სამორინის მოწყობის ნებართვისა და აზარტული კლუბის მოწყობის ნებართვის მფლობელების მიერ საქმიანობის განხორციელებისთვის საჭირო სააღრიცხვო ფორმების დამტკიცების შესახებ

ა)  „სამორინის მოწყობის ნებართვისა და აზარტული კლუბის მოწყობის ნებართვის მფლობელების მიერ საქმიანობის განხორციელებისთვის საჭირო სააღრიცხვო ფორმების წარმოების წესი“ თანდართული რედაქციით;

ბ)  „სალაროს გახსნის/დახურვის აღრიცხვის ფორმა“ (დანართი №1);

გ) „სალაროში სეიფიდან ან სალაროდან სეიფში თანხის/ჟეტონის დამატების/დაბრუნების აღრიცხვის ფორმა“ (დანართი №2);

დ)  „მაგიდის გახსნის/დახურვის აღრიცხვის ფორმა“ (დანართი №3);

ე) „სალაროს დათვლის  აღრიცხვის ფორმა“ (დანართი №4);

ვ) „ჩაის აღრიცხვის ფორმა“ (დანართი №5).

სამორინის მოწყობის ნებართვისა და აზარტული კლუბის მოწყობის ნებართვის მფლობელების მიერ საქმიანობის განხორციელებისთვის საჭირო სააღრიცხვო ფორმების წარმოების წესი

მუხლი 1. ზოგადი დებულებები

1. წინამდებარე წესი ადგენს სამორინის და აზარტული კლუბის მოწყობის ნებართვის მფლობელების მიერ თავიანთი საქმიანობის განხორციელებისათვის საჭირო სააღრიცხვო ფორმების წარმოების წესსა და ფორმებს.

2. სამორინის მოწყობის ნებართვის მფლობელი და აზარტული კლუბის მოწყობის ნებართვის მფლობელი ვალდებულია თავისი საქმიანობა განახორციელოს ამ ბრძანებით დადგენილი წესითა და სააღრიცხვო ფორმების მეშვეობით.

3. ამ ბრძანებით დადგენილი წესების დარღვევა წარმოადგენს სანებართვო პირობების დარღვევას და ითვალისწინებს პასუხისმგებლობას კანონმდებლობით დადგენილი წესით.

მუხლი 2. ტერმინთა განმარტება

ამ წესის მიზნებისათვის მასში გამოყენებულ ტერმინებს აქვთ შემდეგი მნიშვნელობა:

ა) სალარო – სპეციალურად მოწყობილი ადგილი, რომელიც განკუთვნილია ჟეტონების რეალიზაციისა და მოთამაშეებთან (კლიენტებთან) ფულადი ანგარიშსწორების წარმოებისთვის;

ბ) ჟეტონი – სხვადასხვა ფორმის პატარა დისკი, რომელიც თამაშის პროცესში ფულის ნაცვლად გამოიყენება;

გ) დილერი – სამორინეს წარმომადგენელი, რომელიც უძღვება თამაშის პროცესს;

დ) ჩაი – ფული ან/და ჟეტონი, რომელსაც დილერს ან სხვა თანამშრომელს აძლევს მოთამაშე (კლიენტი) დამატებით საჩუქრად ან/და გაწეული მომსახურების სანაცვლოდ;

ე) ნებართვის მფლობელი – სამორინის მოწყობის ნებართვისა და აზარტული კლუბის მოწყობის ნებართვის მფლობელი;

ვ) სააღრიცხვო ფორმები – ამ ბრძანებით დამტკიცებული დანართი №1, დანართი №2, დანართი №3, დანართი №4 და დანართი №5;

ზ) სალაროს სისტემა – ნებართვის მფლობელის მიერ გამოყენებული სისტემა, რომელშიც აღირიცხება ინფორმაცია თითოეული მოთამაშის, მისი საიდენტიფიკაციო მონაცემების, შეძენილი ჟეტონებისა და გაცემული თანხების შესახებ;

თ) დროფი – სათამაშო მაგიდაზე განთავსებული სპეციალური ყუთი, რომელიც გამოიყენება სათამაშო მაგიდაზე ჟეტონის შესაძენად გადახდილი თანხის მოსათავსებლად.

მუხლი 3. ნებართვის მფლობელის ვალდებულებები და უფლებამოსილებები სააღრიცხვო ფორმების წარმოების წესთან დაკავშირებით

1. ნებართვის მფლობელი ვალდებულია:

ა) ჟეტონების ფულზე გადაცვლა განახორციელოს მხოლოდ სალაროს მეშვეობით;

ბ) ამ ბრძანებით დამტკიცებული თითოეული სააღრიცხვო ფორმა აწარმოოს ყოველდღიურად, მის მიერვე დადგენილი სამუშაო გრაფიკის გათვალისწინებით;

გ) ამ ბრძანებით დამტკიცებული თითოეული სააღრიცხვო ფორმა აწარმოოს ელექტრონულად, თანმიმდევრული ნუმერაციით;

დ) უზრუნველყოს სააღრიცხვო ფორმების ელექტრონულად აღრიცხვა ისეთი ფორმით, რომელიც მისი საქმიანობის ხასიათის და მოცულობის პროპორციულია და კანონმდებლობით დადგენილი წესით, დასაბუთებული მოთხოვნის საფუძველზე წარუდგინოს უფლებამოსილ ორგანოებს;

ე) დაამტკიცოს იმ პირთა შეზღუდული წრე, ვინც უფლებამოსილია ჰქონდეს წვდომა ელექტრონულად წარმოებულ სააღრიცხვო ფორმებზე;

ვ) ამ ბრძანებით დამტკიცებული დანართი №4-ით გათვალისწინებული სალაროს დათვლა განახორციელოს მის მიერ განსაზღვრულ დროს, სულ მცირე 36 საათში ერთხელ, ხოლო შევსებული ფორმა, მისი შევსებიდან არაუგვიანეს 24 საათისა ელექტრონულად წარუდგინოს სსიპ – შემოსავლების სამსახურს. ნებართვის მფლობელი უფლებამოსილია, ამ ბრძანებით დამტკიცებულ დანართი №4-ში არსებული ინფორმაცია დააზუსტოს საქართველოს საგადასახადო კოდექსით დადგენილი ხანდაზმულობის ვადის გათვალისწინებით;

ზ) დანართი №4-ით გათვალისწინებული სალაროს დათვლის დრო წინასწარ აცნობოს სსიპ – შემოსავლების სამსახურს;

თ) სსიპ – შემოსავლების სამსახურს წარუდგინოს ინფორმაცია მის საკუთრებაში/სარგებლობაში არსებული ჟეტონების რაოდენობის და მათი ნომინალური ღირებულების შესახებ და მათი რაოდენობის ცვლილების შემთხვევაში დამატებით აცნობოს ამის შესახებ არაუგვიანეს 2 სამუშაო დღისა;

ი) ამ ბრძანების დანართებით გათვალისწინებულ სააღრიცხვო ფორმებში ჟეტონის ნომინალის გრაფაში მიუთითოს ჟეტონზე დატანილი რიცხვი, ხოლო თანხის გრაფაში – ლარის ოდენობა ან მისი ეკვივალენტის ოდენობა იმ დღის არსებული შიდა კურსით ეროვნულ ვალუტაში;

კ) სალაროში და მაგიდაზე რეალიზებული ჟეტონებისა და გაცემული თანხების შესახებ ინფორმაცია ასახოს სალაროს სისტემაში.

2. ნებართვის მფლობელი უფლებამოსილია, მოთამაშის მიერ ჟეტონების შეძენა შესაძლებელი გახადოს/დაუშვას როგორც სალაროში, ასევე სათამაშო მაგიდაზე; სათამაშო მაგიდაზე ჟეტონის შეძენისას ნებართვის მფლობელი ასევე ვალდებულია განახორციელოს მოთამაშის იდენტიფიკაცია/ვერიფიკაცია და რეალიზებული ჟეტონების სალაროს სისტემაში ასახვა. 

დანართი №1

დანართი №2

დანართი №3

დანართი №4

დანართი №5