საქართველოს ფინანსთა მინისტრს ეძლევა უფლება განსაზღვროს ამ ქვეპუნქტით გათვალისწინებული საგადასახადო შეღავათის გამოყენების წესები და პირობები, რის გამოც 309-ე მუხლს ემატება 107-ე ნაწილი.

წარმოდგენილი პროექტის მე-2 მუხლში ჩნდება გარდამავალი დებულება, რომლის მიხედვითაც საბაჟო საწყობში ან საქონლის შენახვის სხვა ადგილზე შესანახად ამ კანონის ამოქმედებამდე მიბარებულ საქონელზე დროებით შენახვის ახალი ვადების, ასევე საბაჟო ორგანოს მიერ საქონლის განკარგვის ახალი საფუძვლების მოქმედება გავრცელდება 2018 წლის პირველი იანვრიდან.

ბ) კანონპროექტის ფინანსური დასაბუთება.

ბ.ა) კანონპროექტის მიღებასთან დაკავშირებით აუცილებელი ხარჯების დაფინანსების წყარო:

კანონპროექტის მიღება არ გამოიწვევს აუცილებელი ხარჯების გამოყოფას;

ბ.ბ) კანონპროექტის გავლენა ბიუჯეტის საშემოსავლო ნაწილზე:

კანონპროექტი არსებით გავლენას არ ახდენს ბიუჯეტის საშემოსავლო ნაწილზე;

ბ.გ) კანონპროექტის გავლენა ბიუჯეტის ხარჯვის ნაწილზე:

კანონპროექტის მიღება გავლენას არ მოახდენს ბიუჯეტის ხარჯვით ნაწილზე;

ბ.დ) სახელმწიფოს ახალი ფინანსური ვალდებულებები:

კანონპროექტის მიღებით არ წარმოიშობა სახელმწიფოს ახალი ფინანსური ვალდებულება;

ბ.ე) კანონპროექტით მოსალოდნელი ფინანსური შედეგი იმ პირთათვის, რომელთა მიმართ ვრცელდება კანონპროექტის მოქმედება:

კანონპროექტი დადებითად იმოქმედებს იმ პირთა ფინანსურ მდგომარეობაზე, რომელთა მიმართ ვრცელდება მისი მოქმედება;

ბ.ვ) კანონპროექტით დადგენილი გადასახადის, მოსაკრებლის ან სხვა სახის გადასახდელის ოდენობა და ოდენობის განსაზღვრის პრინციპი:

კანონპროექტით არ იცვლება დადგენილი გადასახადის, მოსაკრებლის ან სხვა სახის გადასახდელის ოდენობის განსაზღვრის პრინციპი;

გ) კანონპროექტის მიმართება საერთაშორისო სამართლებრივ სტანდარტებთან:

გ.ა) კანონპროექტის მიმართება ევროკავშირის დირექტივებთან:

კანონპროექტის მიღება არ ეწინააღმდეგება ევროკავშირის დირექტივებს;

გ.ბ) კანონპროექტის მიმართება საერთაშორისო ორგანიზაციებში საქართველოს წევრობასთან დაკავშირებულ ვალდებულებებთან:

 კანონპროექტის მიღება ეწინააღმდეგება საერთაშორისო ორგანიზაციებში საქართველოს წევრობასთან დაკავშირებულ ვალდებულებებს;

გ.გ) კანონპროექტის მიმართება საქართველოს ორმხრივ და მრავალმხრივ ხელშეკრულებებთან:

კანონპროექტის მიღება არ ეწინააღმდეგება საქართველოს ორმხრივ და მრავალმხრივ ხელშეკრულებებს;

დ) კანონპროექტის მომზადების პროცესში მიღებული კონსულტაციები:

დ.ა) სახელმწიფო, არასახელმწიფო ან/და საერთაშორისო ორგანიზაცია/დაწესებულება, ექსპერტები, რომლებმაც მონაწილეობა მიიღეს კანონპროექტის შემუშავებაში, ასეთის არსებობის შემთხვევაში;

ასეთი არ არსებობს;

დ.ბ) კანონპროექტის შემუშავებაში მონაწილე ორგანიზაციის (დაწესებულების) ან/და ექსპერტის შეფასება კანონპროექტის მიმართ, ასეთის არსებობის შემთხვევაში:

ასეთი არ არსებობს;

ე) კანონპროექტის ავტორი:

საქართველოს ფინანსთა სამინისტრო;

ვ) კანონპროექტის ინიციატორი:

საქართველოს მთავრობა.