საქართველოს ადმინისტრაციულ სამართალდარღვევათა კოდექსში დამატებების შესახებ

საქართველოს კანონი

საქართველოს ადმინისტრაციულ სამართალდარღვევათა კოდექსში დამატებების შეტანის შესახებ

საქართველოს პარლამენტი ადგენს:

I. საქართველოს ადმინისტრაციულ სამართალდარღვევათა კოდექსში (საქართველოს სსრ უმაღლესი საბჭოს უწყებები, 1984წ., №12-ის დანართი, მუხ. 421) შეტანილ იქნეს შემდეგი დამატებები:

1. კოდექსს დაემატოს შემდეგი შინაარსის 159-ე, 159¹, 159² და 159³ მუხლები:

     „მუხლი 159. რეკლამის დაკვეთის, წარმოებისა და გავრცელებისათვის დადგენილი წესების დარღვევა

რეკლამის დაკვეთის, წარმოებისა და გავრცელებისათვის დადგენილი წესების დარღვევა, _

გამოიწვევს ფიზიკურ პირთა დაჯარიმებას ორას ორმოცდაათიდან ხუთას ლარამდე, საწარმოების, დაწესებულებებისა და ორგანიზაციების პასუხისმგებელი პირებისა _ ხუთასიდან ათას ხუთას ლარამდე.

იგივე ქმედება, ჩადენილი იმ პირის მიერ, რომელსაც ერთი წლის განმავლობაში ამ ქმედებისათვის შეფარდებული ჰქონდა ადმინისტრაციული სახდელი, _

გამოიწვევს დაჯარიმებას ათასიდან სამი ათას ლარამდე.

    მუხლი 159¹. არასათანადო რეკლამის განთავსება (გავრცელება)

არასათანადო რეკლამის განთავსება (გავრცელება),_

გამოიწვევს ფიზიკურ პირთა დაჯარიმებას განთავსებული (გავრცელებული) რეკლამის სრული ღირებულების ოთხმაგი ოდენობით, იურიდიული პირებისა და დაწესებულებებისა _ განთავსებული (გავრცელებული) რეკლამის სრული ღირებულების შვიდმაგი ოდენობით.

    მუხლი 159². ანტიმონოპოლიური სამსახურის თანამდებობის პირთა მიწერილობის შეუსრულებლობა

ანტიმონოპოლიური კანონმდებლობის, მომხმარებელთა უფლებების დაცვის შესახებ კანონმდებლობისა და რეკლამის შესახებ კანონმდებლობის დარღვევის შეწყვეტის თაობაზე სახელმწიფო ანტიმონოპოლიური სამსახურის მიწერილობის შეუსრულებლობა, _

გამოიწვევს ფიზიკურ პირთა დაჯარიმებას სამასიდან ექვსას ლარამდე, საწარმოების, დაწესებულებებისა და ორგანიზაციების პასუხისმგებელი პირებისა _ ათასიდან სამი ათას ლარამდე.

    მუხლი 159³. სახელმწიფო ანტიმონოპოლიური სამსახურისათვის კანონმდებლობით განსაზღვრული ინფორმაციის მიუწოდებლობა

სახელმწიფო ანტიმონოპოლიური სამსახურისათვის კანონმდებლობით განსაზღვრული ინფორმაციის მიუწოდებლობა, _

გამოიწვევს დაჯარიმებას ხუთასიდან ათას ლარამდე“.

2. 208-ე მუხლს ციფრების „158¹“ შემდეგ დაემატოს ციფრები „159-ე, 159¹, 159², 159³“.

3. 239-ე მუხლის მე-16 ნაწილს ციფრების „158¹“ შემდეგ დაემატოს ციფრები „159-ე, 159¹, 159², 159³“, ხოლო სიტყვების „კონტროლის პალატის ორგანოები“ შემდეგ _ სიტყვები „სახელმწიფო ანტიმონოპოლიური სამსახურის უფლებამოსილი პირები“.

4. 262-ე მუხლის მე-2 ნაწილს ციფრების „158¹“ შემდეგ დაემატოს ციფრები „159-ე, 159¹, 159², 159³“.

II. ეს კანონი ამოქმედდეს გამოქვეყნებიდან მე-15 დღეს.

საქართველოს პრეზიდენტი ედუარდ შევარდნაძე.

თბილისი,

1998 წლის 18 თებერვალი.

№1231_IIს