დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
კონსოლიდირებული პუბლიკაციები
საქართველოში ოზურგეთის რაიონის სოფელ მერიაში გაზზე მომუშავე 300 მგვ თბოელექტროსადგურის მშენებლობის შესახებ | |
---|---|
დოკუმენტის ნომერი | 121 |
დოკუმენტის მიმღები | საქართველოს პრეზიდენტი. |
მიღების თარიღი | 03/04/2000 |
დოკუმენტის ტიპი | საქართველოს პრეზიდენტის ბრძანებულება |
გამოქვეყნების წყარო, თარიღი | სსმ, 29, 05/04/2000 |
ძალის დაკარგვის თარიღი | 20/08/2003 |
სარეგისტრაციო კოდი | 330.130.000.05.002.001. |
კონსოლიდირებული პუბლიკაციები |
პირველადი სახე (05/04/2000 - 18/08/2003)
საქართველოს პრეზიდენტის
ბრძანებულება №121
2000 წლის 3 აპრილი
ქ. თბილისი
საქართველოში ოზურგეთის რაიონის სოფელ მერიაში გაზზე მომუშავე 300 მგვ თბოელექტროსადგურის მშენებლობის შესახებ
საქართველოს ენერგეტიკულ სისტემაში შექმნილი რთული ვითარების გამოსწორებისათვის, არსებული კრიზისული მდგომარეობის დაძლევისა და ქვეყნის ენერგეტიკული კომპლექსის შემდგომი სტაბილური განვითარებისათვის უდიდესი მნიშვნელობა ენიჭება ქვეყნის ენერგოსისტემის განვითარების გენერალური სქემით გათვა-ლისწინებული ბაზისური თბოელექტროსადგურების მშენებლობის პრო-ექტების რეალიზაციას.
ასეთი პროექტია ოზურგეთის რაიონის სოფელ მერიაში გაზზე მომუშავე 300 მგვ სიმძლავრის თბოელექტროსადგურის მშენებლობა.
ქვეყნის ეკონომიკისა და მისი სტრატეგიული დარგის - ენერგეტიკის განვითარების საკითხის მნიშვნელობიდან გამომდინარე:
1. მიღებულ იქნეს საქართველოს ურბანიზაციისა და მშენებლობის სამინისტროს, გურიაში საქართველოს პრეზიდენტის სახელმწიფო რწმუნებულის კ.გუჯაბიძის წინადადება, შეთანხმებული საქართველოს სათბობ-ენერგეტიკის სამინისტროსთან, ოზურგეთის რაიონში სოფელ მერიაში გაზზე მომუშავე 300 მგვ თბოელექტროსადგურის მშენებლობის შესახებ.
აღინიშნოს, რომ მშენებლობის დაფინანსება ხორციელდება საქართველოს საფინანსო და საბანკო გარანტიების გარეშე.
2. დადგინდეს, რომ თბოელექტროსადგურის მშენებლობის პროექტს ახორციელებენ გერმანიის კომპანია „ACT LTD“-ს წარმომადგენელი საქართველოში „დაგითი“ და მენაშენე კომპანია სააქციო საზოგადოება „ჯიპპკო“.
3. მიღებულ იქნეს ცნობად, რომ მშენებლობის ვადა განსაზღვრულია პროექტის რეალიზაციის დაწყებიდან 15 თვით.
4. პროექტის რეალიზაციის ხელშეწყობის მიზნით:
ა) პროექტი შემუშავდეს ევროპული სტანდარტების მიხედვით (გერმანული ნორმები);
ბ) თბოელექტროსადგურის მშენებლობისათვის ფირმა „დაგითს“ გამოეყოს საკუთრებაში მერიის სამხედრო აეროდრომის მიმდებარე ტერიტორიიდან სახელმწიფო მუნიციპალურ საკუთრებაში არსებული არასასოფლო-სამეურნეო დანიშნულების, საცხოვრებლად უვარგისი მიწის ნაკვეთი 160 ჰა ოდენობით, პირდაპირი მიყიდვის წესით, სიმბოლურ ფასად 200 (ორასი) ათასი აშშ დოლარის ეკვივალენტი ლარობით.
5. საქართველოს გაზის საერთაშორისო კორპორაციამ (ა. გოცირიძე) სხვა დაინტერესებულ სამინისტროებთან და უწყებებთან ერთად აღმოუჩინოს დახმარება მენაშენეს პროექტის განხორციელებისათვის საჭირო ღონისძიებათა შესრულებაში.
6. საქართველოს ურბანიზაციისა და მშენებლობის სამინისტრომ (მ.ჩხენკელი), მოქმედი კანონმდებლობის შესაბამისად მოაწყოს 300 მგვ თბოელექტროსადგურის მშენებლობის პროექტის სახელმწიფო კომპლექსური ექსპერტიზა მისი შეთანხმებისა და მშენებლობის ნებართვის გაცემის მიზნით.
7. საქართველოს სათბობ-ენერგეტიკის სამინისტრომ (დ.მირცხუ-ლავა) მოქმედი კანონმდებლობის შესაბამისად თბოსადგურის მენაშენეს მისცეს ენერგოსისტემაში განთავსების ლიცენზია.
8. საქართველოს იუსტიციის სამინისტრომ (ჯ.ხეცურიანი), ეკონომიკის სამინისტრომ (ვ. პაპავა), ვაჭრობისა და საგარეო-ეკონომიკური ურთიერთობების სამინისტრომ (თ. ბერუჩაშვილი), სათბობ-ენერგეტიკის სამინისტრომ სხვა დაინტერესებულ სამინისტროებთან და უწყებებთან ერთად აღმოუჩინონ დახმარება მენაშენეს ქართველ და უცხოელ პარტნიორებთან ხელშეკრულებების გაფორმებაში.
9. ეთხოვოს საქართველოს ენერგეტიკის მარეგულირებელ ეროვნულ კომისიას (ე. ერისთავი) ოზურგეთის რაიონში თბოელექტროსადგურის მშენებლობასთან დაკავშირებული ინვესტიციების ეფექტიანობის უზრუნველსაყოფად დაადგინოს თბოელექტროსადგურში წარმოებული ელექტროენერგიის გრძელვადიანი ტარიფი.
10. პროექტის, დაბანდებული აქტივების, ფირმის უძრავ-მოძრავი ქონების, ელექტროენერგიის, ტრანსპორტირების უსაფრთხოება უზრუნველყოფილ იქნეს მოქმედი კანონმდებლობით დადგენილი წესით. ხელშეკრულებები მენაშენესა და სახელმწიფოს შესაბამის სამსახურებს შორის გაფორმდეს 300 მგვ-იანი თბოელექტროსადგურის მშენებლობის პროექტის სახელმწიფო ექსპერტიზისა და დამტკიცების შემდეგ.
11. თბოელექტროსადგურის დაპროექტებისა და მშენებლობის წარმართვის კოორდინაცია დაევალოს საქართველოს ურბანიზაციისა და მშენებლობის მინისტრს მ.ჩხენკელს.
12. ბრძანებულების შესრულების კონტროლი განახორციელოს საქართველოს სახელმწიფო მინისტრის მოადგილემ ი. ჩხარტიშვილმა.
ე. შევარდნაძე
დოკუმენტის კომენტარები