საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ

    1. კოდექსს დაემატოს შემდეგი შინაარსის 172⁷ მუხლი:

   „მუხლი 172⁷. მხარდამჭერის მიერ თავისი მოვალეობის არაჯეროვნად შესრულება ან შეუსრულებლობა

   1. მხარდამჭერის მიერ სასამართლოს გადაწყვეტილებით განსაზღვრული მოვალეობის არაჯეროვნად შესრულება –

   გამოიწვევს დაჯარიმებას 100-დან 300 ლარამდე ოდენობით.

  2. მხარდამჭერის მიერ საქართველოს სამოქალაქო კოდექსის 1292-ე მუხლით გათვალისწინებული მოვალეობის შეუსრულებლობა −

   გამოიწვევს დაჯარიმებას 100-დან 300 ლარამდე ოდენობით.

   3. მხარდამჭერის მიერ საქართველოს სამოქალაქო კოდექსის 1508¹ მუხლის პირველი ნაწილით გათვალისწინებული მოვალეობის შეუსრულებლობა −

   გამოიწვევს დაჯარიმებას 100-დან 300 ლარამდე ოდენობით.

   4. სტაციონარული ფსიქიატრიული დაწესებულების მიერ საქართველოს სამოქალაქო კოდექსის 1508¹ მუხლის მე-2 ნაწილით გათვალისწინებული მოვალეობის შეუსრულებლობა −

   გამოიწვევს დაჯარიმებას 500 ლარის ოდენობით.“.

   2. 239-ე მუხლის მე-60 ნაწილი ჩამოყალიბდეს შემდეგი რედაქციით:

  „60. ამ კოდექსის 172⁴, 172⁵, 173⁶, 173⁷, 173⁹ და 175¹ მუხლებით გათვალისწინებულ ადმინისტრაციულ სამართალდარღვევათა შესახებ ოქმებს ადგენენ შინაგან საქმეთა ორგანოების და მეურვეობისა და მზრუნველობის ორგანოების საამისოდ უფლებამოსილი პირები, ხოლო ამ კოდექსის 172⁷ და 173¹³ მუხლებით გათვალისწინებულ ადმინისტრაციულ სამართალდარღვევათა შესახებ ოქმებს – მეურვეობისა და მზრუნველობის ორგანოების საამისოდ უფლებამოსილი პირები.“.

   3. 254-ე მუხლი ჩამოყალიბდეს შემდეგი რედაქციით:

  „მუხლი 254. კანონიერი წარმომადგენლები

  ადმინისტრაციულ პასუხისგებაში მიცემული იმ პირისა და დაზარალებულის ინტერესების დაცვის უფლება, რომლებიც არასრულწლოვნები არიან ან რომლებსაც ფიზიკური ან ფსიქიკური ნაკლის გამო თვითონ არ შეუძლიათ ადმინისტრაციულ სამართალდარღვევათა საქმეებზე განახორციელონ თავიანთი უფლებები, აქვთ მათ კანონიერ წარმომადგენლებს (მშობლები, მშვილებლები, მეურვეები, მზრუნველები, მხარდამჭერები).“.

   მუხლი 2. ეს კანონი ამოქმედდეს 2015 წლის 1 აპრილიდან.