დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
„საქართველოს პრეზიდენტის ადმინისტრაციის შესახებ“ საქართველოს პრეზიდენტის 2005 წლის 30 ივნისის №562 ბრძანებულებაში ცვლილებებისა და დამატებების შეტანის თაობაზე“ | |
---|---|
დოკუმენტის ნომერი | 377 |
დოკუმენტის მიმღები | საქართველოს პრეზიდენტი. |
მიღების თარიღი | 03/07/2009 |
დოკუმენტის ტიპი | საქართველოს პრეზიდენტის ბრძანებულება |
გამოქვეყნების წყარო, თარიღი | სსმ, 82, 03/07/2009 |
ძალის დაკარგვის თარიღი | 20/12/2013 |
სარეგისტრაციო კოდი | 010.210.040.08. |
საქართველოს პრეზიდენტის
ბრძანებულება №377
2009 წლის 3 ივლისი
ქ. თბილისი
„საქართველოს პრეზიდენტის ადმინისტრაციის შესახებ“ საქართველოს პრეზიდენტის 2005 წლის 30 ივნისის №562 ბრძანებულებაში ცვლილებებისა და დამატებების შეტანის თაობაზე
1. „ნორმატიული აქტების შესახებ“ საქართველოს კანონის 36-ე მუხლის შესაბამისად, „საქართველოს პრეზიდენტის ადმინისტრაციის შესახებ“ საქართველოს პრეზიდენტის 2005 წლის 30 ივნისის №562 ბრძანებულებით (სსმ III, 2005 წ., №78, მუხ. 831) დამტკიცებულ საქართველოს პრეზიდენტის ადმინისტრაციის დებულებაში შეტანილ იქნეს შემდეგი ცვლილებები და დამატებები:
ა) მე-2 მუხლის „მ“ ქვეპუნქტი ჩამოყალიბდეს შემდეგი რედაქციით:
„მ) ეკონომიკური, სოციალური და სამართლებრივი პოლიტიკის საკითხებზე წინადადებების შემუშავებას; საინვესტიციო გარემოს განვითარების ხელშეწყობის მიზნით შესაბამისი ღონისძიებების განხორციელებას;“;
ბ) მე-5 მუხლის „ლ“ ქვეპუნქტი ჩამოყალიბდეს შემდეგი რედაქციით:
„ლ) საორგანიზაციო სამსახური;“;
გ) ამოღებულ იქნეს მე-5 მუხლის „ჟ“ ქვეპუნქტი;
დ) მე-5 მუხლს დაემატოს შემდეგი რედაქციის „ტ“ და „უ“ ქვეპუნქტები:
„ტ) საგარეო ურთიერთობათა და ინვესტიციების ხელშეწყობის სამსახური;
უ) საზოგადოებასთან ურთიერთობის სამსახური.“;
ე) მე-6 მუხლის მე-11 პუნქტი ჩამოყალიბდეს შემდეგი რედაქციით:
„11. საორგანიზაციო სამსახურის ფუნქციებია:
ა) საქმისწარმოების (მათ შორის, საიდუმლო) ორგანიზაცია;
ბ) ადმინისტრაციის სტრუქტურულ ქვედანაყოფებში საქმისწარმოებისათვის პასუხისმგებელი თანამშრომლების საქმიანობის კოორდინაცია და მეთოდური ხელმძღვანელობა;
გ) საქმისწარმოების ოპტიმიზაციის მიზნით წინადადებებისა და პროექტების მომზადება;
დ) საქართველოს პრეზიდენტის სამართლებრივი აქტების, რეზოლუციებისა და წერილების პროექტების რედაქტირება და ხელმოსაწერად მომზადება;
ე) საქართველოს პრეზიდენტის ბრძანებულებებისა და განკარგულებების რეესტრების წარმოება;
ვ) საჯარო ინფორმაციის ხელმისაწვდომობის უზრუნველყოფა;
ზ) ადმინისტრაციის არქივის წარმოება;
თ) კანონმდებლობით გათვალისწინებულ სხვა უფლებამოსილებათა განხორციელება.“;
ვ) ამოღებულ იქნეს მე-6 მუხლის მე-16 პუნქტი;
ზ) მე-6 მუხლს დაემატოს შემდეგი რედაქციის მე-19 და მე-20 პუნქტები:
„19. საგარეო ურთიერთობათა და ინვესტიციების ხელშეწყობის სამსახურის ფუნქციებია:
ა) საზღვარგარეთის ქვეყნებში მიმდინარე პროცესებისა და საგარეო პოლიტიკის მიმართულებათა შესწავლის საფუძველზე საინფორმაციო-ანალიტიკური მასალების მომზადება და საქართველოს პრეზიდენტისათვის წარდგენა;
ბ) საზღვარგარეთ საქართველოს პრეზიდენტის ოფიციალური ვიზიტისას შესაბამისი სახელმწიფოს საგარეო პოლიტიკის თაობაზე ინფორმაციის მომზადება და ანალიზი;
გ) საქართველოს პრეზიდენტის ინფორმირება ქვეყნის საგარეო მდგომარეობის შესახებ;
დ) საერთაშორისო მოვლენების სისტემატური ანალიზი;
ე) თავისი კომპეტენციის ფარგლებში საქართველოს პრეზიდენტის საერთაშორისო ორგანიზაციებთან და უცხო სახელმწიფოებთან ურთიერთობის კოორდინაცია და ხელშეწყობა;
ვ) ინვესტირების შესაძლებლობების, საინვესტიციო სფეროებისა და პერსპექტივების ანალიზი და სათანადო წინადადებების შემუშავება;
ზ) თავისი კომპეტენციის ფარგლებში საზღვარგარეთის ქვეყნებიდან და საერთაშორისო ორგანიზაციებიდან ინვესტიციების მოსაზიდად სათანადო ღონისძიებების განხორციელება და აღნიშნული საქმიანობის კოორდინაციაში მონაწილეობა;
თ) საინვესტიციო პროგრამების დაფინანსების სფეროში არსებული მდგომარეობის სისტემატური შესწავლა, გაანალიზება და საქართველოს პრეზიდენტის მიერ სათანადო გადაწყვეტილებების მისაღებად წინადადებების მომზადება;
ი) საინვესტიციო გარემოს განვითარების ხელშემწყობი სამართლებრივი ბაზის ჩამოყალიბების მიზნით წინადადებების მომზადება;
კ) საქართველოს პრეზიდენტისა და ადმინისტრაციის უფროსის ცალკეული დავალებების შესრულება.
20. საზოგადოებასთან ურთიერთობის სამსახურის ფუნქციებია:
ა) საქართველოს პრეზიდენტისა და ადმინისტრაციის სახელზე წარმოდგენილი მოქალაქეთა თხოვნების, შუამდგომლობების, განცხადებების მიღება, აღრიცხვა და სისტემატიზაცია, თავისი კომპეტენციის ფარგლებში მათი განხილვა, ანალიზი, მათში დასმულ პრობლემათა განზოგადება და ადმინისტრაციის ხელმძღვანელობისათვის შესაბამისი დასკვნების წარდგენა;
ბ) საქართველოს პრეზიდენტისა და ადმინისტრაციის სახელზე წარმოდგენილ მოქალაქეთა თხოვნებზე, შუამდგომლობებზე, განცხადებებსა და სახელმწიფო ორგანოებიდან მიღებულ შესაბამის პასუხებზე სტატისტიკური და თემატური ანალიზის მომზადება;
გ) საქართველოს პრეზიდენტისა და ადმინისტრაციის სახელზე წარმოდგენილი მოქალაქეთა თხოვნების, შუამდგომლობებისა და განცხადებების განხილვის პროცესის ოპტიმიზაციისა და მათზე დროული რეაგირების მიზნით სახელმწიფო ორგანოების საქმიანობის კოორდინაცია;
დ) საპრეზიდენტო ღონისძიებების ორგანიზებასა და დაგეგმვაში მონაწილეობა და ამ მიზნით სათანადო წინადადებების შემუშავება;
ე) ადმინისტრაციის უფროსის სხვა დავალებების შესრულება.“.
2. ეს ბრძანებულება ამოქმედდეს გამოქვეყნებისთანავე.
მ. სააკაშვილი
დოკუმენტის კომენტარები